សាការី
១ នៅខែទី៨ ក្នុងឆ្នាំទី២នៃការគ្រប់គ្រងរបស់ដារីយុស+ ប្រសាសន៍របស់ព្រះយេហូវ៉ាបានមកដល់សាការី*+ដែលជាអ្នកប្រកាសទំនាយ គាត់ជាកូនរបស់បេរេគា និងជាចៅរបស់អ៊ីតដូ។ ព្រះមានប្រសាសន៍ថា៖ ២ «ព្រះយេហូវ៉ាបានខឹងឪពុករបស់អ្នករាល់គ្នាខ្លាំងណាស់។+
៣ «ចូរទៅប្រាប់ពួកគេថា៖ ‹ព្រះយេហូវ៉ានៃបណ្ដាកងទ័ពស្ថានសួគ៌មានប្រសាសន៍ថា៖ «‹ចូរត្រឡប់មករកខ្ញុំវិញ›។ ព្រះយេហូវ៉ានៃបណ្ដាកងទ័ពស្ថានសួគ៌មានប្រសាសន៍ថា៖ ‹ហើយខ្ញុំនឹងត្រឡប់ទៅរកអ្នករាល់គ្នាដែរ›។+ ព្រះយេហូវ៉ានៃបណ្ដាកងទ័ពស្ថានសួគ៌មានប្រសាសន៍ដូច្នេះ»›។
៤ «‹កុំប្រព្រឹត្តដូចឪពុករបស់អ្នករាល់គ្នាឲ្យសោះ។ ខ្ញុំធ្លាប់ប្រើពួកអ្នកប្រកាសទំនាយនៅជំនាន់មុនឲ្យទៅប្រាប់ថា៖ «ព្រះយេហូវ៉ានៃបណ្ដាកងទ័ពស្ថានសួគ៌មានប្រសាសន៍ថា៖ ‹ចូរអ្នករាល់គ្នាបែរចេញ*ពីផ្លូវអាក្រក់ ហើយលះចោលអំពើអាក្រក់›»›។+
«‹ប៉ុន្តែ ពួកគេមិនព្រមស្ដាប់ទេ ហើយក៏មិនយកចិត្តទុកដាក់នឹងសម្ដីរបស់ខ្ញុំដែរ›។+ ព្រះយេហូវ៉ាបានប្រកាសដូច្នេះ។
៥ «‹ឥឡូវ តើឪពុករបស់អ្នករាល់គ្នានៅឯណា? ហើយតើពួកអ្នកប្រកាសទំនាយនៅជំនាន់មុន នៅតែមានជីវិតឬ? ៦ ខ្ញុំបានប្រាប់អំពីក្រឹត្យក្រមដល់ឪពុកអ្នករាល់គ្នារួចហើយ។ ខ្ញុំថែមទាំងបានចាត់ពួកអ្នកប្រកាសទំនាយដែលជាអ្នកបម្រើរបស់ខ្ញុំឲ្យទៅដាស់តឿនពួកគេឲ្យដឹងអំពីអ្វីដែលនឹងកើតឡើងដល់ពួកគេ បើពួកគេមិនធ្វើតាមក្រឹត្យក្រមទាំងនោះទេ។ អ្វីទាំងអស់ដែលខ្ញុំបានប្រកាសទុកពិតជាបានកើតឡើង មែនទេ?›។+ ដូច្នេះ ពួកគេបានត្រឡប់មករកខ្ញុំវិញ ហើយនិយាយថា៖ ‹ព្រះយេហូវ៉ានៃបណ្ដាកងទ័ពស្ថានសួគ៌បានប្រព្រឹត្តមកលើពួកយើងស្របតាមទង្វើរបស់ពួកយើង ដូចដែលលោកបានមានប្រសាសន៍មែន›»។+
៧ នៅថ្ងៃទី២៤ ខែទី១១ ជាខែសេបាត* ក្នុងឆ្នាំទី២នៃការគ្រប់គ្រងរបស់ដារីយុស+ ប្រសាសន៍របស់ព្រះយេហូវ៉ាបានមកដល់សាការីដែលជាអ្នកប្រកាសទំនាយ គាត់ជាកូនរបស់បេរេគា និងជាចៅរបស់អ៊ីតដូ។ ៨ សាការីនិយាយថា៖ «នៅពេលយប់ ខ្ញុំបានឃើញការបើកបង្ហាញពីព្រះ។ ខ្ញុំឃើញបុរសម្នាក់កំពុងជិះសេះសម្បុរក្រហម ហើយគាត់បានឈប់នៅកណ្ដាលដើមមើថល ត្រង់ច្រកភ្នំ។ នៅពីក្រោយគាត់ មានអ្នកជិះសេះសម្បុរក្រហម សេះសម្បុរក្រហមក្រមៅ និងសេះសម្បុរស»។
៩ ដូច្នេះ ខ្ញុំបានសួរថា៖ «លោកម្ចាស់ តើពួកគេទាំងនេះជានរណា?»។
ទេវតាដែលកំពុងនិយាយជាមួយនឹងខ្ញុំ បានឆ្លើយថា៖ «ខ្ញុំនឹងបង្ហាញអ្នកឲ្យដឹងថាពួកគេជានរណា»។
១០ រួចមក បុរសដែលឈរនៅកណ្ដាលដើមមើថល បានប្រាប់ថា៖ «ពួកគេគឺជាអ្នកដែលព្រះយេហូវ៉ាបានចាត់ឲ្យមកដើរល្បាតផែនដី»។ ១១ ពួកគេនិយាយទៅកាន់ទេវតារបស់ព្រះយេហូវ៉ាដែលកំពុងឈរនៅកណ្ដាលដើមមើថលថា៖ «យើងបានដើរល្បាតផែនដីរួចហើយ។ មើល! ផែនដីទាំងមូលនៅស្ងប់ស្ងាត់ និងគ្មានអ្វីនាំឲ្យមានភាពវឹកវរឡើយ»។+
១២ ដូច្នេះ ទេវតារបស់ព្រះយេហូវ៉ានិយាយថា៖ «ឱព្រះយេហូវ៉ានៃបណ្ដាកងទ័ពស្ថានសួគ៌ តើដល់ពេលណាទើបលោកអាណិតមេត្តាដល់យេរូសាឡិម* និងក្រុងផ្សេងៗរបស់យូដា?+ លោកខឹងពួកគេអស់៧០ឆ្នាំហើយ»។+
១៣ ព្រះយេហូវ៉ាក៏តបឆ្លើយទៅទេវតាដែលកំពុងនិយាយជាមួយនឹងខ្ញុំ។ លោកតបឆ្លើយដោយសប្បុរសនិងដោយសម្ដីសម្រាលទុក្ខ។ ១៤ រួចមក ទេវតាដែលកំពុងនិយាយជាមួយនឹងខ្ញុំ បានប្រាប់ខ្ញុំថា៖ «ចូរទៅប្រកាសថា៖ ‹ព្រះយេហូវ៉ានៃបណ្ដាកងទ័ពស្ថានសួគ៌មានប្រសាសន៍ថា៖ «ខ្ញុំបានតាំងចិត្តការពារយេរូសាឡិមនិងស៊ីយ៉ូន។+ ១៥ ខ្ញុំខឹងប្រជាជាតិដែលក្រអឺតក្រអោងទាំងនោះខ្លាំងណាស់។+ ខ្ញុំចង់ដាក់ទោសរាស្ត្ររបស់ខ្ញុំតែបន្តិចទេ+ ប៉ុន្តែប្រជាជាតិទាំងនោះបែរជាធ្វើឲ្យរាស្ត្ររបស់ខ្ញុំអន្តរាយទាំងស្រុងវិញ»›។+
១៦ «ម្ល៉ោះហើយ ព្រះយេហូវ៉ាមានប្រសាសន៍ថា៖ ‹«ខ្ញុំនឹងបែរមកអាណិតមេត្តាដល់យេរូសាឡិម+ ហើយសង់វិហាររបស់ខ្ញុំដែលនៅក្នុងនាងឡើងវិញ។+ ម្យ៉ាងទៀត នឹងមានការទាញខ្សែវាស់យេរូសាឡិមសាជាថ្មី»។ នេះជាសេចក្ដីប្រកាសរបស់ព្រះយេហូវ៉ានៃបណ្ដាកងទ័ពស្ថានសួគ៌›។+
១៧ «ចូរអ្នកទៅប្រកាសម្ដងទៀតថា៖ ‹ព្រះយេហូវ៉ានៃបណ្ដាកងទ័ពស្ថានសួគ៌មានប្រសាសន៍ថា៖ «ក្រុងនានារបស់ខ្ញុំនឹងបានទទួលសេចក្ដីល្អ*យ៉ាងបរិបូរម្ដងទៀត ហើយព្រះយេហូវ៉ានឹងសម្រាលទុក្ខស៊ីយ៉ូន+ ព្រមទាំងជ្រើសរើសយេរូសាឡិមសាជាថ្មីផង»›»។+
១៨ រួចមក ពេលខ្ញុំងើបមុខឡើង ខ្ញុំឃើញស្នែងបួន។+ ១៩ ខ្ញុំក៏សួរទេវតាដែលកំពុងនិយាយជាមួយនឹងខ្ញុំថា៖ «តើស្នែងទាំងនេះមានអត្ថន័យអ្វី?»។ គាត់បានតបថា៖ «ស្នែងទាំងនេះជាស្នែងដែលបានកម្ចាត់កម្ចាយយូដា+ អ៊ីស្រាអែល+ និងយេរូសាឡិម»។+
២០ បន្ទាប់មកទៀត ព្រះយេហូវ៉ាបានបង្ហាញឲ្យខ្ញុំឃើញសិប្បករបួននាក់។ ២១ ដូច្នេះ ខ្ញុំក៏សួរថា៖ «តើបុរសទាំងនេះមកធ្វើអ្វី?»។
គាត់ប្រាប់ថា៖ «ស្នែងទាំងនោះបានកម្ចាត់កម្ចាយយូដា រហូតដល់គ្មានអ្នកណាអាចងើបក្បាលរួច។ ប៉ុន្តែ បុរសទាំងនេះនឹងមកដើម្បីធ្វើឲ្យស្នែងទាំងនោះភ័យតក់ស្លុត ហើយដើម្បីបំផ្លាញស្នែងរបស់ប្រជាជាតិដែលធ្លាប់តែលើកស្នែងឡើងប្រឆាំងស្រុកយូដាធ្វើឲ្យនាងខ្ចាត់ខ្ចាយទៅ»។
២ រួចមក ខ្ញុំងើបមុខឡើង ហើយឃើញបុរសម្នាក់មានខ្សែរង្វាស់+ក្នុងដៃ។ ២ ដូច្នេះ ខ្ញុំក៏សួរគាត់ថា៖ «តើអ្នកអញ្ជើញទៅណា?»។
គាត់តបថា៖ «ទៅវាស់យេរូសាឡិម ដើម្បីឲ្យដឹងពីទទឹងនិងបណ្ដោយរបស់នាង»។+
៣ មើល! ទេវតាដែលកំពុងនិយាយជាមួយនឹងខ្ញុំក៏ចេញទៅ ហើយមានទេវតាមួយទៀតមកជួបទេវតានោះ ៤ រួចក៏និយាយទៅទេវតានោះថា៖ «ចូរប្រញាប់រត់ទៅប្រាប់បុរសនោះថា៖ ‹«យេរូសាឡិមនឹងទៅជាទីអាស្រ័យនៅ+ ដូចជាក្រុងដែលនៅចំហគ្មានកំពែងការពារ ដោយសារមនុស្សនិងហ្វូងសត្វច្រើនសន្ធឹករស់នៅក្នុងនាង។+ ៥ ខ្ញុំនឹងទៅជាកំពែងភ្លើងនៅព័ទ្ធជុំវិញនាង+ ហើយខ្ញុំនឹងទៅជាសិរីរុងរឿងរបស់នាង»។+ ព្រះយេហូវ៉ាមានប្រសាសន៍ដូច្នោះ›»។
