Hũthĩra Wega Ihinda Rĩrĩa Ũtarĩ Thĩinĩ Wa Kĩhiko
“Ũrĩa ũkũhota gwĩtĩkĩra ũhoro ũcio, nĩawĩtĩkĩre.”—MAT. 19:12.
1, 2. (a) Jesu, Paulo, na andũ angĩ moonaga atĩa ũhoro wa mũndũ gũkorũo atarĩ thĩinĩ wa kĩhiko? (b) Nĩ kĩĩ kĩngĩtũma amwe mone mũndũ gũkorũo atarĩ thĩinĩ wa kĩhiko ta atarĩ kĩheo?
HATARĨ nganja-rĩ, kĩhiko nĩ kĩmwe kĩa iheo iria njega mũno Ngai aheete andũ. (Thim. 19:14) No rĩrĩ, Akristiano aingĩ matarĩ thĩinĩ wa kĩhiko o nao no makenagĩra mũtũũrĩre mwega na makaiganĩra. Mũrũ ũmwe wa Ithe witũ ũtarĩ wahikania wĩtagwo Harold, ũrĩa wĩna ũkũrũ wa mĩaka 95 oigire ũũ: “O na gũtuĩka nĩ ngenagĩra gũkorũo hamwe na andũ arĩa angĩ na kũmatuga-rĩ, rĩrĩa ndĩ wiki ndiguaga ihooru. No njuge atĩ nĩ ndĩ kĩheo gĩa gũkorũo itarĩ thĩinĩ wa kĩhiko.”
2 Na ma-rĩ, Jesu Kristo o na mũtũmwo Paulo nĩ maaririe ũhoro wa mũndũ gũikara atarĩ thĩinĩ wa kĩhiko. Mũtũmwo Paulo o na nĩ oigire atĩ mũndũ gũikara atarĩ thĩinĩ wa kĩhiko nĩ kĩheo kuuma kwĩ Ngai, o ta ũrĩa kĩhiko arĩ kĩheo. (Thoma Mathayo 19:11, 12; 1 Akorintho 7:7.) No o na kũrĩ ũguo-rĩ, andũ amwe matarĩ thĩinĩ wa kĩhiko no mende mũno kũhika kana kũhikania. Rĩngĩ na rĩngĩ maũndũ matiganĩte nĩ matũmaga mũndũ aage mũndũ maganĩrĩirũo. Kana angĩ thutha wa mĩaka mĩingĩ kĩhiko-inĩ, magekora marĩ oiki nĩ ũndũ wa ndigano kana gũkuĩrũo nĩ mũthuri kana mũtumia wao. Hakĩrĩ ũguo-rĩ, nĩ na njĩra ĩrĩkũ kwaga gũkorũo thĩinĩ wa kĩhiko arĩ kĩheo? Ningĩ-rĩ, Akristiano mangĩhũthĩra wega ihinda rĩrĩa matarĩ thĩinĩ wa kĩhiko atĩa?
Kĩheo kĩa Mwanya
3. Nĩ maũndũ marĩkũ mega Akristiano arĩa matarĩ thĩinĩ wa kĩhiko makenagĩra?
3 Kaingĩ mũndũ ũtarĩ thĩinĩ wa kĩhiko nĩ akoragwo na mahinda maingĩ na wĩyathi gũkĩra ũrĩa wĩ thĩinĩ wa kĩhiko. (1 Kor. 7:32-35) Macio nĩ maũndũ ma mwanya marĩa mangĩteithia mũndũ kwandandũra ũtungata wake, kũgĩa na arata aingĩ, na gũkuhĩrĩria Jehova makĩria. Nĩ ũndũ ũcio-rĩ, Akristiano amwe nĩ mamenyete bata wa gũikara matarĩ thĩinĩ wa kĩhiko na ‘magetĩkĩra’ gũikara ũguo kwa ihinda. Angĩ no makorũo matiabangĩte gũikara matarĩ thĩinĩ wa kĩhiko, no rĩrĩa maũndũ mao maagarũrũkire nĩ meeciririe ũndũ ũcio na ũritũ, na makĩona atĩ marĩ na ũteithio kuuma kwĩ Jehova, no mahote kũhoorera ngoro. Kwoguo, magĩĩtĩkĩra ũgarũrũku ũcio na magĩtua itua rĩa gũikara matarĩ thĩinĩ wa kĩhiko.—1 Kor. 7:37, 38.
