Jehova nĩ Atũteithĩtie ‘Gũkũra Harĩa Twahandwo’

Mũrũ na mwarĩ wa Ithe witũ Kassholm maathiire Cukuru ya Gileadi mwaka wa 1979, na kuuma hĩndĩ ĩyo nĩ “mahandĩtwo,” kana magatũmwo gũtungata kũndũ gũtiganĩte ta Iran, Mauritius, Myanmar, Tanzania, Uganda, na Zaire. Mũrutani ũmwe wao wa Gileadi Jack Redford, nĩ aamaheire ũtaaro ũrĩa ũmateithĩtie “gũkũra” kũndũ kũingĩ kũrĩa matũmĩtwo magatungate. Reke matũtaarĩrie.

No mwende gũtũtaarĩria ũrĩa mwamenyire ũhoro wa ma?

Mats: Baba aaikaraga Poland hĩndĩ ya Mbaara ya Kerĩ ya Thĩ, na nĩ eeyoneire ũhinga mũingĩ ndini-inĩ ya Gatoreki. No kaingĩ nĩ aaugaga ũũ: “No nginya akorũo nĩ kũrĩ ndini ya ma!” Thutha wa ihinda, nĩ ndonire atĩ ndaahĩtĩtie. Nĩ ndagũraga mabuku maingĩ ma gũthoma, na harĩ ibuku rĩmwe rĩa mburuu ndagũrire rĩetagwo Ma Ĩrĩa Ĩtongoragia Muoyo-inĩ wa Tene na Tene. Nĩ ndagucĩrĩirio nĩ kĩongo kĩa ibuku rĩu, na ndaarĩthomire rĩothe ũtukũ wa mũthenya ũcio ndarĩgũrire. Gũkinyĩria rũcinĩ, nĩ ndamenyete atĩ nĩ ndona ũhoro wa ma!

Kuuma mweri-inĩ wa Ĩpuro 1972, nĩ ndathomire mabuku maingĩ ma Aira a Jehova na ngĩona macokio ma ciũria iria ndaarĩ nacio cia Bibilia. Ndaiguire haana ta mũhũũri biacara ũrĩa ũgwetetwo ngerekano-inĩ ya Jesu, ũrĩa thutha wa kuona ruru ĩmwe ya goro mũno eendirie indo ciake ciothe nĩguo amĩgũre. Nĩ ndendirie na njĩra ya mũhaano muoroto ũrĩa ndaarĩ naguo wa gũthiĩ yunivasĩtĩ ngathomere ũndagĩtarĩ, na ngĩgũra “ruru” ya ũhoro wa ma ũrĩa ndonete. (Mat. 13:​45, 46) Ndabatithirio Dicemba 10, 1972.

Ihinda-inĩ rĩa mwaka ũmwe, aciari akwa na mũrũ wa maitũ ũrĩa mũnini nĩ meetĩkĩrire ũhoro ũrĩa wa ma na makĩbatithio. Mweri-inĩ wa Julaĩ 1973, nĩ ndambĩrĩirie ũtungata wa mahinda mothe. Nĩ kwarĩ na mapainia maarĩ kĩyo kĩũngano-inĩ gitũ, na ũmwe wao aarĩ Ann-Catrin, ũrĩa warĩ mũirĩtu mũthaka na wendete maũndũ ma kĩĩroho. Nĩ twendanire na tũkĩhikania mwaka-inĩ wa 1975, na mĩaka ĩna ĩrĩa yarũmĩrĩire twaikarire taũni-inĩ ya Strömsund kũu Sweden. Taũni ĩyo yarĩ thaka na andũ aingĩ nĩ maakenagĩra kwĩruta Bibilia.

Ann-Catrin: Baba eerutire ũhoro wa ma rĩrĩa aarĩkagia mathomo make ma yunivasĩtĩ taũni-inĩ ya Stockholm. Hĩndĩ ĩyo ndaarĩ na ũkũrũ wa mĩeri ĩtatũ tu, no nĩ aanguuaga agĩthiĩ mĩcemanio na ũtungata. Mami ndaakenagio nĩ ũndũ ũcio, na nĩ aacaragia ũira wa kuonania atĩ Aira a Jehova ti andũ ega. No ndoonire, kwoguo thutha wa ihinda o nake nĩ aabatithirio. Ndaabatithirio ndĩ na mĩaka 13, na ndakinyia mĩaka 16 ngĩambĩrĩria ũpainia. Thutha wa gũtungata taũni-inĩ ya Umeå, kũrĩa kwarĩ na bata mũnene wa ahunjia, nĩ ndaatuĩkire painia wa mwanya.

