Okulilongekida oku ka yandja oshipopiwa shomoipafi

OSHIVIKE keshe, omaongalo mahapu Eendombwedi daJehova ohaa kala e na oshipopiwa she likolelela kOmishangwa. U li omukulunhuongalo ile omuyakuliongalo, mbela oho ulike ngoo kutya ou li omupopi nomuhongi omunekeka? Ngeenge osho, otashi dulika u pulwe u yandje oshipopiwa shomoipafi. Ofikola yOukalele woPauteokratika oya deula ovamwatate omayovi omilongo va kale va pyokoka mokuyandja oipopiwa yomoipafi. Ou na okulilongekida ngahelipi ngeenge owa pulwa u ka yandje oshipopiwa shomoipafi?

Konakona oshipopiwadutilo

Fimbo ino hovela okukonga omauyelele a wedwa po, tete lesha oshipopiwadutilo osho wa pewa nokudilonga kusho fiyo osheshi wa uda ko oshikalimo shasho. Kaleka momadiladilo oshipalanyole shoshipopiwa. Lipula yo kutya: ‘Oshike osho ndi na okuhonga ovapwilikini? Elalakano lilipi nda hala okuhanga?’

Konakona nawa oupalanyole. Nongonona oitwa oyo ya fimanenena. Mbela oitwa oyo ya fimanenena oya pambafana ngahelipi noshipalanyole shoshipopiwa? Oitwa ya fimanenena oi na yo oitwa oyo tai i yambidida. Koshi yoitwa oyo tai yambidida oitwa oyo ya fimanenena oku na yo ouyelele oo tau yambidida oitwa ya tya ngaho. Okutala kunghee oitwa aishe tai yambididafana otashi ke ku kwafela u hange elalakano loye. Ngeenge owa kala u shii oshipalanyole shoshipopiwa, elalakano lasho nosho yo nghee oitwa oyo ya fimanenena tai wanifa po elalakano loshipopiwa, oto dulu nee okuhovela okuunganeka ouyelele woye.

Ngeenge to lilongekida, oshiwa okutukula oshipopiwadutilo shoye moitukulwa i li ine ile itano ixupi, she likolelela koitwa oyo ya fimanenena. Opo nee lilongekida oitukulwa oyo koshiimwe.

Oshipopiwadutilo osho wa pewa osha nuninwa oku ku kwafela u lilongekide. Hasho u na okulongifa eshi to yandje oshipopiwa shoye. Oshipopiwadutilo otashi dulu okuyelekanifwa nomudutilo weumbo. Owa pumbwa okukonga oitungifo nokulongekida eumbo opo li dule okukalwa. Sha faafana, owa pumbwa okukonga omauyelele nokuunganeka oshipopiwa shoye opo shi kale sha mwenyopala notashi tungu.

Longifa Omishangwa

Jesus Kristus novahongwa vaye ova li va kanghamekela ehongo lavo kOmishangwa. (Luk. 4:16-21; 24:27; Oil. 17:2, 3) Naave oto dulu okuninga ngaho. Oshipopiwa shoye oshi na okukala she likolelela kOmishangwa. Ponhele ashike yokuyelifa oitwa oyo i li moshipopiwadutilo, tala kunghee Omishangwa tadi yambidida oitwa oyo, nokutomhafana novapwilikini to longifa Omishangwa.

Eshi to lilongekidile oshipopiwa shoye, konakona omushangwa keshe wa etwa mo moshipopiwadutilo. Tala yo ketukulwa alishe omo mwa dja omushangwa oo. Omishangwa dimwe ohadi tulwa mo ashike opo di kwafele ovapopi va mone kutya ouyelele wonhumba ile wongadi owe likolelela komishangwa dilipi. Onghee hano, ino pumbwa okulesha ile okuyelifa omishangwa adishe odo da etwa mo eshi to ka yandja oshipopiwa. Hoolola mo ashike odo u wete tadi ka kwafela ovapwilikini. Ngeenge owa longifa ashike omishangwa odo di li moshipopiwadutilo, ito ka pumbwa vali okulongifa omishangwa odo di li meedjo douyelele odo da ulikwa moshipopiwadutilo.

