Li chʼaʼajkilal li nekeʼxnumsi li xeʼelelik chaq saʼ li xtenamit: chi miyon ebʼ li kristiʼaan xeʼxkanabʼ Ucrania

Saʼ li 24 re febrero 2022 li tenamit Rusia kiʼok chi pleetik rikʼin li tenamit Ucrania. Aʼin kixkʼam chaq naabʼal li rahilal saʼ xbʼeenebʼ li poyanam ut naabʼalebʼ chik xeʼelelik saʼ li xtenamit.a

«Naq yookebʼ chi tʼaneʼk li bʼombʼa ut yookebʼ chi moq li kʼaʼaq re ru kʼajoʼ chaq linxiw ut inkʼaʼ ninruuk xyeebʼal rikʼin aatin li xwekʼa. Naq xqil naq yookebʼ chi kʼameʼk saʼ tren ebʼ li poyanam xqakʼubʼ naq tooxik. Kaʼajwiʼ xooruuk xkʼambʼal jun li chʼina mochiil bʼarwiʼ xqakʼam li naʼajmank chiqu. Xqakʼam li qahu, li bʼan, li haʼ ut bʼayaq qatzekemq. Naq yook chi tʼaneʼk li bʼombʼa xqakanabʼ chixjunil ut xkoho bʼarwiʼ wank li tren» (Li xNatalia, de Járkov, Ucrania).

«Maakʼaʼ saʼ qachʼool naq kitiklaak li yalok. Xwabʼi naq yalaq bʼar yook chi moq ebʼ li kʼaʼaq re ru ut xbʼaan aʼin yookebʼ chi ekʼank ebʼ li bʼentaan. Joʼkan naq xinkʼubʼ naq tinʼeleliq ut tinkʼam kaʼajwiʼ li aajel ru. Xinʼelk waqxaqibʼ hoor re li eqʼla ut xinchap jun li tren li tinxkʼam saʼ li teep Lviv moqon xinchap jun li bʼelebʼaal chʼiichʼ li tinxkʼam Polonia» (Li xNadia, de Járkov).

Saʼ li tzolom aʼin tqil ebʼ li naʼlebʼ aʼin:

• Kʼaru xyaalal li chʼaʼajkilal li yookebʼ xnumsinkil li xeʼelelik chaq saʼ li xtenamit?

• Bʼar teʼruuq xtawbʼal xkʼojobʼankil xchʼool li xeʼelelik chaq saʼ li xtenamit?

• Ma truuq li Santil Hu xtenqʼankilebʼ li xeʼelelik chaq saʼ li xtenamit?

Kʼaru xyaalal li chʼaʼajkilal li yookebʼ xnumsinkil li xeʼelelik chaq saʼ li xtenamit?

Usta li rahilal aʼin li wank Ucrania kitiklaak saʼ xkʼabʼaʼ li pleetik li kixkʼam chaq Rusia, li Santil Hu naxchʼolobʼ chi tzʼaqal re ru li xyaalalil aʼin.

• Ebʼ li xʼawabʼejilal li winq moko nekeʼruuk ta xtenqʼankilebʼ li poyanam re xkʼebʼal rehebʼ li naʼajmank chiru. Nekeʼroksi bʼan li xwankilebʼ re xrahobʼtesinkilebʼ li poyanam (Eclesiastés 4:1; 8:9).

• Laj Tza aʼan «laj Taqlanel saʼ xbʼeen li ruuchichʼochʼ» joʼkan naq naxbʼalaqʼi ebʼ li poyanam ut li Santil Hu naxye: «Chixjunil li ruuchichʼochʼ wank rubʼel xwankil li maaʼus» (Juan 14:30, Li Santil Hu, Sociedad Bíblica de Guatemala, SBG; 1 Juan 5:19, SBG).

• Chiru naabʼal chihabʼ ebʼ li poyanam yookebʼ xnumsinkil naabʼal li chʼaʼajkilal, anaqwan wanko saʼ jun li kutan li ak xye chaq li Santil Hu. Saʼ 2 Timoteo 3:1, SBG, naxye: «Saʼ rosoʼjikebʼ li kutan wank honal qʼaxal chʼaʼajkaq xnumsinkil». Li yalok u, li chʼaʼajkilal li naxkʼam chaq li kaqsut-iqʼ malaj hiik, li weʼej ut ebʼ li yajel aʼan reetalil naq wanko saʼ rosoʼjikebʼ li kutan. Ebʼ li naʼlebʼ aʼin naxbʼaanu naq naabʼalebʼ li kristiʼaan teʼxkanabʼ li rochoch (Lucas 21:10, 11).

Bʼar teʼruuq xtawbʼal xkʼojobʼankil xchʼool li xeʼelelik chaq saʼ li xtenamit?