៦ ព្រះយេហូវ៉ាមានប្រសាសន៍ថា៖ «មក! មក! ចូរភៀសខ្លួនចេញពីទឹកដីទិសខាងជើងមក»។+
ព្រះយេហូវ៉ាមានប្រសាសន៍ថា៖ «ព្រោះខ្ញុំបានកម្ចាត់កម្ចាយអ្នករាល់គ្នាទៅទិសទាំងបួន»។+
៧ «មកចុះ ស៊ីយ៉ូន! អ្នករាល់គ្នាដែលកំពុងអាស្រ័យជាមួយនឹងកូនស្រីនៃក្រុងបាប៊ីឡូន*អើយ ចូរគេចចេញមក!+ ៨ ក្រោយពីព្រះយេហូវ៉ានៃបណ្ដាកងទ័ពស្ថានសួគ៌បានទទួលការលើកតម្កើង លោកបានចាត់ខ្ញុំឲ្យទៅឯប្រជាជាតិនានាដែលប្លន់អ្នករាល់គ្នា។+ លោកមានប្រសាសន៍ថា៖ ‹អ្នកណាក៏ដោយដែលប៉ះពាល់អ្នករាល់គ្នា ក៏ដូចជាពាល់ប្រស្រីភ្នែករបស់ខ្ញុំដែរ។+ ៩ ពីព្រោះខ្ញុំនឹងលើកដៃប្រឆាំងពួកគេ ហើយទាសកររបស់ពួកគេនឹងប្លន់ពួកគេវិញ›។+ រួចអ្នករាល់គ្នានឹងដឹងច្បាស់ថា ព្រះយេហូវ៉ានៃបណ្ដាកងទ័ពស្ថានសួគ៌បានចាត់ខ្ញុំឲ្យមក។
១០ «ឱកូនស្រីនៃក្រុងស៊ីយ៉ូន*អើយ+ ចូរស្រែកដោយអំណរ ព្រោះខ្ញុំនឹងមក+ ហើយខ្ញុំនឹងនៅជាមួយនឹងអ្នករាល់គ្នា»។+ នេះជាប្រសាសន៍របស់ព្រះយេហូវ៉ា។ ១១ «នៅថ្ងៃនោះ ប្រជាជាតិជាច្រើននឹងគាំទ្រខាងខ្ញុំជាយេហូវ៉ា+ ហើយពួកគេនឹងក្លាយជារាស្ត្ររបស់ខ្ញុំ។ ខ្ញុំនឹងអាស្រ័យនៅជាមួយនឹងអ្នករាល់គ្នា»។ រួចអ្នករាល់គ្នានឹងដឹងច្បាស់ថា ព្រះយេហូវ៉ានៃបណ្ដាកងទ័ពស្ថានសួគ៌បានចាត់ខ្ញុំឲ្យមក។ ១២ ព្រះយេហូវ៉ានឹងយកយូដាទុកជាចំណែកនៃសម្បត្តិរបស់លោកនៅក្នុងទឹកដីបរិសុទ្ធ ហើយលោកនឹងជ្រើសរើសយេរូសាឡិមសាជាថ្មី។+ ១៣ ចូរឲ្យមនុស្សជាតិទាំងឡាយនៅស្ងៀមនៅចំពោះមុខព្រះយេហូវ៉ា ព្រោះលោកកំពុងចាត់វិធានការពីលំនៅបរិសុទ្ធរបស់លោកហើយ។
៣ បន្ទាប់មក លោក*បានបង្ហាញឲ្យខ្ញុំឃើញយ៉ូស្វេ+ជាសម្ដេចសង្ឃកំពុងឈរនៅចំពោះមុខទេវតារបស់ព្រះយេហូវ៉ា។ រីឯសាថាន+ឈរនៅខាងស្ដាំដៃយ៉ូស្វេ ដើម្បីតតាំងនឹងគាត់។ ២ រួចទេវតារបស់ព្រះយេហូវ៉ានិយាយទៅកាន់សាថានថា៖ «ឱសាថាន សូមឲ្យព្រះយេហូវ៉ាស្ដីបន្ទោសអ្នកចុះ!+ សូមឲ្យព្រះយេហូវ៉ាជាអ្នកដែលបានជ្រើសរើសយេរូសាឡិម+ ស្ដីបន្ទោសអ្នកចុះ! តើបុរសនេះមិនមែនជាកន្ទុយអុសដែលបានត្រូវកញ្ឆក់ចេញពីភ្លើងទេឬ?»។
៣ ពេលនោះ យ៉ូស្វេកំពុងឈរនៅចំពោះមុខទេវតានោះទាំងស្លៀកសម្លៀកបំពាក់កខ្វក់។ ៤ ទេវតានោះបាននិយាយទៅកាន់ពួកអ្នកបម្រើថា៖ «ចូរដោះសម្លៀកបំពាក់កខ្វក់ចេញពីគាត់»។ រួចទេវតានោះក៏ប្រាប់យ៉ូស្វេថា៖ «មើល ខ្ញុំបានលុបចោលកំហុសរបស់អ្នករួចហើយ។ អ្នកនឹងស្លៀកសម្លៀកបំពាក់ប្រណីតវិញ»។+
៥ ម្ល៉ោះហើយ ខ្ញុំក៏និយាយថា៖ «ចូរយកឈ្នួតស្អាតមកបំពាក់លើក្បាលរបស់គាត់»។+ រួចពួកគេក៏បំពាក់ឈ្នួតស្អាតលើក្បាលគាត់ ថែមទាំងស្លៀកសម្លៀកបំពាក់ឲ្យគាត់ផង។ ទេវតារបស់ព្រះយេហូវ៉ាក៏ឈរនៅជិតនោះដែរ។ ៦ បន្ទាប់មក ទេវតារបស់ព្រះយេហូវ៉ាក៏ប្រាប់យ៉ូស្វេថា៖ ៧ «ព្រះយេហូវ៉ានៃបណ្ដាកងទ័ពស្ថានសួគ៌បានមានប្រសាសន៍ថា៖ ‹ប្រសិនបើអ្នកដើរតាមផ្លូវរបស់ខ្ញុំ ហើយបន្តបំពេញភារកិច្ចនៅចំពោះមុខខ្ញុំ នោះអ្នកនឹងធ្វើជាអ្នកវិនិច្ឆ័យក្នុងវិហាររបស់ខ្ញុំ+ ហើយនឹងមើលការខុសត្រូវលើទីធ្លារបស់ខ្ញុំ។ ម្យ៉ាងទៀត ខ្ញុំនឹងអនុញ្ញាតឲ្យអ្នកមានសិទ្ធិចូលមកក្នុងចំណោមអស់អ្នកដែលកំពុងឈរនៅទីនេះ›។
៨ «‹ឱសម្ដេចសង្ឃយ៉ូស្វេអើយ សូមអ្នកនិងបណ្ដាសង្ឃឯទៀតដែលអង្គុយនៅពីមុខអ្នក មេត្តាប្រុងស្ដាប់ ព្រោះពួកអ្នកនឹងទៅជាសញ្ញាសម្គាល់អំពីអ្វីដែលនឹងកើតឡើងនាអនាគត។ មើល! ខ្ញុំនឹងនាំពន្លក+ដែលជាអ្នកបម្រើរបស់ខ្ញុំមក!+ ៩ សូមមើលថ្មដែលខ្ញុំបានដាក់នៅពីមុខយ៉ូស្វេចុះ! នៅលើថ្មនោះមានភ្នែក៧។ ខ្ញុំនឹងចារឹកអក្សរនៅលើថ្មនោះ ហើយខ្ញុំនឹងដកកំហុសចេញពីទឹកដីនោះក្នុងពេលតែមួយថ្ងៃប៉ុណ្ណោះ›។ ព្រះយេហូវ៉ានៃបណ្ដាកងទ័ពស្ថានសួគ៌បានមានប្រសាសន៍ដូច្នោះ។+
១០ «ព្រះយេហូវ៉ានៃបណ្ដាកងទ័ពស្ថានសួគ៌ប្រកាសថា៖ ‹នៅថ្ងៃនោះ អ្នកទាំងអស់គ្នានឹងអញ្ជើញអ្នកជិតខាងឲ្យមកអង្គុយក្រោមវល្លិទំពាំងបាយជូរ និងក្រោមដើមល្វាតូចរបស់អ្នកទាំងអស់គ្នា›»។+
៤ ទេវតាដែលបានពោលមកកាន់ខ្ញុំ ក៏ត្រឡប់មកវិញ ហើយដាស់ខ្ញុំឲ្យភ្ញាក់ ដូចគេដាស់មនុស្សឲ្យក្រោកពីដំណេក។ ២ រួចទេវតាសួរខ្ញុំថា៖ «តើអ្នកឃើញអ្វី?»។
ខ្ញុំឆ្លើយថា៖ «មើល! ខ្ញុំឃើញជើងចង្កៀងមួយធ្វើពីមាស+ មានទាំងចង្កៀង៧នៅពីលើផង+ ហើយក៏មានចានគោមមួយនៅពីលើចង្កៀងទាំងនោះដែរ។ ម្យ៉ាងទៀត មានបំពង់៧ដែលតភ្ជាប់ពីចានគោមទៅចង្កៀងទាំង៧នោះ។ ៣ នៅក្បែរជើងចង្កៀងនិងចានគោមនោះ មានដើមអូលីវពីរដើម+ មួយនៅខាងស្ដាំ មួយនៅខាងឆ្វេង»។
៤ រួចខ្ញុំក៏សួរទេវតាដែលកំពុងសន្ទនានឹងខ្ញុំថា៖ «លោកម្ចាស់ តើអ្វីទាំងនេះមានអត្ថន័យអ្វី?»។ ៥ ទេវតានោះសួរខ្ញុំថា៖ «តើអ្នកមិនដឹងអំពីអត្ថន័យទេឬ?»។
ខ្ញុំតបវិញថា៖ «ខ្ញុំមិនដឹងទេលោកម្ចាស់»។
៦ ទេវតានោះនិយាយថា៖ «នេះជាប្រសាសន៍ដែលព្រះយេហូវ៉ាពោលទៅកាន់សេរ៉ូបាបិលគឺ៖ ‹«អ្វីទាំងនេះនឹងកើតឡើង មិនមែនដោយកម្លាំងកងទ័ព ហើយក៏មិនមែនដោយអំណាចទេ+ តែដោយឫទ្ធានុភាពរបស់ខ្ញុំ»។+ ព្រះយេហូវ៉ានៃបណ្ដាកងទ័ពស្ថានសួគ៌មានប្រសាសន៍ដូច្នោះ។ ៧ ឱភ្នំធំអើយ តើអ្នកជានរណា? នៅចំពោះសេរ៉ូបាបិល+ អ្នកនឹងក្លាយទៅជាដីរាបស្មើ។+ គាត់នឹងនាំថ្មកំពូលនៃវិហារមក ហើយអស់អ្នកដែលឃើញនឹងបន្លឺសំឡេងថា៖ «ស្អាតខ្លាំងណាស់! ស្អាតខ្លាំងណាស់!»›»។
៨ ប្រសាសន៍របស់ព្រះយេហូវ៉ាបានមកដល់ខ្ញុំទៀតថា៖ ៩ «សេរ៉ូបាបិលជាអ្នកដែលដាក់គ្រឹះវិហារនេះដោយដៃរបស់គាត់+ ហើយគាត់ក៏នឹងសង់បង្ហើយដោយដៃរបស់គាត់ដែរ។+ យ៉ាងនេះ អ្នកនឹងដឹងថាព្រះយេហូវ៉ានៃបណ្ដាកងទ័ពស្ថានសួគ៌បានចាត់ខ្ញុំឲ្យមក។ ១០ តើអ្នកណានឹងមើលងាយការចាប់ផ្ដើមបន្តិចបន្តួច?+* ពួកគេនឹងរីករាយត្រេកអរដោយឃើញខ្សែប្រយោល*នៅក្នុងដៃរបស់សេរ៉ូបាបិល។ រីឯភ្នែកទាំង៧នេះ ជាភ្នែករបស់ព្រះយេហូវ៉ាដែលកំពុងសម្លឹងមើលពាសពេញផែនដី»។+
