Twagĩrĩirũo Kũheana Ũtaaro Atĩa?

1. Nĩa mabatiĩ kũheana ũtaaro? Taarĩria.

ŨIGUAGA atĩa ũhoro-inĩ wĩgiĩ kũheana ũtaaro? Andũ amwe nĩ makenagĩra gwĩka ũguo, nao angĩ magetigĩra kana makaigua makĩritũhĩrũo kũhe arĩa angĩ ũtaaro. O ũrĩa kũrĩ, rĩmwe na rĩmwe ithuothe nĩ tũbataraga kũheana ũtaaro. Nĩkĩ? Tondũ Jesu aaugire atĩ arũmĩrĩri ake marĩmenyekaga kũgerera wendo ũrĩa monanagia gatagatĩ-inĩ kao. (Joh. 13:35) Na rĩrĩa twahe aarĩ na ariũ a Ithe witũ ũtaaro ũrĩa marabatara, tũkoragwo tũkĩmonia wendo. Kiugo kĩa Ngai kiugaga atĩ “ũtaaro wa kuuma ngoro” nĩ ũtũmaga tũkorũo na “ũrata mwega.”—Thim. 27:9.

2. Athuri a kĩũngano magĩrĩirũo kwĩrutanĩria gwĩka atĩa, na nĩkĩ? (Ningĩ rora gathandũkũ, “Kũheana Ũtaaro Tũcunjĩ-inĩ twa Arutwo.”)

² Athuri a kĩũngano nĩ magĩrĩirũo kũmenya ũrĩa mangĩka nĩguo maheanage ũtaaro na njĩra ĩrĩ na maumĩrĩro mega. Gĩtũmi nĩ tondũ Jehova na Jesu nĩ mamehokeire wĩra wa kũrĩithia kĩũngano. (1 Pet. 5:​2, 3) Njĩra ĩmwe mekaga ũguo nayo nĩ rĩrĩa matũhe ũtaaro wa Kĩĩmandĩko makĩruta mĩario kĩũngano-inĩ. Ningĩ nĩ mabatiĩ kũhe ũtaaro Akristiano marĩ mũndũ ũmwe ũmwe, nginya arĩa meherete kĩũngano-inĩ. Hihi athuri a kĩũngano o hamwe na ithuĩ ithuothe-rĩ, tũngĩka atĩa nĩguo tũheanage ũtaaro mwega?

3. (a) Tũngĩka atĩa nĩguo tũtuĩke ataarani ega? (Isaia 9:6; ningĩ rora gathandũkũ, “Wĩgerekanie na Jesu Rĩrĩa Ũraheana Ũtaaro.”) (b) Tũkwarĩrĩria maũndũ marĩkũ gĩcunjĩ-inĩ gĩkĩ?

³ No twĩrute ũrĩa tũngĩtuĩka ataarani ega tũngĩthuthuria cionereria iria irĩ thĩinĩ wa Bibilia, makĩria kĩonereria kĩa Jesu. Rĩĩtwa rĩmwe aheetwo nĩ “Mũtaarani wa Magegania.” (Thoma Isaia 9:6.) Gĩcunjĩ-inĩ gĩkĩ, nĩ tũkuona ũrĩa tũngĩka rĩrĩa mũndũ atũhoya ũtaaro, na rĩrĩa twabatara kũhe mũndũ ũtaaro o na atatũhoete. Ningĩ nĩ tũkuona bata wa kũheana ũtaaro ihinda-inĩ rĩrĩa rĩagĩrĩire, na twĩke ũguo na njĩra ĩrĩa yagĩrĩire.

RĨRĨA MŨNDŨ ATŨHOYA ŨTAARO

4-5. Rĩrĩa mũndũ atũhoya ũtaaro-rĩ, nĩ kĩũria kĩrĩkũ twagĩrĩirũo kwamba kwĩyũria? Heana ngerekano.

⁴ Rĩrĩa mũndũ atũhoya ũtaaro, no tũigue tũkenete nĩ kuona atĩ mũndũ ũcio nĩ atwĩhokete. Na kwoguo no tũigue tũkĩhĩahĩa kũmũteithia o rĩo. No nĩ twagĩrĩirũo kwamba kwĩyũria ũũ, ‘Hihi niĩ nĩ ndĩragĩrĩra kũmũhe ũtaaro ũndũ-inĩ ũcio?’ Rĩmwe ũndũ ũrĩa mwega gwĩka nĩ kũmũteithia kuona mũndũ ũngĩagĩrĩra kũmũhe ũtaaro ũndũ-inĩ ũcio.