4. Akristiano arĩa matarĩ thĩinĩ wa kĩhiko mangĩigua maiganĩire ũtungata-inĩ wa Ngai nĩkĩ?
4 Akristiano arĩa matarĩ thĩinĩ wa kĩhiko nĩ moĩ atĩ to nginya mahike kana mahikanie nĩ getha metĩkĩrũo na moneke marĩ a bata harĩ Jehova kana ithondeka rĩake. Wendo wa Ngai nĩ ũtũgunaga ithuothe o mũndũ o mũndũ. (Mat. 10:29-31) Gũtirĩ mũndũ kana kĩndũ kĩngĩtũtigithũkania na wendo wa Ngai. (Rom. 8:38, 39) Akorũo tũrĩ thĩinĩ wa kĩhiko kana aca-rĩ, tũrĩ na itũmi njiganu cia kũigua tũiganĩire ũtungata-inĩ wa Ngai.
5. Nĩ ũndũ ũrĩkũ ũbataranagia nĩguo mũndũ agunĩke biũ nĩ gũkorũo atarĩ thĩinĩ wa kĩhiko?
5 No o na kũrĩ ũguo-rĩ, o ta iheo cia ũini kana mathako, kĩheo kĩu no mũhaka kĩrĩmĩrũo nĩguo kĩrehe ũguni wakĩo biũ. Akristiano arĩa matarĩ thĩinĩ wa kĩhiko ũmũthĩ—marĩ ariũ kana aarĩ a Ithe witũ, marĩ akũrũ kana ethĩ, marĩ ũguo nĩ ũndũ wa kwĩyendera kana nĩ ũndũ wa itũmi ingĩ—mangĩhũthĩra ũtũũro wao wega atĩa? Rekei twĩcũranie ũhoro wa cionereria ingĩtũũmĩrĩria cia Akristiano a tene na tuone maũndũ marĩa tũngĩĩruta.
Gũkorũo Ũtarĩ Thĩinĩ wa Kĩhiko Hĩndĩ ya Wĩthĩ
6, 7. (a) Nĩ gĩtĩo kĩrĩkũ airĩtu a Filipu maarĩ nakĩo ũtungata-inĩ wa Ngai? (b) Nĩ na njĩra irĩkũ Timotheo aahũthĩrire wega mĩaka yake rĩrĩa ataahikanĩtie, na aarathimirũo atĩa nĩ ũndũ wa gwĩtĩkĩra gũtungata arĩ mwĩthĩ?
6 Filipu ũrĩa warĩ mũhunjia aarĩ na airĩtu ana arĩa maarĩ na kĩyo gĩa kũhunjia o ta ithe wao. (Atũm. 21: 8, 9) Kũratha kwarĩ kĩmwe kĩa iheo cia roho mũtheru, na airĩtu acio nĩ maahũthĩrire kĩheo kĩu kũhingia ũrathi ũrĩa wĩ thĩinĩ wa Joel. 2:28, 29.
