Rĩrĩa Mũndũ Wendete Akua

“Rĩrĩa mũrũ wa maitũ ũrĩa mũkũrũ aakuire iterĩgĩrĩire, ndaaiguaga itarĩ na hinya wa gwĩka ũndũ. Mĩeri mĩingĩ thutha ũcio ndaakiraga o ũguo rĩmwe ngamũririkana ngaigua ruo ta ndathecwo na kahiũ ngoro-inĩ. Rĩmwe na rĩmwe o na ndaaiguaga ndĩ mũrakaru nĩ ũndũ wa kũrigwo aakuire nĩkĩ. Nĩ ndaaiguaga ũũru tondũ ndiahũthĩrire mahinda ma kũigana hamwe nake rĩrĩa aarĩ muoyo.”—Vanessa, kuuma Australia.

ANGĨKORŨO wanakuĩrũo nĩ mũndũ wendete no kũhoteke o nawe nĩ ũiguaga ruo, ihooru, na kĩeha. Ningĩ no kũhoteke o na nĩ ũiguaga guoya, ũkaigua ũrakarĩte, kana ũgecokia. No gũkorũo nĩ ũrigagwo kana harĩ bata wa gũthiĩ na mbere gũtũũra.

Ririkanaga atĩ gũcakaya gũtionanagia atĩ ndũrĩ na hinya wa gwĩtiiria. Kuonanagia ũrĩa ũrendete mũndũ ũcio ũrakuire. O na kũrĩ ũguo-rĩ, hihi no ũhote kũnyihanyihia kĩeha na ruo?

MAŨNDŨ MARĨA MATEITHĨTIE ANDŨ AMWE

Maũndũ maya mahota gũgũteithia o na angĩkorũo ũraigua ta ruo rwaku rũtaranyihanyiha:

NDŨKONE TA ARĨ ŨŨRU GŨCAKAYA

Andũ macakayaga na njĩra itiganĩte na kwa ihinda rĩtiganĩte. O na kũrĩ ũguo, kũrĩra no gũgũteithie kweheria ruo rũrĩa rũrĩ ngoro-inĩ. Vanessa ũrĩa ũkũgwetetwo kĩambĩrĩria-inĩ ooigire ũũ: “Ndaaiguaga ngĩenda o kũrĩra tondũ nĩ ndabataraga kweheria ruo.” Sofía, ũrĩa wakuĩrĩirũo nĩ mwarĩ wa nyina aterĩgĩrĩire ooigire ũũ: “Gwĩciria ũhoro wa ũndũ ũcio wekĩkire nĩ kũrĩ ruo mũno, nĩ ta kuohora kĩronda na gũgĩthambia. Gwĩka ũguo nĩ kũrĩ ruo mũno no nĩ gũteithagia kĩronda kũhona.”

WĨYARIE ŨRĨA ŨRAIGUA NGORO

Ũhoro wa ma nĩ atĩ, rĩmwe na rĩmwe no wĩrirĩrie gũkorũo wĩ wiki. No gwĩka ũguo nĩ ta gũkuua mũrigo mũritũ ũrĩ wiki. Jared ũrĩa ũrĩ na mĩaka ikũmi na mũgwanja, ũrĩa wakuĩrĩirũo nĩ ithe ooigire ũũ: “Nĩ ndeeraga andũ arĩa angĩ ũrĩa ndĩraigua ngoro-inĩ. Ndigwĩciria nĩ ndahotaga kwĩyaria wega, no gwĩka ũguo nĩ kwandeithagia.” Janice ũrĩa ũgwetetwo gĩcunjĩ-inĩ kĩa mbere, ooigire ũũ akĩonania ũguni ũngĩ wa kwĩyaria: “Kwaria na andũ arĩa angĩ nĩ kwanjĩkagĩra ngoro mũno. Gwatũmaga nyone andũ arĩa angĩ magĩtaũkĩrũo nĩ ũrĩa ndĩraigua na kwoguo ndiahiũranagia na ũndũ ũcio ndĩ wiki.”

ĨTĨKĨRA GŨTEITHIO

Ndagĩtarĩ ũmwe ooigire ũũ: “Mũndũ ũkuĩrĩirũo angĩtĩkĩra gũteithio nĩ arata na andũ a famĩlĩ rĩrĩa akuĩrũo o ũguo, ũkoragwo ũrĩ ũndũ mũhũthũ gũkirĩrĩria na gũtooria ũndũ ũcio.” Arata aku no makorũo makĩenda gũgũteithia, no matiramenya ũrabatara ũteithio ũrĩkũ, kwoguo nĩ wega kũmeera ũrĩa mangĩgũteithia.—Thimo 17:17.