⁵ Ta wĩcirie ngerekano ĩno. Ta tua atĩ mũrata ũmwe waku wa hakuhĩ arĩ na mũrimũ mũũru. Agakwĩra atĩ nĩ athuthurĩtie njĩra itiganĩte cia ũrigitani iria angĩhũthĩra, agacoka agakũũria nĩ njĩra ĩrĩkũ ũrona ĩrĩ njega makĩria. O na hangĩkorũo harĩ na njĩra ĩrĩa ũrona ĩrĩ njega makĩria, no wage kwagĩrĩra kũmũhe ũtaaro angĩkorũo ndũrĩ ndagĩtarĩ kana ndũrĩ na ũũgĩ wa kũrigita mũrimũ ũcio. Kwoguo, ũndũ ũrĩa mwega nĩ kũmũteithia kuona mũndũ ũthomeire maũndũ megiĩ mũrimũ ũcio.

6. Nĩkĩ nĩ wega kwamba kwĩhe ihinda tũtanaheana ũtaaro?

⁶ O na tũngĩona ta tũragĩrĩra kũhe mũndũ ũtaaro wĩgiĩ ũndũ mũna, no tũthuure kwamba kwĩhe ihinda inini tũtanamũhe macokio. Nĩkĩ? Tondũ Thimo 15:28 yugaga atĩ “ngoro ya mũndũ mũthingu nĩ ĩĩcũranagia ĩtanacokia.” Kwoguo o na angĩkorũo nĩ tũrona ta twĩ na macokio, nĩ wega kwamba kwĩhe ihinda rĩa gwĩka ũthuthuria, kũhoya, na gwĩcũrania ũhoro ũcio. Tũngĩka ũguo, no tũkorũo na ma atĩ ũtaaro ũrĩa tũkũmũhe nĩ ũraringana na mawoni ma Jehova. Ta wĩcirie ngerekano ya mũnabii Nathani.

7. Ũreruta atĩa kuumana na ngerekano ya mũnabii Nathani?

⁷ Kũrĩ hĩndĩ Mũthamaki Daudi eerire mũnabii Nathani atĩ nĩ arenda gwakĩra Jehova hekarũ. Nathani aamũcokeirie o rĩo, akĩmwĩra eke guo. No Nathani nĩ aabatiĩ kwamba kwĩhe ihinda rĩa gũtuĩria ũhoro ũcio harĩ Jehova. Gĩtũmi nĩ tondũ ndwarĩ wendi wa Jehova Daudi ake hekarũ. (1 Maũ. 17:​1-4) Rũgano rũu rũratũruta atĩ rĩrĩa mũndũ atũhoya ũtaaro, tũtibatiĩ ‘kũhiũha kwaria.’—Jak. 1:19.

8. Nĩ ũndũ ũrĩkũ ũngĩ ũronania bata wa kwamba gwĩcũrania na kinyi tũtanaheana ũtaaro?

⁸ Ũndũ ũngĩ ũronania bata wa gwĩcũrania na kinyi tũtanaheana ũtaaro nĩ atĩ, no tũcokererũo nĩ mahĩtia angĩkorũo ũtaaro witũ nĩ ũgũtũma mũndũ atue itua rĩrĩ na maumĩrĩro moru. Hatarĩ nganja, ũkĩrĩ ũndũ wa bata mũno kwamba gwĩcũrania na kinyi tũtanaheana ũtaaro.

RĨRĨA TŨRAHE MŨNDŨ ŨTAARO O NA ATATŨHOETE

9. Mbere ya athuri maheanĩte ũtaaro-rĩ, nĩ ũndũ ũrĩkũ mabatiĩ gũkorũo na ma naguo? (Agalatia 6:1)

⁹ Kũrĩ hĩndĩ athuri a kĩũngano mabataraga kũhe mũrũ kana mwarĩ wa Ithe witũ ũtaaro, angĩkorũo nĩ arathiĩ “na njĩra ĩtagĩrĩire.” (Thoma Agalatia 6:1.) Mũndũ ũrathiĩ “na njĩra ĩtagĩrĩire” no akorũo agĩtua matua matarĩ ma ũũgĩ, marĩa mangĩtũma akinyĩrĩre gwĩka mehia maritũ. Muoroto wa athuri nĩ gũteithia mũndũ ũcio athiĩ na mbere kũgerera njĩra-inĩ ĩrĩa ĩtongoragia muoyo-inĩ wa tene na tene. (Jak. 5:​19, 20) No nĩguo makorũo na maumĩrĩro mega, nĩ mabatiĩ kwamba gũtigĩrĩra atĩ nĩ ma mũndũ ũcio nĩ arathiĩ na njĩra ĩtagĩrĩire. Nĩ maririkanaga atĩ Jehova nĩ atwĩtĩkĩrĩtie ithuothe gwĩtuĩra matua tũkĩhũthĩra thamiri citũ. (Rom. 14:​1-4) No kũngĩoneka atĩ mũrũ wa Ithe witũ nĩ arathiĩ na njĩra ĩtagĩrĩire-rĩ, hihi athuri a kĩũngano magĩrĩirũo kũmũhe ũtaaro atĩa?