7 Timotheo aarĩ mũndũ mwĩthĩ wahũthĩrire wanake wake na njĩra njega. Kuuma e mwana nĩ aarutĩtwo “Maandĩko marĩa matheru” nĩ nyina Eunike, o na cũwe Loisi. (2 Tim. 1:5; 3:14, 15) No kũhoteke maatuĩkire Akristiano mwaka-inĩ wa 47 M.M. thutha wa Paulo gũceera Lusitera, kũrĩa maikaraga. Mĩaka ĩĩrĩ thutha ũcio, rĩrĩa Paulo aaceerire kuo riita rĩa kerĩ, hihi Timotheo aarĩ na mĩaka ta 20 ũguo. O na gũtuĩka aarĩ mũnyinyi na ndaaikarĩte mũno ũhoro-inĩ wa ma-rĩ, Timotheo “aarĩ na ngumo njega” harĩ athuri a kĩũngano a Lusitera na a Ikonio. (Atũm. 16:1, 2) Nĩ ũndũ ũcio, Paulo akĩĩra Timotheo mathiage nake maceera-inĩ ma ũtungata. (1 Tim. 1:18; 4:14) Tũtingiuga tũrĩ na ũũma atĩ Timotheo ndaahikanirie. No nĩ tũũĩ atĩ e mwanake, nĩ eetĩkĩrire rĩĩtana rĩa Paulo, na kwa mĩaka mĩingĩ thutha ũcio agĩkenera gũtungata atahikanĩtie arĩ mishonarĩ na mũrori.—Afil. 2:20-22.
8. Nĩ kĩĩ gĩatũmire Mariko athingate mĩoroto ya kĩĩroho, na onire irathimo irĩkũ nĩ ũndũ wa gwĩka ũguo?
8 Arĩ mũndũ mwĩthĩ, Johana ũrĩa wetagwo Mariko, nĩ aahũthĩrire wega mĩaka yake rĩrĩa ataahikanĩtie. We na nyina, Mariamu, na Baranaba mũrũ wa tatawe, maarĩ a kĩũngano kĩa Jerusalemu. Kũroneka atĩ Mariko matiarĩ andũ athĩni, tondũ maaikaraga nyũmba yao ene thĩinĩ wa taũni na nginya maarĩ na mũruti wa wĩra. (Atũm. 12:12, 13) O na marĩ atongu-rĩ, Mariko ndaarũmagĩrĩra ikeno kana maũndũ ma kwĩguna we mwene, ningĩ ndeeciragia o ũrĩa angĩhikania na agĩe na mũtũũrĩre mwega. No gũkorũo gũikarania na atũmwo nĩkuo gwatũmire agĩe na wendi wa gũtungata arĩ mishonarĩ. Kwoguo arĩ na wendi mũnene agĩthiĩ hamwe na Paulo na Baranaba rũgendo-inĩ rwao rwa mbere rwa ũmishonarĩ arĩ wa kũmatungatagĩra. (Atũm. 13:5) Thutha-inĩ, nĩ maagendire na Baranaba, na nĩ tũthomaga atĩ thutha ũcio nĩ maatungatire thĩinĩ wa Babuloni marĩ na Petero. (Atũm. 15:39; 1 Pet. 5:13) Tũtiũĩ wega Mariko aaikarire kahinda kaigana atĩa atahikanĩtie. No nĩ aagĩire na ngumo njega ya mũndũ werutĩire gũtungatĩra arĩa angĩ na werutanagĩria makĩria ũtungata-inĩ wa Ngai.
9, 10. Akristiano ethĩ arĩa matarĩ thĩinĩ wa kĩhiko marĩ na mĩeke ĩrĩkũ ya kwandandũra ũtungata wao? Heana ngerekano.
9 Andũ aingĩ ethĩ ũmũthĩ thĩinĩ wa kĩũngano nĩ makenagĩra kũhũthĩra ihinda rĩao rĩrĩa matarĩ thĩinĩ wa kĩhiko kwandandũra ũtungata wao. O ta Mariko na Timotheo, nĩ mamenyaga atĩ gũkorũo matarĩ thĩinĩ wa kĩhiko nĩ kũmateithagia ‘gũikaraga meheanĩte kwĩ Mwathani matekũgucĩrĩrio nĩ maũndũ mangĩ.’ (1 Kor. 7:35) Ũcio nĩ ũguni mũnene. Kũrĩ na mĩeke mĩingĩ: ta ũpainia, gũtungata kũrĩa kwĩ na bata mũnene wa ahunjia, kwĩruta rũthiomi rũngĩ, gũteithĩrĩria mĩako-inĩ ya wabici cia honge na Nyũmba cia Ũthamaki, gũthiĩ Cukuru ya Kũmenyeria Maũndũ ma Ũtungata (MTS), na gũtungata Betheli. Angĩkorũo ũrĩ mũndũ mwĩthĩ na ndũrĩ thĩinĩ wa kĩhiko-rĩ, hihi nĩ ũrahũthĩra wega mĩeke ĩrĩa ũrĩ nayo?
