Kwagagĩria Ũtungata Witũ—Ũrĩa Ũngĩka Ũrĩa Ũrahunjĩria Angĩrakara

Ũndũ Ũcio nĩ wa Bata Nĩkĩ? Andũ aingĩ arĩa tũhunjagĩria matikoragwo na mwerekera mũũru. O na kũrĩ ũguo, Jesu nĩ aarathĩte atĩ andũ amwe nĩ mangĩgaatũthũũra. (Joh. 17:14) Nĩ ũndũ ũcio, tũtiagĩrĩirũo kũgega tũngĩcemania na mũndũ atũrakarĩre. Mũndũ ta ũcio twagĩrĩirũo nĩ kũmũcokeria na njĩra ĩgũkenia Jehova, ũrĩa ũtũhete wĩra wa kũhunjia. (Rom. 12:17-21; 1 Pet. 3:15) Gwĩka ũguo no kũgirĩrĩrie maũndũ matigathũke mũno. Ningĩ no gũteithie mũndũ ũcio na arĩa angĩ mangĩkorũo magĩtuona, magaathikĩrĩria hĩndĩ ĩngĩ mangĩgaacererũo nĩ Aira a Jehova.—2 Kor. 6:3.

Ũrĩa Tũngĩka:

Thiĩ na mbere kuonania mwerekera wa ũhooreri na ũrata. Gwĩka ũguo no kũhoorerie mwene nyũmba. Ndũkone ta arĩ we arakarĩire. (Koh. 7:9) Rĩngĩ na rĩngĩ arakarĩte nĩ ũndũ wa mathĩna make kana nĩ ũndũ wa kũmũceerera hĩndĩ ĩtamwagĩrĩire. O na angĩkorũo nĩ ndũmĩrĩri itũ ĩratũma arakare, no kũhoteke nĩ kũhĩtithio ahĩtithĩtio.—2 Kor. 4:4.
Mũcokerie na ciugo njega na cia ũhooreri. (Thim. 15:1) Hihi ũkũmũkorete toro kana arĩ na wĩra? O na gũtuĩka tũtihoyaga andũ rũtha nĩguo tũmahunjĩrie, ti ũũru kũhoya mwene nyũmba mũheera angĩkorũo wathiĩ gwake ihinda rĩtamwagĩrĩire. Hihi mwene nyũmba arakarĩte nĩ ũndũ wa kũigua mũhuhu wa maheeni gũtwerekera? Angĩkorũo nĩguo-rĩ, no ũmwĩre ũũ: “Nĩ ma maũndũ macio ũiguĩte no matũme ũrakare no ti ma ma. Hihi no wende ngwĩre ũrĩa kũrĩ?” Hihi mwene nyũmba arakarĩtio nĩ ũmwe wa morutani maitũ ta ũrĩa wĩgiĩ kweheria andũ kĩũngano-inĩ kana wĩgiĩ thakame? No ũmwĩre ũũ: “Kĩu nĩ kĩũria kĩega. O na nĩ kũrĩ andũ angĩ manakorũo na kĩũria ta kĩu. No wende nguonie ũrĩa Bibilia yugaga igũrũ rĩgiĩ ũndũ ũcio?”
Angĩkorũo mũndũ ũrĩa ũrahunjĩria nĩ mũrakaru mũno, no ũkorũo ũrĩ ũndũ wa ũũgĩ kũmũtiga ũtekũmũcokeria ũndũ. Angĩkwĩra atĩ ndekwenda gũkoona Aira a Jehova gwake rĩngĩ, mwĩre nĩ ũgũtigĩrĩra atĩ wendi wake nĩ waheo gĩtĩo.

Geria Gwĩka ũũ Mweri-inĩ Ũyũ:

Hĩndĩ ya ũthathaiya wanyu wa famĩlĩ, wĩmenyeriei maũndũ macio twarĩrĩria.
Thutha wa kuuma kwa mũndũ uuma mũrakaru, arĩrĩriai na mũhunjia ũrĩa mũrĩ nake ũrĩa ũngĩcokirie na njĩra njega makĩria.