Li Santil Hu naxkʼut naq laj Yobʼtesinel, aʼ li Jehobʼab joʼ jun Yos li naxrahebʼ li xeʼelelik chaq saʼ li xtenamit ut ebʼ li poyanam li xeʼxkanabʼ li rochochebʼ naxtoqʼobʼa ruhebʼ ut narekʼa li xrahilalebʼ (Deuteronomio 10:18). Aʼan naxyeechiʼi risinkil li chʼaʼajkilal li nekeʼxnumsi li xeʼelelik chaq saʼ li xtenamit. Chanru? Rikʼin li Xʼawabʼejilal li Yos, jun li awabʼejilal li wank saʼ choxa li tixsach chixjunil li xʼawabʼejilal li winq (Daniel 2:44; Mateo 6:10). Li Jehobʼa troksi li Xʼawabʼejilal re xsachbʼal laj Tza (Romanos 16:20). Li Awabʼejilal aʼin tixjolomi chixjunil li ruuchichʼochʼ ut tixbʼaanu naq maakʼaʼaq chik li jachok ibʼ saʼ xyanqebʼ li tenamit. Ebʼ li kristiʼaan teʼwanq joʼ jun li junkabʼal saʼ chixjunil li ruuchichʼochʼ. Maaʼani chik t-eleliq saʼ rochoch xbʼaan naq li Santil Hu naxye: «Li junjunq taahilanq saʼ xmu li rochoch saʼ tuqtuukilal, chi maakʼaʼaq xxiw. Aʼan aʼin xyehom li Qaawaʼ, li Nimajwal Yos» (Miqueas 4:4, SBG).

Kaʼajwiʼ li Xʼawabʼejilal li Yos tixtuqubʼ ru chi junajwa li chʼaʼajkilal li naxbʼaanu naq ebʼ li kristiʼaan teʼxkanabʼ li xtenamit. Li Jehobʼa troksi li Xʼawabʼejilal re risinkil li rahilal li naxbʼaanu naq ebʼ li kristiʼaan teʼxkanabʼ li xtenamit. Tqatzʼil rix wiibʼ oxibʼ rehebʼ aʼin:

• Ebʼ li yalok u. Li Jehobʼa «xchʼanabʼank re li yalok» (Salmo 46:10, SBG). Re xnawbʼal chanru li Yos tixtuqubʼ ru chixjunil ebʼ li chʼaʼajkilal aʼin, chaawil li naʼlebʼ «Chanru tchalq li tuqtuukilal saʼ Ruuchichʼochʼ?».

• Li rahobʼtesink ut li raaxiikʼ. Li Jehobʼa «taaʼisinq rehebʼ saʼ li raasa ut li rahobʼtesiik» (Salmo 72:14, SBG). Re xnawbʼal chanru ebʼ li qas qiitzʼin nekeʼruuk risinkil saʼ xchʼoolebʼ li yibʼru aj naʼlebʼ, chaawil ebʼ li jalan jalanq chi naʼlebʼ li naxkʼabʼaʼi «Qamichʼaq saʼ qachʼool li xikʼ ilok».

• Li nebʼaʼil. Li Jehobʼa «taakoloq re li nebʼaʼ li yo chi tzʼaamank, aʼ li toqʼobʼ ru li inkʼaʼ natenqʼaak xbʼaan anihaq» (Salmo 72:12, SBG). Re xnawbʼal chanru li Yos tixsach chi junajwa li naxbʼaanu naq wank li nebʼaʼil, chaawil li naʼlebʼ ma juntaqʼeetaq li xwanjikebʼ li kristiʼaan saʼ junaq kutan.

• Li weʼej. «Numtajenaqaq li awimq saʼ ruuchichʼochʼ» (Salmo 72:16, SBG). Re rilbʼal kʼaru tixbʼaanu li Yos re naq maajun chik li kristiʼaan tixnumsi tzʼokak, chaawil li naʼlebʼ maaʼani chik tixnumsi weʼej saʼ ruuchichʼochʼ.

Ma truuq li Santil Hu xtenqʼankilebʼ li xeʼelelik chaq saʼ li xtenamit?

Truuq. Moko kaʼaj tawiʼ naxkʼe roybʼenihomebʼ choʼq re li kutan chalk re, saʼ li Santil Hu natawmank li chaabʼil naʼlebʼ li ttenqʼanq rehebʼ chi xqʼaxbʼal ru li chʼaʼajkilal li yookebʼ xnumsinkil anaqwan.

Li xraqal li Santil Hu: «Maakʼaʼ kʼaʼaq re ru chiʼok wiʼ eekʼaʼuxl, junelik bʼan cheqʼaxtesi saʼ roq ruqʼ li Yos leepatzʼom rikʼin tijok ut tzʼaamank, joʼwiʼ rikʼin yoxink. Ut li tuqtuukil usilal li nachalk rikʼin li Yos ut naxqʼax ru chixjunil li naʼlebʼ, tixkʼuula leechʼool ut leekʼaʼuxl» (Filipenses 4:6, 7, SBG).

Li naraj xyeebʼal: Maakʼaʼ naxye kʼaru li chʼaʼajkilal yookat xnumsinkil tzʼaama re li Yos naq tixkʼe aawe li tuqtuukilal li naʼajmank chaawu. Chaabʼil li naʼlebʼ «Filipenses 4:6, 7 | “Maakʼaʼ kʼaʼaq re ru chiʼok wiʼ eekʼaʼuxl”».