Teithagia Arĩa Marĩ na “Mwerekera Ũrĩa Wagĩrĩire”

1. Andũ maiyũkagia ndũmĩrĩri ya Ũthamaki na njĩra irĩkũ? (Atũmwo 13:​47, 48; 16:​14, 15)

ANDŨ aingĩ karine-inĩ ya mbere nĩ meetĩkĩrire ũhoro wa ma o rĩo thutha wa kũhunjĩrio. (Thoma Atũmwo 13:​47, 48; 16:​14, 15.) O na ũmũthĩ, andũ amwe nĩ makenaga mũno maigua ũhoro ũrĩa mwega rĩa mbere. Angĩ nao nĩ magaga gũkenio nĩ ũhoro wa Ũthamaki kĩambĩrĩria-inĩ, no thutha-inĩ makawĩtĩkĩra. Hihi twagĩrĩirũo gwĩka atĩa tũngĩona andũ marĩ na “mwerekera ũrĩa wagĩrĩire” tũkĩhunjia?

2. Nĩ na njĩra ĩrĩkũ wĩra witũ wa gũtua andũ arutwo ũngĩringithanio na wĩra ũrĩa mũrĩmi arutaga?

² No tũringithanie wĩra wa gũtua andũ arutwo na wĩra ũrĩa mũrĩmi arutaga. Mĩmera ndĩkũraga ũndũ ũmwe, kwoguo mũrĩmi angĩkora mĩmera ĩmwe ĩrĩ na maciaro mangĩgethwo amagethaga o rĩo. No nĩ athiaga na mbere gũtungata mĩmera ĩyo ĩngĩ. Na njĩra o ta ĩyo, tũngĩkora mũndũ wĩhaarĩirie gũthikĩrĩria ndũmĩrĩri itũ, tũbatiĩ kũmũteithia o rĩo nĩguo atuĩke mũrũmĩrĩri wa Jesu. Ihinda-inĩ o rĩu nĩ tũthiaga na mbere gũteithia arĩa mangĩbatara ihinda makĩria nĩguo mone bata wa kwĩruta Bibilia. (Joh. 4:​35, 36) Ũtaũku nĩ ũrĩtũhotithagia kũmenya ũrĩa tũgũteithia o mũndũ, gũkĩringana na ũrĩa ekũiyũkia ndũmĩrĩri itũ. Reke rĩu tuone ũrĩa tũngĩka tũkĩhunjĩria andũ rĩa mbere angĩkorũo nĩ mehaarĩirie gũtũthikĩrĩria. Ningĩ nĩ tũkuona ũrĩa tũngĩmateithia nĩguo makũre kĩĩroho.

RĨRĨA TWAKORA ANDŨ MEHAARĨIRIE GŨTŨTHIKĨRĨRIA

3. Twagĩrĩirũo gwĩka atĩa twacemania na andũ marakenio nĩ ndũmĩrĩri itũ? (1 Akorintho 9:26)

³ Rĩrĩa twakora andũ marakenio nĩ ũhoro, nĩ twagĩrĩirũo kũmateithia o rĩo nĩguo mambĩrĩrie kũgerera njĩra-inĩ ya muoyo. Kwoguo iceera-inĩ ritũ rĩa mbere, tũtibatiĩ kũmaĩrĩria kwambĩrĩria wĩruti wa Bibilia nao na kũmanyita ũgeni moke mĩcemanio-inĩ itũ.—Thoma 1 Akorintho 9:26.

