‘Ikaranagiai na Andũ Othe Mwĩna Thayũ’
1. Nĩ ũtaaro ũrĩkũ wa Bibilia twagĩrĩirũo kũhũthĩra rĩrĩa ene nyũmba marakara?
1 Andũ a Jehova nĩ endi thayũ, na ũtungata witũ nĩ wa thayũ. (Isa. 52:7) No rĩmwe nĩ tũcemanagia na andũ marakaraga rĩrĩa twathiĩ kũmahunjĩria. Nĩ kĩĩ kĩngĩtũteithia gũtũũria thayũ mahinda-inĩ ta macio?—Rom. 12:18.
2. Nĩkĩ nĩ ũndũ wa bata tũhũthagĩre ũtaũku?
2 Hũthagĩra Ũtaũku: O na gũtuĩka andũ amwe marakaraga tondũ matiendete ũhoro wa ma-rĩ, angĩ no marakare nĩ ũndũ wa itũmi itakonainie na ndũmĩrĩri itũ. Hihi no tũkorũo tũmaceereire ihinda rĩrĩa rĩtamagĩrĩire. Mwene nyũmba no akorũo arĩ mũrakaru nĩ ũndũ wa mathĩna make kĩũmbe. O na angĩkorũo ũhoro ũrĩa mwega nĩguo watũma arakare-rĩ, twagĩrĩirũo kũririkana atĩ no kũhoteke araigua ũguo tondũ wa gũkorũo ahĩtithĩtio. (2 Kor. 4:4) Ũtaũku nĩ ũgũtũteithia gũikara tũhoreire na kwaga kuona ta arĩ ithuĩ arakarĩire.—Thim. 19:11.
3. Tũngĩonania atĩa atĩ nĩ tũratĩa mwene nyũmba?
3 Onanagia Gĩtĩo: Andũ aingĩ icigo-inĩ citũ nĩ makoragwo na wĩtĩkio marũmĩtie mũno. (2 Kor. 10:4) Nĩ makoragwo na kĩhooto gĩa gũthuura gũtũthikĩrĩria kana kwaga gũtũthikĩrĩria. Tũtingĩenda o na hanini kũhũthia wĩtĩkio wa mwene nyũmba kana kũmuonia ta tũũĩ kũmũkĩra. Tũngĩĩrũo tũthiĩ, twagĩrĩirũo gwĩka ũguo tũrĩ na gĩtĩo.
4. Kwaria tũhoreire nĩ kuuga twĩke atĩa?
4 Aragia Ũhoreire: O na tũngĩrumwo, twagĩrĩirũo gũcokia na njĩra njega na ya ũhooreri. (Kol. 4:6; 1 Pet. 2:23) Handũ ha gwĩtĩkĩra gũkararania, geria gũcaria ũndũ mũngĩiguithanĩria. Hihi no ũũrie mwene nyũmba ũhoreire gĩtũmi kĩa arakare. No rĩmwe na rĩmwe nĩ wega kwaga gũtwarithia ndeereti na mbere nĩguo twĩtheme kũmũrakaria makĩria.—Thim. 9:7; 17:14.
5. Nĩ ũguni ũrĩkũ uumanaga na gũkorũo tũrĩ andũ a thayũ ũtungata-inĩ?
5 Tũngĩkorũo tũrĩ andũ a thayũ, mwene nyũmba no aririkane ũndũ ũcio na etĩkĩre gũgaathikĩrĩria angĩhunjĩrio rĩngĩ. (Rom. 12:20, 21) O na angĩoneka ta anyitĩrĩire mawoni make mũno, mũthenya ũmwe no atuĩke mũrũ wa Ithe witũ. (Gal. 1:13, 14) Gũtekũmakania kana kwĩ hĩndĩ agaakenio nĩ ũhoro wa ma, nĩ tũrĩtĩithagia Jehova na ũrutani witũ tũngĩĩgirĩrĩria na tuonanie atĩ tũrĩ andũ mendete thayũ.—2 Kor. 6:3.