Mbandu ya Bangogo ya Kukotila na Masolo

(Sadila periodike ya Kifalansa kana yo kele ve na Kikongo)

Kuyantika Kulonguka ti Muntu na Sabala ya Ntete ya Ngonda ya Desembri

“Na ngonda yai, bantu mingi ke na kuyindula mambu ya me tala Yezu. Sambu na nge, inki kele diambu ya kuluta nene yina Yezu salaka? [Bika muntu yango kupesa mvutu.] Tala ntu-diambu ya disolo yai ya kele na lutiti 16.” Pesa muwi Nzozulu ya Nkengi ya Desembri 1, mpi beno tadila malongi yina kele na nsi ya kantu-dyambu ya ntete mpi beno tanga ata verse mosi ya bo me vutukila ve bangogo na yo. Pesa muwi zulunalu, mpi baka bangidika sambu na kuvutukila yandi mpi kutadila ngyufula ya ke landa.

Nzozulu ya Nkengi Desembri 1

“Na nsungi yai, bantu mingi ke vandaka ti kikalulu ya kusala nkinsi ya Lubutuku. Nge ke yindula nde inki diambu na kati ya mambu yai ke siamisaka mingi kibeni kikalulu yai? [Songa listi ya mambu yina kele na lutiti 3 mpi bika muntu yango kupesa mvutu. Na nima kangula disolo yina ke tubila diambu yango mpi tanga verse ya ntu-dyambu.] Zulunalu yai ke monisa mitindu ya mbote yina beto lenda yibuka Yezu na mvula ya mvimba, kansi ve kaka na nsungi ya Lubutuku.”

Réveillez-vous ! Desembri

“Beto ke na kutala bantu sambu mingi na kati na bo ke tungisama na mawi mpi ke niokwama. Keti nge ke mona mpi nde bantu mingi me kuma ntima zulu-zulu bilumbu yai? [Bika muntu yango kupesa mvutu.] Bantu yankaka ke kwikila nde beto ke zinga na nsungi mosi ya mpasi, yina bo tubilaka na mbikudulu ya 2 Timoteo 3:1. [Tanga] Zulunalu yai ke monisa sambu na nki kuvanda ntima zulu-zulu kele mbi mpi yo ke pesa mwa bangindu na yina me tala mutindu ya kuvanda ntima nda.”