NAʼLEBʼ RE TZOLOK 15
BʼICH 38 Aʼan tatxkawresi
Tqataw rusilal wi nokoojilok chixkʼatq li Yos
«Aʼut li wank chi xkʼatq li Yos aʼan li us choʼq we» (SAL. 73:28).
RUʼUJIL LI TZOLOM
Saʼ li tzolom aʼin tqil kʼaru tento tqabʼaanu re naq toojiloq chixkʼatq li Jehobʼa ut kʼaru rusilal naqataw naq naqabʼaanu.
1, 2. a) Kʼaru naʼajmank re naq toowanq saʼ amiiwil rikʼin junaq li kristiʼaan? b) Kʼaru tqatzʼil rix saʼ li tzolom aʼin?
KʼOXLAN chirix jun laawamiiw. Ma jultik aawe kʼaru xaabʼaanu re xkawresinkil laaʼamiiwil rikʼin? Chʼolchʼo naq xaanumsi li hoonal rikʼin, xaatzol kʼaru nawulak chiru ut kʼaru inkʼaʼ, joʼkan ajwiʼ xaawil junjunq xchaabʼil naʼlebʼ ut xaawaj xkʼambʼal aawe rikʼin. Timil timil laarahom chirix laawamiiw xkʼiik.
2 Naʼajmank naq tqakʼe qachʼool ut qahoonal re naq toowanq saʼ amiiwil rikʼin junaq li kristiʼaan ut joʼkan ajwiʼ nakʼulmank rikʼin li qamiiwil rikʼin li Jehobʼa. Saʼ li tzolom aʼin tqatzʼil rix kʼaru tooruuq xbʼaanunkil re naq toojiloq chixkʼatq li Yos aʼ li tzʼaqal qamiiw. Abʼan xbʼeenwa tqil kʼaʼut jwal us naq tqabʼaanu.
3. Kʼaʼut aajel ru naq tqakʼoxla rix li rusilal li naxkʼam chaq jilok chixkʼatq li Jehobʼa? Kʼe jun eetalil.
3 Aajel ru naq tqakʼoxla chixjunil li rusilal li naxkʼam chaq wank chixkʼatq li Jehobʼa (Sal. 63:7-9). Re xtawbʼal ru chiʼus qilaq jun li eetalil, ebʼ li kristiʼaan nekeʼxnaw naq tento teʼwaʼaq chiʼus, teʼukʼaq, teʼxkawresi li xjunxaqalil ut teʼwarq chiʼus. Usta joʼkan naabʼalebʼ li kristiʼaan inkʼaʼ nekeʼxbʼaanu aʼin. Abʼanan, wi junaq naxtzʼil rix kʼaru rusilal naxkʼam chaq xbʼaanunkil ebʼ li naʼlebʼ aʼin, tixbʼaanu. Joʼkan ajwiʼ laaʼo, naqanaw naq wank chixkʼatq li Jehobʼa jwal chaabʼil, abʼanan xkʼoxlankil kʼaru rusilal naxkʼam chaq wank chixkʼatq li Yos, tixwaklesi qachʼool re naq rajlal toojiloq chixkʼatq (Sal. 119:27-30).
4. Kʼaru kixye li kitzʼiibʼank re li Salmo 73:28?
4 (Yaabʼasi Salmo 73:28). Li kitzʼiibʼank re li Salmo 73 chalenaq saʼ xteepal laj Leví ut nawajbʼak saʼ rochoch li Yos. Chanchan naq ak naabʼal chihabʼ rokik chi kʼanjelak chiru li Jehobʼa, abʼan chʼolchʼo chiru naq wank rusilal jilok chixkʼatq li Jehobʼa ut aʼin maajunwa tsachq saʼ xchʼool. Joʼkan naq kiraj naq naabʼalebʼ li kristiʼaan teʼwanq saʼ amiiwil rikʼin li Yos. Anaqwan qatzʼilaq rix wiibʼ oxibʼ li rusilal li naxkʼam chaq jilok chixkʼatq li Jehobʼa.
JILOK CHIXKʼATQ LI YOS NAXKʼE XSAHIL QACHʼOOL
5. a) Kʼaʼut jilok chixkʼatq li Jehobʼa naxkʼe xsahil qachʼool? b) Chanru nokooxtenqʼa ut nokooxkol li naʼlebʼ li naxkʼe qe li Jehobʼa? (Proverbios 2:6-16).
