Xqataw qanaʼlebʼ ut sa qachʼool naq nokookʼanjelak chiru li Jehobʼa

Chiru li xkabʼ nimla yalok u, linnaʼ ut linyuwaʼ xeʼelk Estonia ut xeʼqʼaxonk Alemania bʼarwiʼ xinyoʼlaak. Moqon chik xeʼxkawresi ribʼ re qʼaxonk Canadá. Li qochoch nachʼ wank chixkʼatq Ottawa. Wanko saʼ jun li naʼajej bʼarwiʼ wankebʼ ajwiʼ li kaxlan. Qʼaxal nebʼaʼo chaq, abʼan wankebʼ li xmol kaxlan li naqatzeka chaq.

Saʼ jun kutan, ebʼ laj testiiw re li Jehobʼa xeʼxyaabʼasi re linnaʼ Apocalipsis 21:3, 4. Qʼaxal kiwulak saʼ xchʼool ut kiʼok chi yaabʼak. Saʼ xkʼabʼaʼ li yaal aʼin, linnaʼ ut linyuwaʼ xeʼok chi kʼiik saʼ li xpaabʼal ut saʼ junpaat xeʼkubʼeek xhaʼ.

Usta linnaʼ ut linyuwaʼ inkʼaʼ mas nekeʼxnaw aatinak saʼ inglés xeʼxbʼaanu chixjunil li wank saʼ ruqʼ re xyuʼaminkil li nekeʼxtzol. Usta linyuwaʼ nakʼanjelak chixjunil li qʼoqyink bʼarwiʼ nekeʼxyiibʼ li níquel aran Sudbury (Ontario), rajlal xamaan nokooxkʼam rochbʼeen li wiitzʼin xSylvia, saʼ li puktesink. Rajlal ajwiʼ naqatzol li hu Laj Kʼaakʼalehom joʼ junkabʼal. Linnaʼ ut linyuwaʼ xeʼxbʼaanu naq qʼaxal tinra li Yos ut aʼin kixbʼaanu naq saʼ 1956, xinsubʼ wibʼ saʼ haʼ naq wank chaq lajeebʼ chihabʼ we. Li xnimal li xrahom linnaʼ ut linyuwaʼ chirix li Jehobʼa, qʼaxal nikinxtenqʼa saʼ linyuʼam.

Naq xinkʼul wibʼ saʼ li tzolebʼaal, xkehoʼk bʼayaq inpaabʼal. Ninkʼoxla chaq naq wi tinʼoq joʼ aj kʼamolbʼe saʼ li puktesink maajunwa tintaw intumin re xik saʼ junaq avión ut xnawbʼal naabʼal li tenamit joʼ ninkʼoxla chaq junxil. Xinʼok chi kʼanjelak saʼ jun li raay re xkʼebʼal li son ut jwal nawulak chaq chiwu. Abʼan, saʼ xkʼabʼaʼ naq ninkʼanjelak toj najt qʼoqyink, rajlal inkʼaʼ ninxik saʼ chʼutam ut xinʼok xnumsinkil naabʼal hoonal rikʼinebʼ li kristiʼaan li inkʼaʼ nekeʼxra li Yos. Abʼan li xintzol saʼ li Santil Hu kixbʼaanu naq tinjal linyuʼam.

Xinqʼaxonk Oshawa, saʼ Ontario. Aran xinnaw ru laj Ray Norman, li ranabʼ xLesli ut jalan chik aj kʼamolbʼe saʼ li puktesink. Xeʼxkʼe xchʼool chiwix. Naq xinkʼe reetal naq qʼaxal sahebʼ saʼ xchʼool saʼ li xkʼanjel, xinʼok wiʼ chik xkʼoxlankil li twaj xbʼaanunkil saʼ linyuʼam. Xineʼxtenqʼa re naq tinʼoq joʼ aj kʼamolbʼe saʼ li puktesink. Saʼ septiembre re 1966 joʼkan xinbʼaanu. Qʼaxal sa chaq saʼ inchʼool ut us yookin chi elk. Abʼanan inkʼaʼ ninkʼoxla naq twanq junjunq li naʼlebʼ li tixjal chi junajwa linyuʼam.

