Inki Mambu Bankaka Kelongukaka na Ntangu Bo Ketalaka Nge?
1. Inki balongoki ya Yezu kulongukaka na kutalaka yandi?
1 Yezu kutubaka nde: “Beno baka kilo na mono, beno nata yo; beno vanda balonguki na mono.” (Mat. 11:29) Yo kele pwelele nde, yandi longaka bankaka na kupesaka mbandu ya mbote, kansi na bangogo kaka ve. Yindula mambu yina balongoki kulongukaka na kutalaka Yezu. Yandi vandaka mawete, ntima-mbote, mpi vandaka kuzola bantu. (Mat. 8:1-3; Mar. 6:30-34) Yandi vandaka na kudikulumusa ya masonga. (Yoa. 13:2-5) Ntangu bo vandaka kukwenda ti Yezu na kisalu ya kusamuna, balongoki kumonaka nde yandi vandaka nsadi mosi ya kelembaka ve mpi yina vandaka kununga na kulonga bankaka kyeleka. (Luka 8:1; 21:37, 38) Inki bantu yankaka kelongukaka ntangu bo ketalaka beto na kisalu ya kusamuna?
2. Inki mutindu bikalulu na beto ya mbote na kisalu ya kusamuna kevandaka ti bupusi ya mbote na bawi?
2 Bawi: Kulwata na beto ya kukonda mindondo, bikalulu na beto ya mbote, mpi dikebi ya masonga yina beto ketudilaka bantu lenda vanda ti bupusi ya ngolo na bawi na beto. (2 Kor. 6:3; Filp. 1:27) Bo kemonaka nde beto kesadilaka Biblia mbala na mbala. Bantu yankaka keyitukaka na mutindu beto kewidikilaka bo na luzitu yonso ntangu bo ketubaka. Kumona ve mpamba mutindu kupesa mbandu ya mbote na mambu yai lenda benda bantu na kuwa nsangu ya Kimfumu.
3. Inki bupusi ya mbote beto lenda vanda na yo na bampangi na beto?
3 Bampangi na Beto: Yindula mpi bupusi ya mbote yina beto lenda vanda na yo na bampangi na beto. Kikesa na beto na kisalu ya kusamuna kesambukilaka bankaka. Bonso kibende kepesaka makasi na kibende yankaka, bangogo ya kukotila na masolo ya beto meyidika mbote kepusaka bankaka na kutomisa mayele na bo ya kulonga. (Bing. 27:17) Kikesa na beto na kubaka banoti ya sikisiki ya bantu yina kemonisaka mpusa mpi mutindu beto kevutukilaka bo kukonda kusukinina kesadisaka na kusyamisa bankaka na kusala mutindu mosi. Beto tavanda ti bupusi ya mbote na bampangi na beto Bakristu na kulungisaka mbotembote kisalu na beto ya kusamuna.—2 Tim. 4:5.
4. Sambu na nki beto fwete tadilaka mbandu na beto mbala na mbala?
4 Sambu na nki ve kutadila mbala na mbala mambu ya nge kesalaka mpi ketubaka mpi mutindu mbandu ya nge kepesaka kevandaka na bupusi na bankaka? Mbandu na beto ya mbote tasepedisa Yehowa mpi tasadisa beto na kudiwa mutindu ntumwa Polo kudiwaka ntangu yandi tubaka nde: “Beno baka mbandu na mono, mutindu mono mpi ke bakaka mbandu na Kristo.”—1 Kor. 11:1.