Yehowa Ke Sakumunaka Bantu Yina Ke Pesaka na Luzolo Yonso

NGANGI na beto me pesaka beto lukumu kibeni na mutindu yandi me bikilaka beto kimpwanza ya kupona. Diaka, yandi ke sakumunaka mingi bantu yina ke pesaka na luzolo yonso bima yina bo kele ti yo sambu na kupesa maboko na lusambu ya kieleka, bayina ke salaka bikesa sambu na kusantisa zina ya Nzambi mpi ke pesaka maboko sambu na kulungana ya lukanu na yandi. Yehowa ke zolaka ve kupusa bantu na kulemfukila yandi na kingolo-ngolo. Kansi, yandi ke sepelaka mingi na bantu yina ke pesaka na luzolo yonso sambu bo ke zolaka yandi na masonga yonso mpi ke monisilaka yandi ntonda ya mingi.

Mu mbandu, ntangu bantu ya Izraele vandaka na ntoto-makanga ya Sinai, Yehowa zabisaka bo na kutunga nzo ya lusambu. Yandi tubaka nde: ‘Beno baka makabu sambu na Yehowa na kati na beno. Bika nde konso muntu yina ntima na yandi me zola, kunata dikabu sambu na Yehowa.’ (Kub. 35:5) Nzambi pesaka nzila nde konso muntu ya Izraele kupesa kima yina yandi me zola, kukonda kutala kana yo kele nene to fioti, sambu bima yonso vandaka mfunu sambu na kulungisa lukanu ya Nzambi. Bantu ya Izraele salaka nki?

‘Konso muntu yina ntima na yandi vandaka kupusa yandi,’ ‘konso muntu yina mpeve na yandi vandaka kupusa yandi,’ mpi ‘konso muntu na luzolo na yandi,’ pesaka makabu ya luzolo. Na luzolo yonso, babakala mpi bankento nataka bima yai sambu na kisalu ya Yehowa: babukle, bima-makutu, mitaku, babiju, wolo, arza, kwivre, nsinga ya ble, lene ya mbwaki, lele ya mbwaki mingi, lino ya kitoko, mika ya nkombo, bampusu ya mameme, bampusu ya mbisi ya bo ke bingaka foke, mabaya ya akasia, matadi ya ntalu, mafuta ya kinganga-nzambi, mpi mafuta ya mwinda. Nsuka-nsuka, ‘bima yina lungaka sambu na bisalu yonso, mpi yo vandaka mingi kuluta.’—Kub. 35:21-24, 27-29; 36:7.

Kiese ya Yehowa vandaka ve sambu na bima yina bo pesaka, kansi, mutindu bo pesaka yo na luzolo yonso sambu na kupesa maboko na lusambu ya kieleka. Bo vandaka mpi ti luzolo ya kupesa ntangu mpi ngolo na bo. Biblia ke tuba nde: ‘Bankento yonso ya zabaka kutunga mbote, tungaka ti maboko na bo.’ Ya kieleka, ‘bankento yonso yina zabaka kisalu mbote yina ntima na bo vandaka kupusa bo tungaka bansinga ti mika ya nkombo.’ Diaka, Yehowa pesaka Besalele ‘mayele, ngangu, mpi nzayilu ya kusala bisalu ya maboko ya mitindu yonso.’ Ebuna, Besalele mpi Oholiabi kumaka ti makuki ya me fwana sambu na kusala bisalu yonso yina Nzambi lombaka bo.—Kub. 35:25, 26, 30-35.

Ntangu Yehowa lombaka bantu ya Izraele na kupesa makabu, yandi vandaka ti kivuvu nde ‘konso muntu ta ndima na luzolo yonso’ kupesa maboko na lusambu ya kieleka. Mpi yandi sakumunaka mingi bantu yina pesaka na luzolo yonso na mutindu yandi pesaka bo lutwadisu ya mbote mpi kiese ya mingi. Mpidina, Yehowa monisaka nde yandi ke sakumunaka bansadi na yandi yina ke vandaka ti luzolo ya kupesa, yandi ke sadisaka bo na kuzwa bima mpi mayele yina bo kele na yo mfunu sambu na kulungisa luzolo na yandi. (Nk. 34:10) Kana nge ke sadila Yehowa na luzolo yonso, vanda ti kivuvu nde yandi ta sakumuna mpeve na nge ya kusadila yandi na luzolo yonso.

