Okulilongekida oku ka yandja oshipopiwa meongalo

OFIKOLA YOUKALELE WOPAUTEOKRATIKA oya nuninwa okukwafela eongalo alishe. Omauyelele makwao a fimana ohaa yandjwa yo pokwoongala kukwao nosho yo poyoongalele. Ngeenge owa ulikwa u ka yandje oshipopiwa pokwoongala kwonhumba ile poshoongalele, oshi li oshinakuwanifwa sha kwata moiti. Omuyapostoli Paulus okwa li a ladipika omukulunhuongalo Omukriste, Timoteus, a pashukile ehongo laye. (1 Tim. 4:16) Ovamwatate novamwameme ohava ningi eenghendabala opo ve uye kokwoongala; vamwe ohava ningi nokuli omaliyambo a wedwa po opo va dule okukala pokwoongala. Ohave uya nelalakano lokuhongwa oinima oyo tai va kwafele va kaleke po ekwatafano lavo naKalunga. Kashi fi tuu oufembanghenda munene okuyandja oshipopiwa pokwoongala! Ndele ongahelipi to dulu okulilongekidila oshipopiwa shoye?

Omanenediladilo okudja melesho lOmbibeli

Oshipopiwa osho shomofikola ohashi kala she likolelela kelesho lOmbibeli lokoshivike. Omupopi oku na okuyandja elitulemo kunghee ouyelele oo we tu kuma kunena. Nehemia 8:8 ota popi kutya Esra novahongi vomhango vakwao ova li va leshela ovanhu moipafi Eendjovo daKalunga ndele tave di “fatulula” opo ovanhu ve di ude ko. Naave oto dulu okuninga sha faafana ngeenge to yandje oshipopiwa shomanenediladilo.

Ongahelipi to dulu okulilongekida oshipopiwa shomanenediladilo? Ngeenge otashi dulika, lesha omatukulwa omo tamu di omanenediladilo fimbo ku na oshivike shimwe ile oivike yonhumba fimbo ino ka yandja oshipopiwa osho. Opo nee diladila keongalo leni nosho yo keemhumbwe dalo. Ilikana shi na naasho. Omayele nomafinamhango elipi ile oihopaenenwa ilipi oyo tai hangwa momatukulwa oo Ombibeli to dulu oku ka longifa opo u kwafele eongalo she likolelela keemhumbwe dalo?

Osha fimana okukonga omauyelele. Longifa nawa oshuulikifo shoipalanyole yOshungonangelo osho hashi kala mOshungonangelo yaDesemba ile oishangomwa noikwa noipangifo ikwao yokukonga omauyelele. Ngeenge owa kongo ouyelele u na sha neevelishe odo wa hala oku ka longifa, osho otashi ke ku kwafela u ude ko nawa eevelishe odo, omaxunganeko onhumba oo a wanifwa, omayelifilo e na sha nomishangwa donhumba odo tadi popi shi na sha naJehova ile e na sha nomafinamhango onhumba. Ino kendabala oku ka yelifa oitwa ihapu. Yandja ashike elitulemo keevelishe donhumba dinini. Oshiwa okulilongekida eevelishe dinini noku di yelifa nawa.

Oshipopiwa osho otashi dulika yo shi kale sha kwatela mo okupula ovapwilikini va ninge omatyekosha avo shi na sha nouwa oo va mona melesho lOmbibeli lokoshivike. Oshike osho va mona melesho lOmbibeli osho tashi va etele ouwa paumwene, moukwaneumbo, moukalele ile mokukalamwenyo kwavo? Onghedi omo Jehova a ungaunga novanhu nosho yo noiwana oyo tai hokololwa momatukulwa oo otai holola omaukwatya aye elipi? Oshike osho ovapwilikini ve lihonga sha pameka eitavelo lavo noshe va kwafela va kale ve na olupandu lokupandula Jehova? Ino mana po efimbo nokuyelifa oinima oyo ya kitakana noinai fimana lela kovapwilikini. Divilika eityo nosho yo efimano loitwa oyo wa hoolola.

Okwoongala kwopailonga

Ngeenge to yandje oshipopiwa she likolelela koshitukulwa osho shi li mokafo kOukalele Wetu wOuhamba, owa pumbwa okuyandja elitulemo kouyelele oo u li mokafo. Kwafela ovapwilikini va mone nghee omishangwa odo di li moshitukulwa tadi yambidida oshikundafanwa osho. (Tit. 1:9) Molwaashi efimbo ohali kala la ngabekwa, peemhito dihapu ito ka dula okuyandja ouyelele wa wedwa po.

Peemhito dimwe, otashi dulika u pulwe u yandje oshipopiwa osho shi na ouyelele oo uhe li mokafo kOukalele Wetu wOuhamba. Ouyelele oo otashi dulika tau hangwa mOshungonangelo ile u pewe ashike ouyelele munini. U li omuhongi, ou na okutala nghee ouyelele oo to ka longifa moshipopiwa shoye tau wapalele eemhumbwe deongalo. Otashi dulika wa pumbwa okuyandja efaneko lonhumba li li pauxupi ile u hokolole oshimoniwa tashi wapalele. Dimbuluka kutya ino pumbwa ashike okupopya ngahenya shi na sha noshikundafanwa osho wa pewa, ndele owa pumbwa okukwafela ovapwilikini va katuke metwokumwe nEendjovo daKalunga nove shi ninge nehafo. — Oil. 20:20, 21.

Eshi to lilongekida oshipopiwa shoye, diladila shi na sha neenghalo doilyo yeongalo. Pandula eongalo opo tali shi endifa nawa. Ngeenge ovakwaneongalo ova tula moilonga omaetepo oo to ka kundafana, mbela otashi ke va kwafela ngahelipi va kale hava pondola moukalele nova kale have u hafele?

