Ebʼ li naʼaj li naxkʼe xloqʼal li Jehobʼa

Jwal nawulak chiru li Jehobʼa xtzolbʼal li xtenamit. Xbʼaan aʼin, li xmolam li Jehobʼa ak kixxaqabʼ naabʼal li tzolebʼaal re naq ebʼ li hermaan kawresinbʼilaqebʼ ut us teʼxbʼaanu li xkʼanjel. Jun rehebʼ aʼan, li Tzolok chirix li Xʼawabʼejilal li Yos. Saʼ xnumikebʼ li chihabʼ, li xmolam li Yos kixkʼe xchʼool moko kaʼaj tawiʼ chirix li tzolok, chirix ajwiʼ ebʼ li naʼaj bʼarwiʼ naʼuxmank li tzolok chirix li Yos. Li qajom aʼan xchaabʼilobʼresinkil ebʼ li naʼaj bʼarwiʼ wankebʼ laj kʼutunel ut ebʼ laj tzolonel. Chanru nokooxtenqʼa li tenqʼ tumin re xbʼaanunkil aʼin?

Naabʼalebʼ chik laj tzolonel saʼebʼ li naʼaj li jwal chʼinaʼus

Chiru naabʼal chihabʼ, ebʼ li tzolok chirix li Yos nabʼaanumank saʼebʼ li Chʼutlebʼaal Kabʼl malaj saʼebʼ li naʼaj re li nimla chʼutam. Kʼaʼut naq tojeʼ xqayiibʼ malaj xqachaabʼilobʼresi naabʼal li naʼajej li anaqwan kaʼajwiʼ naʼoksimank re tzolok chirix li Yos? Qilaq oxibʼ xyaalalil.

Li naʼajmank. Li hermaan Christopher Mavor, li natenqʼank saʼ li chʼuut li naril li puktesink re li Nekeʼjolomink re Xmolam li Jehobʼa, kixye: «Ebʼ li molam ak keʼxkʼe resil bʼar nekeʼajmank ebʼ laj puktesinel. Joʼ eetalil, saʼ 2019, li molam re Brasil kixye naq naʼajmank 7,600 li ak xeʼwulak saʼ li Tzolok chirix li Xʼawabʼejilal li Yos re kʼanjelak saʼ li teep re li molam aʼan». Li molam re Estados Unidos kixye naq naʼajmank ebʼ laj kʼamolbʼe li kawresinbʼilebʼ re xtenqʼankil ebʼ li junchʼol saʼ li puktesink bʼarwiʼ nekeʼnumeʼk naabʼal li qas qiitzʼin, bʼarwiʼ nekeʼxaqliik ebʼ li jukubʼ, ut saʼebʼ li tzʼalam. Joʼkan ajwiʼ, naʼajmank ebʼ li hermaan re kʼanjelak saʼ li chʼuut li nekeʼril li kabʼlak ut li xyiibʼankil ut saʼ ajwiʼ li chʼuut li naʼulaʼanink bʼanlebʼaal. Li ak xeʼwulak saʼ li Tzolok chirix li Xʼawabʼejilal li Yos, teʼruuq chi tenqʼank re xbʼaanunkil li kʼanjel aʼin.

Ebʼ li nekeʼxnujtesi li hu. Naabʼalebʼ li molam ak xeʼxkʼul ebʼ li hu joʼ maajunwa xʼilmank chaq. Joʼ eetalil, saʼ Brasil, li molam kixkʼul 2,500 ebʼ li hu, kaʼajwiʼ chiru jun chihabʼ. Abʼan, saʼ xkʼabʼaʼ naq jwal kachʼin li naʼaj, li molam kaʼajwiʼ kiruuk xkʼulubʼankil 950 aj tzolonel.

Bʼarwiʼ teʼruuq chi hilank. Naq ebʼ laj tzolonel nekeʼxkʼul li xtzolom saʼ jun li Chʼutlebʼaal Kabʼl malaj saʼebʼ li naʼaj re li nimla chʼutam, nekeʼkanaak saʼ rochochebʼ li hermaan re li teep aʼan. Aʼin nakʼanjelak saʼebʼ li teep bʼarwiʼ moko naabʼal ta li tzolok naʼuxmank rajlal chihabʼ. Abʼan, bʼarwiʼ naʼuxmank naabʼal li tzolok, maare wank sut ebʼ laj puktesinel li wankebʼ saʼ li teep aʼan, inkʼaʼ teʼruuq xkʼulbʼalebʼ chiru naabʼal po. Joʼkan naq, keʼxsikʼ jun li naʼaj re naq teʼhilanq, li nachʼ wank bʼarwiʼ nekeʼxkʼul li tzolok ut kʼubʼkʼu kaʼajwiʼ choʼq rehebʼ laj tzolonel.

Re xkawresinkil jun li naʼaj choʼq re li tzolok, joʼ ajwiʼ choʼq rehebʼ laj kʼutunel ut ebʼ li 30 aj tzolonel rikʼin chixjunil li naʼajmank chiruhebʼ, chi miyon li dólar naru nasachmank, a yal bʼar wank li naʼajej.