10-12. Athuri a kĩũngano mabatiĩ gwĩka atĩa mangĩbatara kũheana ũtaaro matahoetwo? Heana ngerekano. (Ningĩ rora mbica.)

¹⁰ Ndũkoragwo ũrĩ ũndũ mũhũthũ harĩ mũthuri wa kĩũngano kũhe mũndũ ũtaaro angĩkorũo ndamũhoete. Nĩkĩ? Mũtũmwo Paulo aaugire atĩ mũndũ no akorũo agĩthiĩ na njĩra ĩtagĩrĩire o na atekũmenya. Kwoguo athuri a kĩũngano matanahe mũndũ ũtaaro, magĩrĩirũo kwamba kũmũhaarĩria ngoro na meciria, nĩguo amenye kĩrĩa kĩratũma aheo ũtaaro.

¹¹ Kũhe mũndũ ũtaaro atatũhoete no kũringithanio na kũhanda mĩmera tĩĩri-inĩ mũũmũ. Mũrĩmi atanahanda mbeũ tĩĩri-inĩ ta ũcio, no nginya ambe arĩme nĩguo tĩĩri ũcio ũhũthe. Thutha ũcio nĩrĩo ahandaga mbeũ, agacoka agaitĩrĩria maĩ nĩguo ĩkũre. Na njĩra o ta ĩyo, mũthuri wa kĩũngano angĩbatara kũhe mũrũ wa Ithe witũ ũtaaro atamũhoete, harĩ maũndũ angĩamba gwĩka nĩguo amũhaarĩrie ngoro na meciria. Kwa ngerekano, no aarie nake ihinda-inĩ rĩrĩa rĩagĩrĩire amwĩre atĩ harĩ ũndũ arenda kwaria nake, na areka ũguo tondũ nĩ amwendete na nĩ amwĩciragia mũno. Angĩkorũo mũndũ ũrĩa ũraheana ũtaaro nĩ oĩkaine atĩ nĩ arĩ wendo na nĩ mũtugi, no ũkorũo ũrĩ ũndũ mũhũthũ harĩ andũ arĩa angĩ gwĩtĩkĩra ũtaaro wake.

¹² Makĩarĩrĩria ũndũ ũcio, mũthuri ũcio wa kĩũngano no athiĩ na mbere kuororoiya ngoro ya mũrũ wa Ithe witũ ũcio, na njĩra ya kũmũririkania atĩ ithuothe nĩ tũhĩtagia na tũkabatara kũheo ũtaaro rĩmwe na rĩmwe. (Rom. 3:23) Mũthuri ũcio no amũtaarĩrie ahooreire na arĩ na gĩtĩo kĩnene, amuonie kũgerera Maandĩko harĩa atereire ikinya. Mũrũ wa Ithe witũ ũcio angĩtĩkĩra atĩ nĩ ahĩtĩtie, mũthuri ũcio no ahande mbeũ na njĩra ya mũhaano, amũtaarĩrie na njĩra hũthũ ũndũ ũrĩa arabatara gwĩka nĩguo arũnge mahĩtia make. Thutha ũcio, no aitĩrĩrie mbeũ ĩyo maĩ, na njĩra ya kũgaathĩrĩria mũrũ wa Ithe witũ ũcio kuuma ngoro na kũhoya hamwe nake.—Jak. 5:15.

13. Hihi athuri a kĩũngano mangĩka atĩa nĩguo matigĩrĩre atĩ ũtaaro ũrĩa maheana nĩ wataũkĩka wega?

¹³ Rĩmwe na rĩmwe, mũndũ no age gũtaũkĩrũo wega nĩ ũtaaro ũrĩa aheo. Hihi athuri a kĩũngano mangĩka atĩa nĩguo matigĩrĩre atĩ ũtaaro ũrĩa maheana nĩ wataũkĩka wega? No morie mũndũ ũcio ciũria na njĩra ya ũũgĩ, marĩ na gĩtĩo. (Koh. 12:11) Macokio marĩa mũndũ ũcio ũraheo ũtaaro ekũheana, nĩ mekuonania kana nĩ arataũkĩrũo nĩ ũtaaro ũcio.