4. Heana ngerekano ya mũndũ wehaarĩirie kũrutwo Bibilia o rĩo.

⁴ Ambĩrĩria wĩruti wa Bibilia. Andũ amwe tũhunjagĩria nĩ makoragwo mehaarĩirie kwambĩrĩria wĩruti wa Bibilia o rĩo. Kwa ngerekano, mũthenya ũmwe wa Aramithi, mũirĩtu ũmwe bũrũri-inĩ wa Canada nĩ aathiire gakaari-inĩ ka mabuku na akĩoya broshua ya Kenera Ũtũũro Tene na Tene! Mwarĩ wa Ithe witũ ũrĩa warĩ na gakaari kau nĩ aamũtaarĩirie atĩ nĩ tũhũthagĩra broshua ĩyo kwĩruta Bibilia na andũ hatarĩ marĩhi. Mũirĩtu ũcio nĩ aakenirio nĩ ũhoro ũcio na akĩhe mwarĩ wa Ithe witũ ũcio namba yake ya thimũ. Thutha-inĩ mũthenya o ro ũcio nĩ aandĩkĩire mwarĩ wa Ithe witũ ũcio ndũmĩrĩri, akĩmũũria nĩ rĩ mekwambĩrĩria kwĩruta. Rĩrĩa mwarĩ wa Ithe witũ ũcio aamwĩrire atĩ no mambĩrĩrie wikendi ĩyo, mũirĩtu ũcio aamwĩrire ũũ: “Hihi no ũke rũciũ? Nĩ ngaakorũo kuo.” Makĩambĩrĩria wĩruti wa Bibilia mũthenya ũcio wa Njumaa, na mũirĩtu ũcio agĩthiĩ mũcemanio rĩa mbere wikendi ĩyo, na akĩambĩrĩria gũkũra kĩĩroho atekũmaĩrĩria.

5. Tũngĩonania ũtaũku atĩa rĩrĩa tũrenda kwambĩrĩria wĩruti wa Bibilia na mũndũ? (Ningĩ rora mbica.)

⁵ Ma nĩ atĩ, tũtingĩrĩgĩrĩra atĩ andũ othe arĩa tũkũhunjĩria nĩ megũkorũo makĩĩrirĩria kwĩruta Bibilia ta mũirĩtu ũcio. Amwe no mabatare gũteithĩrĩrio kwa ihinda nĩguo makũrie wendi ũcio. No tũbatare kwamba kwarĩrĩria nao ũndũ ũrĩa ũramagucĩrĩria. No tũngĩkorũo na muonere ũrĩa wagĩrĩire na tũthiĩ na mbere kũmonia atĩ nĩ tũrakenio nĩo, thutha wa ihinda inini no mende kũgĩa na wĩruti wa Bibilia. Nĩ ciugo ta irĩkũ tũngĩhũthĩra tũkĩmataarĩria igũrũ rĩgiĩ wĩruti wa Bibilia? Kĩũria kĩu nĩ kĩoririo aarĩ na ariũ a Ithe witũ makoragwo na ũhoti mwega wa kwambĩrĩria wĩruti wa Bibilia na andũ.

6. Tũngĩhũthĩra ciugo ta irĩkũ tũgĩtaarĩria mũndũ mũbango wa kwĩruta Bibilia?

⁶ Ahunjia na mapainia arĩa mooririo kĩũria kĩu, maataarĩirie atĩ mabũrũri-inĩ mamwe nĩ wega gwĩthema kũhũthĩra ciugo ta “wĩruti,” “gĩthomo kĩa Bibilia,” kana “gũkũruta” rĩrĩa tũrataarĩria mũbango wa kwĩruta Bibilia. Nĩ monete atĩ mũndũ no agĩe na maumĩrĩro mega angĩhũthĩra ciugo ta “gũteereta,” “kwarĩrĩria,” na “kũmenya Bibilia wega.” Nĩguo mũndũ agĩe na wendi wa gũgaagũthikĩrĩria hĩndĩ ĩngĩ, no ũmwĩre, “Nĩ ũgũkena kuona ũrĩa Bibilia ĩcokagia ciũria iria tũkoragwo nacio,” kana “Bibilia ndĩaragĩrĩria o ũhoro wa Ngai, no nĩ ĩkoragwo na motaaro mangĩtũteithia ũtũũro-inĩ wa o mũthenya.” Ningĩ no ũmwĩre: “Tũtiikaraga mũno. No tũhũthĩre kĩndũ ta ndagĩka 10 kana 15 na tũkorũo tweruta ũndũ wa bata.” No tũmũtaarĩrie na njĩra ta ĩyo tũtekũhũthĩra ciugo ta, “nĩ twagĩa kĩrĩko” kana “ndĩrĩũkaga o kiumia,” tondũ ciugo icio no itũme aigue ta twamuoha.

