Hũthĩra Njĩra Ĩkũgucĩrĩria Mwene Nyũmba
1. Nĩ ũndũ ũrĩkũ tũngĩĩruta kuumana na njĩra ngũrani cia Akristiano a tene?
1 Akristiano a tene maahunjagia ũhoro ũrĩa mwega kũrĩ andũ a ũndũire na ndini itiganĩte. (Kol. 1:23) O na gũtuĩka ndũmĩrĩri yarĩ ĩmwe—Ũthamaki wa Ngai—njĩra cia kũhunjia ciaringanaga na arĩa marahunjĩria. Kwa ngerekano, rĩrĩa Petero aaragia na Ayahudi arĩa maatĩĩte Maandĩko mũno, aambĩrĩirie na kũgweta ciugo cia mũnabii Joeli. (Atũm. 2:14-17) No ta rora wone njĩra ĩrĩa Paulo aahũthĩrire akĩaria na Agiriki ta ũrĩa honanĩtio thĩinĩ wa Atũmwo 17:22-31. Ũmũthĩ, andũ thĩinĩ wa icigo imwe nĩ matĩĩte Maandĩko, na kwoguo tũtionaga arĩ hinya kũmathomera Bibilia tũkĩhunjia nyũmba kwa nyũmba. O na kũrĩ ũguo, no tũbatare kũhũthĩra ũũgĩ makĩria rĩrĩa tũraria na arĩa matakenagio nĩ Bibilia kana ndini o na kana arĩa matarĩ a ndini cia Gĩkristiano.
2. Tũngĩhũthĩra atĩa mabuku marĩa maraheanwo gũteithia andũ arĩa matĩĩte Bibilia o hamwe na arĩa matamĩtĩĩte?
2 Hũthĩra Wega Biũ Mabuku Marĩa Maraheanwo: Mabuku marĩa tũrĩheanaga mwaka-inĩ ũyũ wa ũtungata marĩcenjagia o thutha wa mĩeri ĩĩrĩ na marĩkoragwo marĩ ngathĩti, trakti, na broshua. O na angĩkorũo andũ thĩinĩ wa gĩcigo gitũ matikenagio nĩ Bibilia, no tũrĩhotaga kwarĩrĩria ũndũ ũngĩmakenia kuuma mabuku-inĩ macio. No twage gũthoma rĩandĩko kana kũgweta Bibilia ĩmwe kwa ĩmwe tũkĩhunjia rita rĩa mbere, ĩndĩ tũngĩona mũndũ ũrakenio nĩ ũhoro no tũmũcokere tũrĩ na muoroto wa kũmũteithia akũrie wĩtĩkio harĩ Mũũmbi na Kiugo gĩake kĩrĩa gĩtongoretio nĩ roho. No angĩkorũo tũrahunjia kũndũ andũ matĩĩte Bibilia, no tũhũthĩre mabuku na tũhunjie na njĩra ĩronania nĩ mamĩtĩĩte. O na no tũmatigĩre ibuku rĩa Bibilia Ĩrutanaga kana broshua cia Thikĩrĩria Ngai kana Thikĩrĩria Ngai na Ũtũũre Tene na Tene hĩndĩ o yothe, o na angĩkorũo timo maraheanwo mweri ũcio. Ũndũ ũrĩa wa bata makĩria nĩ kũhũthĩra njĩra ĩkũgucĩrĩria mwene nyũmba.
3. Nĩ na njĩra ĩrĩkũ ngoro cia andũ arĩa tũhunjagĩria gĩcigo-inĩ gitũ ihaana ta tĩri?
3 Haarĩria Tĩri: Ngoro ya mũndũ nĩ ĩhaanaine mũno na tĩri. (Luk. 8:15) Tĩri ũmwe nĩ ũbataraga kũhaarĩrio makĩria nĩguo mbeũ cia ma ya Bibilia igĩe mĩri na ikũre. Ahunjia a karine ya mbere nĩ maahotaga kũhanda tĩri-inĩ wa mĩthemba yothe, na ũndũ ũcio nĩ watũmaga magĩe na gĩkeno na maiganĩre. (Atũm. 13:48, 52) O na ithuĩ no tũkorũo na moimĩrĩro ta macio tũngĩroraga wega njĩra iria tũhũthagĩra tũkĩhunjia.