10 Mũrũ ũmwe wa Ithe witũ wĩtagwo Mark aambĩrĩirie ũpainia arĩ mũndũ mũnini, agĩthiĩ Cukuru ya Kũmenyeria Maũndũ ma Ũtungata na nĩ atungatĩte kũndũ kũingĩ thĩinĩ wa thĩ. Agĩcokia meciria na thutha mĩaka-inĩ ĩyo 25 ya ũtungata wa mahinda mothe-rĩ, oigire ũũ: “Nĩngeretie kũrutithania wĩra na andũ othe kĩũngano-inĩ, kũhunjia nao, kũmateithia kĩĩroho, kũmanyita ũgeni gwakwa tũkarĩanĩra nao, na kũbanga maũndũ ma gwĩkenia hamwe twĩ na muoroto wa gwakana kĩĩroho. Maũndũ macio mothe nĩ mandeheire gĩkeno kĩnene ma.” O ta ũguo ciugo icio cia Mark ironania-rĩ, gĩkeno kĩrĩa kĩnene mũtũũrĩre-inĩ kiumanaga na kũheana, na ũtungata wa mahinda mothe nĩ ũheaga mũndũ mĩeke mĩingĩ ya gũteithia arĩa angĩ. (Atũm. 20:35) O na ũngĩkorũo wendete kana ũgathomera maũndũ marĩkũ, kana wĩ na ũũgĩ ũrĩkũ mũtũũrĩre-inĩ, kũrĩ na wĩra mũingĩ wa Mwathani andũ ethĩ mangĩruta ũmũthĩ.—1 Kor. 15:58.
11. Kwaga gũtengʼerera kĩhiko kũrĩ na ũguni ũrĩkũ?
11 O na gũtuĩka andũ aingĩ ethĩ no mende gũkaahikania kana kũhika-rĩ, harĩ bata kwaga gũtengʼerera ũndũ ũcio. Paulo arekĩra andũ ethĩ ngoro meterere mahĩtũke mĩaka ya wĩthĩ rĩrĩa merirĩria ma ngomanio makoragwo marĩ na hinya mũno. (1 Kor. 7:36) Mahinda nĩ mabataranagia nĩguo mũndũ emenye wega na agĩe na ũũgĩ mũtũũrĩre-inĩ ũrĩa ũbataranagia nĩguo athuure ũrĩa maganĩrĩirũo. Mĩĩhĩtwa ya kĩhiko nĩ ũndũ mũritũ, yagĩrĩirũo nĩ gũtũũra o nginya rĩrĩa mũndũ agaakua.—Koh. 5:2-5.
Gũkorũo Ũtarĩ Thĩinĩ wa Kĩhiko Mĩaka-inĩ ya Thutha
12. (a) Mũtumia wa ndigwa, Anna, aahiũranirie atĩa na ũgarũrũku ũtũũro-inĩ wake? (b) Aagĩire na kĩrathimo kĩrĩkũ?
12 Anna ũrĩa ũgwetetwo thĩinĩ wa Injiri ya Luka, nĩ aaiguire ihooru nĩ gũkuĩrũo hi-na-hi nĩ mũthuriwe thutha wa mĩaka mũgwanja tu kuuma maahikania. Tũtiũĩ kana nĩ maarĩ na ciana, kana nĩ eeciragia kũhika rĩngĩ. No Bibilia ĩtwĩraga atĩ arĩ na ũkũrũ wa mĩaka 84, Anna aarĩ o wa ndigwa. Kuumana na ũrĩa Bibilia ĩtwĩraga, no tuuge atĩ Anna aahũthĩrire ũgarũrũku ũcio gũkuhĩrĩria Jehova makĩria. We “ndoimaga hekarũ, no aatũire aturagĩria Ngai ndu akamũhoyaga ũtukũ na mũthenya akĩĩhingaga kũrĩa irio, na akĩmũthaithaga.” (Luk. 2:36, 37) Kwoguo aaigaga maũndũ ma kĩĩroho mbere mũtũũrĩre-inĩ wake. Ũndũ ũcio nĩ wabataraga kwĩrutanĩria na kĩyo, no nĩ aarathimirũo mũno. Nĩ aaheirũo gĩtĩo gĩa kuona Jesu arĩ gakenge na kũrutĩra arĩa angĩ ũira igũrũ rĩgiĩ ũkũũri ũrĩa watanyĩtwo kũrehũo nĩ Mesia ũcio.—Luk. 2:38.