Thutha wa kũhikania na Mats, nĩ twakeneire gũteithia andũ aigana ũna kwĩruta ũhoro wa ma. Ũmwe wao aarĩ mũirĩtu wetagwo Maivor, ũrĩa watiganĩirie wĩra wa mathaako nĩguo atungatĩre Jehova makĩria, na thutha ũcio makĩambĩrĩria gũpainia hamwe na mwarĩ wa maitũ ũrĩa mũnini. Nĩ maathiire Cukuru ya Gileadi mwaka-inĩ wa 1984, na rĩu matungataga marĩ amishonarĩ bũrũri-inĩ wa Ecuador.

Mũhotete atĩa kũrũmĩrĩra ũtaaro wa ‘gũkũra harĩa mwahandwo’ ũtungata-inĩ wanyu wa ũmishonarĩ?

Mats: Nĩ tũkoretwo “tũkĩhandwo” kana tũgĩtũmwo tũgatungate kũndũ gũtiganĩte. Ũndũ ũmwe watũteithagia gwĩka mogarũrũku marĩa marabatarania nĩ kwĩrutanĩria kwĩgerekania na Jesu, makĩria ũhoro-inĩ wĩgiĩ kuonania wĩnyihia. (Kol. 2:​6, 7) Kwa ngerekano, handũ ha kwĩrĩgĩrĩra aarĩ na ariũ a Ithe witũ arĩa twakora meke maũndũ na njĩra itũ, nĩ twageragia gũtaũkĩrũo kĩrĩa kĩratũma meke maũndũ na njĩra ngũrani. Nĩ tweendaga gũtaũkĩrũo nĩ mwĩcirĩrie na ũndũire wao. O ũrĩa twerutanagĩria kwĩgerekania na Jesu, noguo twaiguaga ta tũhandĩtwo “mĩtaro-inĩ ya maĩ,” na kwoguo tũgakũra harĩa hothe twatũmwo.—Thab. 1:​2, 3.

Ann-Catrin: Nĩguo mũtĩ ũkũre thutha wa kũhandwo handũ hangĩ, nĩ ũbataraga ũrugarĩ wa riũa. Hingo ciothe Jehova akoretwo arĩ “riũa” harĩ ithuĩ. (Thab. 84:11) Nĩ atũheete aarĩ na ariũ a Ithe witũ aingĩ matwendete. Kwa ngerekano, tũrĩ Iran kĩũngano-inĩ kĩmwe kĩnini taũni-inĩ ya Tehran, ariũ a Ithe witũ kũu nĩ maatũnyitire ũgeni na njĩra nene o ta ũrĩa ndungata cia Jehova mahinda-inĩ ma Bibilia ciekaga. Nĩ tũngĩendire gũthiĩ na mbere gũikara Iran, no mweri-inĩ wa Julaĩ 1980, Aira a Jehova nĩ maahũũrirũo marubuku bũrũri-inĩ ũcio na tũkĩheo mathaa 48 tũkorũo tuumĩte kuo. Twerirũo tũgatungate bũrũri-inĩ wa Zaire (ũrĩa rĩu wĩtagwo Congo) thĩinĩ wa Afrika.

Nĩ ndarĩrire rĩrĩa ndaiguire atĩ tũrathiĩ Afrika. Maũndũ marĩa ndaiguĩte megiĩ nyoka na mĩrimũ ĩrĩa ĩkoragwo kuo nĩ maatũmaga ndĩtigĩre. No arata aitũ erĩ a hakuhĩ arĩa maatungatĩte kuo ihinda iraihu maatwĩrire ũũ: “Mũtigetigĩre! O na gũtuĩka mũtirĩ mwathiĩ Afrika, nĩ tũĩ atĩ nĩ mũgũkenera.” Na ũguo nĩguo gwathiire. Aarĩ na ariũ a Ithe witũ kũu nĩ maatuonirie wendo mũingĩ. Mĩaka ĩtandatũ thutha ũcio rĩrĩa twerirũo tuume Zaire nĩ ũndũ wa wĩra witũ kũhũũrũo marubuku, nĩ ndethekereire tondũ ndekorire ngĩhoya Jehova areke tũikare Afrika.

Nĩ irathimo irĩkũ muonete ũtungata-inĩ wanyu?