WI LI JEHOBʼA NAXYE NAQ TATRUUQ XBʼAANUNKIL JUN LI KʼANJEL YAL XBʼAANUNKIL

Naq toj yookin chaq chi tzolok saʼ li tzolebʼaal xinnujtesi jun li hu re xik saʼ Betel saʼ Toronto (Canadá). Ut moqon chik naq ak yookin chi kʼanjelak joʼ aj kʼamolbʼe saʼ li puktesink, xineʼxbʼoq re xik saʼ Betel chiru kaahibʼ chihabʼ. Abʼan nachalk inxiw xkʼoxlankil naq wiʼ tinkʼulubʼa xik saʼ Betel maare inkʼaʼ chik twil ru xLesli xbʼaan naq nawulak chaq chiwu. Abʼan naq ak xintijok chiru li Jehobʼa xinkʼulubʼa xik saʼ Betel. Ut chi ra saʼ inchʼool xinchaqʼrabʼi xLesli.

Saʼ Betel xinkʼanjelak joʼ aj puchʼunel, moqon chik joʼ aj tzʼiibʼ. Abʼan li xLesli xeʼxxaqabʼ joʼ aj kʼamolbʼe saʼ li puktesink li naxkʼe chixjunil xhoonal saʼ Gatineau (Quebec). Wank sut ninkʼoxla kʼaru yook xbʼaanunkil ut ninkʼoxla ma us li xinsikʼ saʼ linyuʼam. Tojaʼ naq xinkʼul jun li nimla osobʼtesihom: xexbʼoq saʼ Betel laj Ray, li ras li xLesli ut xeʼxkanabʼ joʼ wochbʼeen. Chi joʼkan xinʼok wiʼ chik raatinankil li xLesli. Naq xraqeʼk linkʼanjel saʼ Betel xoosumlaak saʼ 27 re febrero 1971.

Xootaqlaak saʼ Quebec bʼarwiʼ li chʼuut naʼaatinak saʼ francés. Wiibʼ oxibʼ chihabʼ chirix aʼin, chi maakʼaʼ saʼ linchʼool xineʼxxaqabʼ joʼ «li cheekel winq li naʼulaʼanink chʼuut». Wank chaq 28 chihabʼ we, xwekʼa naq toj saajin ut maakʼaʼ chaq innawom. Abʼan xwaklesi inchʼool li naxye saʼ Jeremías 1:7, 8. Naxkʼe inkʼaʼuxl chanru tqabʼaanu li kʼanjel, xbʼaan naq li xLesli nachʼaʼajkoʼk chaq chiru wark saʼ xkʼabʼaʼ naq naabʼal sut kixkʼul li rahilal saʼ li bʼelebʼaal chʼiichʼ. Abʼan, xLesli kixye we: «Wi li Jehobʼa nokooxbʼoq chi xbʼaanunkil jun li kʼanjel, ma inkʼaʼ raj us naq tqayal xbʼaanunkil?». Xqakʼulubʼa li kʼanjel ut xooʼulaʼanink chʼuut chiru wuqlaju chihabʼ.