5 Wank naabʼal li naʼlebʼ li naxkʼutbʼesi naq jilok chixkʼatq li Yos naxkʼe xsahil qachʼool (Sal. 65:5). Jun rehebʼ, aʼan naq chaabʼil nokooʼelk naq naqapaabʼ li naxye li Raatin li Yos. Li xnaʼlebʼ li Jehobʼa nokooxkol chiru li yibʼ aj naʼlebʼ ut nokooxtenqʼa re naq inkʼaʼ tqabʼaanu jun li nimla maak (yaabʼasi Proverbios 2:6-16). Wank xyaalal naq li Santil Hu naxye: «Us xaq rehebʼ li xeʼxtaw li chaabʼil naʼlebʼ, us xaq rehebʼ li wankebʼ xseebʼal xkʼaʼuxebʼ» (Prov. 3:13).
6. Kʼaʼut kirahoʼk xchʼool li kitzʼiibʼank re li Salmo 73?
6 Abʼan aʼin moko naraj ta xyeebʼal naq maajunwa teʼrahoʼq xchʼool ebʼ laj kʼanjel chiru li Yos. Li kitzʼiibʼank re li Salmo 73 kʼajoʼ kirahoʼk xchʼool naq kiril chixjunil li maaʼusilal li nakʼulmank. Kiʼok xkʼoxlankil naq chaabʼil nekeʼelk li kristiʼaan li inkʼaʼ nekeʼxpaabʼ li naxye li Yos ut maaʼusebʼ xnaʼlebʼ, kiʼok ratawankil li kʼaru wank rehebʼ ut xbʼaan aʼin kichalk xjosqʼil. Kixkʼoxla naq ebʼ laj pleet ut li nekeʼxnimobʼresi ribʼ junelik nekeʼxtaw li nekeʼraj, maajunwa nekeʼyajerk ut maajunwa nekeʼxkʼul li rahilal, abʼan aʼin moko joʼkan ta (Sal. 73:3-7, 12). Saʼ xkʼabʼaʼ naq laj salmiist kʼajoʼ yook xjosqʼil, kiʼok xkʼoxlankil naq maakʼaʼ aj e chixjunil li kixbʼaanu re kʼanjelak chiru li Yos. Chi ra saʼ xchʼool kixye: «Maakʼaʼ aj e naq xinwank chi saq ru linchʼool; maakʼaʼ aj e naq xinchʼaj li wuqʼ, joʼ reetalil naq maakʼaʼ linmaak» (Sal. 73:13).
7. Kʼaru tooruuq xbʼaanunkil naq rahaq qachʼool? (Chaawil li jalam u).
7 Usta ra saʼ xchʼool laj salmiist, kixbʼaanu jun li naʼlebʼ re naq li rahil chʼoolej inkʼaʼ tnumtaaq saʼ xbʼeen. Joʼkan naq kiʼok saʼ li xloqʼlaj ochoch li Jehobʼa ut aran xtenqʼaak re naq tixjal chanru nanaʼlebʼak (Sal. 73:17-19). Li Jehobʼa naxnaw joqʼe ra qachʼool xbʼaan naq aʼan li qamiiw. Joʼkan naq tento tqapatzʼ re naq aʼan tooxbʼeresi ut tqakʼulubʼa li tenqʼ li naxkʼe qe rikʼin li Raatin ut li naxkʼe qe li chʼuut. Chi joʼkan twanq qametzʼew re naq tooʼelq chiʼubʼej ut tooruuq xqʼaxbʼal li rahil chʼoolej, joʼkan ajwiʼ usta twanq naabʼal qachʼaʼajkilal ut inkʼaʼ tqanaw kʼaru xbʼaanunkil li Jehobʼa tooxtenqʼa ut tixkʼojobʼ qachʼool (Sal. 94:19).a
Laj Leví li kitzʼiibʼank re li Salmo 73 wank saʼ li xloqʼlaj ochoch li Yos (Chaawil li raqal 7).
WI NOKOOJILOK CHIXKʼATQ LI YOS TWANQ XYAALAL LI QAYUʼAM UT QOYBʼENIHOM
8. Kʼaru chik rusilal naqataw naq nokoojilok chixkʼatq li Yos?
8 Anaqwan tqatzʼil rix wiibʼ chik li rusilal li naqataw naq nokoojilok chixkʼatq li Jehobʼa. Li xbʼeen aʼan naq naxkʼe xyaalal li qayuʼam ut li xkabʼ aʼan naq naxkʼe qoybʼenihom choʼq re li kutan chalk re (Jer. 29:11).
