ចម្រៀងសរសើរព្រះ

សៀវភៅទី១

(ចម្រៀងសរសើរព្រះ ១-៤១)

១ អ្នកណាដែលមិនដើរតាមឱវាទរបស់មនុស្សទុច្ចរិត

ហើយមិនឈរលើផ្លូវរបស់អ្នកប្រព្រឹត្តអំពើខុសឆ្គង+

ក៏មិនអង្គុយជាមួយនឹងអ្នកដែលចំអកមើលងាយ+ អ្នកនោះមានសុភមង្គលហើយ!

២ គាត់ស្រឡាញ់ច្បាប់របស់ព្រះយេហូវ៉ា+

គាត់រំពឹងគិតអំពីច្បាប់របស់លោក*ទាំងថ្ងៃទាំងយប់។+

៣ គាត់នឹងដូចដើមឈើដែលដុះនៅក្បែរមាត់ទឹក

ដូចដើមឈើដែលបង្កើតផលតាមរដូវកាល

ឯស្លឹកមិនក្រៀមស្វិតឡើយ

ហើយអ្វីៗដែលគាត់ធ្វើនឹងបានសម្រេច។+

៤ ប៉ុន្តែ មនុស្សទុច្ចរិតមិនដូច្នោះទេ

ពួកគេដូចជាអង្កាមដែលត្រូវខ្យល់ផាត់បាត់ទៅ។

៥ ដូច្នេះ មនុស្សទុច្ចរិតនឹងមិនរួចទោសទេ+

ហើយនឹងគ្មានអ្នកដែលធ្វើអំពើខុសឆ្គងនៅក្នុងចំណោមមនុស្សសុចរិតឡើយ។+

៦ ព្រោះព្រះយេហូវ៉ាស្គាល់ផ្លូវរបស់មនុស្សសុចរិត+

ប៉ុន្តែ ផ្លូវរបស់មនុស្សទុច្ចរិតនឹងវិនាសជាមិនខាន។+