KUHĨRĨRIA NGAI MAKĨRIA

Tina ooigire ũũ: “Rĩrĩa mũthuri wakwa aakuire nĩ ũndũ wa kansa ndingĩahotire kũmwĩra mathĩna makwa, kwoguo ndeeraga Ngai maũndũ mothe! Ndaahoyaga Ngai o rũcinĩ ngamwĩra andeithie mũthenya ũcio. Ngai nĩ aandeithirie na njĩra nyingĩ o na gũkĩra ũrĩa ingĩhota gũtaarĩria.” Tarsha, ũrĩa warĩ na mĩaka 22 rĩrĩa mami wao aakuire, ooigire ũũ: “Gũthoma Bibilia o mũthenya nĩ kwanyũmĩrĩirie mũno. Gwatũmaga ngĩe na maũndũ ma gwĩcũrania marĩa maanjĩkagĩra ngoro.”

HŨŨRA MBICA MŨNDŨ ŨCIO ŨKUĨTE ARIŨKĨTIO

Tina ũrĩa ũkũgwetetwo ooigire ũũ: “Kĩambĩrĩria-inĩ, ndionaga ta kĩĩrĩgĩrĩro gĩa kũriũka kĩrandeithia tondũ nĩ ndaabataraga mũthuri wakwa na ciana ciakwa nĩ ciabataraga baba wao hĩndĩ ĩyo ĩyo. No rĩu, nĩ mĩaka ĩna kuuma akua, na kĩĩrĩgĩrĩro kĩu nĩkĩo kĩndeithagia gũthiĩ na mbere. Hũũraga mbica ariũkĩtio na ũndũ ũcio nĩ ũtũmaga ngĩe na thayũ na gĩkeno!”

No kũhoteke ndũgũthirũo nĩ kĩeha gĩaku o rĩo. O na kũrĩ ũguo, ũndũ ũrĩa Vanessa eeyoneire no ũgwĩkĩre ngoro. Ooigire ũũ: “Mũndũ ndonaga ta kĩeha kĩu gĩgaathira, no ũndũ ũcio ũthiaga ũthirĩte kahora kahora.”

Ririkanaga atĩ, o na akorũo ndũgũtiga kũigua wagĩte mũndũ ũcio, ũtũũro waku nĩ wa bata. Nĩ ũndũ wa ũteithio wa Ngai, no ũhote gũkenera ũtũũro ũrĩ na muoroto na arata ega. Na ica ikuhĩ Ngai nĩ ekũriũkia andũ arĩa makuĩte. Wendi wake nĩ ũkaahĩmbĩria mũndũ ũcio rĩngĩ. Hingo ĩyo, ruo rũrĩa rũrĩ ngoro-inĩ yaku nĩ rũkeherio tene na tene!

Mĩhari ya Bibilia Ĩngĩgũteithia

Ngai nĩ onaga kĩeha na maithori maku.

Mwandĩki ũmwe wa Bibilia eerire Ngai ũũ: “Cokanĩrĩria maithori makwa cuba-inĩ yaku. Na githĩ matiandĩkĩtwo ibuku-inĩ rĩaku?”—Thaburi 56:8.

Itũrũrĩra Ngai ngoro yaku.

‘Nĩ menyithagia Ngai mĩtangĩko yakwa ndĩ mbere yake. Jehova,a wee nĩwe ndĩrakaĩra ngĩhoya ũteithio.’—Thaburi 142:2, 5.

Kũrĩ na kĩĩrĩgĩrĩro.

“Nĩ gũkaariũkio andũ.”—Atũmwo 24:15.

Ngai nĩ eranĩire atĩ nĩ akaariũkia andũ aingĩ arĩa makuĩte, na nĩ eriragĩria gwĩka ũguo.b—Ayubu 14:14, 15.

a Jehova nĩrĩo rĩĩtwa rĩa Ngai ta ũrĩa rĩguũrĩtio thĩinĩ wa Bibilia.

b Nĩguo wone ũhoro makĩria wĩgiĩ kĩĩrĩgĩrĩro gĩa kũriũka, thoma ithomo rĩa 30 rĩa ibuku rĩa Kenera Ũtũũro Tene na Tene! rĩrĩa rĩcabĩtwo nĩ Aira a Jehova na no ũrĩone thĩinĩ wa jw.org/ki.