9. Kʼaʼut jilok chixkʼatq li Jehobʼa naxkʼe xyaalal li qayuʼam?
9 Saʼ li qakutan naabʼalebʼ li kristiʼaan nekeʼxye naq moko yoʼyo ta li Yos ut nekeʼxkʼoxla naq twulaq li hoonal bʼarwiʼ maakʼaʼaqebʼ chik li kristiʼaan saʼ Ruuchichʼochʼ. Ut xbʼaan aʼin naabʼalebʼ li poyanam moko nekeʼxtaw ta xyaalal li xyuʼam. Abʼanan, li Jehobʼa xooxyobʼtesi re naq t-alaaq saʼ qachʼool xloqʼoninkil ru. Joʼkan naq, naq nokoojilok chixkʼatq li Yos ut nokookʼanjelak chiru, naqataw xyaalal li qayuʼam ut aʼin naxkʼe xsahil qachʼool (Deut. 10:12, 13). Ut saʼ xkʼabʼaʼ li xqatzol saʼ li Santil Hu, chʼolchʼo chiqu naq li Yos «yoʼyo ut naq naxqʼajkamuhebʼ li nekeʼxkʼe xchʼool chi xloqʼoninkil ru» (Heb. 11:6).
10. Joʼ naxye Salmo 37:29, kʼaru nekeʼroybʼeni li nekeʼxkʼojobʼ xchʼool rikʼin li Jehobʼa?
10 Naabʼalebʼ li kristiʼaan maakʼaʼ roybʼenihomebʼ xbʼaan naq moko nekeʼxnaw ta li naxyeechiʼi li Yos choʼq re li kutan chalk re. Kaʼajwiʼ nekeʼxik xchʼool chi kʼanjelak, xkʼiresinkilebʼ li xkokʼal ut xxokbʼal bʼayaq li xtumin li tkʼanjelaq chiruhebʼ naq ak cheekebʼ chik. Abʼanan, joʼ aj kʼanjel chiru li Jehobʼa naqakʼojobʼ qachʼool rikʼin (Sal. 25:3-5; 1 Tim. 6:17). Naqapaabʼ naq li Jehobʼa aʼan li qamiiw ut naq tixbʼaanu chixjunil li naxyeechiʼi qe. Chʼolchʼo chiqu naq wank naabʼal li chʼinaʼusil naʼlebʼ li tkʼulmanq saʼ li kutan chalk re ut jun rehebʼ aʼan naq tooruuq chi kʼanjelak chiru li Yos saʼ li Chʼinaʼusil Naʼajej (yaabʼasi Salmo 37:29).
11. Kʼaru rusilal naqataw naq nokoojilok chixkʼatq li Yos? Chanru narekʼa ribʼ naq naqabʼaanu aʼin?
11 Naqataw naabʼal chik rusilal naq nokoojilok chixkʼatq li Jehobʼa. Jun rehebʼ, aʼan naq li Jehobʼa naxye naq tixkuy qamaak wi naqayotʼ qachʼool chiru (Is. 1:18). Aʼin naraj xyeebʼal naq inkʼaʼ chik trahoʼq qachʼool saʼ xkʼabʼaʼ li maak li xqabʼaanu chaq junxil (Sal. 32:1-5). Joʼkan ajwiʼ, nasahoʼk qachʼool xbʼaan naq yooko xsahobʼresinkil xchʼool li Jehobʼa (Prov. 23:15). Chʼolchʼo naq ak xqakʼul naabʼal li osobʼtesihom saʼ xkʼabʼaʼ naq wanko joʼ ramiiw li Yos. Abʼanan, kʼaru chik tooruuq xbʼaanunkil re jilok chixkʼatq li Jehobʼa?
KʼARU TQABʼAANU RE NAQ YOOQO CHI JILOK CHIXKʼATQ LI YOS
12. Kʼaru tento taabʼaanu re naq junelik yooqat chi jilok chixkʼatq li Yos?
12 Wi ak xkubʼeek aahaʼ joʼ aj testiiw re li Jehobʼa, naraj xyeebʼal naq ak xaatzol naabʼal li naʼlebʼ chirix li Yos ut li Jesús, naq ak xaayotʼ aachʼool, ak xaakʼutbʼesi naq nakaapaabʼ li Jehobʼa ut xaakʼe aaqʼe chi xpaabʼankil li xchaqʼrabʼ. Chixjunil aʼin naxkʼutbʼesi naq xatnachʼok rikʼin li Jehobʼa. Abʼan aajel ru naq maajunwa taakanabʼ xbʼaanunkil aʼin re naq rajlal yooqat chi jilok chixkʼatq li Jehobʼa (Col. 2:6).
