Inki Mutindu Nge Lenda Tanina Bana na Nge?

NTANGU Wernera manisaka nzo-nkanda ya fyoti na bwala na bau, yandi kwenda ti bana yankaka kiteso ya 3000 sambu na kulanda nzo-nkanda ya nene na São Paulo, na Brésil. Kuna yandi monaka mbala ya ntete, banduku ya nzo-nkanda keteka mpi kenwa dyamba. Sambu yandi vandaka kamuntu mosi ya fyoti, bana ya nzo-nkanda ya bambuta yantikaka kunyokula yandi sambu yandi longuka luzingu ya kuna.

Mpangi ya Werner ya nkento, Eva, monaka mpi mpasi. Yandi kudipesaka mingi na kulonguka, yoyina yandi belaka ntu, mabanza na yandi kumaka bisakasaka. Bonso baleke yankaka, Werner ti Eva vandaka na mfunu ya lutaninu na kinsuni ti na mawi. Ebuna bana na nge, inki lusadisu bau ke na yo mfunu? Inki mutindu nge lenda tula bau na nzila sambu bau zinga mbote na kimbuta? Nge kezola mpenza nde bau kuma banani?

Bau Kele Ve Kaka na Mfunu ya Kudya

Yindula fyoti mpasi ya bibuti kemona bubu yai sambu na kutanina bana na bau. Na bansi mingi, bana yina kelalaka na babalabala mekuma mingi. Yina yonso sambu luzingu ya mabuta mebeba, bunsukami mpi mekuma mingi. Kana bana kemona mpasi mpi bau kesala bisalu, yau kele sambu kele ve ti muntu ya kutanina bau. Dyamba mpi mebebisa bana mingi. Mu mbandu, ntangu dyamba kumisa mwana mosi kiyungu na Brésil, ngemba vandaka dyaka ve na nzo na bau. Mpasi kotilaka bibuti: katula susi ya maladi na yandi ti mpasi ya mbongo ya kusansa yandi, miteki-dyamba yina vandaka kwisa kulomba mfuka na bo kukonda mawa.

Kansi, ata luzingu kele mpasi, bibuti mingi kesalaka ngolo na kusuka ve kaka na kupesa bana na bau madya, bilele ti nzo. Bau kesosaka mpi kutanina bau na bantu ya nku, na dyamba ti na bampasi yankaka. Yau kele kisalu mosi ya mbote mpenza. Kansi, keti beto fwete suka pana? Keti beto fwete tanina mpi ve bana na mawi ti na kimpeve? Bantu mingi kendimaka nde kulonga bana mbote kelomba kununga na kunata bau na kupona banduku ti bansaka ya mbote. Na yau, inki mutindu bibuti lenda buya kikalulu ya kulutisa ndilu na yina metala kutanina bana to kikalulu ya kupesa bana nzila ya kusala yina bau mezola? Beto kelomba nge na kutala mvutu na disolo ya melanda.

[Noti na nsi ya lutiti]