១១ រួចខ្ញុំសួរគាត់ថា៖ «តើដើមអូលីវពីរដើមដែលមួយនៅខាងស្ដាំ និងមួយនៅខាងឆ្វេងជើងចង្កៀងនោះ មានអត្ថន័យអ្វី?»។+ ១២ ខ្ញុំក៏សួរគាត់ជាលើកទី២ថា៖ «តើមែកពីរ*នៃដើមអូលីវដែលបង្ហូរប្រេងពណ៌មាសចេញតាមបំពង់មាសពីរនោះ មានអត្ថន័យអ្វី?»។
១៣ ដូច្នេះ ទេវតានោះក៏សួរខ្ញុំថា៖ «តើអ្នកមិនដឹងអំពីអត្ថន័យទេឬ?»។
ខ្ញុំតបវិញថា៖ «ខ្ញុំមិនដឹងទេលោកម្ចាស់»។
១៤ គាត់និយាយថា៖ «នោះគឺជាអ្នកដែលបានត្រូវរើសតាំង។ ពួកគេទាំងពីរកំពុងឈរអមសងខាងម្ចាស់នៃផែនដីទាំងមូល»។+
៥ ខ្ញុំបានងើបមុខឡើងម្ដងទៀត ហើយឃើញរមូរមួយកំពុងហោះ។ ២ គាត់បានសួរខ្ញុំថា៖ «តើអ្នកឃើញអ្វី?»។
ខ្ញុំឆ្លើយថា៖ «ខ្ញុំឃើញរមូរមួយកំពុងហោះ មានបណ្ដោយ២០ហត្ថ* និងទទឹង១០ហត្ថ»។
៣ រួចគាត់ប្រាប់ខ្ញុំថា៖ «នេះជាបណ្ដាសាដែលផ្សាយចេញទៅទូទាំងផែនដី ព្រោះទោះជារមូរម្ខាងបញ្ជាក់ថាអ្នកដែលលួចត្រូវបណ្ដាសាក្ដី+ ក៏អ្នកដែលលួចនោះមិនទាន់រងទោសទេ ហើយទោះជារមូរម្ខាងទៀតបញ្ជាក់ថាអ្នកដែលស្បថបំពានត្រូវបណ្ដាសាក៏ដោយ+ ក៏អ្នកដែលស្បថបំពាននោះមិនទាន់រងទោសដែរ។ ៤ ព្រះយេហូវ៉ានៃបណ្ដាកងទ័ពស្ថានសួគ៌មានប្រសាសន៍ថា៖ ‹ខ្ញុំនឹងចាត់បណ្ដាសាឲ្យចេញទៅ ហើយបណ្ដាសានឹងចូលទៅក្នុងផ្ទះរបស់ចោរ និងផ្ទះរបស់អ្នកដែលស្បថបំពានដោយអាងនាមខ្ញុំ។ បណ្ដាសានឹងនៅក្នុងផ្ទះនោះ ហើយធ្វើឲ្យផ្ទះនោះវិនាសហិនហោចអស់ទាំងឈើទាំងថ្មផង›»។
៥ បន្ទាប់មក ទេវតាដែលបានសន្ទនាជាមួយនឹងខ្ញុំក៏ចូលមក ហើយនិយាយមកកាន់ខ្ញុំថា៖ «សូមងើបមុខឡើង ហើយមើលអ្វីដែលកំពុងចេញទៅនោះ»។
៦ ដូច្នេះ ខ្ញុំបានសួរថា៖ «តើនោះជាអ្វី?»។
គាត់ឆ្លើយថា៖ «នោះជាកញ្ឆេវាល់ស្រូវ»។* គាត់បន្តទៀតថា៖ «មនុស្សទុច្ចរិតទាំងអស់នៅផែនដីមានសណ្ឋានដូចនោះ»។ ៧ ម្យ៉ាងទៀត ខ្ញុំឃើញគម្របរាងមូលធ្វើពីសំណបានត្រូវបើកឡើង ហើយឃើញមានស្ត្រីម្នាក់អង្គុយក្នុងកញ្ឆេនោះ។ ៨ ដូច្នេះ គាត់និយាយថា៖ «ស្ត្រីនោះគឺជាអំពើទុច្ចរិត»។ រួចគាត់រុញស្ត្រីនោះទៅក្នុងកញ្ឆេវិញ ហើយគាត់ក៏យកគម្របសំណដ៏ធ្ងន់មកគ្របពីលើមាត់កញ្ឆេ។
៩ លំដាប់នោះ ខ្ញុំបានងើបមុខឡើង ហើយឃើញស្ត្រីពីរនាក់កំពុងហោះលើអាកាស។ ពួកនាងមានស្លាបដូចស្លាបរបស់សត្វកុក ហើយពួកនាងបានលើកកញ្ឆេនោះហោះឡើងទៅលើមេឃ។* ១០ ខ្ញុំក៏សួរទេវតានោះថា៖ «តើពួកនាងយកកញ្ឆេវាល់ស្រូវ*ទៅណា?»។
១១ គាត់តបថា៖ «ទៅស្រុកស៊ីណើរ*+ ដើម្បីសង់ផ្ទះឲ្យស្ត្រីនោះ។ ពេលសង់រួចហើយ ស្ត្រីនោះនឹងត្រូវរស់នៅទីនោះ ជាកន្លែងដែលស័ក្ដិសមសម្រាប់នាង»។
៦ រួចមក ខ្ញុំបានងើបមុខឡើងម្ដងទៀត ហើយឃើញរទេះចម្បាំងបួនដែលកំពុងចេញមកពីចន្លោះរវាងភ្នំពីរ។ ភ្នំទាំងពីរនោះជាភ្នំស្ពាន់។ ២ រទេះចម្បាំងទី១ទឹមដោយសេះសម្បុរក្រហម ហើយរទេះចម្បាំងទី២ទឹមដោយសេះសម្បុរខ្មៅ។+ ៣ ឯរទេះចម្បាំងទី៣ទឹមដោយសេះសម្បុរស ហើយរទេះចម្បាំងទី៤ទឹមដោយសេះសម្បុរពព្លាក់និងសេះសម្បុរពពាល។+
៤ ខ្ញុំក៏សួរទេវតាដែលសន្ទនាជាមួយនឹងខ្ញុំថា៖ «លោកម្ចាស់ តើអ្វីទាំងនេះមានអត្ថន័យអ្វី?»។
៥ ទេវតានោះបានឆ្លើយថា៖ «នេះជាកងកម្លាំងបួន+នៃស្ថានសួគ៌ដែលចេញដំណើរទៅ ក្រោយពីបានឈរនៅចំពោះមុខម្ចាស់នៃផែនដីទាំងមូល។+ ៦ រទេះចម្បាំងដែលទឹមដោយសេះសម្បុរខ្មៅចេញទៅទឹកដីខាងជើង+ ហើយសេះសម្បុរសចេញទៅឯទឹកដីដែលនៅឆ្ងាយហួសសមុទ្រ។ ចំណែកសេះសម្បុរពព្លាក់ចេញទៅទឹកដីខាងត្បូង។ ៧ រួចសេះសម្បុរពពាលនោះពិតជាចង់ធ្វើដំណើរខ្លាំងណាស់ ទៅទឹកដីដែលបានត្រូវកំណត់ឲ្យទៅ»។ ដូច្នេះ គាត់ប្រាប់ថា៖ «ចូរធ្វើដំណើរឲ្យសព្វទឹកដីដែលបានត្រូវកំណត់ឲ្យចុះ»។ ម្ល៉ោះហើយ ពួកគេក៏តាំងធ្វើដំណើរពេញទឹកដីទាំងនោះ។
៨ បន្ទាប់មក គាត់បានហៅខ្ញុំ ហើយប្រាប់ថា៖ «ឃើញទេ ពួកអ្នកដែលចេញទៅទឹកដីខាងជើងបានធ្វើឲ្យកំហឹងរបស់ព្រះយេហូវ៉ាស្ងប់រម្ងាប់នៅទឹកដីនោះ»។*
៩ ប្រសាសន៍របស់ព្រះយេហូវ៉ាបានមកដល់ខ្ញុំម្ដងទៀត។ លោកប្រាប់ថា៖ ១០ «ចូរទៅទទួលរបស់ពីហេលដាយ ថូបាយយ៉ា និងយេដាយយ៉ា ជារបស់ដែលពួកគេបានមកពីបណ្ដាជននិរទេស។ នៅថ្ងៃដដែលនោះ អ្នកត្រូវទៅផ្ទះរបស់យ៉ូសៀសជាកូនសេផានា រួមជាមួយនឹងមនុស្សទាំងនេះដែលមកពីស្រុកបាប៊ីឡូន។ ១១ ចូរអ្នកយកប្រាក់និងមាសទៅធ្វើមកុដ*មួយ ហើយបំពាក់មកុដនោះលើក្បាលយ៉ូស្វេ+ដែលជាសម្ដេចសង្ឃ និងជាកូនរបស់យេហូសាដាក។ ១២ រួចមក អ្នកត្រូវប្រាប់យ៉ូស្វេថា៖
«‹ព្រះយេហូវ៉ានៃបណ្ដាកងទ័ពស្ថានសួគ៌មានប្រសាសន៍ថា៖ «នេះជាបុរសឈ្មោះពន្លក។+ គាត់នឹងឡើងចេញពីកន្លែងរបស់គាត់ដូចជាពន្លក ហើយគាត់នឹងសង់វិហាររបស់ព្រះយេហូវ៉ា។+ ១៣ គាត់នេះហើយជាអ្នកដែលនឹងសង់វិហាររបស់ព្រះយេហូវ៉ា ហើយគាត់ក៏ជាអ្នកដែលនឹងទទួលភាពរុងរឿងដែរ។ គាត់នឹងអង្គុយលើបល្ល័ង្ករបស់ខ្លួន គ្រប់គ្រងជាស្ដេចនិងជាសង្ឃ+ ហើយគាត់នឹងបំពេញតួនាទីទាំងពីរនេះដើម្បីលើកស្ទួយសេចក្ដីសុខសាន្ត។* ១៤ រីឯមកុដនោះនឹងត្រូវរក្សាទុកក្នុងវិហាររបស់ព្រះយេហូវ៉ា ដើម្បីជាការរំលឹក*អំពីហេលេម ថូបាយយ៉ា យេដាយយ៉ា+ និងហេនដែលជាកូនសេផានា។ ១៥ ចំណែកអស់អ្នកដែលនៅឆ្ងាយ ពួកគេនឹងមកចូលរួមសង់វិហាររបស់ព្រះយេហូវ៉ា»។ អ្នកនឹងបានដឹងថាព្រះយេហូវ៉ានៃបណ្ដាកងទ័ពស្ថានសួគ៌បានចាត់ខ្ញុំឲ្យមកជួបអ្នក។ អ្វីទាំងអស់នេះនឹងកើតឡើង បើអ្នកស្ដាប់សំឡេងរបស់ព្រះយេហូវ៉ាជាព្រះរបស់អ្នក›»។