Qʼaxal laatzʼ chaq qu saʼ li ulaʼanink chʼuut ut saʼ xkʼabʼaʼ aʼin wank sut inkʼaʼ naqanumsi hoonal wochbʼeen li xLesli. Joʼkan naq xintzol jun chik chaabʼil naʼlebʼ. Saʼ jun kutan eqʼla, xeʼxtochʼ li okebʼaal. Naq xinte maaʼani wank aran, kaʼajwiʼ jun chakach li tzekemq ut jun li mantel, wank li saaʼus, li queso, li pan ut jun bʼootey li bʼiin, wank li sekʼ ut jun li hu li naxye: «Kʼam laawixaqil chi bʼeek». Qʼaxal chʼinaʼus li kutan. Abʼan tento tinkawresi wiibʼ oxibʼ li seeraqʼ, joʼkan naq xinye re li xLesli naq inkʼaʼ tinruuq chi xik, xrahoʼk xchʼool, abʼan xtaw ru. Naq xinʼok xkawresinkil inseeraqʼ inkʼaʼ tuqtu ru linkʼaʼuxl. Xinjultika li naxye Efesios 5:25, 28. Ma yook xjultikankil li Jehobʼa re naq tento tinkʼe saʼ ajl li narekʼa li wixaqil? Xinbʼaanu jun li tij ut moqon xinye re li xLesli: «Yoʼo». Jwal kisahoʼk saʼ xchʼool. Xookoho saʼ kaar ut xqasikʼ jun li naʼaj li nachʼ chixkʼatq nimaʼ, xqahel li qamantel… ut aʼan jun li kutan li qʼaxal chaabʼil xqanumsi saʼ kabʼichal. Toj kiwank ajwiʼ inhoonal re xkawresinkil inseeraqʼ!

Naabʼal li chʼuut xqulaʼani, natiklaak Columbia Británica toj Terranova, sa chaq saʼ qachʼool xbʼaanunkil aʼin. Li xwaj xbʼaanunkil chalen saʼ linkachʼinal yook chi tzʼaqlok ru! Wank sut xinkʼoxla xik chi Tzolok saʼ Galaad, abʼan moko wank ta raj sa inchʼool kʼanjelak joʼ li taqlanbʼilebʼ saʼ jalan chik tenamit. Ninkʼoxla chaq naq moko kawresinbʼilin ta. Naxkʼe ajwiʼ inkʼaʼuxl naq tineʼxtaqla saʼ África saʼ jun li naʼajej bʼarwiʼ naabʼal li yajel ut li yalok. Qʼaxal sa chaq inchʼool bʼarwiʼ wankin.

MAAKʼAʼ SAʼ QACHʼOOL NAQ XOOʼEʼXTAQLA CHI KʼANJELAK CHIXKʼATQ LI PALAW BÁLTICO

Saʼ 1992 ebʼ laj testiiw re li Jehobʼa xeʼruuk chi puktesink saʼ wiibʼ oxibʼ li tenamit bʼarwiʼ kiwank li Unión Soviética. Joʼkan naq xeʼxpatzʼ qe ma tqaj xik chi puktesink joʼ li taqlanbʼil saʼ jalan chik tenamit saʼ Estonia. Xootijok chiru li Jehobʼa xbʼaan naq maakʼaʼ saʼ qachʼool naq xeʼxye qe aʼin. Joʼkan naq xqakʼoxla: «Wi li Jehobʼa yook xyeebʼal qe aʼin, ma inkʼaʼ raj us naq tqayal xbʼaanunkil aʼin?». Xqakʼulubʼa xik, joʼkan naq xinkʼoxla: «Us naq inkʼaʼ xooʼeʼxtaqla África».

Saʼ junpaat xooʼok chi xtzolbʼal li aatinobʼaal estonio. Wiibʼ oxibʼ po chirix aʼin xooʼeʼxtaqla chi ulaʼanink chʼuut. Xqulaʼani 46 chi chʼuut ut wiibʼ oxibʼ li kokʼ chʼuut saʼ Estonia, Latvia, Lituania ut saʼ Kaliningrado (Rusia). Joʼkan naq xqatzol bʼayaq li aatinobʼaal letón, lituano ut ruso. Qʼaxal xchʼaʼajkoʼk chiqu. Abʼanan, ebʼ li hermaan sahebʼ saʼ xchʼool naq naqayal qaqʼe xbʼaanunkil ut qʼaxal xooxtenqʼa. Saʼ 1999 kiʼok chi kʼanjelak li molam saʼ Estonia ut xineʼxxaqabʼ joʼ jun rehebʼ li naril li qakʼanjel wochbʼeenebʼ laj Toomas Edur, laj Lembit Reile ut laj Tommi Kauko.

