CHANRU XKANABʼANKIL LI XIKʼ ILOK
2 | Mat-eeqajunk
Li Santil Hu naxye:
«Maaʼani chereeqajun wiʼ li raaxiikʼ rikʼin raaxiikʼ […]. Wi naru xbʼaanunkil, chexwanq saʼ usilal rikʼinebʼ chixjunil, joʼchʼinal joʼnimal naxkʼe ribʼ cheru. Ex was wiitzʼin raarookex inbʼaan, mexʼeeqajunk […], xbʼaan naq tzʼiibʼanbʼil saʼ li Santil Hu: “We li eeqajunk; laaʼin tinqʼajkamunq, chan li Qaawaʼ”» (ROMANOS 12:17-19).
Kʼaru naraj xyeebʼal?
Ak re naq nokoojosqʼoʼk naq nekeʼxbʼaanu maaʼusilal qe, abʼan li Yos inkʼaʼ naraj naq tooʼeeqajunq. Naraj bʼan, naq tqakanabʼ saʼ ruqʼ, xbʼaan naq chi seebʼ trisi li xikʼ ilok (Salmo 37:7, 10).
Li tatruuq xbʼaanunkil:
Wi tat-eeqajunq yal nanumtaak li xikʼ ilok saʼ laachʼool. Joʼkan naq, wi xeʼxbʼaanu maaʼusilal aawe, maakʼe chik reqaj. Yaal aaqʼe chi xkuybʼal aawibʼ. Chatwanq saʼ xyaalal ut maakʼe saʼ laachʼool li xeʼxbʼaanu aawe (Proverbios 19:11). Wank sut, li jwal us aʼan jitok. Jun eetalil, wi saʼ jun kutan xeʼxbʼaanu junaq rahilal aawe, us naq tatjitoq chiru chaqʼrabʼ re xtuqubʼankil ru.
Maakʼaʼ aj e li eeqajunk, yal naqarahobʼtesi qibʼ
Ut wi nakaakʼoxla naq inkʼaʼ nakatruuk xtuqubʼankil ru li chʼaʼajkilal? Malaj xaabʼaanu chixjunil li wank saʼ aawuqʼ re xtuqubʼankil ru? Usta joʼkan, mat-eeqajunk, xbʼaan naq aʼan naru naxnimobʼresi li chʼaʼajkilal. Kanabʼ li xikʼ ilok. Tzol xkʼojobʼankil aachʼool rikʼin li Yos naq aʼan ttuqubʼanq re li chʼaʼajkilal. Joʼ naxye Salmo 37:3-5: «Kʼojkʼooq aachʼool rikʼin, ut Aʼan taatenqʼanq aawe».