13. (a) Nĩ ũndũ ũrĩkũ wonanagia atĩ Dorokasi nĩ aanyitanagĩra biũ na kĩũngano? (b) Wega na ũtugi wa Dorokasi watũmire agĩe na ngerenwa ĩrĩkũ?
13 Mũtumia wetagwo Dorokasi, kana Tabitha, aaikaraga Jopa, itũũra rĩarĩ rũgũrũ rwa Jerusalemu hakuhĩ na iria. Tondũ Bibilia ndĩgwetaga mũthuri wake-rĩ, hihi kahinda-inĩ kau ndaarĩ mũhiku. Dorokasi “aatũire arutaga mawĩra mega, na akaheanaga indo cia gũtugana.” Kũroneka atĩ nĩ aatumagĩra atumia a ndigwa na andũ angĩ nguo nyingĩ na ũndũ ũcio nĩ watũmaga mamwende mũno. Kwoguo rĩrĩa aarwarire hi-na-hi na agĩkua-rĩ, kĩũngano gĩothe gĩgĩtũmanĩra Petero gĩkĩmũthaitha oke ariũkie mwarĩ wa Ithe wao ũcio mendete. Rĩrĩa ũhoro wa kũriũka gwake wahunjire Jopa guothe, andũ aingĩ magĩtuĩka etĩkia. (Atũm. 9:36-42) Nĩ ũndũ wa gũkorũo arĩ mũtugi mũno, Dorokasi we mwene hihi nĩ aateithĩtie amwe ao.
14. Nĩ kĩĩ gĩtũmaga Akristiano arĩa matarĩ thĩinĩ wa kĩhiko makuhĩrĩrie Jehova makĩria?
14 O ta Anna na Dorokasi, andũ aingĩ thĩinĩ wa ciũngano nĩ mekoraga marĩ oiki mĩaka-inĩ ya thutha. Amwe hihi nĩ maagire mũndũ ũmaagĩrĩire mangĩhikania nake. Angĩ nĩ matiganĩte kana magakuĩrũo. Nĩ ũndũ wa kwaga mũthuri kana mũtumia mangĩhingũranĩra ngoro-rĩ, Akristiano arĩa matarĩ thĩinĩ wa kĩhiko kaingĩ nĩ mehokaga Jehova makĩria. (Thim. 16:3) Mwarĩ ũmwe wa Ithe witũ ũtarĩ mũhiku wĩtagwo Silvia, ũrĩa ũtungatĩte Betheli mĩaka 38, onaga ũndũ ũcio arĩ kĩrathimo. Oigĩte ũũ: “Rĩngĩ na rĩngĩ nĩ nogaga nĩ gũtuĩka atĩ nĩ niĩ nyũmagĩrĩria arĩa angĩ, ngeyũria, niĩ ngũũmĩrĩrio nũũ? ” No agacoka akongerera ũũ: “Kwĩhoka atĩ Jehova nĩoĩ mabataro makwa gũkĩra ũrĩa niĩ ndĩmoĩ nĩ kũndeithagia kũmũkuhĩrĩria makĩria. Na hingo ciothe nĩ anyũmagĩrĩria, rĩmwe na njĩra iterĩgĩrĩire.” Hĩndĩ o yothe twakuhĩrĩria Jehova makĩria, nĩ atwĩkĩraga ngoro na njĩra ya wororo mũno na ya gũtũũmĩrĩria.