Xqanaw ru naabʼalebʼ laj Testiiw li xeʼtaqlaak chi preexil Siberia. Usta ra nekeʼxkʼul saʼ tzʼalam ut najt wankebʼ rikʼin li xjunkabʼal, maajunwa xeʼchʼinaak xchʼool. Junelik sahebʼ saʼ xchʼool saʼ li puktesink. Aʼin naxkʼut chiqu naq naru ajwiʼ naq sahaq saʼ qachʼool usta tqakʼul li chʼaʼajkilal.

Kaw xookʼanjelak chiru naabʼal chihabʼ ut inkʼaʼ naqasikʼ qahoonal re hilank, joʼkan naq li xLesli inkʼaʼ chik sa narekʼa ribʼ. Inkʼaʼ xqakʼe reetal naq li xLesli wank jun xyajel, fibromialgia xkʼabʼaʼ. Joʼkan naq xqakʼoxla naq toosutqʼiiq Canadá. Naq xooʼeʼxbʼoq saʼ jun li tzolok aran Patterson (Nueva York saʼ Estados Unidos), xinkʼoxla naq inkʼaʼ tooruuq chi xik. Xootijok chiru li Jehobʼa ut xqakʼulubʼa xik. Li Jehobʼa kirosobʼtesi li xqasikʼ xbʼaanunkil. Saʼ ajwiʼ li hoonal naq yooko chi tzolok, li xLesli kixkʼul li bʼaneʼk li kiʼajmank re naq tkʼiraaq. Chi joʼkan xooruuk chi sutqʼiik saʼ li qakʼanjel.

JUN CHIK LI INKʼAʼ NAQOYBʼENI: LI KʼANJEL JUNPAKʼAL LI PALAW

Saʼ jun li qʼoqyink saʼ li 2008, naq ak xoosutqʼiik wiʼ chik Estonia, xinxbʼoq li qanimla molam re xpatzʼbʼal we ma tqakʼulubʼa xik saʼ República Democrática del Congo. Sachso inchʼool xinkanaak xbʼaan naq xeʼxye we naq saʼ li jun chik kutan tento tinsume, ma tqakʼulubʼa malaj inkʼaʼ. Maakʼaʼ xinye re li xLesli re naq sa twarq. Abʼanan xinye re li Jehobʼa li naxkʼe inkʼaʼuxl re xik África.

Saʼ li jun chik kutan xinye re li xLesli ut xqaye: «Li Jehobʼa yook qabʼoqbʼal África. Chankiru tqanaw ma tooruuq xbʼaanunkil ut xyalbʼal xsahil wiʼ toj maajiʼ naqayal xbʼaanunkil li kʼanjel aʼin?». Naq 16 chihabʼ qawanjik Estonia, xookoho Kinsasa, saʼ República Democrática del Congo. Li xmolam li Jehobʼa wank jun xchʼinaʼusil naʼaj bʼarwiʼ kʼajoʼ li tuqtuukilal wank. Li xbʼeenwa kixbʼaanu li xLesli naq xoowulak saʼ li qanaʼaj aʼan xletzbʼal jun li hu li kixkʼam chaq naq xooʼelk Canadá. Naxye: «Chaayal xsahil laakʼanjel yalaq bʼar wanqat». Naq ak xqanaw ruhebʼ li hermaan xqil chankiru nekeʼxkʼe li tzolok chirix li Santil Hu, xqayal xsahil li kʼanjel saʼ li puktesink ut xqakʼe reetal naq tooruuq xyalbʼal xsahil li kʼanjel aʼin. Saʼ xnumik li kutan xqayal xsahil rulaʼaninkil li xmolam li Jehobʼa saʼ 13 chi teep re li tenamit África. Aʼin kixbʼaanu naq tooruuq xyalbʼal xsahil li junjunq chi tenamit ut xnawbʼal jalan jalanq chi poyanam. Joʼkan naq linxiw li kiwank saʼ xtiklajik kisach ut xqabʼanyoxi re li Jehobʼa naq xooxtaqla África.