Chanru jun li naʼaj re tzolok

Nasikʼmank jun li naʼaj najt chiru li nimla tenamit bʼarwiʼ maakʼaʼ li choqink, abʼan nachʼ bʼarwiʼ nanumeʼk li kamioneet. Nakʼemank xwankil ebʼ li teep bʼarwiʼ wankebʼ naabʼal laj puktesinel li teʼruuq chi tenqʼank re xchaabʼilobʼresinkil li naʼaj ut ebʼ li kʼanjelobʼaal.

Saʼebʼ li naʼaj aʼin wankebʼ li biblioteca, naʼaj re tzolok, ebʼ li ululchʼiichʼ ut jalan chik ebʼ li kʼanjelobʼaal. Wank ajwiʼ jun li naʼaj bʼarwiʼ ebʼ laj tzolonel ut laj kʼutunel teʼruuq chi waʼak saʼ komonil. Joʼkan ajwiʼ wank naabʼal li naʼaj bʼarwiʼ teʼruuq xkawresinkil li xjunxaqalil malaj hilank.

Jwal wank xwankil ebʼ li naʼaj bʼarwiʼ nakʼemank li tzolok. «Xqapatzʼ rehebʼ li nekeʼril ebʼ li tzolok naq tooʼeʼxtenqʼa chi xyiibʼankil li naʼaj re naq chaabʼilaq li tzolok», naxchʼolobʼ laj Troy, li nakʼanjelak rochbʼen li nekeʼril li kabʼlak ut li xyiibʼankil saʼ chixjunil li Ruuchichʼochʼ, aran Warwick, Nueva York. «Ebʼ li hermaan keʼxkʼe qe junjunq ebʼ li naʼlebʼ chirix chanru tqabʼaanu ut kʼaru xnimal tqakʼe, joʼ ajwiʼ chirix li kaxlan xaml, li xyaabʼ kuxej ut bʼideo». Chirix li kʼanjelobʼaal re xyaabʼ kuxej, laj Zoltán, jun laj kʼutunel re li Tzolok chirix li Xʼawabʼejilal li Yos re Hungría, naxye: «Saʼ xtiiklajik, maakʼaʼ chaq qamicrófono, ut rajlal sut naqajultika rehebʼ laj tzolonel naq teʼaatinaq chi kaw. Abʼan anaqwan, ebʼ li junjunq aj tzolonel wankebʼ xmicrófono…, maakʼaʼ chik qachʼaʼajkilal!».

«Ebʼ li rulaʼ li Jehobʼa, li jwal oxloqʼ chiru»

Chanru nekeʼrekʼa ribʼ anaqwan ebʼ laj tzolonel ut ebʼ laj kʼutunel naq xeʼxchaabʼilobʼresi ebʼ li naʼaj? «Aʼan jun li chʼinaʼusil naʼaj bʼarwiʼ sa naqekʼa qibʼ» naxye xʼAngela, li kiwank saʼ li Tzolok chirix li Xʼawabʼejilal li Yos aran Palm Coast (Florida, Estados Unidos). «Chixjunil kʼoxlanbʼil chiʼus, joʼ ajwiʼ li qanaʼaj re tzolok, ebʼ li qahilobʼaal re naq tooruuq chi tzolok ut xtawbʼal ru chiʼus». Laj Csaba, jun laj kʼutunel re Hungría, jwal oxloqʼ chiru waʼak rikʼinebʼ laj tzolonel saʼ junajil. Aʼan naxye: «Ebʼ laj tzolonel nekeʼxye li wank saʼ xchʼoolebʼ ut nekeʼxseeraqʼi qe li xeʼxkʼul chaq. Chi kamaʼin naqanawebʼ ru chiʼus ut saʼ li tzolok nokooruuk xkʼebʼal re li junjunq, li naʼajmank chiruhebʼ».

Ebʼ laj kʼutunel ut ebʼ laj tzolonel nekeʼril li naʼaj li xeʼxchaabʼilobʼresi, joʼ jun rosobʼtesihom li nachalk rikʼin li «Xnimal ru aj Kʼutunel», aʼ li Jehobʼa (Isaías 30:20, 21, Li Santil Hu, Sociedad Bíblica de Guatemala). Jun li hermaan re Filipinas li kiwank saʼ li Tzolok chirix li Xʼawabʼejilal li Yos saʼ jun li naʼajej li keʼxkʼe choʼq tzolebʼaal, kixchʼolobʼ chi joʼkaʼin: «Li naʼaj aʼin naxjultika naq moko kaʼaj tawiʼ laaʼo aj tzolonel, laaʼo li rulaʼ li Jehobʼa, li jwal oxloqʼ chiru. Aʼan naraj naq tqayal xsahil li xchamal li tzolok chirix li Santil Hu».

Ebʼ li tzolebʼaal naru xkabʼlankil, xchaabʼilobʼresinkil ut xwenteninkil saʼ xkʼabʼaʼ leetenqʼ, naabʼal rehebʼ aʼin nakʼemank saʼ donate.jw.org. Naqabʼanyoxi tzʼaqal eere leetenqʼ.