Kũhũthĩra Ũhoro Ũrĩa Ũheetwo

BIBILIA yugaga kĩũngano gĩa Gĩkristiano nĩ ta mwĩrĩ wa mũndũ. Gũtirĩ kĩĩga gĩtarĩ kĩa bata, no ‘citirutaga wĩra mũthemba ũmwe.’ Nĩ ũndũ ũcio, twagĩrĩirũo kũruta wĩra o wothe ũrĩa tũngĩkorũo twĩhokeirũo. Nĩguo twĩke ũguo, tũkũbatara gũtaũkĩrũo na kũhaarĩria wega mĩario o yothe ĩrĩa tũngĩkorũo tũheetwo handũ ha kuona ĩmwe ta ĩrĩ ya bata gũkĩra ĩrĩa ĩngĩ. (Rom. 12:4-8) Ngombo ĩrĩa ĩĩhokekete na njũgĩ nĩyo ĩheetwo wĩra wa kũheana irio cia kĩĩroho “hĩndĩ ĩrĩa yagĩrĩire.” (Mat. 24:45) Rĩrĩa tũrahũthĩra ũhoti witũ kĩũmbe kũhaarĩria mĩario tũkĩrũmĩrĩra ũtongoria ũrĩa tũheetwo, tuonanagia atĩ nĩ tũtĩĩte mũbango ũcio. Ũndũ ũcio ũtũmaga kĩũngano kĩrĩ gĩothe kĩgaacĩre.

Ũhoro wa Kwarĩrĩria. Rĩrĩa waheo mĩario mĩna thĩinĩ wa cukuru, tigĩrĩra atĩ warĩrĩria o ndeto ĩrĩa ikonainie na mĩario ĩyo. Maita maingĩ nĩ marĩa mũndũ akoragwo aheetwo ũhoro mũna ũrĩa ekwarĩrĩria. Angĩkorũo ndwĩrĩtwo harĩa ũkũruta ũhoro wa mĩario yaku, no wĩcarĩrie ũhoro arĩ we. O na kũrĩ ũguo, ũkĩhaarĩria mĩario yaku tigĩrĩra atĩ maũndũ mothe marĩa ũkaria nĩ makonainie na ũhoro ũrĩa ũheetwo. Ũgĩthuura maũndũ marĩa ũkaahũthĩra, nĩ ũkũbatara ningĩ gwĩciria athikĩrĩria aku.

Thoma na ũbarĩrĩru ũhoro kuuma mabuku-inĩ marĩa monanĩtio, na ũthathaũranie maandĩko marĩa marĩ thĩinĩ waguo. Ũcoke wĩcirie ũrĩa ũngĩũhũthĩra wega makĩria ũgune athikĩrĩria. Thuura maũndũ merĩ kana hihi matatũ kuuma ũhoro-inĩ ũcio mũcabe matuĩke maũndũ marĩa ma bata makĩria mĩario-inĩ yaku. Hamwe na ũguo, ũhoro-inĩ ũrĩa ũheetwo thuura maandĩko marĩa ũrabanga gũthoma na kwarĩrĩria.

Nĩ maũndũ maigana atĩa wagĩrĩirũo kwarĩrĩria ũhoro-inĩ ũcio? O marĩa ũngĩhota kwarĩrĩria ũrĩa kwagĩrĩire. Ndũgakorũo na ũhoro mũingĩ mũno ũndũ mũrutanĩre mwega ũgũthũka. Angĩkorũo ndeto imwe itirahingia muoroto wa mĩario yaku, ĩkĩrĩra tũcunjĩ tũrĩa tũgũgũteithia kũhingia muoroto ũcio. Ũhoro-inĩ ũrĩa ũheetwo, hũthĩra ũrĩa ũgũkorũo na ũguni makĩria harĩ athikĩrĩria aku. Muoroto waku harĩ ngumo ĩno ya mĩario nĩ kũhũthĩra ũhoro ũrĩa ũheetwo ũrĩ mũthingi wa mĩario yaku, no ti kũrora nĩ maũndũ maigana atĩa ũngĩarĩrĩria.

Muoroto wa mĩario yaku ti kũgweta matemo ma ũhoro ũrĩa ũheetwo. Wagĩrĩirũo kũbanga kwarĩrĩria maũndũ mamwe, ũmathathaũre, ũheane ngerekano ciamo, na hihi ũheane kĩonereria kĩa ũrĩa ũhoro ũcio ũngĩhũthĩrũo. Ndeto ingĩ ciagĩrĩirũo kũhũthĩrũo gũthathaũra maũndũ ma bata kuuma ũhoro-inĩ ũrĩa ũheetwo handũ ha gũciĩkĩra ithenya rĩa maũndũ macio.

Ariũ a Ithe witũ arĩa mangĩagĩrĩra gũtuĩka arimũ, thutha wa ihinda no maheo mĩario thĩinĩ wa Mũcemanio wa Ũtungata. Nĩ moĩ nĩ magĩrĩirũo kũhũthĩra wega ũhoro ũrĩa maheetwo handũ ha kwaria maũndũ mangĩ ithenya rĩaguo. O ũndũ ũmwe, ariũ a Ithe witũ arĩa marutaga mĩario ya andũ othe nĩ maheagwo matemo ma kũrũmĩrĩra. Matemo macio makoragwo maheete mwaria mweke wa kũgarũrĩra, ĩndĩ makonania wega maũndũ marĩa ma bata makĩria ma kwarĩrĩria, ma kũnyita mbaru, na maandĩko ma mũthingi ma mĩario ĩyo. Kwĩruta kũrutana mũndũ akĩhũthĩra ũhoro ũrĩa aheetwo nĩ kwa bata harĩ kũmũhaarĩria kũruta icunjĩ ingĩ cia mĩario.

Kwĩruta kũhũthĩra ũhoro ũrĩa ũheetwo ningĩ no gũkũhotithie gũteithia arutwo a Bibilia mathiĩ na mbere. Nĩ ũrĩhotaga kwarĩrĩria ũhoro ũrĩa ũheetwo handũ ha kuuma nja yaguo na njĩra ya gũtũgĩria maũndũ mangĩ ũrona ta mangĩgucĩrĩria no ti ma bata harĩ gũtarĩria ũhoro ũcio. Ĩndĩ, ũngĩtaũkĩrũo wega nĩ gĩcunjĩ gĩkĩ, ndũkũnyitĩrĩra mũno ũhoro ũrĩa ũrarutana ũũ atĩ ndũngĩongerera kaũndũ ga gũteithĩrĩria mũrutwo ataũkĩrũo makĩria.