Saʼ Congo-Kinsasa xqayal jalan jalanq chi tzekemq. Saʼ xyanqebʼ aʼan wank li maajunwa xinkʼoxla naq twulaq chiwu joʼebʼ li kokʼ xul. Abʼanan, naq xqakʼe reetal naq jwal nawulak chiruhebʼ li qechpaabʼanel xqayal xsahil ut xwulak chiqu.

Xooruuk xtenqʼankilebʼ li hermaan rikʼin li naʼajmank chiruhebʼ ut saʼ li xpaabʼal li wankebʼ junpakʼal tenamit bʼarwiʼ ebʼ laj puubʼ malaj gueriiy nekeʼxrahobʼtesi li kristiʼaan, li ixq ut li kokʼal. Li xkʼihalil li qechpaabʼanel nebʼaʼebʼ. Abʼanan li roybʼenihom chirix li wakliik wiʼ chik chi yoʼyo, li xrahom chirix li Jehobʼa ut li xtiikilal li xchʼool chiru li xmolam li Jehobʼa, kʼajoʼ kixwaklesi inchʼool. Li xeʼxbʼaanu xooxtenqʼa naq tqakʼoxla chiʼus li xkawilal li qapaabʼal ut chankiru xkawresinkil. Wankebʼ li hermaan xeʼsach li rochochebʼ ut ebʼ li rawimq. Aʼin kixjultika chiwu naq saʼ junpaat nasach li kʼaʼaq re ru, li wank xwankil aʼan li qamiiwil chiru li Jehobʼa. Usta naabʼal li chʼaʼajkilal nekeʼxkʼul ebʼ li qechpaabʼanel inkʼaʼ nekeʼchʼinaak xchʼool, li xnaʼlebʼ xooxtenqʼa re naq tooruuq xqʼaxbʼal ru li chʼaʼajkilal ut ebʼ li yajel li naqanumsi.

ASIA, JUN AKʼ KʼANJEL

Chi maakʼaʼ saʼ qachʼool xqakʼul jun akʼ kʼanjel. Xeʼxpatzʼ qe naq tooqʼaxonq saʼ li xmolam li Jehobʼa re Hong Kong. Maajunwa xqakʼoxla naq toowanq Asia. Saʼ xkʼabʼaʼ naq li Jehobʼa xooxtenqʼa saʼ li kʼanjel li xqakʼul rubʼelaj, inkʼaʼ xwiibʼank qachʼool. Saʼ li chihabʼ 2013, xqachaqʼrabʼihebʼ li qamiiw ut li xchʼinaʼusal África, xookoho Asia chi maakʼaʼ saʼ qachʼool kʼaru tqakʼul aran.

Jwal kichʼaʼajkoʼk chiqu qʼaxonk saʼ Hong Kong, xbʼaan naq aʼan jun nimla tenamit bʼarwiʼ wankebʼ naabʼal li kristiʼaan li chalenaqebʼ saʼ chixjunil li ruuchichʼochʼ ut jwal kichʼaʼajkoʼk chiqu ajwiʼ xtzolbʼal li aatinobʼaal chino cantonés. Abʼan ebʼ li hermaan chi sa saʼ xchʼool xooʼeʼxkʼul ut kiwulak chiqu li xtzekemq. Li kʼanjel yook chi kʼiik, joʼkan naq li Nekeʼjolomink re Xmolam li Jehobʼa keʼril naq naʼajmank xkomon li chʼochʼ, abʼan jwal terto xtzʼaq ebʼ li chʼochʼ, joʼkan naq xeʼxkʼoxla chi chaabʼil naq aajel ru xjalbʼal li naʼaj bʼarwiʼ nabʼaanumank li kʼanjel, kixkʼayi li xkʼihalil li ochoch li naʼoksimank joʼ li xmolam li Jehobʼa ut kixnumsi li kʼanjel saʼ jalan chik naʼajej. Saʼ 2015, xooqʼaxonk Corea del Sur, bʼarwiʼ wanko anaqwan. Nachʼaʼajkoʼk bʼayaq chiqu xtzolbʼal li aatinobʼaal. Usta moko chaabʼil ta naʼelk chiqu, ebʼ li hermaan kʼajoʼ nekeʼxwaklesi qachʼool naq nekeʼxye qe naq yooko xtzolbʼal li aatinobʼaal.