15. Akristiano arĩa matarĩ thĩinĩ wa kĩhiko mangĩhingũrĩra andũ arĩa angĩ ngoro atĩa?
15 Mũndũ gũkorũo atarĩ thĩinĩ wa kĩhiko nĩ kũmũheaga mweke wa mwanya wa ‘kũhingũranĩra ngoro’ arĩ na wendo. (Thoma 2 Akorintho 6:11-13.) Mwarĩ ũmwe wa Ithe witũ ũtarĩ mũhiku wĩtagwo Jolene, ũrĩa ũkoretwo ũtungata-inĩ wa mahinda mothe mĩaka 34, aroiga ũũ: “Nĩ ndĩrutanagĩria gũtuma ndũgũ na andũ othe, to a riika rĩakwa tu. Gũkorũo ũtarĩ thĩinĩ wa kĩhiko no gũkũhotithie wĩheane kwĩ Jehova, famĩlĩ yanyu, aarĩ na ariũ a Ithe witũ, o na andũ arĩa angĩ. O ũrĩa ndĩrakũra-rĩ, noguo ngenagĩra gũkorũo itarĩ mũhiku.” Andũ arĩa akũrũ, arwaru, mũciari wĩ wiki, andũ ethĩ, na angĩ thĩinĩ wa kĩũngano nĩ makenagĩra wĩrutĩri wa ngoro yothe wa arĩa matarĩ thĩinĩ wa kĩhiko. Ĩĩ-ni, rĩrĩa tuonia arĩa angĩ wendo, nĩ tũiguaga wega. Ĩ wee-rĩ, hihi no ‘ũhingũrĩre ngoro’ andũ arĩa angĩ?
Gũtũũra Ũtarĩ Wahikania Kana Kũhika
16. (a) Jesu aagire kũhikania nĩkĩ? (b) Paulo aahũthĩrire atĩa ihinda rĩake rĩrĩa ataarĩ thĩinĩ wa kĩhiko?
16 Jesu ndaahikanirie; aabataraga kwĩhaarĩria nĩ ũndũ wa ũtungata wake na kũũthingata. Aathiaga ngʼendo ndaya, akaruta wĩra kuuma ruoro rũgĩtema nginya ũtukũ mũno na mũthia-inĩ akĩruta muoyo wake ũtuĩke igongona. Gũkorũo atahikanĩtie nĩ kwamũteithirie mũno. Mũtũmwo Paulo nĩ aathiaga ngʼendo ndaya mũno na nĩ aacemanirie na moritũ maingĩ arĩ ũtungata-inĩ. (2 Kor. 11:23-27) O na gũtuĩka no kũhoteke atĩ Paulo nĩ aahikanĩtie mbere ĩyo-rĩ, atuĩka mũtũmwo aathurire kwaga kũhikania. (1 Kor. 7:7; 9:5) Jesu na Paulo meekĩrire andũ arĩa angĩ ngoro meegerekanie nao mangĩhota, nĩ ũndũ wa ũtungata. No o erĩ gũtirĩ woigire atĩ arĩa megũtuĩka ndungata matikanahikanie.—1 Tim. 4:1-3.
17. Ũmũthĩ andũ amwe marũmagĩrĩra makinya ma Jesu na Paulo atĩa, na tũngĩkorũo na ũũma atĩa atĩ Jehova nĩakenagĩra arĩa meimaga na njĩra ta ĩyo?