13. Kʼaru oxibʼ chi naʼlebʼ tento tqabʼaanu re naq toojiloq chixkʼatq li Jehobʼa?
13 Kʼaru chik tooxtenqʼa re naq rajlal yooqo chi jilok chixkʼatq li Jehobʼa? 1) Aajel ru naq inkʼaʼ tqakanabʼ xyaabʼasinkil ut xtzolbʼal li naxye li Santil Hu. Moko kaʼaj tawiʼ naqaj xtzolbʼal li naʼlebʼ li xqatzol saʼ xtiklajik, naqaj bʼan xyuʼaminkil li yooko xtzolbʼal ut xtawbʼal ru bʼar wank li rajom li Yos choʼq qe (Efes. 5:15-17). 2) Tento naq rajlal tqakʼoxla rix ebʼ li naʼlebʼ li naxkʼutbʼesi li xrahom li Yos chiqix xbʼaan naq aʼin tixkawresi li qapaabʼal. 3) Ut aajel ru naq xikʼ tqil li xikʼ naril li Jehobʼa ut inkʼaʼ toowanq saʼ amiiwil rikʼinebʼ li kristiʼaan li nekeʼxbʼaanu li inkʼaʼ us (Sal. 1:1; 101:3).
14. Kʼaru tooruuq xbʼaanunkil rajlal kutan re xsahobʼresinkil xchʼool li Jehobʼa? (1 Corintios 10:31; chaawil ebʼ li jalam u).
14 (Yaabʼasi 1 Corintios 10:31). Re xsahobʼresinkil xchʼool li Jehobʼa moko kaʼaj tawiʼ tooxik saʼebʼ li chʼutam ut saʼ li puktesink, jwal wank bʼan xwankil naq tqakʼe qachʼool re naq rajlal kutan tqabʼaanu ebʼ li naʼlebʼ li nawulak chiru. Qakʼehaq jun eetalil, naqanaw naq nawulak chiru li Jehobʼa naq junelik tqaye li yaal ut naq tqawotz rikʼinebʼ li junchʼol li kʼaru wank qe (2 Cor. 8:21; 9:7). Li Jehobʼa naraj ajwiʼ naq tqakʼutbʼesi naq oxloqʼ chiqu li qayuʼam, joʼkan naq naqasikʼ jalan jalanq li naʼlebʼ re xkawresinkil li qajunxaqalil ut weent naqabʼaanu rikʼin joʼkʼihal naqawaʼ ut joʼkʼihal li haʼ li nakaltesink naqukʼ. Naq naqabʼaanu aʼin, nokoojilok chixkʼatq li Jehobʼa xbʼaan naq naqakʼutbʼesi naq naqabʼanyoxi li maatan li kixkʼe qe. Li Jehobʼa qʼaxal wiʼ chik nokooxra naq naril naq yooko xkʼebʼal qachʼool chi xsahobʼresinkil xchʼool usta chanchan naq moko nim ta li yooko xbʼaanunkil (Luc. 16:10).
Naru tqasahobʼresi xchʼool li Jehobʼa wi naqabʼaanu wiibʼ oxibʼ li naʼlebʼ, joʼ xbʼeresinkil chiʼus li bʼelebʼaal chʼiichʼ, xkawresinkil li qajunxaqalil, xwaʼbʼal li chaabʼil tzekemq ut xwotzbʼal li kʼaru wank qe rikʼinebʼ li junchʼol. (Chaawil li raqal 14).
15. Chanru naraj li Jehobʼa naq tqilebʼ li junchʼol?
15 Li Jehobʼa naxkʼutbʼesi li xchaabʼilal re chixjunilebʼ aʼ yaal ma nekeʼkʼanjelak chiru malaj inkʼaʼ (Mat. 5:45). Joʼkan naq naraj naq laaʼo ajwiʼ tqabʼaanu aʼin. Jun eetalil, li Jehobʼa naraj naq ebʼ laj kʼanjel chiru «inkʼaʼ teʼaatinaq chirix xjolom ebʼ li junchʼol», «maawaʼaqebʼ aj pleet» ut «junelik tuulanaqebʼ rikʼin chixjunilebʼ li qas qiitzʼin» (Tito 3:2). Joʼkan naq inkʼaʼ naqakʼoxla naq nim qawankil chiruhebʼ li maawaʼebʼ aj Testiiw (2 Tim. 2:23-25). Wi junelik chaabʼilaqo rikʼin chixjunilebʼ toojiloq chixkʼatq li Jehobʼa.