៧ នៅថ្ងៃទី៤ ខែទី៩ គឺជាខែគីស្លេវ* ក្នុងឆ្នាំទី៤នៃការគ្រប់គ្រងរបស់ស្ដេចដារីយុស នោះប្រសាសន៍របស់ព្រះយេហូវ៉ាបានមកដល់សាការី។+ ២ បណ្ដាជនក្រុងបេតអែលបានចាត់សារេសឺ និងរេគេមម៉ាឡេក ព្រមទាំងពួកបុរសរបស់គាត់ ឲ្យទៅអង្វរសុំសេចក្ដីមេត្តាករុណាពីព្រះយេហូវ៉ា។ ៣ ពួកគេសួរពួកសង្ឃនៅវិហាររបស់ព្រះយេហូវ៉ានៃបណ្ដាកងទ័ពស្ថានសួគ៌ និងពួកអ្នកប្រកាសទំនាយថា៖ «តើគួរឲ្យខ្ញុំយំ ហើយមិនបរិភោគអាហារក្នុងខែទី៥+ ដូចដែលខ្ញុំធ្លាប់ធ្វើអស់ជាច្រើនឆ្នាំមកហើយឬ?»។
៤ ប្រសាសន៍របស់ព្រះយេហូវ៉ានៃបណ្ដាកងទ័ពស្ថានសួគ៌បានមកដល់ខ្ញុំម្ដងទៀតថា៖ ៥ «ចូរទៅប្រាប់បណ្ដាជនទាំងអស់និងពួកសង្ឃថា៖ ‹កាលដែលអ្នករាល់គ្នាតមអាហារ ហើយស្រែកយំក្នុងខែទី៥និងខែទី៧+ អស់៧០ឆ្នាំនោះ+ តើអ្នករាល់គ្នាពិតជាធ្វើដើម្បីខ្ញុំឬ? ៦ ពេលដែលអ្នករាល់គ្នាបរិភោគហើយផឹក អ្នករាល់គ្នាធ្វើដើម្បីតែខ្លួនឯងប៉ុណ្ណោះ មែនទេ? ៧ អ្នករាល់គ្នាគួរធ្វើតាមប្រសាសន៍ដែលព្រះយេហូវ៉ាបានប្រកាសប្រាប់តាមរយៈពួកអ្នកប្រកាសទំនាយនៅជំនាន់មុន+ ក្នុងកាលដែលយេរូសាឡិមនិងក្រុងផ្សេងៗដែលនៅជុំវិញ មានមនុស្សរស់នៅដោយសន្តិភាព និងក្នុងកាលដែលតំបន់ណេកេបនិងតំបន់សេភីឡានៅមានមនុស្សអាស្រ័យនៅ មែនទេ?›»។
៨ ប្រសាសន៍របស់ព្រះយេហូវ៉ាបានមកដល់សាការីម្ដងទៀតថា៖ ៩ «ព្រះយេហូវ៉ានៃបណ្ដាកងទ័ពស្ថានសួគ៌មានប្រសាសន៍ថា៖ ‹ចូរវិនិច្ឆ័យក្ដីដោយយុត្តិធម៌+ ហើយប្រព្រឹត្តចំពោះគ្នាដោយសេចក្ដីស្រឡាញ់ដ៏ស្មោះត្រង់+ និងដោយសេចក្ដីមេត្តាករុណា។ ១០ កុំបន្លំបោកប្រាស់ស្ត្រីមេម៉ាយ កូនកំព្រា*+ ជនបរទេស+ ឬមនុស្សក្រីក្រ+ ហើយមិនត្រូវគិតធ្វើអាក្រក់ចំពោះគ្នាឡើយ›។+ ១១ ប៉ុន្តែ ពួកគេមិនព្រមធ្វើតាម+ ក៏មានចិត្តរឹងរូស*+ ហើយមិនយកត្រចៀកស្ដាប់លោកទាល់តែសោះ។+ ១២ ពួកគេមានចិត្តរឹងដូចពេជ្រ*+ មិនព្រមធ្វើតាមច្បាប់*និងប្រសាសន៍របស់ព្រះយេហូវ៉ានៃបណ្ដាកងទ័ពស្ថានសួគ៌ ដែលលោកបានប្រាប់ដោយឫទ្ធានុភាពរបស់លោកតាមរយៈពួកអ្នកប្រកាសទំនាយនៅជំនាន់មុនទេ។+ ហេតុនេះហើយបានជានាំឲ្យព្រះយេហូវ៉ានៃបណ្ដាកងទ័ពស្ថានសួគ៌បញ្ចេញកំហឹងយ៉ាងខ្លាំង»។+
១៣ «ព្រះយេហូវ៉ានៃបណ្ដាកងទ័ពស្ថានសួគ៌មានប្រសាសន៍ថា៖ ‹ពេលដែលខ្ញុំនិយាយ ពួកគេមិនបានស្ដាប់ទេ។+ ដូច្នេះ ពេលដែលពួកគេនិយាយ ក៏ខ្ញុំមិនស្ដាប់ដែរ។+ ១៤ ខ្ញុំបានឲ្យព្យុះកម្ចាត់កម្ចាយពួកគេទៅក្នុងចំណោមប្រជាជាតិនានាដែលពួកគេមិនស្គាល់។+ រីឯទឹកដីរបស់ពួកគេបានត្រូវទុកចោល គ្មានអ្នកណាម្នាក់ដើរឆ្លងកាត់ទេ+ ព្រោះពួកគេបានធ្វើឲ្យទឹកដីដែលគួរឲ្យចង់រស់នៅ ប្រែទៅជាទឹកដីដ៏គួរឲ្យភ័យស្លុតវិញ›»។
៨ ប្រសាសន៍របស់ព្រះយេហូវ៉ានៃបណ្ដាកងទ័ពស្ថានសួគ៌បានមកម្ដងទៀតថា៖ ២ «ព្រះយេហូវ៉ានៃបណ្ដាកងទ័ពស្ថានសួគ៌ប្រាប់ថា៖ ‹ខ្ញុំប្រាកដជានឹងការពារស៊ីយ៉ូន+ ខ្ញុំប្រាកដជានឹងការពារនាងដោយកំហឹងដ៏ខ្លាំងរបស់ខ្ញុំ›»។
៣ «ព្រះយេហូវ៉ាមានប្រសាសន៍ថា៖ ‹ខ្ញុំនឹងត្រឡប់ទៅឯស៊ីយ៉ូន+ ហើយអាស្រ័យនៅក្នុងយេរូសាឡិមវិញ។+ គេនឹងហៅយេរូសាឡិមថាក្រុងនៃសេចក្ដីពិត*+ ហើយហៅភ្នំរបស់ព្រះយេហូវ៉ានៃបណ្ដាកងទ័ពស្ថានសួគ៌ថាភ្នំបរិសុទ្ធ›»។+
៤ «ព្រះយេហូវ៉ានៃបណ្ដាកងទ័ពស្ថានសួគ៌ប្រាប់ថា៖ ‹មនុស្សចាស់ទាំងប្រុសទាំងស្រីនឹងអង្គុយនៅតាមទីលានសាធារណៈក្នុងយេរូសាឡិម។ ពួកគេម្នាក់ៗនឹងកាន់ឈើច្រត់ ដោយសារតែវ័យចាស់ជរា។+ ៥ ម្យ៉ាងទៀត នៅតាមទីលានសាធារណៈក្នុងក្រុង នឹងពេញដោយក្មេងៗទាំងប្រុសទាំងស្រីរត់លេងសប្បាយ›»។+
៦ «ព្រះយេហូវ៉ានៃបណ្ដាកងទ័ពស្ថានសួគ៌មានប្រសាសន៍ថា៖ ‹ទោះជានៅពេលនោះ បណ្ដាជនដែលនៅសេសសល់ប្រហែលជាគិតថាការនោះពិបាកនឹងកើតឡើងក៏ដោយ ប៉ុន្តែតើការនោះពិបាកពេកចំពោះខ្ញុំឬ?›។ ព្រះយេហូវ៉ានៃបណ្ដាកងទ័ពស្ថានសួគ៌មានប្រសាសន៍ដូច្នោះ»។
៧ «ព្រះយេហូវ៉ានៃបណ្ដាកងទ័ពស្ថានសួគ៌មានប្រសាសន៍ថា៖ ‹ខ្ញុំនឹងសង្គ្រោះរាស្ត្ររបស់ខ្ញុំចេញពីទឹកដីផ្សេងៗនៃទិសខាងកើតនិងខាងលិច។*+ ៨ ខ្ញុំនឹងនាំពួកគេចូលមកក្នុងយេរូសាឡិម ហើយពួកគេនឹងរស់នៅទីនោះ។+ ពួកគេនឹងទៅជារាស្ត្ររបស់ខ្ញុំ ហើយខ្ញុំនឹងទៅជាព្រះរបស់ពួកគេ+ ជាព្រះដែលប្រកបដោយសេចក្ដីពិត*និងសេចក្ដីសុចរិត›»។
៩ «ព្រះយេហូវ៉ានៃបណ្ដាកងទ័ពស្ថានសួគ៌មានប្រសាសន៍ថា៖ ‹ចូរអ្នករាល់គ្នាក្លាហានឡើង។+ សម្ដីដែលអ្នករាល់គ្នាបានឮពីមាត់ពួកអ្នកប្រកាសទំនាយនៅពេលនេះ+ គឺដូចគ្នានឹងសម្ដីដែលបានត្រូវប្រាប់នៅថ្ងៃដែលគេចាក់គ្រឹះសង់វិហាររបស់ព្រះយេហូវ៉ានៃបណ្ដាកងទ័ពស្ថានសួគ៌។ ១០ មុនគ្រានោះ គ្មានថ្លៃឈ្នួលសម្រាប់មនុស្សនិងសត្វទេ។+ ចំណែកឯមនុស្សដែលធ្វើដំណើរទៅមក ក៏គ្មានសុវត្ថិភាពដែរ ព្រោះតែមានខ្មាំងសត្រូវ ដោយសារខ្ញុំបានធ្វើឲ្យមនុស្សទាំងអស់ទាស់ប្រឆាំងគ្នា›។
១១ «ព្រះយេហូវ៉ានៃបណ្ដាកងទ័ពស្ថានសួគ៌មានប្រសាសន៍ថា៖ ‹ប៉ុន្តែពេលនេះ ខ្ញុំនឹងមិនប្រព្រឹត្តចំពោះបណ្ដាជនដែលនៅសេសសល់ដូចនៅជំនាន់មុនឡើយ។+ ១២ ពីព្រោះពួកគេនឹងសាបព្រោះពូជដែលបង្កើតផលជាសេចក្ដីសុខសាន្ត ហើយវល្លិទំពាំងបាយជូរនឹងចេញផ្លែ ហើយដីនឹងផ្ដល់ភោគផលយ៉ាងបរិបូរ។+ ឯមេឃនឹងធ្លាក់សន្សើមចុះមក។ ខ្ញុំនឹងប្រគល់អ្វីៗទាំងអស់នោះដល់បណ្ដាជនដែលនៅសេសសល់នេះទុកជាមត៌ក។+ ១៣ ឱពូជពង្សយូដានិងពូជពង្សអ៊ីស្រាអែលអើយ ទោះជាប្រជាជាតិនានាធ្លាប់យកឈ្មោះអ្នករាល់គ្នាទៅដាក់បណ្ដាសាគេក៏ដោយ+ តែខ្ញុំនឹងសង្គ្រោះអ្នករាល់គ្នា ហើយពួកគេនឹងយកឈ្មោះអ្នករាល់គ្នាទៅជូនពរគេវិញ។+ ដូច្នេះ កុំភ័យខ្លាចឡើយ!+ ចូរអ្នករាល់គ្នាក្លាហានឡើង›។+