7. Nĩ rĩ andũ amwe mataũkagĩrũo atĩ mararutwo ma cia Bibilia? (1 Akorintho 14:​23-25)

⁷ Manyite ũgeni mũcemanio-inĩ wa kĩũngano. Matukũ-inĩ ma mũtũmwo Paulo, kwahoteka andũ amwe maataũkagĩrũo atĩ mararutwo ma cia Bibilia thutha wa gũthiĩ rĩa mbere mũcemanio-inĩ wa Gĩkristiano. (Thoma 1 Akorintho 14:​23-25.) O na ũmũthĩ, kaingĩ ũguo nĩguo gũthiaga. Arutwo aingĩ a Bibilia nĩ makũraga na ihenya kĩĩroho mambĩrĩria gũka mĩcemanio-inĩ. Wagĩrĩirũo kũmanyita ũgeni rĩ? Ithomo rĩa 10 rĩa ibuku rĩa Kenera Ũtũũro Tene na Tene! nĩ rĩkĩraga mũrutwo ngoro athiĩ mĩcemanio, no tũtirabatara gweterera nginya tũkinye ithomo-inĩ rĩu nĩguo tũmũnyite ũgeni. Kuuma o mũthenya wa mbere wahunjĩria mũndũ, no ũmũnyite ũgeni mũcemanio wa mũthia wa kiumia kĩu, na hihi ũmũgwetere kĩongo kĩa mĩario ya andũ othe kana ũndũ ũmwe ũkaarĩrĩrio Wĩruti-inĩ wa Mũrangĩri wa kiumia kĩu.

8. Nĩ maũndũ ta marĩkũ tũngĩtaarĩria mũndũ rĩrĩa tũramũnyita ũgeni oke mĩcemanio-inĩ itũ? (Isaia 54:13)

⁸ Tũkĩnyita mũndũ ũgeni mĩcemanio-inĩ itũ, no tũmũtaarĩrie ũrĩa ĩkoragwo ĩrĩ ngũrani na ndini iria anathiĩ. Rĩrĩa mũrutwo ũmwe wa Bibilia aathiire rĩa mbere mũcemanio-inĩ wa mũthia wa kiumia, ooririe mwarimũ wake ũũ igũrũ rĩgiĩ Wĩruti wa Mũrangĩri: “Hihi mũndũ ũcio ũgũtongoragia akoragwo oĩ marĩĩtwa ma andũ othe?” Mwarĩ wa Ithe witũ ũcio aamũtaarĩirie atĩ ithuothe nĩ twĩrutanagĩria kũmenya marĩĩtwa ma andũ othe kĩũngano-inĩ, o ta ũrĩa tũmenyaga marĩĩtwa ma andũ aitũ a famĩlĩ. Mũrutwo ũcio oonire ũndũ ũcio ũrĩ ngũrani na ũrĩa gũkoragwo kanitha-inĩ yao. Ũndũ ũngĩ arutwo aingĩ a Bibilia monaga ũrĩ ngũrani, nĩ muoroto wa mĩcemanio itũ. (Thoma Isaia 54:13.) Tũcemanagia nĩguo tũthathaiye Jehova, tũrutwo nĩwe, na twĩkĩrane ngoro. (Ahib. 2:12; 10:​24, 25) Nĩ ũndũ ũcio tũtikoragwo na mũtugo mũna wa kĩĩndini tũrũmagĩrĩra, no mĩcemanio itũ ĩkoragwo ĩbangĩtwo wega nĩguo ĩtũteithie kwĩruta. (1 Kor. 14:40) Ningĩ Nyũmba citũ cia Ũthamaki ikoragwo irĩ na ũtheri wa kũigana, tondũ tũkoragwo tũthiĩte kuo kwĩruta. Na tondũ tũtinyitaga mbaru maũndũ ma gĩũteti, tũtimaaragĩrĩria mĩcemanio-inĩ, o na kana tũgaikanĩria ciugo tũgĩkararanĩria ũndũ mũna. No ũkorũo ũrĩ ũndũ mwega kuonia mũrutwo o kabere video ya Nĩ Maũndũ Marĩkũ Mekagwo Nyũmba-inĩ ya Ũthamaki? nĩguo akorũo akĩmenya maũndũ marĩa ekwĩrĩgĩrĩra oka.