HEANAGA ŨTAARO IHINDA RĨRĨA RĨAGĨRĨIRE NA NJĨRA ĨRĨA YAGĨRĨIRE

14. Hihi nĩ twagĩrĩirũo kũheana ũtaaro tũrĩ arakaru? Taarĩria.

¹⁴ Ithuothe tũtirĩ akinyanĩru, na kwoguo rĩmwe no twĩke kana tuuge ũndũ ũngĩrakaria andũ arĩa angĩ. (Kol. 3:13) Kiugo kĩa Ngai o na nĩ kĩonanagia atĩ kũrĩ hĩndĩ tũngĩrakarania. (Ef. 4:26) No nĩ tũbatiĩ gwĩthema kũheana ũtaaro hĩndĩ ĩrĩa tũrĩ arakaru. Gĩtũmi nĩ tondũ, “marakara ma mũndũ matirehaga ũthingu wa Ngai.” (Jak. 1:20) Kwoguo tũngĩheana ũtaaro tũrĩ arakaru, no tũthũkie maũndũ o na makĩria. No ũguo ti kuuga atĩ tũtiagĩrĩire kwĩra mũndũ ũrĩa ũtũrakarĩtie ũrĩa tũraigua. Ĩndĩ twagĩrĩirũo kwamba kũhooreria marakara tũtanaarĩria mũndũ ũcio. Ta rora kĩonereria kĩa Elihu ũrĩa waheire Ayubu ũtaaro mwega.

15. Tũreruta atĩa na kĩonereria kĩa Elihu? (Ningĩ rora mbica.)

¹⁵ Elihu aaikarire thikũ cigana ũna agĩthikĩrĩria Ayubu agĩĩtetera kuumana na maũndũ moru marĩa arata ake a maheeni maarĩtie mamwĩgiĩ. Elihu nĩ aacayagĩra Ayubu, no ningĩ nĩ aacinirũo nĩ marakara aigua maũndũ marĩa Ayubu aaugaga matarĩ ma ma megiĩ Jehova, na ũrĩa aageragia kuonania atĩ we ndarĩ na mahĩtia. O na kũrĩ ũguo, Elihu nĩ eetereire ihinda rĩake rĩa kwaria rĩkinye, na akĩaria ahooreire arĩ na gĩtĩo kĩnene akĩhe Ayubu ũtaaro. (Ayub. 32:2; 33:​1-7) Kĩonereria kĩu kĩa Elihu nĩ kĩratũruta ũndũ ũyũ wa bata: Ũtaaro wagĩrĩirũo kũheanwo ihinda rĩrĩa rĩagĩrĩire, na ũheanwo na njĩra ya gĩtĩo na wendo.—Koh. 3:​1, 7. 

THIĨ NA MBERE KŨHEANA NA GWĨTĨKĨRA ŨTAARO

16. Ũreruta atĩa kuumana na Thaburi 32:8?

¹⁶ Rĩandĩko rĩa mũthingi rĩa gĩcunjĩ gĩkĩ rĩrauga atĩ ‘Jehova atũheaga ũtaaro riitho rĩake rĩtũrorete.’ (Thoma Thaburi 32:8.) Ũndũ ũcio ũronania atĩ nĩ arĩthiaga na mbere gũtũteithia. Atwĩrĩire atĩ nĩ arĩtũheaga ũtaaro na agatũteithia kũũhũthĩra. Na githĩ kĩu ti kĩonereria kĩega Jehova atũigĩire? Rĩrĩa rĩothe twagĩa na mweke wa kũhe andũ arĩa angĩ ũtaaro, no twĩke ũguo riitho ritũ rĩmarorete o ta Jehova na njĩra ya kũmahe ũteithio ũrĩa marabatara nĩguo magunĩke kuumana na ũtaaro ũcio.

17. Tũiguaga atĩa rĩrĩa athuri a kĩũngano matũhe ũtaaro uumĩte Bibilia-inĩ? (Isaia 32:​1, 2)

¹⁷ Nĩ tũrabatara kũheana na gwĩtĩkĩra ũtaaro ihinda-inĩ rĩrĩ gũkĩra hĩndĩ ĩngĩ o yothe. (2 Tim. 3:1) Athuri a kĩũngano arĩa maheanaga ũtaaro wĩhocetie Maandĩko-inĩ na makonania ĩmwe kwa ĩmwe ũrĩa ũtaaro ũcio ũngĩhũthĩka, matariĩ “ta tũrũũĩ twa maĩ bũrũri-inĩ ũtarĩ maĩ.” (Thoma Isaia 32:​1, 2.) Nĩ tũkenaga gũkorũo na arata matũheaga ũtaaro ũrĩa tũrabatara, handũ ha o gũtwĩra maũndũ marĩa tũrenda kũigua. Ũtaaro wao ũtariĩ o ta “matunda ma thahabu marĩ mbakũri-inĩ cia betha.” (Thim. 25:11) Rekei ithuothe tũthiĩ na mbere kwĩgĩĩra na ũũgĩ ũrĩa ũrabatarania nĩguo tũhotage kũheana na gwĩtĩkĩra ũtaaro mwega.