១៤ «ព្រោះព្រះយេហូវ៉ានៃបណ្ដាកងទ័ពស្ថានសួគ៌មានប្រសាសន៍ថា៖ ‹«ពីមុនខ្ញុំបានតាំងចិត្តនាំអន្តរាយមកលើអ្នករាល់គ្នា ដោយសារបុព្វបុរសរបស់អ្នករាល់គ្នាបានធ្វើឲ្យខ្ញុំក្ដៅក្រហាយ ហើយខ្ញុំមិនបានផ្លាស់ប្ដូរគំនិតទេ។*+ ព្រះយេហូវ៉ានៃបណ្ដាកងទ័ពស្ថានសួគ៌មានប្រសាសន៍ដូច្នេះ។ ១៥ ប៉ុន្តែនៅពេលនេះ ខ្ញុំបានតាំងចិត្តធ្វើល្អចំពោះយេរូសាឡិមនិងពូជពង្សយូដា។+ ដូច្នេះ កុំភ័យខ្លាចឡើយ!»›។+
១៦ «‹អ្នករាល់គ្នាគួរធ្វើអ្វីៗទាំងនេះ៖ ចូរនិយាយពាក្យពិតចំពោះគ្នា។+ ពេលអ្នករាល់គ្នាវិនិច្ឆ័យក្ដីនៅឯទ្វារក្រុង អ្នករាល់គ្នាត្រូវវិនិច្ឆ័យដោយត្រឹមត្រូវ ហើយត្រូវជួយបណ្ដាជនឲ្យមានសេចក្ដីសុខសាន្តផង។+ ១៧ កុំគិតធ្វើអាក្រក់ចំពោះគ្នា+ ហើយឈប់ស្បថបំពានទៀត+ ព្រោះខ្ញុំស្អប់អ្វីទាំងអស់នោះ›។+ ព្រះយេហូវ៉ាមានប្រសាសន៍ដូច្នោះ»។
១៨ ប្រសាសន៍របស់ព្រះយេហូវ៉ានៃបណ្ដាកងទ័ពស្ថានសួគ៌បានមកដល់ខ្ញុំម្ដងទៀតថា៖ ១៩ «ព្រះយេហូវ៉ានៃបណ្ដាកងទ័ពស្ថានសួគ៌មានប្រសាសន៍ថា៖ ‹ការតមអាហារនៅខែទី៤+ ខែទី៥+ ខែទី៧+ និងខែទី១០+ នឹងទៅជាឱកាសដ៏សប្បាយរីករាយ គឺជាពិធីដ៏រីករាយត្រេកអរ ហើយក៏ជាពេលវេលាដែលពូជពង្សយូដាមានអំណរ។+ ដូច្នេះ ចូរអ្នករាល់គ្នាស្រឡាញ់សេចក្ដីពិតនិងសេចក្ដីសុខសាន្ត›។
២០ «ព្រះយេហូវ៉ានៃបណ្ដាកងទ័ពស្ថានសួគ៌មានប្រសាសន៍ថា៖ ‹នឹងមានគ្រាមួយដែលជនជាតិផ្សេងៗ ព្រមទាំងមនុស្សដែលរស់នៅក្រុងនានា នឹងនាំគ្នាមក ២១ ហើយអស់អ្នកដែលរស់នៅក្រុងមួយនឹងទៅប្រាប់មនុស្សនៅក្រុងមួយទៀតថា៖ «ចូរយើងទៅជាមួយគ្នាដើម្បីអង្វរសុំសេចក្ដីមេត្តាករុណាពីព្រះយេហូវ៉ា ហើយទៅបម្រើព្រះយេហូវ៉ានៃបណ្ដាកងទ័ពស្ថានសួគ៌។ ខ្ញុំក៏ទៅដែរ»។+ ២២ ជនជាតិជាច្រើន ព្រមទាំងប្រជាជាតិនានាដែលខ្លាំងក្លា នឹងនាំគ្នាមកយេរូសាឡិមដើម្បីបម្រើព្រះយេហូវ៉ានៃបណ្ដាកងទ័ពស្ថានសួគ៌+ និងដើម្បីអង្វរសុំសេចក្ដីមេត្តាករុណាពីព្រះយេហូវ៉ា›។
២៣ «ព្រះយេហូវ៉ានៃបណ្ដាកងទ័ពស្ថានសួគ៌មានប្រសាសន៍ថា៖ ‹នៅគ្រានោះ មនុស្ស១០នាក់ពីគ្រប់ភាសាគ្រប់ប្រជាជាតិ+នឹងចាប់កាន់ជាយអាវ*របស់យូដាម្នាក់* គឺនឹងចាប់យ៉ាងជាប់ ដោយនិយាយថា៖ «យើងចង់ទៅជាមួយនឹងអ្នកដែរ+ ព្រោះយើងបានឮថាព្រះនៅជាមួយនឹងអ្នករាល់គ្នា»›»។+
៩ សេចក្ដីប្រកាស៖
«នេះជាប្រសាសន៍របស់ព្រះយេហូវ៉ាប្រឆាំងនឹងទឹកដីហាត្រាក
ជាពិសេសក្រុងដាម៉ាស់+
ព្រោះព្រះយេហូវ៉ាសង្កេតមើលមនុស្សជាតិ+
និងមើលកុលសម្ព័ន្ធទាំងអស់របស់អ៊ីស្រាអែល
២ ហើយលោកប្រឆាំងនឹងក្រុងហាម៉ាត+ដែលមានព្រំប្រទល់ជាប់នាង
ព្រមទាំងទាស់នឹងក្រុងទីរ៉ុស+និងក្រុងស៊ីដូន+ ដោយសារពួកគេមានប្រាជ្ញាច្រើនពេក។+
៣ ក្រុងទីរ៉ុសសង់កំពែង*ដើម្បីការពារខ្លួន។
នាងប្រមូលប្រាក់ទុកដូចគំនរដី
ហើយប្រមូលមាសទុកដូចជាពំនូកភក់នៅតាមផ្លូវ។+
៤ មើល! ព្រះយេហូវ៉ានឹងដកហូតទ្រព្យសម្បត្តិរបស់នាង
ហើយលោកនឹងបំផ្លាញពលទ័ពរបស់នាងទៅក្នុងសមុទ្រ*+
ហើយនាងនឹងត្រូវភ្លើងឆេះសុស។+
៥ ក្រុងអាសកាឡូននឹងឃើញ ហើយតាំងភ័យខ្លាច
ក្រុងកាសានឹងកើតទុក្ខព្រួយជាខ្លាំង
ក្រុងអេក្រុនក៏ដូចគ្នាដែរ ពីព្រោះអ្នកដែលនាងសង្ឃឹមបានត្រូវបង្អាប់បង្អោន។
ស្ដេចរបស់ក្រុងកាសានឹងវិនាសទៅ
ហើយក្រុងអាសកាឡូននឹងលែងមានមនុស្សរស់នៅទៀត។+
៦ កូនមិនស្របច្បាប់នឹងចូលទៅអាស្រ័យនៅក្នុងក្រុងអាសូត
ហើយខ្ញុំនឹងបំបាក់អំណួតរបស់ពួកភីលីស្ទីន។+
៧ ខ្ញុំនឹងលុបបំបាត់ឈាមចេញពីមាត់របស់គាត់
ហើយយកអ្វីដ៏គួរឲ្យខ្ពើមចេញពីធ្មេញរបស់គាត់
អ្នកដែលនៅសល់នឹងត្រូវទុកសម្រាប់ព្រះរបស់យើង។
៨ ខ្ញុំនឹងតាំងជំរំចាំយាមការពារលំនៅរបស់ខ្ញុំ+
ដើម្បីកុំឲ្យអ្នកណាដើរកាត់ទៅមក
ហើយនឹងលែងមានអ្នកសង្កត់សង្កិន*ដើរកាត់ទៀត+
ព្រោះឥឡូវខ្ញុំបានឃើញស្ថានភាពនេះ*ដោយផ្ទាល់ភ្នែក។
៩ ឱកូនស្រីនៃស៊ីយ៉ូន*អើយ ចូររីករាយត្រេកអរឲ្យខ្លាំងឡើង
ឱកូនស្រីក្រុងយេរូសាឡិម*អើយ ចូរស្រែកហ៊ោសាទរនឹងជ័យជម្នះ។
មើល! ស្ដេចរបស់អ្នកកំពុងមកឯអ្នកហើយ។+
១០ ខ្ញុំនឹងបំផ្លិចបំផ្លាញរទេះចម្បាំងដែលមកពីអេប្រាអ៊ីម
ថែមទាំងកម្ចាត់សត្វសេះដែលមកពីយេរូសាឡិមផងដែរ។
ធ្នូចម្បាំងនឹងត្រូវដកហូត។
រួចលោកនឹងប្រកាសសេចក្ដីសុខសាន្តដល់ប្រជាជាតិនានា+
លោកនឹងគ្រប់គ្រងចាប់ពីសមុទ្រមួយរហូតដល់សមុទ្រមួយ
១១ រីឯនាងវិញ ឱស្ត្រីអើយ ខ្ញុំនឹងឲ្យពួកអ្នកទោសរបស់នាងចេញពីរណ្ដៅស្ងួត+
ដោយយល់ដល់ឈាមនៃកិច្ចព្រមព្រៀងរបស់នាង។
១២ ពួកអ្នកទោសដែលមានសេចក្ដីសង្ឃឹមអើយ ចូរត្រឡប់ទៅបន្ទាយវិញចុះ។+
ថ្ងៃនេះ ខ្ញុំសូមប្រាប់នាងថា៖
‹ឱស្ត្រីអើយ ខ្ញុំនឹងឲ្យពរដល់នាងមួយជាពីរ។+
១៣ ព្រោះខ្ញុំនឹងប្រើយូដាដូចយឹតធ្នូ។
ខ្ញុំនឹងយកអេប្រាអ៊ីមធ្វើជាព្រួញក្នុងធ្នូ។
ឱស៊ីយ៉ូនអើយ ខ្ញុំនឹងដាស់កូនប្រុសៗរបស់នាង
ឲ្យមកទាស់ប្រឆាំងនឹងកូនប្រុសៗរបស់ក្រិច
ហើយខ្ញុំនឹងធ្វើឲ្យនាងដូចជាដាវរបស់អ្នកចម្បាំងខ្លាំងក្លា›។
១៤ ព្រះយេហូវ៉ានឹងបង្ហាញឲ្យឃើញច្បាស់ថាលោកនៅជាមួយនឹងរាស្ត្ររបស់លោក
ហើយព្រួញរបស់លោកនឹងឆ្ពោះទៅដូចផ្លេកបន្ទោរ។
ព្រះយេហូវ៉ាជាម្ចាស់ដ៏ឧត្ដមបំផុតនឹងផ្លុំស្នែង+
ហើយលោកនឹងចេញទៅច្បាំងនឹងសត្រូវ ដូចជាព្យុះពីទិសខាងត្បូង។
១៥ ព្រះយេហូវ៉ានៃបណ្ដាកងទ័ពស្ថានសួគ៌នឹងការពារពួកគេ
ហើយពួកគេនឹងយកឈ្នះថ្មខ្សែដង្ហក់របស់ពួកសត្រូវ។+
ពួកគេនឹងសប្បាយក្អាកក្អាយ ដូចបានផឹកស្រាទំពាំងបាយជូរ។
ពួកគេនឹងឆ្អែតស្កប់ស្កល់ ដូចជាទឹកពេញចានគោម
និងដូចជាជ្រុងនៃទីបូជាដែលមានឈាមជោកជាំ។+
១៦ នៅថ្ងៃនោះ ព្រះយេហូវ៉ាជាព្រះរបស់ពួកគេ នឹងសង្គ្រោះពួកគេ
ដូចជាគង្វាលដែលសង្គ្រោះហ្វូងចៀមរបស់គាត់។+
ព្រោះពួកគេនឹងភ្លឺចិញ្ចាចនៅលើទឹកដីរបស់លោកប្រៀបដូចជាត្បូងនៅលើមកុដ។+
១៧ ព្រោះគុណធម៌របស់លោកគឺធំធេងណាស់+
ហើយសិរីរុងរឿងរបស់លោកអស្ចារ្យម្ល៉េះហ្ន៎!