9-10. Nĩ maũndũ ta marĩkũ tũngĩra mũndũ ũrĩa tũranyita ũgeni nĩguo ndagetigĩre gũka mĩcemanio-inĩ itũ? (Ningĩ rora mbica.)

⁹ Andũ amwe nĩ metigagĩra gũka mĩcemanio-inĩ itũ magĩciria atĩ nĩ tũkũmeera matuĩke a ndini itũ. Teithia mũndũ gũtaũkĩrũo atĩ nĩ twendete ageni na tũtimatindĩkagĩrĩria matuĩke a ndini itũ kana kũruta macokio mĩcemanio-inĩ. Tũnyitaga andũ othe ũgeni, nginya arĩa marĩ na ciana nini. Mĩcemanio-inĩ itũ, ciana itirutagwo irĩ ciki, no cikaraga hamwe na aciari a cio makarutwo othe marĩ hamwe. Nĩ ũndũ ũcio mũciari nĩ akoragwo akĩmenya harĩa mwana wake arĩ na maũndũ marĩa ararutwo. (Gũcok. 31:12) Ningĩ tũtihĩtũkagia kĩndũ gĩa kũngania mĩhothi. Handũ ha ũguo, tũrũmagĩrĩra watho ũyũ wa Jesu: “Mũheetwo tũhũ, heanagai tũhũ.” (Mat. 10:8) Ũndũ ũngĩ ũngĩgwetera mũndũ ũcio nĩ atĩ ndarabatara kwĩhumba nguo cia goro, tondũ Ngai aroraga ngoro no ti ũrĩa mũndũ ahaana na igũrũ.—1 Sam. 16:7.

¹⁰ Rĩrĩa mũndũ ũcio oka mũcemanio-inĩ, mũteithie kũigua aiganĩire. Mũmenyithanie na athuri a kĩũngano o hamwe na ahunjia arĩa angĩ. Mũndũ ũcio no ende gũka hĩndĩ ĩngĩ angĩona atĩ nĩ amũkĩrũo wega. Mũcemanio ũgĩthiĩ na mbere, no mũhũthĩre hamwe nake Bibilia yaku angĩkorũo ndarĩ nayo, na ũmũteithie kũrũmanĩrĩra na mwaria kana gĩcunjĩ kĩrĩa mũrathoma.

RĨRĨA ŨRAMBĨRĨRIA WĨRUTI WA BIBILIA

11. Ũngĩonania atĩa atĩ nĩ ũratĩa mahinda ma mwene nyũmba?

¹¹ Nĩ maũndũ marĩkũ wagĩrĩirũo kũririkana rĩrĩa ũreruta na mũndũ Bibilia? Onania atĩ nĩ ũratĩa mahinda ma mwene nyũmba. Kwa ngerekano, mũngĩrĩkanĩra thaa iria mũgũcemania, tigĩrĩra atĩ ndũnacererũo, o na angĩkorũo andũ a itũũra rĩanyu matitindanagĩra na kũiga mahinda. Ningĩ nĩ wega riita rĩa mbere kwaga kũhũthĩra mahinda maingĩ. Ahunjia amwe marĩ na ũmenyeru nĩ monete arĩ wega kwaga kũhũthĩra mahinda maingĩ hĩndĩ ta ĩyo, o na angĩkorũo mũndũ ũcio nĩ arenda kwĩruta makĩria. Ningĩ nĩ ũndũ wa bata kwaga kwaria mũno, handũ ha ũguo ũreke mwene nyũmba eyarie.—Thim. 10:19.