Okulongifa omishangwa dihapu hako taku ufa kutya oto ka yandja oshipopiwa shiwa, ndele shihapu oshe likolelela konghedi yoye yokuhonga. Ngeenge to shivi ovapwilikini va endele pamwe naave eshi to ka lesha omushangwa, yelifa kutya omolwashike wa hala okulesha omushangwa oo. Yelifa nghee omishangwa odo to lesha tadi dulu okutulwa moilonga. Konima eshi wa mana okulesha omushangwa wonhumba, kaleka Ombibeli yoye ya patuluka eshi to u yelifa. Ovapwilikini voye navo oshi na oupu va kaleke Eembibeli davo da pandjwa pomushangwa oo. Ongahelipi to dulu okuhokwifa ovapwilikini voye noku va kwafela va mone ouwa muhapu mEendjovo daKalunga? (Neh. 8:8, 12) Oto dulu okuninga ngaho mokuyelifa omishangwa, okulongifa omafaneko nosho yo mokuyelifa etulomoilonga.

Yelifa omishangwa. Ngeenge to lilongekidile oku ka yelifa ovelishe yonhumba ya fimana, lipula kutya: ‘Ovelishe ei oya hala okutya shike? Omolwashike nda hala oku ke i longifa moshipopiwa shange? Ovapwilikini ove shii shi fike peni kombinga yovelishe ei?’ Otashi dulika wa pumbwa okunongonona oshikalimo shetukulwa omo mwa dja ovelishe oyo, onghalo yopefimbo loiningwanima oyo tai kundafanwa, eityo leendjovo nosho yo elalakano lomushangi oo a shanga embo lOmbibeli omo mwa dja ovelishe oyo. Osho otashi pula u konge ouyelele wa wedwa po. Oto ka mona ouyelele muhapu tau ku kwafele moishangomwa ‘yomupiya omudiinini nomunaendunge.’ (Mat. 24:45-47) Ino yelifa keshe shimwe osho u shii kombinga yovelishe oyo, ndele yelifila ovapwilikini kutya omolwashike we va shiva mu leshe ovelishe oyo, opo va mone nghee ya pambafana noshitwa osho to kundafana.

Longifa omafaneko. Elalakano lomafaneko olo okukwafela ovapwilikini voye va ude ko oinima moule ile oku va kwafela va dimbuluke oshitwa ile efinamhango lonhumba olo wa kundafana navo. Omafaneko ohaa kwafele ovanhu va ude ko osho to kundafana navo noku shi kwatakanifa naasho ve shii nale. Jesus okwa li a longifa omafaneko mEudifo laye lokOmhunda. Okwa li a popya kombinga ‘yeedila dokeulu,’ “eenhemo domoixwa,” ‘oshivelo sha finana,’ ‘ongulu ya tungilwa kemanya’ nosho tuu oinima ikwao ihapu oyo ya li ya ningifa omahongo aye a kale e na eenghono, a fatuka nawa, mapu okuudiwa ko noitaa dimbuwa noupu. — Mat., etukulwa eti-5-7.

Yelifa etulomoilonga. Okuyelifa omishangwa nokulongifa omafaneko ohaku kwafele ovanhu va kale ve na eshiivo. Ndelenee ovanhu ohava mono ashike oidjemo iwa ngeenge tava tula moilonga osho ve lihonga. Odoshili kutya omupwilikini keshe oku na oshinakuwanifwa shokukatuka metwokumwe netumwalaka lOmbibeli, ndele oto dulu oku va kwafela va mone kutya eenghatu dilipi ve na okukatuka. Ngeenge ou wete kutya ovapwilikini voye ove udite ko ovelishe oyo wa kundafana navo nove udite ko nghee ya pambafana noshitwa osho wa yelifa, va kwafela yo va mone nghee tai dulu okunwefa mo eitavelo lavo nonghedi yavo yokukalamwenyo. Divilika nghee shi na ouwa okweefa po okudiladila kwa puka nokweefa po elihumbato inali koshoka olo lihe li metwokumwe nomafinamhango Ombibeli oo to kundafana navo.