ស្រូវនឹងធ្វើឲ្យពួកយុវជនមានកម្លាំងខ្លាំងក្លា
ហើយស្រាថ្មីនឹងធ្វើឲ្យពួកក្រមុំបរិសុទ្ធបានមាំមួន»។+
១០ «ចូរសុំព្រះយេហូវ៉ាផ្ដល់ទឹកភ្លៀងនៅចុងរដូវស្លឹកឈើលាស់។
ព្រះយេហូវ៉ាជាអ្នកដែលធ្វើឲ្យមានព្យុះភ្លៀង
លោកជាអ្នកដែលបង្អុរភ្លៀងសម្រាប់មនុស្សគ្រប់រូប+
ថែមទាំងឲ្យរុក្ខជាតិដុះនៅឯស្រែចម្ការសម្រាប់ពួកគេផង។
២ ចំណែករូបព្រះ*ប្រាប់តែពាក្យបោកបញ្ឆោត។
ឯអ្វីដែលពួកគ្រូទាយឃើញក្នុងគំនិត សុទ្ធតែក្លែងក្លាយ។
ពួកគេរៀបរាប់អំពីសុបិនឥតបានការ
ហើយព្យាយាមសម្រាលទុក្ខ ដោយពាក្យឥតប្រយោជន៍។
ហេតុនេះហើយបានជាពួកគេនឹងវង្វេងចេញដូចចៀមដែលបាត់ទៅ។
ពួកគេនឹងរងទុក្ខវេទនា ព្រោះតែគ្មានគង្វាល។
៣ ខ្ញុំខឹងពួកគង្វាលខ្លាំងណាស់
ហើយខ្ញុំនឹងឲ្យពួកអ្នកដឹកនាំដែលសង្កត់សង្កិន ទទួលខុសត្រូវចំពោះទង្វើរបស់ខ្លួន។
ព្រោះព្រះយេហូវ៉ានៃបណ្ដាកងទ័ពស្ថានសួគ៌បានបែរមកយកចិត្តទុកដាក់នឹងពូជពង្សយូដា ដែលជាហ្វូងចៀមរបស់លោក។+
លោកបានធ្វើឲ្យពួកគេប្រៀបដូចជាសេះដ៏ខ្លាំងពូកែក្នុងចម្បាំង។
៤ បុរសសំខាន់*នឹងចេញមកពីពួកគេ
អ្នកដឹកនាំដែលគាំទ្រក៏ចេញមកពីពួកគេដែរ
ហើយធ្នូចម្បាំងនឹងចេញមកពីពួកគេ
អស់អ្នកដែលត្រួតពិនិត្យក៏នឹងចេញមកពីពួកគេ ជាមួយនឹងអ្នកទាំងនោះដែរ។
៥ ពួកគេនឹងដូចជាអ្នកចម្បាំងដ៏ខ្លាំងក្លា
ពួកគេនឹងតន្ត្រំភក់លើផ្លូវក្នុងសមរភូមិ។
ពួកគេនឹងចេញធ្វើសង្គ្រាម ព្រោះព្រះយេហូវ៉ានៅជាមួយនឹងពួកគេ+
ហើយពួកទាហានសេះរបស់ខ្មាំងសត្រូវនឹងអាម៉ាស់មុខ។+
៦ ខ្ញុំនឹងធ្វើឲ្យពូជពង្សយូដាមានអំណាចខ្លាំងក្លា
ហើយខ្ញុំនឹងសង្គ្រោះពូជពង្សយ៉ូសែប។+
ខ្ញុំនឹងនាំពួកគេត្រឡប់មកវិញ
ព្រោះខ្ញុំនឹងបង្ហាញសេចក្ដីមេត្តាករុណាដល់ពួកគេ+
ហើយពួកគេនឹងត្រឡប់ទៅដូចពីមុនវិញ ហាក់ដូចជាខ្ញុំមិនដែលបោះបង់ចោលពួកគេសោះ។+
ព្រោះខ្ញុំជាយេហូវ៉ាជាព្រះរបស់ពួកគេ ខ្ញុំនឹងធ្វើតាមសំណូមពររបស់ពួកគេ។
៧ ពួកអេប្រាអ៊ីមនឹងទៅជាអ្នកចម្បាំងខ្លាំងពូកែ
ហើយពួកគេនឹងអរសប្បាយ ដូចបានផឹកស្រាទំពាំងបាយជូរ។+
កូនៗរបស់ពួកគេនឹងឃើញការនេះ ហើយត្រេកអរ។
ពួកគេនឹងមានអំណរ ដោយសារព្រះយេហូវ៉ា។+
៨ ‹ខ្ញុំនឹងហួចហៅពួកគេឲ្យមកជួបជុំគ្នា
ព្រោះខ្ញុំនឹងលោះពួកគេ+ ហើយពួកគេនឹងមានចំនួនកាន់តែច្រើន
ក៏មានគ្នាកើនឡើងឥតឈប់។
៩ ទោះជាខ្ញុំធ្វើឲ្យពួកគេខ្ចាត់ខ្ចាយក្នុងចំណោមជនជាតិនានាដូចជាបាចគ្រាប់ពូជក៏ដោយ
ក៏ពួកគេនឹងនឹកចាំខ្ញុំដែរ សូម្បីតែពួកគេនៅកន្លែងឆ្ងាយ។
ពួកគេនិងកូនៗរបស់ពួកគេនឹងមានកម្លាំងឡើងវិញ រួចត្រឡប់មកវិញ។
១០ ខ្ញុំនឹងនាំពួកគេចេញពីស្រុកអេហ្ស៊ីប
ហើយប្រមូលពួកគេចេញពីស្រុកអាស៊ីរី។+
ខ្ញុំនឹងនាំពួកគេមកស្រុកគីលាត+និងស្រុកលីបង់
ហើយនៅទីនោះនឹងគ្មានកន្លែងគ្រប់គ្រាន់សម្រាប់ពួកគេទេ។+
១១ ខ្ញុំនឹងដើរកាត់សមុទ្រ ដោយធ្វើឲ្យសមុទ្រកម្រើករំពើក
ហើយខ្ញុំនឹងវាយទឹករលកក្នុងសមុទ្រ+
ទឹកទន្លេនីលនឹងរីងស្ងួតអស់។
អំណួតរបស់អាស៊ីរីនឹងត្រូវបន្ទាបបន្ថោក
ហើយដំបងរាជ្យរបស់អេហ្ស៊ីបនឹងមកដល់ទីបញ្ចប់។+
១២ ខ្ញុំនឹងធ្វើឲ្យពួកគេមានអំណាចខ្លាំងក្លា ដោយសារព្រះយេហូវ៉ា+
ហើយពួកគេនឹងមានរបៀបរស់នៅដែលលើកតម្កើងនាមរបស់ខ្ញុំ›។+ នេះជាប្រសាសន៍របស់ព្រះយេហូវ៉ា»។
១១ «ឱលីបង់អើយ ចូរបើកទ្វាររបស់អ្នក
ដើម្បីឲ្យភ្លើងឆេះដើមស៊ីដាររបស់អ្នក។
២ ដើមយូនីពើអើយ ចូរទ្រហោយំ ព្រោះដើមស៊ីដារបានដួលរលំហើយ។
ដើមឈើធំខ្ពស់បានត្រូវបំផ្លាញចោល!
ដើមអូកនៅតំបន់បាសានអើយ ចូរទ្រហោយំចុះ!
ព្រោះព្រៃក្រាស់បានត្រូវវិនាសអស់គ្មានសល់!
៣ សូមស្ដាប់សំឡេងទ្រហោយំរបស់ពួកគង្វាល!
ព្រោះភាពខ្ពង់ខ្ពស់របស់ពួកគេបានវិនាសអន្តរាយ។
សូមស្ដាប់សូរគ្រហឹមរបស់តោស្ទាវ!
ព្រោះគុម្ពោតព្រៃដ៏ក្រាស់ដែលនៅតាមដងទន្លេយ៉ូដាន់បានត្រូវបំផ្លាញចោល។
៤ «ព្រះយេហូវ៉ាជាព្រះរបស់ខ្ញុំមានប្រសាសន៍ថា៖ ‹ចូរទៅឃ្វាលហ្វូងចៀមដែលគេទុកដើម្បីសម្លាប់+ ៥ ជាចៀមដែលអ្នកទិញយកទៅសម្លាប់+ ហើយអ្នកទិញគ្មានទោសទេ។ ចំណែកពួកអ្នកដែលលក់ចៀមទាំងនោះ+ ពួកគេនិយាយថា៖ «សូមឲ្យព្រះយេហូវ៉ាទទួលការលើកតម្កើង ព្រោះខ្ញុំនឹងក្លាយទៅជាអ្នកមាន»។ ពួកគង្វាលទាំងនោះគ្មានចិត្តអាណិតមេត្តាចំពោះហ្វូងចៀមទាល់តែសោះ›។+
៦ «ព្រះយេហូវ៉ាប្រកាសថា៖ ‹ខ្ញុំនឹងលែងបង្ហាញសេចក្ដីអាណិតមេត្តាដល់បណ្ដាជនក្នុងស្រុកទៀត។ ដូច្នេះ ខ្ញុំនឹងធ្វើឲ្យពួកគេម្នាក់ៗធ្លាក់ទៅក្នុងកណ្ដាប់ដៃរបស់អ្នកជិតខាងនិងស្ដេចរបស់ពួកគេ។ ពួកគេនឹងបំផ្លាញស្រុកនោះ ហើយខ្ញុំនឹងមិនជួយសង្គ្រោះពួកគេឡើយ›»។
៧ ឱហ្វូងចៀមដែលរងទុក្ខវេទនា ជាហ្វូងចៀមដែលគេទុកដើម្បីសម្លាប់អើយ ដើម្បីជួយអ្នករាល់គ្នា ខ្ញុំក៏ចាប់ផ្ដើមឃ្វាលអ្នករាល់គ្នា។+ ខ្ញុំបានយកដំបងពីរ ហើយដាក់ឈ្មោះដំបងមួយថា«ពេញចិត្ត» និងដំបងមួយទៀតថា«មិត្តភាព»+ រួចខ្ញុំក៏ចាប់ផ្ដើមឃ្វាលហ្វូងចៀម។ ៨ ក្នុងមួយខែ ខ្ញុំបានបណ្ដេញគង្វាលអស់បីនាក់ ព្រោះខ្ញុំអស់ចិត្តអត់ធ្មត់នឹងពួកគេ ហើយពួកគេក៏ស្អប់ខ្ពើមខ្ញុំដែរ។ ៩ រួចខ្ញុំនិយាយថា៖ «ខ្ញុំឈប់ឃ្វាលអ្នករាល់គ្នាហើយ។ បើអ្នកណាជិតស្លាប់ ឲ្យស្លាប់ចុះ ហើយបើអ្នកណាជិតវិនាស ឲ្យវិនាសទៅ។ រីឯអស់អ្នកដែលនៅសេសសល់ ចូរឲ្យពួកគេស៊ីសាច់ហុតឈាមគ្នាចុះ»។ ១០ ដូច្នេះ ខ្ញុំបានយកដំបងឈ្មោះ«ពេញចិត្ត»+មកកាត់ជាបំណែកៗ ក្នុងបំណងផ្ដាច់កិច្ចព្រមព្រៀងដែលខ្ញុំបានធ្វើជាមួយនឹងរាស្ត្ររបស់ខ្ញុំ។ ១១ ហេតុនេះ កិច្ចព្រមព្រៀងបានត្រូវផ្ដាច់នៅថ្ងៃនោះ ហើយហ្វូងចៀមដែលរងទុក្ខវេទនា ជាហ្វូងចៀមដែលកំពុងមើលខ្ញុំបានដឹងថា នេះជាប្រសាសន៍របស់ព្រះយេហូវ៉ា។
១២ បន្ទាប់មក ខ្ញុំនិយាយទៅពួកគេថា៖ «បើអ្នករាល់គ្នាគិតថាសមនឹងបង់ថ្លៃឈ្នួលឲ្យខ្ញុំ ក៏ចូរបង់មក តែបើមិនចង់ មិនចាំបាច់បង់ទេ»។ ម្ល៉ោះហើយ ពួកគេបានបង់ថ្លៃឈ្នួលឲ្យខ្ញុំ ចំនួន៣០កាក់ប្រាក់។+