Mats: Nĩ tũgĩte na ũrata wa hakuhĩ na amishonarĩ aingĩ a kuuma mabũrũri matiganĩte na ũndũire ngũrani. Na kũndũ kũmwe twanatũmwo nĩ twakenagĩra gũkorũo na arutwo aingĩ a Bibilia—ta arutwo 20 o mũndũ! Ningĩ ndikariganĩrũo nĩ wendo na ũtugi ũrĩa tuoonirio nĩ aarĩ na ariũ a Ithe witũ a Afrika. Rĩrĩa twaceeragĩra ciũngano bũrũri-inĩ wa Tanzania, twakomaga ngaari-inĩ itũ ĩrĩa twaigaga mĩciĩ-inĩ ya aarĩ na ariũ a Ithe witũ, na nĩ maatuonagia ũtaana mũingĩ nginya “makĩria ma ũhoti wao.” (2 Kor. 8:3) Na ũndũ ũngĩ wa mwanya twakenagĩra nĩ ihinda rĩa hwaĩ-inĩ rĩrĩa twateeretaga hamwe na mũtumia wakwa. Nĩ twaaragĩrĩria maũndũ marĩa tweyoneire mũthenya ũcio, na tũgacokeria Jehova ngatho nĩ ũndũ wa gũkorũo hamwe na ithuĩ.

Ann-Catrin: Nĩ ngĩte na gĩkeno kĩnene nĩ ũndũ wa kũmenyana na aarĩ na ariũ a Ithe witũ kuuma kũndũ gũtiganĩte thĩinĩ wa thĩ. Nĩ twĩrutĩte thiomi ta Kĩfarsi, Kĩfaranja, Kĩganda, na Gĩthwaĩri, na tũkeruta ũndũire ũtiganĩte. Ningĩ nĩ tũteithĩrĩirie andũ amwe gũkũra kĩĩroho, tũkagĩa na arata a ma, na tũkarutithania wĩra nao tũrĩ na “ũrũmwe” ũtungata-inĩ wa Jehova.—Zef. 3:9.

Ũndũ ũngĩ tũkeneire nĩ kwĩyonera ũũmbi ũtiganĩte wa Jehova. Hĩndĩ ciothe twaheo wĩra mwerũ ũtungata-inĩ wa Jehova, tuoonaga ta arĩ Jehova ũratũceeria atũtongoretie. Tiga nĩ Jehova, tũtingĩũĩ maũndũ maingĩ marĩa twĩrutĩte.

Nĩ moritũ marĩkũ mũcemanĩtie namo, na mũhiũranĩtie atĩa namo?

Mats: Rĩmwe nĩ twarwaraga mĩrimũ ĩtiganĩte ta malaria, na Ann-Catrin nĩ athĩnjĩtwo maita maigana ũna. Ningĩ nĩ twatangĩkaga nĩ ũndũ wa aciari aitũ akũrũ, na kwoguo nĩ tũcokagia ngatho tondũ ciana iria tũciaranĩirũo nacio nĩ ciamarũmbũyagia irĩ na wetereri, gĩkeno, na wendo. (1 Tim. 5:4) O na gũtuĩka nĩ twekaga ũrĩa wothe tũngĩhota kũmateithia o na tũrĩ kũraihu, rĩmwe nĩ twaiguaga ũũru na tũkeĩra naarĩ korũo no tũhote gwĩka makĩria.

Ann-Catrin: Mwaka-inĩ wa 1983 tũgĩtungata bũrũri-inĩ wa Zaire, nĩ ndarwarire mũno mũrimũ wa cholera. Ndagĩtarĩ eerire Mats andute bũrũri-inĩ ũcio mũthenya o ro ũcio. Mũthenya ũrĩa warũmĩrĩire nĩ twambĩrĩirie thabarĩ ya gũthiĩ Sweden, na twathiire na ndege ya mĩrigo tondũ noyo yoonekaga.

Mats: Nĩ twarĩrire mũno tondũ tweciragia atĩ tũtigatungata rĩngĩ tũrĩ amishonarĩ. No ngũrani na ũrĩa ndagĩtarĩ aaugĩte, Ann-Catrin nĩ aahonire. Mwaka ũmwe thutha ũcio nĩ twacokire Zaire, na tũgĩtũmwo kĩũngano-inĩ kĩnini gĩa Gĩthwaĩri taũni-inĩ ya Lubumbashi.