MUTINDU BANTU YA NKAKA KE PESAKA MAKABU SAMBU NA KISALU YINA KE SALAMA NA NSI-NTOTO YA MVIMBA

Bonso na bilumbu ya ntumwa Polo, bubu yai bampangi mingi ‘ke tulaka kima mosi na lweka’ to ke bumbaka mwa mbongo sambu na kutula na bakesi ya makabu ya dibundu, yina bo me sonikaka nde: “Kisalu Yina Ke Salama na Nsi-Ntoto ya Mvimba.” (1 Bak. 16:2) Konso ngonda, mabundu ke tindaka makabu yina na biro ya filiale ya Bambangi ya Yehowa ya insi na bo. Muntu lenda tinda mpi makabu ya mbongo mbala mosi na Association Sans But Lucratif “Les Témoins de Jéhovah,” 75, 13^e Rue, Industriel, Limete-Kinshasa, République Démocratique du Congo, to na biro ya filiale yina ke talaka mambu ya insi na bo. Ba chèque yina beno ke tinda na adresi yai fwete vanda na zina ya “Association ‘Les Témoins de Jéhovah.’” Muntu lenda tinda mbongo na yandi na nzila ya banki, na nsadisa ya karti ya banki, to karti ya kudefisa mbongo. Na bafiliale ya nkaka, bantu ke sadilaka mpi site Internet jw.org to site ya nkaka. Bantu lenda pesa mpi babiju to bima ya nkaka ya mbalu kumosi ti mukanda yina ke monisa nde bima yina kele makabu.

KUDEFISA MBONGO

Muntu lenda defisa “Association ‘Les Témoins de Jéhovah’” mbongo sambu na kisalu ya kusamuna ya ke salama na nsi-ntoto ya mvimba. Kansi, konso ntangu yina yandi ta lomba mbongo na yandi, bo ta vutudila yandi yo. Sambu na kuzaba mambu ya nkaka, sonikila “Association ‘Les Témoins de Jéhovah’” na adresi yina kele na zulu to binga na 099 818 97 91 to na 081 555 1000.

MITINDU YA NKAKA YA KUPESA MAKABU

Katula kupesa makabu ya mbongo, muntu lenda pesa makabu ya mitindu ya nkaka sambu kisalu ya Kimfumu ya ke salama na nsi-ntoto ya mvimba kukwenda na ntwala. Mu mbandu:

Asiranse: Muntu lenda sonika zina ya “Association ‘Les Témoins de Jéhovah’” sambu yo baka mbongo na yandi ya asiranse to ya pansio kana yandi me fwa.

Kukangula Konti na Banki: Muntu lenda kangula konti na banki, to kupesa certificat de dépôt, na zina ya “Association ‘Les Témoins de Jéhovah,’” sambu na mbongo na yandi ya pansio to kutula zina ya “Association ‘Les Témoins de Jéhovah’” sambu na kubaka mbongo na yandi kana yandi me fwa, na kutadila bansiku ya banki ya insi na yandi.

Nswa ya Kubaka Mbongo: Nge lenda pesa “Association ‘Les Témoins de Jéhovah’” nswa (titres et obligations) ya kubaka mbongo bonso makabu to kupesa “Association ‘Les Témoins de Jéhovah’” nswa ya kubaka mbongo na nima ya lufwa na nge.

Kupesa Lupangu to Nzo: Muntu lenda pesa lupangu to nzo na yandi bonso makabu, kana yo kele nzo yina yandi ke zingaka, yandi ta vanda ti nswa ya kusadila yo ntangu yandi kele ntete na luzingu. Na ntwala ya kupesa bima ya mutindu yina, nge fwete zabisa biro ya Bambangi ya Yehowa ya insi na beno.

Kutula Mbongo na Banki Yina Ta Basisa Matabisi: Muntu lenda tula mbongo na banki to kupesa mikanda bonso kipiku na zina ya kimvuka mosi yina Bambangi ya Yehowa ke sadilaka. Na nima, muntu yina yandi mosi to muntu ya nkaka yina yandi me pona ta yantikaka kubaka konso mvula matabisi yina mbongo yango ta basisaka. Leta ta kulumusa ntalu ya mpaku yina yandi fwete futa banda na mvula yina yandi me pesa makabu yina.

Testama: Muntu lenda pesa “Association ‘Les Témoins de Jéhovah’” bima to nzo to mbongo na mukanda ya kubaka difwa yina nsiku ya leta ke ndimaka, to yandi lenda pesa “Association ‘Les Témoins de Jéhovah’” nswa ya kubaka bima yina yandi ta yambula. Kana muntu me sonika mukanda sambu na kupesa dibundu nswa ya kubaka bima na yandi ntangu yandi ta fwa, Leta ke kulumusaka mpaku yina yandi fwete futa sambu na bima yina.

Bangogo “mitindu ya nkaka ya kupesa makabu” ke monisa nde muntu yina ke pesa makabu ya mutindu yina fwete baka bangidika ya nkaka.

Sambu na kuzaba mambu ya nkaka, nge lenda binga na telefone to kusonikila “Association ‘Les Témoins de Jéhovah’” na adresi yina kele awa na nsi to kukwenda na biro ya filiale ya insi na nge.

BIRO YA FILIALE

“Association ‘Les Témoins de Jéhovah’”

B.P. 634, 75, 13^e Rue Limete-Kinshasa,

République Démocratique du Congo.

Telefone: 099 818 97 91 to 081 555 1000.