១៣ រួចព្រះយេហូវ៉ាមានប្រសាសន៍មកខ្ញុំថា៖ «ចូរបោះកាក់ប្រាក់ទាំងនោះទៅក្នុងឃ្លាំងប្រាក់ចុះ គឺជាតម្លៃដ៏លើសលប់ដែលពួកគេគិតថាសមនឹងខ្ញុំ»។+ ដូច្នេះ ខ្ញុំបានយក៣០កាក់ប្រាក់នោះទៅបោះក្នុងឃ្លាំងប្រាក់នៅវិហាររបស់ព្រះយេហូវ៉ា។+
១៤ រួចមក ខ្ញុំបានយកដំបងទី២ឈ្មោះ«មិត្តភាព»មកកាត់ជាបំណែកៗ+ ក្នុងបំណងផ្ដាច់ភាពជាបងប្អូនរវាងយូដានិងអ៊ីស្រាអែល។+
១៥ បន្ទាប់មក ព្រះយេហូវ៉ាមានប្រសាសន៍មកខ្ញុំថា៖ «ឥឡូវ ចូរទៅយកឧបករណ៍របស់គង្វាលដែលឥតបានការមក។+ ១៦ ព្រោះខ្ញុំអនុញ្ញាតឲ្យមានគង្វាលម្នាក់គ្រប់គ្រងស្រុកនោះ។ គាត់នឹងមិនមើលថែចៀមដែលជិតវិនាសទេ។+ គាត់នឹងមិនតាមរកកូនចៀមដែលវង្វេងបាត់ ហើយក៏មិនព្យាបាលចៀមដែលរងរបួស+ ឬឲ្យចំណីដល់ចៀមដែលមាំមួនដែរ។ ផ្ទុយទៅវិញ គាត់នឹងស៊ីបំផ្លាញចៀមធាត់ៗ+ ថែមទាំងហែកក្រចកជើងរបស់ចៀមទៀតផង។+
១៧ គង្វាលដែលឥតបានការនឹងត្រូវវេទនា!+ ព្រោះគាត់បោះបង់ចោលហ្វូងចៀម។+
ដាវនឹងប្រហារដៃនិងភ្នែកស្ដាំរបស់គាត់។
ដៃរបស់គាត់នឹងស្វិតក្រញង់
ហើយភ្នែកស្ដាំរបស់គាត់នឹងងងឹតសូន្យសុង»។
១២ សេចក្ដីប្រកាស៖
ព្រះយេហូវ៉ាជាព្រះដែលបានលាតផ្ទៃមេឃ+
ជាព្រះដែលបានដាក់គ្រឹះផែនដី+
និងជាព្រះដែលផ្ដល់កម្លាំងជីវិតឲ្យមនុស្ស
លោកបានមានប្រសាសន៍ថា៖ «ខ្ញុំជាព្រះយេហូវ៉ាកំពុងនិយាយអំពីអ៊ីស្រាអែល។
២ «ខ្ញុំនឹងធ្វើឲ្យយេរូសាឡិមទៅជាពែងមួយ* ដែលនាំឲ្យជនជាតិទាំងឡាយនៅជុំវិញទ្រេតទ្រោត ហើយនឹងមានការឡោមព័ទ្ធយូដានិងយេរូសាឡិមផងដែរ។+ ៣ នៅថ្ងៃនោះ ខ្ញុំនឹងធ្វើឲ្យយេរូសាឡិមទៅជាថ្មមួយដ៏ធ្ងន់សម្រាប់ជនជាតិទាំងអស់។ អស់អ្នកដែលលើកថ្មនោះ ប្រាកដជារងរបួសធ្ងន់ធ្ងរជាមិនខាន+ ហើយប្រជាជាតិនានានៅផែនដីនឹងប្រមូលគ្នាមកទាស់នឹងនាង»។+ ៤ ព្រះយេហូវ៉ាមានប្រសាសន៍ថែមទៀតថា៖ «នៅថ្ងៃនោះ ខ្ញុំនឹងធ្វើឲ្យសេះទាំងអស់ភ័យស្លុត ហើយធ្វើឲ្យពួកអ្នកជិះសេះវង្វេងស្មារតី។ ខ្ញុំនឹងបន្តចាំមើលពូជពង្សយូដា តែខ្ញុំនឹងធ្វើឲ្យសេះទាំងអស់របស់ជនជាតិនានាខ្វាក់ភ្នែក។ ៥ ពួកមេកុលសម្ព័ន្ធយូដានឹងគិតក្នុងចិត្តថា៖ ‹មនុស្សដែលរស់នៅក្នុងយេរូសាឡិម ពួកគេជាទីមាំមួនរបស់យើង ដោយសារព្រះយេហូវ៉ានៃបណ្ដាកងទ័ពស្ថានសួគ៌ ជាព្រះរបស់ពួកគេ›។+ ៦ នៅថ្ងៃនោះ ខ្ញុំនឹងធ្វើឲ្យពួកមេកុលសម្ព័ន្ធយូដាដូចជារងើកភ្លើងដែលឆេះសន្ធោសន្ធៅក្នុងព្រៃ និងដូចជាចន្លុះភ្លើងឆេះក្នុងកណ្ដាប់ស្រូវដែលទើបនឹងច្រូត+ ហើយពួកគេនឹងបំផ្លិចបំផ្លាញជនជាតិទាំងអស់ដែលនៅជុំវិញពួកគេទាំងស្ដាំទាំងឆ្វេង។+ រួចយេរូសាឡិមនឹងមានមនុស្សមកអាស្រ័យនៅម្ដងទៀត គឺមករស់នៅក្នុងយេរូសាឡិម។+
៧ «ព្រះយេហូវ៉ានឹងសង្គ្រោះត្រសាលរបស់យូដាមុនគេ ដើម្បីកុំឲ្យពូជពង្សដាវីឌនិងបណ្ដាជនក្នុងយេរូសាឡិម មានសិរីរុងរឿងអស្ចារ្យជាងយូដា។ ៨ នៅថ្ងៃនោះ ព្រះយេហូវ៉ានឹងការពារបណ្ដាជនក្នុងយេរូសាឡិម។+ នៅថ្ងៃនោះ អ្នកដែលខ្សោយក្នុងចំណោមពួកគេនឹងបានរឹងមាំដូចដាវីឌ ហើយពូជពង្សដាវីឌនឹងមានអំណាចដូចព្រះ និងដូចទេវតារបស់ព្រះយេហូវ៉ាដែលបាននាំមុខពួកគេ។+ ៩ នៅថ្ងៃនោះដែរ ខ្ញុំប្រាកដជានឹងបំផ្លិចបំផ្លាញប្រជាជាតិទាំងអស់ដែលមកប្រឆាំងយេរូសាឡិម។+
១០ «ខ្ញុំនឹងចាក់ឫទ្ធានុភាពរបស់ខ្ញុំទៅលើពូជពង្សដាវីឌ និងលើបណ្ដាជនក្នុងយេរូសាឡិម។ ពួកគេនឹងទទួលការពេញចិត្តពីខ្ញុំ ហើយពួកគេនឹងអង្វរករខ្ញុំ។ ពួកគេនឹងមើលទៅអ្នកដែលពួកគេបានចាក់ទម្លុះ+ ហើយពួកគេនឹងស្រែកយំដោយសារអ្នកនោះស្លាប់ ដូចពួកគេស្រែកយំដោយសារកូនតែមួយស្លាប់។ ម្យ៉ាងទៀត ពួកគេនឹងយំសោកសង្រេងទាំងក្ដីជូរចត់ដោយសារបាត់បង់អ្នកនោះ ដូចពួកគេយំសោកសង្រេងដោយសារបាត់បង់កូនប្រុសច្បងរបស់ពួកគេ។ ១១ នៅថ្ងៃនោះ ការទ្រហោយំក្នុងយេរូសាឡិមនឹងឮខ្លាំង ដូចការទ្រហោយំនៅហាដាតរីម៉ូនក្នុងវាលទំនាបមេគីដោ។+ ១២ ស្រុកទាំងមូលនឹងទ្រហោយំ។ ក្រុមគ្រួសារនីមួយៗនឹងយំសោករៀងៗខ្លួន។ មនុស្សទាំងអស់ក្នុងពូជពង្សដាវីឌនឹងយំសោក តែប្រុសនិងស្រីយំដោយឡែកពីគ្នា។ មនុស្សទាំងអស់ក្នុងក្រុមគ្រួសារនៃពូជពង្សណាថាន់+នឹងយំសោក តែប្រុសនិងស្រីយំដោយឡែកពីគ្នា។ ១៣ មនុស្សទាំងអស់ក្នុងក្រុមគ្រួសាររបស់លេវី+នឹងយំសោក តែប្រុសនិងស្រីយំដោយឡែកពីគ្នា។ មនុស្សទាំងអស់ក្នុងក្រុមគ្រួសាររបស់ស៊ីមម៉ាយ+នឹងយំសោក តែប្រុសនិងស្រីយំដោយឡែកពីគ្នា។ ១៤ ក្រុមគ្រួសារផ្សេងទៀតដែលនៅសល់នឹងយំសោក តែប្រុសនិងស្រីយំដោយឡែកពីគ្នា។
១៣ «នៅថ្ងៃនោះ អណ្ដូងមួយនឹងត្រូវបើកសម្រាប់ពូជពង្សដាវីឌនិងមនុស្សដែលអាស្រ័យនៅក្នុងយេរូសាឡិម ដើម្បីជម្រះអំពើខុសឆ្គងនិងភាពមិនស្អាតស្អំ។+
២ ព្រះយេហូវ៉ានៃបណ្ដាកងទ័ពស្ថានសួគ៌មានប្រសាសន៍ថា៖ «នៅថ្ងៃនោះ ខ្ញុំនឹងលុបបំបាត់ឈ្មោះរបស់រូបព្រះឲ្យអស់ពីទឹកដីនេះ+ ហើយឈ្មោះព្រះទាំងនោះនឹងគ្មានអ្នកណានឹកចាំទៀត។ ខ្ញុំនឹងកម្ចាត់ពួកអ្នកប្រកាសទំនាយ+និងអំណាចរបស់ពួកវិញ្ញាណកំណាចចេញពីទឹកដីនេះ។ ៣ ក៏ប៉ុន្តែ បើមានអ្នកណាម្នាក់ប្រកាសទំនាយម្ដងទៀត នោះឪពុកម្ដាយបង្កើតរបស់អ្នកនោះនឹងនិយាយទៅកាន់គាត់ថា៖ ‹កូននឹងមិនរស់ទេ ព្រោះកូនបាននិយាយភូតកុហកដោយនូវនាមព្រះយេហូវ៉ា›។ រួចឪពុកម្ដាយបង្កើតរបស់គាត់នឹងយកដាវចាក់ទម្លុះគាត់ ដោយសារគាត់ប្រកាសទំនាយ។+
៤ «នៅថ្ងៃនោះ អ្នកប្រកាសទំនាយម្នាក់ៗនឹងអាម៉ាស់មុខ ពេលគាត់ប្រកាសអ្វីដែលគាត់បានឃើញក្នុងគំនិត។ ពួកគេនឹងមិនពាក់អាវរោមសត្វ*+ ដើម្បីបោកបញ្ឆោតមនុស្សទៀតទេ។ ៥ ពួកគេម្នាក់ៗនឹងពោលថា៖ ‹ខ្ញុំមិនមែនជាអ្នកប្រកាសទំនាយទេ តែខ្ញុំជាអ្នកភ្ជួររាស់ដី ដោយសារបុរសម្នាក់បានទិញខ្ញុំមកតាំងពីខ្ញុំនៅក្មេង›។ ៦ បើមានមនុស្សសួរពួកគេណាម្នាក់ថា៖ ‹ហេតុអ្វីលើខ្លួនរបស់អ្នកមានរបួស?›។ គាត់នឹងឆ្លើយថា៖ ‹ខ្ញុំត្រូវរបួសនៅផ្ទះរបស់មិត្តភក្ដិខ្ញុំ›»។*