Ann-Catrin: Ihinda-inĩ rĩu twarĩ Lubumbashi, nĩ ndagĩire nda no ĩkiuma. O na gũtuĩka tũtiarĩ na mũbango wa kũgĩa ciana, gĩkuũ gĩa kaana gaitũ kĩarĩ ihũũra inene harĩ niĩ. No ihinda-inĩ rĩu twarĩ na kĩeha, Jehova nĩ aatũrathimire na njĩra tũteerĩgagĩrĩra. Nĩ twagĩire na arutwo aingĩ a Bibilia gũkĩra mbere ĩyo. Ihinda-inĩ rĩnyihĩire mwaka ũmwe, ahunjia kĩũngano-inĩ gitũ nĩ moongererekire kuuma 35 nginya 70, na mũigana wa andũ arĩa mookaga mĩcemanio ũkĩongerereka kuuma 40 nginya 220. Twarĩ na maũndũ maingĩ ma gwĩka ũtungata-inĩ, na Jehova akĩrathima kĩyo gitũ, ũndũ ũrĩa wanyũmĩrĩirie mũno. O na kũrĩ ũguo, nĩ twĩciragia mũno na tũkaaria ũhoro wa kaana kau gaitũ. Nĩ twĩriragĩria mũno kuona ũrĩa Jehova akaahonia ngoro citũ biũ thĩinĩ wa paradiso.

Mats: Kũrĩ hĩndĩ Ann-Catrin aambĩrĩirie kũigua atarĩ na hinya mwĩrĩ na arĩ mũnogu mũno. Ihinda-inĩ o rĩu nĩ ndamenyekanire ndĩ na kansa ya nda na yarĩ stage-four, na nĩ ndabataraga gũthĩnjwo. No rĩu nĩ ndĩrathiĩ na mbere wega, na Ann-Catrin nĩ arerutanĩria ũrĩa angĩhota ũtungata-inĩ wa Jehova.

Nĩ tuonete atĩ to ithuĩ tu tũhiũranagia na moritũ. Thutha wa njũragano ya gĩĩkabira ĩrĩa yarĩ kuo Rwanda mwaka-inĩ wa 1994, nĩ twaceereire aarĩ na ariũ a Ithe witũ aingĩ arĩa maarĩ kambĩ-inĩ cia ethari-ngũĩ. Kuona ũrĩa maarĩ na wĩtĩkio, ũkirĩrĩria, na ũtaana mũnene, nĩ gwatũrutire atĩ Jehova nĩ arĩ hinya wa gũtiirĩrĩra andũ ake igerio-inĩ o rĩothe.—Thab. 55:22.

Ann-Catrin: Mwaka-inĩ wa 2007 nĩ twacemanirie na ũndũ ũngĩ mũritũ tũthiĩte Uganda nĩ ũndũ wa kwamũrũo kwa wabici ya rũhonge. Thutha wa kũrĩkia programu ĩyo, nĩ twambĩrĩirie thabarĩ ya gũthiĩ Nairobi, Kenya, tũrĩ hamwe na aarĩ na ariũ a Ithe witũ ta 25. Amwe ao maarĩ amishonarĩ na angĩ maatungataga Betheli. No tũtanakinya mũhaka-inĩ wa Kenya, kĩroori kĩmwe nĩ gĩokire mwena ũrĩa twarĩ na gĩkĩgũtha mbathi itũ mwena wa na mbere. Ndereba witũ hamwe na aarĩ na ariũ a Ithe witũ atano maakuuire hau hau, na mwarĩ wa Ithe witũ ũmwe agĩkua thutha ũcio arĩ thibitarĩ. Nĩ twĩriragĩria mũno gũkoona arata acio aitũ rĩngĩ!—Ayub. 14:​13-15.

Nĩ ndahonire nguraro iria ndaarĩ nacio. No aksidenti ĩyo nĩ yatũmire niĩ na Mats hamwe na andũ angĩ tũnyitwo nĩ mũrimũ wa gũtangĩka mũno. Kaingĩ mĩtangĩko ĩyo yanyitaga ũtukũ, ĩgatũma njũkĩre tondũ ndaiguaga ta ngoro yakwa ĩ na thĩna. Ũndũ ũcio nĩ wahahũraga mũno. No mahoya hamwe na gũthoma na gwĩcũrania maandĩko mamwe twendete nĩ gwatũteithagia kũigua tũhooreire. Ningĩ nĩ twacaririe ũrigitani, na ũndũ ũcio ũgĩtũteithia. Rĩu tũtikoragwo na mĩtangĩko mĩingĩ, na nĩ tũhoyaga Jehova atũteithie kũũmĩrĩria arĩa mahiũranagia na mĩtangĩko ta ĩyo.