Mbela oshipopiwa shoye osha kwatela mo euliko ile omapulapulo? Ngeenge osho, ninga omalongekido komesho yefimbo shi na naavo to ka longifa. Otashi dulika u kwatwe keamo lokulombwela ashike ovo wa hala okulongifa meuliko ile momapulapulo ve lilongekide ndele ito kala po eshi tave liendifa po. Ndelenee luhapu osho ihashi eta oidjemo iwa. Ngeenge otashi dulika, liendifei po naavo tava ka ninga euliko ile ovo to ka pulapula. Shilipaleka kutya euliko ile omapulapulo oo a kwatelwa moshipopiwa shoye otaa ningwa monghedi tai hongo lela.

Oyoongalele

Ovamwatate ovo va kulika omaukwatya mawa opamhepo nova ninga ovapopi vomoipafi novahongi va pyokoka otashi dulika va kale hava pulwa va ka yandje oipopiwa poyoongalele. Oyoongalele oi li eemhito de likalekelwa dehongo lopauteokratika. Omumwatate otashi dulika a pewe oshipopiwa shokuleshwa ile a pewe oshipopiwadutilo ile a pewe omalombwelo e na sha noshinyandwa shopaMbibeli osho shi na oilihongomwa oyo tai ti sha kufye kunena, ile a pewe ashike omalombwelo e na sha nanghee e na okuyandja oshitukulwa shaye poshoongalele. Ngeenge ou na oufembanghenda woku ka yandja oshipopiwa poshoongalele, konakona nawa ouyelele oo wa pewa. Lilongekida nokuliendifa po fiyo wa mbilipalelwa nowa tunhukwa kouyelele oo.

Ngeenge owa pewa oshipopiwa shokuleshwa, ou na okulesha oshitya noshitya. Ku na okulundulula sha. Ou na okukonakona ouyelele oo opo u didilike mo oitwa oyo ya fimanenena nonghee ya unganekwa. Ou na okulilongekida oshipopiwa shoye to lesha pombada, to tu omufindo oinima oyo ya pumbwa okudivilikwa, u nexwamo nohamu, to holola omaliudo, u na ondjungu, to lesha wa tomhwa nokulesha newi olo la yeleka ovapwilikini vahapu.

Ovamwatate ovo va pewa oipopiwadutilo ove na okuunganeka ouyelele metwokumwe noipopiwadutilo oyo va pewa. Omupopi ke na okukala ta lesha moshipopiwadutilo osho a pewa kehangano ile e lilongekide oshipopiwa shaye monghedi yoipopiwa oyo hai leshwa. Ndele ponhele yaasho, oku na okupopya tashi di komutima. Ina kala a mangwa koshipopiwadutilo. Osha fimana yo okulongela kefimbo olo la ulikwa moshipopiwadutilo opo a dule okuyelifa nawa oshitwa keshe osho sha fimanenena. Oku na yo okuyelifa nawa omadiladilo nosho yo omishangwa odo di li koshi yoitwa oyo ya fimanenena. Ke na okudivilika oitwa oyo a hokwa paumwene, oyo tai mu imbi a divilike oitwa ya fimanenena oyo i li moshipopiwadutilo osho a pewa kehangano. Molwaashi oipopiwa oyo ohai kala ye likolelela kEendjovo daKalunga, omukulunhuongalo Omukriste oku na oshinakuwanifwa ‘shokuudifa ondjovo.’ (2 Tim. 4:1, 2) Onghee hano, omupopi oku na okuyandja elitulemo le likalekelwa komishangwa odo di li moshipopiwadutilo, sha hala okutya, oku na oku di yelifa monghedi tai tomho nokuulika nghee tadi dulu okutulwa moilonga.

Lilongekida manga kuyele

Mbela ou li meongalo omo ho mono eemhito dihapu dokuyandja oipopiwa? Ongahelipi to dulu okulilongekidila nawa oipopiwa oyo? Kala ho lilongekida kuyele.

Opo oipopiwa yoye i kale tai etele vamwe ouwa, owa pumbwa okulilongekida nefimbo. Onghee hano, kala ho lesha ouyelele oko kwe likolela oshipopiwa shoye diva konima eshi we shi pewa. Osho otashi ke ku kwafela u kale to dilonga koshipopiwa shoye fimbo we lipyakidila noinima imwe. Otashi dulika u ude sha momukokomoko womafiku ile woivike oyo ya tetekela efiku omo to ka yandja oshipopiwa shoye, osho tashi ke ku kwafela u mone nghee to dulu okulongifa ouyelele oo. Otashi dulika pa holoke eenghalo odo tadi ka ulika kutya oshipopiwa osho oshi li pefimbo. Ohashi pula efimbo okulesha nokudilonga koshipopiwa shoye konima eshi we shi pewa, ashike eenghendabala da tya ngaho otadi ti sha. Ngeenge owa kala to dilonga koshipopiwa shoye komesho yefimbo, otashi ke ku kwafela eshi to ka unganeka oshipopiwadutilo shoye. Ngeenge owa kala ho lilongekidile oipopiwa yoye monghedi ya tya ngaho, otashi ke ku kwafela uha kale noshisho sha pitilila notashi ke ku kwafela yo u yandje oipopiwa yoye monghedi omo tai kwafele ovapwilikini voye noto ka hanga omitima davo.

Ngeenge owa lenga oufembanghenda wokukala omuhongi mokati koshiwana shaJehova oo wa pewa, oto ka fimanekifa Jehova noto ka kala enangeko noupuna kwaavo ve mu hole. — Jes. 54:13; Rom. 12:6-8.