JILON CHIXKʼATQ LI JEHOBʼA USTA XATPALTOK
16. Kʼaru kixye chirix li xyuʼam li kitzʼiibʼank re li Salmo 73?
16 Wank sut maare tqekʼa naq li Jehobʼa moko wank ta chik chiqakʼatq saʼ xkʼabʼaʼ li qapaltil. Wi joʼkan us naq tqajultika li kixye li kitzʼiibʼank re li Salmo 73. Aʼan kixye: «Kachʼin chik maa xintichkʼok, bʼaʼbʼay aj chik maa xintʼaneʼk» (Sal. 73:2). Laj salmiist kixye naq xrahoʼk xchʼool, naq maakʼaʼ xnaʼlebʼ ut naq chanchan jun li xul chiru li Jehobʼa (Sal. 73:21, 22). Abʼan, ma kixkʼoxla laj salmiist naq li Jehobʼa maajunwa tixkuy xmaak ut naq inkʼaʼ chik traheʼq?
17. a) Kʼaru kixbʼaanu laj salmiist naq jwal ra xchʼool? b) Kʼaru naqatzol rikʼin li kixkʼul? (Chaawil ebʼ li jalam u).
17 Wi laj salmiist kixkʼoxla naq kitzʼeqtaanaak xbʼaan li Jehobʼa, chʼolchʼo naq saʼ junpaat kixjal li xnaʼlebʼ xbʼaan naq kixkʼe reetal naq tento tjiloq chixkʼatq li Jehobʼa. Chʼolchʼo chiqu aʼin xbʼaan li kixye saʼ Salmo 73:23, 24: «Abʼanan xinwank aawikʼin chi junelik: xinaachap chiru linnim uqʼ, xinaabʼeres rikʼin xnimal laakʼaʼuxl, ut saʼ rosoʼjik tinaakʼul aawikʼin saʼ laaloqʼal». Aajel ru naq laaʼo ajwiʼ jwal toojiloq chixkʼatq li Jehobʼa naq ra qachʼool, xbʼaan naq li Jehobʼa aʼan li Qasaqonak ut naru tooxtenqʼa re xkawresinkil li qapaabʼal (Sal. 73:26; 94:18). Usta toopaltoʼq chiru li Jehobʼa chʼolchʼooq chiqu naq naru toosutqʼiiq rikʼin ut naq tixkuy qamaak (Sal. 86:5). Naq jwal ra qachʼool ut naqekʼa naq maakʼaʼ chik nokooʼok wiʼ, aʼan li hoonal re naq qʼaxal toojiloq rikʼin li Jehobʼa (Sal. 103:13, 14).
Naq yooq chi kehoʼk li qapaabʼal, jwal aajel ru naq toojiloq chixkʼatq li Jehobʼa ut tqakʼe xtzʼaqobʼ li qakʼanjel chiru. (Chaawil li raqal 17).
CHOOJILOQ RIKʼIN LI YOS CHI JUNELIK
18. Kʼaʼut junelik yooqo chi jilok chixkʼatq li Jehobʼa?
18 Maajunwa tqakanabʼ xtzolbʼal qanaʼlebʼ chirix li Jehobʼa, joʼkan naq junelik yooqo chi jilok chixkʼatq. Li Santil Hu naxye naq «maaʼani naxtaw ru» li xbʼe, li xnaʼlebʼ ut li xnawom li Yos (Rom. 11:33).
19. Kʼaru naxye li Salmo 79:13 ut Salmo 73:26 chirix li kutan chalk re?
19 Li Salmo 79:13 naxye: «Laaʼo laatenamit, aakarneer li nakabʼeres laaʼat, tooyoxinq chawu chi junelik ut tqapuktesi resil li xnimal aaloqʼal junqʼe junqʼe kutan». Chʼolchʼooq chiqu naq wi maajunwa tqakanabʼ jilok chixkʼatq li Jehobʼa, aʼan toorosobʼtesi junqʼe junqʼe kutan ut naru tqaye: «Li Yos nakʼehok xkawubʼ linchʼool: aʼan linsahilal ut linbʼihomal chi junelik» (Sal. 73:26).
BʼICH 32 Kʼe aawibʼ chixkʼatq li Jehobʼa!
a Maare wankebʼ li tento teʼxsikʼ xtenqʼ rikʼin jun laj bʼanonel xbʼaan naq xnumtaak li xrahilebʼ xchʼool. Taataw xkomon li naʼlebʼ saʼ li hu Laj Kʼaakʼalehom ajl 1 2023.