Ma jultik aawe?

Ma xaakʼe aachʼool chi rilbʼal ebʼ li hu Laj Kʼaakʼalehom li tojeʼ xeʼelk? Kʼe reetal ma tatruuq xsumenkil ebʼ li patzʼom aʼin:

Kʼaru eetalil naxkanabʼ li Jehobʼa chirix chanru narilebʼ li ixq?

Li Jehobʼa inkʼaʼ naxsikʼ ruhebʼ ut juntaqʼeet naril li winq ut li ixq. Narabʼihebʼ, naxkʼe saʼ ajl li nekeʼrekʼa ut li chʼaʼajkilal li nekeʼxnumsi ut naxkʼojobʼ xchʼool rikʼinebʼ naq teʼxbʼaanu li kʼanjel li xtenebʼ saʼ xbʼeenebʼ (w24.01, perel 15 ut 16).

Chanru tooruuq xyuʼaminkil li naxye Efesios 5:7: «Mexʼokenk chirixebʼ»?

Laj Pablo kixye naq inkʼaʼ tqajunaji qibʼ rikʼinebʼ li kristiʼaan li nekeʼxbʼaanu naq inkʼaʼ tqayuʼami li xchaqʼrabʼ li Jehobʼa. Aʼin tqabʼaanu naq nokoowank rikʼinebʼ ut naq nokooʼaatinak rikʼinebʼ saʼ internet (w24.03, perel 22 ut 23).

Kʼaru ebʼ li naʼlebʼ li moko yaal ta tento xtzʼeqtaanankil?

Weent tqabʼaanu rikʼin li naʼlebʼ li naxtaqla qe junaq li qamiiw abʼan toj maajiʼ naxkʼe reetal ma yaal, junaq li korreo ut li nekeʼxye li xeʼxtzʼeqtaana li Jehobʼa li chanchan tawiʼ nekeʼraj xnawbʼal xkomon chirix li Santil Hu (w24.04, perel 12).

Kʼaru naqanaw ut kʼaru inkʼaʼ naqanaw chirix chanru li Jehobʼa traqoq aatin saʼ xbʼeen laj Salomón ut ebʼ li kristiʼaan li xeʼkamk Sodoma, Gomorra ut saʼ li Bʼutʼihaʼ?

Moko chʼolchʼo ta chiqu wi li Jehobʼa kixsachebʼ chi junajwa abʼan naqanaw naq aʼan naxnaw chi tzʼaqal re ru li tkʼulmanq ut naq naʼuxtaanank u (w24.05, perel 3 ut 4).

Kʼaru naxkʼut chiqu naq li Jehobʼa aʼan «li qaSaqoonak»? (Deut. 32:4).

Tooruuq xsikʼbʼal qatenqʼ rikʼin li Jehobʼa xbʼaan naq aʼan nokooxkol naq naqanumsi ebʼ li chʼaʼajkilal. Li Jehobʼa tiik xchʼool xbʼaan naq junelik naxbʼaanu li naxyeechiʼi ut maajunwa najalaak xbʼaan naq li xnaʼlebʼ ut li rajom inkʼaʼ ajwiʼ najalaak (w24.06, perel 26 toj 28).

Kʼaru tooxtenqʼa re naq tookʼayq saʼ jun li akʼ chʼuut?

Xkʼojobʼankil qachʼool rikʼin li Jehobʼa naq tooxtenqʼa joʼ chanru kixtenqʼahebʼ laj kʼanjel chiru saʼ najter qʼe kutan, inkʼaʼ tqajuntaqʼeeta qibʼ rikʼinebʼ li junchʼol, tqajunaji qibʼ rikʼinebʼ li hermaan saʼ li akʼ chʼuut ut tqasikʼebʼ li qamiiw (w24.07, perel 26 toj 28).

Kʼaru li naʼlebʼ naqatzol saʼ li oxibʼ chi jaljokil ru aatin li natawmank saʼ li tasal 25 re Mateo?

Saʼ li jaljokil ru aatin re li karneer ut li chibʼaat naqatzol naq tento tqabʼaanu li us ut naq tiikaq qachʼool, saʼ li jaljokil ru aatin re li lajeebʼ chi ixqaʼal naqatzol naq tento naq kawresinbʼilaqo ut naq yoʼon wanqo ut saʼ li jaljokil ru aatin re li tumin naqatzol naq aajel ru naq kaw tookʼanjelaq (w24.09, perel 20 toj 24).

Joʼ najtil li xteram li xbʼe laj Salomón li wank xmu?

Saʼ wiibʼ oxibʼ li Santil Hu, 2 Crónicas 3:4 naxye naq li xteram aʼan «120 codos» li naraj xyeebʼal naq chanchan tawiʼ jun li ochoch li 53 meetr xteram. Abʼan jalan chik li Santil Hu naxye naq li xteram aʼan «20 codos», naraj xyeebʼal bʼeleebʼ meetr. Li naʼlebʼ aʼin naxchap ribʼ rikʼin li xpimal li xsuttzʼakil li rochoch li Yos (w24.10, perel 31).

Kʼaru naraj xyeebʼal naq ebʼ laj tenqʼanel saʼ li chʼuut «jun ajwiʼ rixaqil teʼwanq»? (1 Tim. 3:12).

Laj tenqʼanel saʼ li chʼuut li sumsu tento naq jun ajwiʼ rixaqil twanq ut maajunwa tixmux li xsumlajik. Joʼkan ajwiʼ, inkʼaʼ taaxik xchʼool chirix jalanebʼ chik li ixq (w24.11, perel 19).

Kʼaʼut naqanaw naq Juan 6:53 inkʼaʼ yook chi aatinak chirix chanru txaqabʼamanq li Xnimankil li Xkamik li Jesús?

Saʼ Juan 6:53 li Jesús kiʼaatinak chirix xwaʼbʼal li tzʼaqal xtibʼel ut rukʼbʼal li tzʼaqal xkikʼel. Aʼin kixye saʼ li chihabʼ 32 rehebʼ laj judiiy li toj maajiʼ nekeʼpaabʼank. Abʼanan jun chihabʼ chirix aʼin naq kixxaqabʼ li xnimankil li xkamik aran Jerusalén, kiʼaatinak rikʼinebʼ li teʼawabʼejinq rochbʼeen saʼ choxa (w24.12, perel 10 ut 11).