Mũgĩtaarĩria ũrĩa mũhotete kũhiũrania na moritũ, mũraugire atĩ Jehova aamũkuuire ta “matumbĩ methĩ.” Mũrendaga kuuga atĩa?

Mats: Ciugo icio ciumanĩte na thimo ya Gĩthwaĩri ĩrĩa yugaga “Tumebebwa kama mayai mabichi,” na ũguo nĩ kuuga “Tũkuuĩtwo ta matumbĩ methĩ.” O ta ũrĩa mũndũ akuuaga matumbĩ methĩ arĩ na ũbacĩrĩru nĩguo matigakue, no taguo Jehova atũrũmbũyĩtie na wororo kũrĩa guothe tũtungatĩte. Hingo ciothe nĩ tũkoretwo na kĩrĩa tũrabatara, nginya makĩria ma kĩrĩa tũrabatara. Njĩra ĩmwe twĩyoneire wendo wa Jehova na ũteithio wake, nĩ kũgerera ũrĩa Kĩama Kĩrĩa Gĩtongoragia gĩtũrũmbũyagia.

Ann-Catrin: No ngwete ngerekano ĩmwe ĩronania ũrĩa Jehova aatũrũmbũirie na wororo. Mũthenya ũmwe nĩ twahũũrĩirũo thimũ kuuma mũciĩ Sweden, tũkĩmenyithio atĩ baba aarĩ thibitarĩ na aarĩ mũrwaru mũno. Nake Mats aakoretwo ahona malaria na mwĩrĩ wake ndwacoketie hinya. Tũtiarĩ na mbeca cia kũrĩha ndege ya kũinũka, kwoguo tũgĩtua itua rĩa kwendia ngaari itũ. No nĩ twahũũrĩirũo thimũ maita mangĩ merĩ; ĩmwe yarĩ ya mũrũ wa Ithe witũ ũmwe na mũtumia wake arĩa maaiguĩte ũrĩa maũndũ maitũ mahaana na nĩ meendaga kũrĩhĩra mũndũ ũmwe ndege. Nayo ĩyo ĩngĩ yarĩ ya mwarĩ wa Ithe witũ mũkũrũ ũrĩa waigĩte mbeca gathandũkũ-inĩ aandĩkĩte “Mũndũ ũrĩ na ũbataro.” Hatarĩ nganja Jehova aatũteithirie o ihinda rĩrĩa rĩagĩrĩire!—Ahib. 13:6.

Makĩria ma mĩaka 50 ĩrĩa mũkoretwo ũtungata-inĩ wa mahinda mothe-rĩ, nĩ maũndũ marĩkũ mwĩrutĩte?

Ann-Catrin: Nĩ ndĩrutĩte atĩ hinya witũ uumanaga na ithuĩ ‘gũikara tũhooreire na kuonania mwĩhoko.’ Rĩrĩa twehoka Jehova, nĩ atũrũagĩrĩra. (Isa. 30:15; 2 Maũ. 20:​15, 17) Nĩ ũndũ wa kwĩheana biũ ũtungata-inĩ ũrĩa wothe twĩhokeirũo, nĩ tũgĩĩte na irathimo nyingĩ ikĩrĩte iria tũngĩrĩ nacio korũo twathuurire gwĩka ũndũ ũngĩ.

Mats: Ũndũ ũrĩa mũnene ndĩrutĩte nĩ kwĩhokaga Jehova ũndũ-inĩ o wothe, na gweterera nyone ũrĩa ekũndeithia. (Thab. 37:5) Hingo ciothe akoretwo akĩndeithia o ta ũrĩa eranĩire. No tũthiaga na mbere kwĩyonera ũteithio wake nginya ihinda-inĩ rĩrĩ tũratungata Betheli bũrũri-inĩ wa Myanmar.

Nĩ mwĩhoko witũ atĩ andũ aingĩ ethĩ arĩa marenda kwandandũra ũtungata wao nĩ mekwĩyonera wendo mwĩhokeku wa Jehova o ta ũrĩa atuonetie. Twĩ na ma atĩ nĩ megũkorũo na gĩkeno, metĩkĩria Jehova amateithie gũkũra harĩa hothe mekũhandwo.