Eshi to diladila shi na sha nanghee to ka yelifa etulomoilonga lomushangwa wonhumba, kaleka momadiladilo kutya vahapu ovo to ka popya navo ova dja momaputuko e lili noku lili nove li meenghalo di lili noku lili. Otashi dulika mokati kovapwilikini mu kale ovanhu ovo ve na ohokwe ovo opo va hovele okweendafana nafye, ovanyasha, ovanamido nosho yo ovo tava ungaunga nomaupyakadi e lili noku lili opaumwene. Oshipopiwa shoye nashi kale tashi hongo shili notashi ti sha kovapwilikini. Henuka okuyandja oshipopiwa shoye wa fa ashike to yandje omayele koohandimwe.

Omatokolo oo e na okuningwa komupopi

Ouyelele muhapu u na sha noshipopiwa osho to ka yandja oho kala we u pewa nale. Oshipopiwadutilo osho wa pewa ohashi kala shi na oitwa oyo ya fimanenena nohashi ulike kutya ou na okulongifa efimbo li fike peni poshitwa keshe sha fimanenena. Ndele shi na sha noinima imwe oove mwene u na okutokola. Pashihopaenenwa, oto dulu okuhoolola kutya oto ka longifa efimbo li fike peni mokuyelifa oitwa oyo i li koshi yoitwa oyo ya fimanenena. Ino pumbwa okulongifa efimbo li fike pamwe okuyelifa oitwa oyo. Ngeenge owa kendabala okuyelifa oitwa oyo to longifa efimbo li fike pamwe, oshi na oupu u kale ashike to yelifa oinima wa uluma, novapwilikini voye otava ka kala va lyalyakana. Ongahelipi to dulu okutokola kutya oshitwa shilipi to ka yelifa pauyadi naasho to ka popya ashike pauxupi? Lipula kutya: ‘Oitwa ilipi tai ka kwafela nge ndi yelife enenediladilo loshipopiwa? Oitwa ilipi tai ka dula okweetela ovapwilikini ouwa? Ngeenge onda fiye po omushangwa umwe ile oshitwa osho she u pamba, mbela oshipopiwa shange otashi ka kala sha fa sha kambela sha?’

Henuka okupopya oinima oyo uhe na oushili muyo ile omataleko opaumwene. Omona waKalunga, Jesus Kristus, ka li ha popi ‘muye mwene.’ (Joh. 14:10) Dimbuluka kutya ovanhu ohave uya kokwoongala kwEendomwedi daJehova opo va hongwe Ombibeli. Ngeenge owa talika ko u li omupopi muwa, otashi dulika omolwaashi ho longifa Eendjovo daKalunga, ndele hamadiladilo oye mwene, nomolwaasho oipopiwa yoye hai pandulwa. — Fil. 1:10, 11.

Konima eshi wa konga ouyelele wa wana oo tau ke ku kwafela u yelife omishangwa, nowa unganeka nawa oshipopiwa shoye, hovela nee okuliendifa po. Oshiwa okuliendifa po to popi mokule. Osha fimana okudimbuluka oitwa aishe oyo to ka longifa. Ou na okupopya tashi di komutima, wa mwenyopala nonexwamo. Fimbo ino ka yandja oshipopiwa shoye, lipula kutya: ‘Onda hala okuhanga elalakano lilipi? Oitwa oyo ya fimanenena otai ka kala ngoo i liwetikile? Oshipopiwa shange oshe likolelela ngoo kOmishangwa? Oshitwa keshe sha fimanenena osha kwatafana ngoo nawa naikwao? Oshipopiwa eshi otashi ke linyengifa ngoo ovanhu va kulike olupandu lavo lokupandula Jehova nomafiloshisho aye? Exulifo loshipopiwa ola pambafana ngoo filufilu noshipalanyole, notali kwafele ngoo ovapwilikini va mone kutya oshike osho ve na okuninga? Otali ke va ladipika ngoo va katuke eenghatu?’ Ngeenge owa nyamukula heeno komapulo aeshe oo, oto ka dula ‘okuhepaululila ovapwilikini eshiivo loshili’ opo va mone ouwa, noto ka fimanekifa Jehova. — Omayel. 15:2.