12. Twagĩrĩirũo gũkorũo na muoroto ũrĩkũ tũkĩambĩrĩria kwĩruta Bibilia na mũndũ?

¹² Kuuma o kĩambĩrĩria, muoroto waku wagĩrĩirũo gũkorũo ũrĩ gũteithia arutwo kũmenya Jehova na Jesu na kũmenda. Ĩka ũguo na njĩra ya kũmonia ũrĩa Bibilia yugaga handũ ha kũmeera ũrĩa ũreciria. (Atũm. 10:​25, 26) Mũtũmwo Paulo nĩ aaigire kĩonereria kĩega ũndũ-inĩ ũcio, tondũ akĩrutana eerekagĩria meciria ma andũ harĩ Jesu Kristo, ũrĩa watũmĩtwo nĩ Jehova nĩguo atũteithie kũmũmenya na kũmwenda. (1 Kor. 2:​1, 2) Ningĩ Paulo nĩ oonanirie wega ũrĩa arĩ ũndũ wa bata gũteithia arutwo gũkũria ngumo njega, iria ingĩringithanio na thahabu, betha, na mahiga ma goro. (1 Kor. 3:​11-15) Ngumo icio nĩ ta wĩtĩkio, ũũgĩ, ũtaũku, na gwĩtigĩra Jehova. (Thab. 19:​9, 10; Thim. 3:​13-15; 1 Pet. 1:7) Wĩgerekanagie na Paulo ũkĩrutana na njĩra ya gũteithia arutwo aku gũkũria wĩtĩkio mũrũmu na kũgĩa na ũrata wa hakuhĩ hamwe na Ithe witũ wa igũrũ ũtwendete.—2 Kor. 1:24.

13. Tũngĩonania wetereri na ũtaũku atĩa tũgĩteithia arutwo aitũ a Bibilia? (2 Akorintho 10:​4, 5) (Ningĩ rora mbica.)

¹³ Wĩgerekanagie na Jesu na njĩra ya kũrutana ũrĩ na wetereri na ũtaũku. Wĩtheme kũũria mũrutwo waku ciũria ingĩmũconorithia. Angĩkorũo harĩ na ũndũ araremwo gũtaũkĩrũo nĩguo, no mwambe mũtigane naguo mũrĩcoka ho thutha-inĩ. Angĩkorũo ndehaarĩirie gwĩtĩkia ũrutani mũna wa Bibilia, ndũkamũtindĩkĩrĩrie. Mũhe ihinda rĩa kũwĩcũrania nĩguo ũingĩre ngoro-inĩ yake. (Joh. 16:12; Kol. 2:​6, 7) Bibilia yugaga atĩ morutani ma maheeni no maringithanio na ‘maũndũ marũmĩte mũno’ marĩa tũbatiĩ “gũtharũria.” (Thoma 2 Akorintho 10:​4, 5.) Mũrutwo no aritũhĩrũo gũtigana na ũndũ atũũrĩte etĩkĩtie kwa ihinda iraihu. Kwoguo tũrabatara kwamba kũmũteithia akũrie ũrata mũrũmu hamwe na Jehova. Ũndũ ũcio no ũteithie mũrutwo ũcio ahote gũtigana na morutani marĩa mangĩkorũo marũmĩte mũno ngoro-inĩ yake.

ŨRĨA TŨNGĨTEITHIA ARĨA MOKA RĨA MBERE MĨCEMANIO-INĨ ITŨ

14. Twagĩrĩirũo kũrũmbũyania atĩa na arĩa moka rĩa mbere mĩcemanio-inĩ itũ?

¹⁴ Jehova endaga tũrũmbũyanie na arĩa angĩ tũtarĩ na mũthutũkanio, gũtekũmakania kũrĩa moimĩte, ũndũire wao, kana ũhoti wao wa kĩĩmbeca. (Jak. 2:​1-4, 9) Kwoguo tũngĩonania atĩa wendo harĩ arĩa moka rĩa mbere mĩcemanio-inĩ itũ?

15-16. Tũngĩka atĩa nĩguo arĩa mokĩte rĩa mbere mĩcemanio-inĩ maigue maiganĩire?