XQATZOL QANAʼLEBʼ

Nachʼaʼajkoʼk chiqu xsikʼbʼalebʼ li qamiiw. Xqakʼe reetal naq wi naqabʼoqebʼ li junchʼol re naq tooʼeʼrulaʼani moko naabʼal ta hoonal tixkʼam re naq teʼwanq choʼq qamiiw. Xqakʼe reetal naq ebʼ li hermaan juntaqʼeetebʼ xchʼool ut li Jehobʼa xooxyobʼtesi re naq tqate qachʼool re naq ebʼ li junchʼol naru teʼwanq choʼq qamiiw (2 Cor. 6:11).

Xqatzol ajwiʼ naq inkʼaʼ toosikʼoq u joʼ naq li Jehobʼa inkʼaʼ nasikʼok u ut tento tqil naq li Jehobʼa nokooxra ut nokooxbʼeresi saʼ li qayuʼam. Naq nachʼinaak qachʼool malaj naqapatzʼ qe ma nokooʼeʼxra ebʼ li qahermaan, naqajultika li naxye li hu ut li esilhu li xeʼxkʼe qe ebʼ li qamiiw re xwaklesinkil li qachʼool. Xqil naq li Jehobʼa relik chi yaal naxsume li qatij, naxkʼe xkawilal li qachʼool ut li metzʼew li naʼajmank chiqu.

Saʼ xnumik li chihabʼ, xqakʼe reetal naq aajel ru risinkil qahoonal saʼ wiibʼal usta qʼaxal laatzʼ qu. Joʼkan ajwiʼ xqakʼe reetal naq us naq tatseʼeq naq yooqat xtzolbʼal junaq akʼ aatinobʼaal. Ut rajlal qʼoqyink naqakʼoxla junaq li naʼlebʼ li jwal nawulak chiqu ut naqabʼanyoxi re li Jehobʼa xbʼaan li naʼlebʼ aʼin.

Li xyaalalil naq maajunwa xinkʼoxla naq tinruuq chi xik saʼ jalan chik tenamit. Abʼan rikʼin xtenqʼ li Jehobʼa chixjunil naruhank xbʼaanunkil ut aʼin naxkʼe naabʼal xsahil inchʼool. Ninkʼoxlak joʼ laj Jeremías naq kixye: «At Qaawaʼ [...] xinaaqʼunbʼesi» (Jer. 20:7). Joʼkan tzʼaqal numtajenaq li osobʼtesihom kixkʼe li Jehobʼa li maajunwa xqakʼoxla. Kixbʼaanu ajwiʼ naq tinruuq chi xik saʼ avión! Ut xqulaʼani naabʼal li naʼajej li maajunwa xinkʼoxla chaq saʼ inkachʼinal. Xqulaʼani xmolam li Jehobʼa saʼ oobʼ xninqal ru tenamit. Ut qʼaxal ninbʼanyoxi re li xLesli, xbʼaan naq aʼan junelik nikinxtenqʼa chi anchal xchʼool saʼ chixjunil li kʼanjel bʼarwiʼ nokooxtaqla li Jehobʼa.

Junelik naqajultika, ani aj e naqabʼaanu aʼin ut kʼaʼut. Chixjunil li osobʼtesihom li naqayal xsahil anaqwan, kaʼajwiʼ jun chʼina eetalil chirix li osobʼtesihom li tqakʼul naq twanq qayuʼam chi junelik ut naq li Jehobʼa trosobʼtesi chixjunil li xyobʼtesihom (Sal. 145:16).