17 O ta ũguo-rĩ, andũ amwe ũmũthĩ nĩ methurĩire kwaga kũingĩra thĩinĩ wa kĩhiko nĩguo mathingate ũtungata wao makĩria. Harold, ũrĩa ũkũgwetetwo hau kabere, akoretwo ũtungata-inĩ wa Betheli mĩaka 56. Oigĩte ũũ: “Ngĩkinyia mĩaka ikũmi Betheli, nĩ ndoonete andũ aingĩ mahikanĩtie makiuma Betheli nĩ ũndũ wa ndwari kana magathiĩ gũteithia aciari ao akũrũ. Aciari akwa erĩ nĩ maakuĩte. No nĩ ndendete Betheli mũno ũũ atĩ ndingĩendire gũtiga ũtungata wa Betheli nĩ ũndũ wa kũhikania.” O ũndũ ũmwe-rĩ, mĩaka ĩigana ũna mĩthiru, painia ũmwe wĩtagwo Margaret oigire ũũ: “Nĩ ngoretwo na mĩeke ya kũhika no ndietĩkĩrire. Ithenya rĩa ũguo, nĩ ndahotire kũhingia maũndũ maingĩ ũtungata-inĩ nĩ ũndũ wa wĩyathi wa kwaga gũkorũo thĩinĩ wa kĩhiko, na ũndũ ũcio nĩ ũndeheire gĩkeno kĩnene kũna.” Na ma, Jehova ndarĩ hĩndĩ akaariganĩrũo nĩ mũndũ o wothe wĩimĩte na njĩra ta ĩyo nĩ ũndũ wa ũthathaiya wa ma.—Thoma Isaia 56:4, 5.
Hũthĩra Wega Ũtũũro Waku o Ũrĩa Ũtariĩ
18. Tũngĩũmĩrĩria Akristiano arĩa matarĩ thĩinĩ wa kĩhiko atĩa?
18 Nĩ twagĩrĩirũo gũcokeria ngatho Akristiano arĩa othe merutanagĩria gũtungatĩra Jehova matarĩ thĩinĩ wa kĩhiko na tũkamomĩrĩria. Nĩ tũmendete nĩ ũndũ wa ngumo ciao na wĩrutĩri wao kĩũngano-inĩ. Matingĩigua ihooru angĩkorũo na ma nĩ tũgũtuĩka “ariũ a nyina, kana aarĩ a nyina, kana nyina, kana ithe, kana ciana” ciao.—Thoma Mariko 10:28-30.
19. Ũngĩĩka atĩa nĩguo ũhũthĩre wega mahinda maku rĩrĩa ũtarĩ thĩinĩ wa kĩhiko?
19 Kana wagĩte gũkorũo thĩinĩ wa kĩhiko nĩ kwenda kana nĩ ũndũ wa itũmi ingĩ-rĩ, reke cionereria icio cia Bibilia na cia matukũ maya ikũũmĩrĩrie atĩ no ũtũũre mũtũũrĩre ũrĩ na uumithio na gĩkeno. Iheo imwe nĩ tũkoragwo tũciĩrĩgĩrĩire mũno, no ingĩ ciũkaga o rĩmwe tũtaciĩrĩgĩrĩire. Imwe nĩ ikenagĩrũo hĩndĩ ĩyo, no ingĩ ikenagĩrũo thutha wa kahinda. Kwoguo-rĩ, kaingĩ kũringanaga na mwerekera witũ. Ũngĩhũthĩra wega atĩa mahinda maku rĩrĩa ũtarĩ thĩinĩ wa kĩhiko? Kuhĩrĩria Jehova makĩria, korũo na maũndũ maingĩ ma gwĩka ũtungata-inĩ wa Ngai, na wonie andũ angĩ wendo kuuma ngoro. O ta kĩhiko-rĩ, gũkorũo tũtarĩ thĩinĩ wa kĩhiko no gũtũrehere irathimo tũngĩkuona ta ũrĩa Ngai akuonaga na tũhũthĩre kĩheo kĩu na ũũgĩ.
Hihi nĩ Ũraririkana?
• Nĩ na njĩra irĩkũ gũkorũo ũtarĩ thĩinĩ wa kĩhiko kũngĩkorũo arĩ kĩheo?
• Gũkorũo ũtarĩ thĩinĩ wa kĩhiko hĩndĩ ya wĩthĩ kũngĩkorũo arĩ kĩrathimo na njĩra ĩrĩkũ?
• Akristiano arĩa matarĩ thĩinĩ wa kĩhiko makoragwo na mĩeke ĩrĩkũ ya gũkuhĩrĩria Jehova makĩria na kuonia andũ aingĩ makĩria wendo?