¹⁵ Andũ amwe mokaga mĩcemanio-inĩ itũ makĩenda tu kũmenya ũrĩa ĩkagwo, kana magakorũo mekĩrĩtwo ngoro maceere nĩ mũndũ ũikaraga kũndũ kũngĩ. Kwoguo ũngĩona mũndũ ũkĩte rĩa mbere mũcemanio-inĩ, ndũgetigĩre gũthiĩ kũmũgeithia. Mũnyite ũgeni ũcanjamũkĩte no ndũgakĩrie njano. No mũikaranie nake na mũhũthĩre hamwe nake Bibilia yaku na mabuku marĩa marahũthĩrũo, kana ũmũcarĩrie ciake. Ningĩ no wĩcirie maũndũ mangĩ ũngĩka nĩguo ũtũme aigue aiganĩire. Kwa ngerekano, mũthuri ũmwe wathiire Nyũmba-inĩ ya Ũthamaki nĩ eerire mũrũ wa Ithe witũ ũmwe wamũgeithirie atĩ nĩ aaiguaga thoni tondũ ndeehumbĩte wega ta andũ arĩa angĩ. Mũrũ wa Ithe witũ ũcio aamwĩrire ndakamake tondũ Aira a Jehova no andũ ta arĩa angĩ, na ũndũ ũcio ũgĩtũma mũthuri ũcio aigue ahoorera. Mũthuri ũcio nĩ aathiire na mbere nginya akĩbatithio, na ndarĩ aariganĩrũo nĩ ciugo iria eerirũo nĩ mũrũ wa Ithe witũ ũcio. O na kũrĩ ũguo, rĩrĩa tũraaria na arĩa mokĩte mĩcemanio rĩa mbere, nĩ twagĩrĩirũo kwĩmenyerera tũtikaingĩrĩre maũndũ mao ma thĩinĩ.—1 Pet. 4:15.

¹⁶ Ningĩ no tũmateithie kũigua maiganĩire angĩkorũo nĩ tũkuonania gĩtĩo tũkĩarĩrĩria andũ matarĩ Aira a Jehova kana maũndũ marĩa metĩkĩtie, akorũo nĩ ndeereti-inĩ citũ, kana nĩ rĩrĩa tũraruta macokio kana icunjĩ mĩcemanio-inĩ. Wĩtheme kũhũthĩra ciugo ingĩmahĩnga kana imatuurithie. (Tit. 2:8; 3:2) Kwa ngerekano, tũtibatiĩ kũmenereria wĩtĩkio wa andũ arĩa angĩ. (2 Kor. 6:3) Ariũ a Ithe witũ arĩa marutaga mĩario ya andũ othe nĩ mabatiĩ kwĩmenyerera o na makĩria ũndũ-inĩ ũcio. Ningĩ no monanie atĩ nĩ mareciria athikĩrĩria arĩa matarĩ Aira a Jehova na njĩra ya gũtaarĩria ciugo kana ũhoro ũrĩa mangĩremwo gũtaũkĩrũo.

17. Twagĩrĩirũo gwĩka atĩa rĩrĩa tuona arĩa marĩ na “mwerekera ũrĩa wagĩrĩire”?

¹⁷ O ũrĩa mahinda marathiĩ noguo tũrabatara gwĩkĩra kĩyo wĩra-inĩ witũ wa gũtua andũ arutwo, na gũthiĩ na mbere gũcaria arĩa marĩ na “mwerekera ũrĩa wagĩrĩire wa kũheo muoyo wa tene na tene.” (Atũm. 13:48) Rĩrĩa tuona andũ a mũthemba ũcio, tũbatiĩ kwambĩrĩria kwĩruta Bibilia nao tũtekũmaĩrĩria na tũmanyite ũgeni moke mĩcemanio-inĩ itũ. Tũngĩka ũguo, nĩ tũkũmateithia kwambĩrĩria kũgerera “[njĩra-inĩ] ĩrĩa ĩkinyagia andũ muoyo-inĩ.”—Mat. 7:14.