៧ ព្រះយេហូវ៉ានៃបណ្ដាកងទ័ពស្ថានសួគ៌មានប្រសាសន៍ថា៖ «ឱដាវអើយ ចូរភ្ញាក់ឡើង ហើយប្រហារគង្វាលរបស់ខ្ញុំទៅ+
គឺប្រហារបុរសដែលជាមិត្តសម្លាញ់របស់ខ្ញុំ។
ចូរប្រហារគង្វាលនោះចុះ+ ហើយធ្វើឲ្យហ្វូងចៀមខ្ចាត់ខ្ចាយទៅ+
នោះខ្ញុំនឹងលើកដៃប្រឆាំងនឹងអស់អ្នកដែលមិនសំខាន់»។
៨ ព្រះយេហូវ៉ាមានប្រសាសន៍ថា៖ «នៅគ្រប់ទឹកដី
បណ្ដាជន២ភាគ៣នឹងត្រូវសម្លាប់ចោល
តែ១ភាគ៣ដែលនៅសល់នឹងទុកឲ្យនៅរស់វិញ។
៩ រួចខ្ញុំនឹងនាំបណ្ដាជន១ភាគ៣ឆ្លងកាត់ភ្លើង
ហើយខ្ញុំនឹងសម្រិតសម្រាំងពួកគេ ដូចគេបន្សុទ្ធប្រាក់
ខ្ញុំនឹងពិនិត្យមើលពួកគេ ដូចគេពិនិត្យមើលមាស។+
ពួកគេនឹងហៅរកនាមរបស់ខ្ញុំ
ហើយខ្ញុំនឹងឆ្លើយតបទៅពួកគេ។
ខ្ញុំនឹងនិយាយថា៖ ‹ពួកគេជារាស្ត្ររបស់ខ្ញុំ›+
ហើយពួកគេនឹងពោលថា៖ ‹ព្រះយេហូវ៉ាជាព្រះរបស់យើង›»។
១៤ «មើល! ថ្ងៃរបស់ព្រះយេហូវ៉ានឹងមកដល់ជាមិនខាន។ នៅថ្ងៃនោះសត្រូវនឹងចាប់យកទ្រព្យសម្បត្តិរបស់អ្នករាល់គ្នា* ហើយចែកនៅចំពោះមុខអ្នករាល់គ្នា។ ២ ខ្ញុំនឹងប្រមូលប្រជាជាតិទាំងអស់មកប្រយុទ្ធនឹងក្រុងយេរូសាឡិម។ ពួកគេនឹងចាប់យកក្រុងនោះ ហើយប្លន់យកទ្រព្យក្នុងផ្ទះ ថែមទាំងរំលោភស្រីៗទៀតផង។ បណ្ដាជនក្នុងក្រុងចំនួនពាក់កណ្ដាលនឹងត្រូវនិរទេសចេញ តែបណ្ដាជនដែលនៅសល់នឹងរស់នៅក្នុងក្រុងតទៅទៀត។
៣ «ព្រះយេហូវ៉ានឹងចេញទៅច្បាំងនឹងប្រជាជាតិទាំងនោះ+ ដូចពេលដែលលោកធ្លាប់ធ្វើចម្បាំងនៅអតីតកាលដែរ។+ ៤ នៅថ្ងៃនោះ ជើងរបស់លោកនឹងឈរនៅលើភ្នំដើមអូលីវ+ ដែលនៅខាងកើតទល់មុខក្រុងយេរូសាឡិម ហើយភ្នំដើមអូលីវនឹងត្រូវបែកជាពីរ គឺចាប់ពីទិសខាងកើតដល់ខាងលិច បណ្ដាលឲ្យមានជ្រលងមួយយ៉ាងធំ។ ភ្នំមួយចំហៀងនឹងរើទៅទិសខាងជើង ហើយភ្នំមួយចំហៀងទៀតនឹងរើទៅទិសខាងត្បូង។ ៥ អ្នករាល់គ្នានឹងរត់គេចទៅជ្រលងភ្នំរបស់ខ្ញុំ ព្រោះជ្រលងភ្នំរបស់ខ្ញុំនឹងលាតសន្ធឹងរហូតដល់អេសូល។ អ្នករាល់គ្នានឹងរត់ភៀសខ្លួន ដូចដែលអ្នករាល់គ្នាធ្លាប់រត់គេចពីការរញ្ជួយដីនៅសម័យរបស់អូសៀសជាស្ដេចស្រុកយូដា។+ រួចព្រះយេហូវ៉ាជាព្រះរបស់ខ្ញុំនឹងមក ហើយពួកអ្នកបរិសុទ្ធទាំងអស់ក៏នឹងមកជាមួយនឹងលោកដែរ។+
៦ «នៅថ្ងៃនោះនឹងគ្មានពន្លឺភ្លឺចិញ្ចាចទេ។+ អ្វីៗនឹងទៅជាកក។* ៧ ថ្ងៃនោះនឹងទៅជាថ្ងៃមួយដែលគេស្គាល់ថាជាថ្ងៃរបស់ព្រះយេហូវ៉ា។+ នៅថ្ងៃនោះ គ្មានថ្ងៃគ្មានយប់ទេ។ ប៉ុន្តែ នៅពេលល្ងាចនឹងមានពន្លឺវិញ។ ៨ នៅថ្ងៃនោះ ទឹកដែលផ្ដល់ជីវិត+នឹងហូរចេញពីក្រុងយេរូសាឡិម+ គឺពាក់កណ្ដាលហូរទៅខាងកើតសមុទ្រ*+ ហើយពាក់កណ្ដាលទៀតហូរទៅខាងលិចសមុទ្រ។*+ ទឹកនោះនឹងហូរនៅរដូវក្ដៅនិងរដូវត្រជាក់។ ៩ ព្រះយេហូវ៉ានឹងទៅជាស្ដេចគ្រប់គ្រងលើផែនដីទាំងមូល។+ នៅថ្ងៃនោះនឹងមានតែព្រះយេហូវ៉ាមួយប៉ុណ្ណោះ+ ហើយនឹងមានតែនាមរបស់លោកមួយប៉ុណ្ណោះ។+
១០ «ស្រុកទាំងមូលនឹងបានដូចតំបន់អារ៉ាបា+ គឺចាប់ពីក្រុងកេបា+ដល់ក្រុងរីម៉ូន+ដែលនៅខាងត្បូងក្រុងយេរូសាឡិម។ ក្រុងយេរូសាឡិមនឹងត្រូវលើកតម្កើងឡើង ហើយមនុស្សនឹងអាស្រ័យនៅកន្លែងនាង+ គឺចាប់ពីទ្វារបេនយ៉ាមីន+រហូតដល់ទ្វារដំបូង និងរហូតដល់ជ្រុងទ្វារ ហើយចាប់ពីប៉មហាណានៀល+រហូតដល់កន្លែងត្រងស្រា*របស់ស្ដេច។ ១១ ក្រុងយេរូសាឡិមនឹងមានមនុស្សអាស្រ័យនៅ ហើយនាងនឹងមិនត្រូវបណ្ដាសានៃសេចក្ដីហិនវិនាសទៀតទេ។+ មនុស្សនឹងអាស្រ័យនៅក្នុងក្រុងយេរូសាឡិមដោយសុវត្ថិភាព។+
១២ «ព្រះយេហូវ៉ានឹងដាក់ទោសជនជាតិទាំងអស់ដែលច្បាំងនឹងក្រុងយេរូសាឡិម+ គឺធ្វើឲ្យសាច់របស់ពួកគេរលួយខណៈពេលដែលពួកគេកំពុងឈរ។ គ្រាប់ភ្នែករបស់ពួកគេនឹងរលួយនៅក្នុងភ្នែក ហើយអណ្ដាតរបស់ពួកគេនឹងរលួយនៅក្នុងមាត់។
១៣ «នៅថ្ងៃនោះ ព្រះយេហូវ៉ានឹងធ្វើឲ្យមានភាពចលាចលក្នុងចំណោមពួកគេ។ ពួកគេនឹងវាយគ្នា ហើយប្រហារគ្នាទៅវិញទៅមក។+ ១៤ ចំណែកឯយូដាក៏នឹងចូលរួមក្នុងសង្គ្រាមនៅឯក្រុងយេរូសាឡិមដែរ។ ពួកគេនឹងប្រមូលទ្រព្យសម្បត្តិរបស់ប្រជាជាតិទាំងអស់ដែលនៅជុំវិញ គឺប្រមូលយកទាំងមាសទាំងប្រាក់និងសម្លៀកបំពាក់បានយ៉ាងច្រើនសន្ធឹកសន្ធាប់។+
១៥ «រីឯការដាក់ទោសនោះ ក៏នឹងកើតឡើងដល់សត្វសេះ លាកាត់ សត្វអូដ្ឋ សត្វលា និងហ្វូងសត្វទាំងអស់ដែលនៅក្នុងជំរំទាំងនោះដែរ។
១៦ «ចំណែកមនុស្សទាំងអស់ដែលនៅសល់ពីប្រជាជាតិនានាដែលច្បាំងនឹងក្រុងយេរូសាឡិម ពួកគេនឹងឡើងមកក្រុងយេរូសាឡិមរាល់ឆ្នាំ+ ដើម្បីក្រាបគោរព*ព្រះយេហូវ៉ាជាស្ដេចនៃបណ្ដាកងទ័ពស្ថានសួគ៌+ និងដើម្បីធ្វើបុណ្យខ្ទម។*+ ១៧ ប៉ុន្តែ ក្នុងចំណោមវង្សត្រកូលនានានៅផែនដី បើមានអ្នកណាម្នាក់មិនឡើងមកក្រុងយេរូសាឡិមដើម្បីក្រាបគោរពព្រះយេហូវ៉ាជាស្ដេចនៃបណ្ដាកងទ័ពស្ថានសួគ៌ទេ នោះនឹងគ្មានភ្លៀងធ្លាក់មកលើអ្នកនោះឡើយ។+ ១៨ ប្រសិនបើបណ្ដាជនស្រុកអេហ្ស៊ីបមិនឡើងមកចូលក្រុងនេះទេ នោះនឹងគ្មានភ្លៀងធ្លាក់លើពួកគេឡើយ។ មិនត្រឹមតែប៉ុណ្ណោះ ព្រះយេហូវ៉ានឹងដាក់ទោសពួកគេ ដូចលោកដាក់ទោសប្រជាជាតិនានាដែលមិនព្រមឡើងមកធ្វើបុណ្យខ្ទមដែរ។ ១៩ ការដាក់ទោសនោះនឹងកើតឡើងដល់ស្រុកអេហ្ស៊ីប និងប្រជាជាតិទាំងឡាយដែលមិនព្រមឡើងមកធ្វើបុណ្យខ្ទម។
២០ «នៅថ្ងៃនោះ ពាក្យដែលថា‹ភាពបរិសុទ្ធជារបស់ព្រះយេហូវ៉ា!›+ នឹងត្រូវចារឹកលើកណ្ដឹងសេះ។ ឯឆ្នាំងធំ+ក្នុងវិហាររបស់ព្រះយេហូវ៉ា នឹងប្រៀបដូចជាចានគោម+នៅមុខទីបូជា។ ២១ ម្យ៉ាងទៀត អស់ទាំងឆ្នាំងធំក្នុងក្រុងយេរូសាឡិមនិងក្នុងយូដា នឹងទៅជារបស់បរិសុទ្ធ ហើយក៏នឹងទៅជារបស់ព្រះយេហូវ៉ានៃបណ្ដាកងទ័ពស្ថានសួគ៌ដែរ។ ចំណែកមនុស្សគ្រប់រូបដែលជូនគ្រឿងបូជា ពួកគេនឹងចូលមក ហើយយកឆ្នាំងខ្លះទៅប្រើ។ នៅថ្ងៃនោះនឹងគ្មានជនជាតិកាណាន*នៅក្នុងវិហាររបស់ព្រះយេហូវ៉ានៃបណ្ដាកងទ័ពស្ថានសួគ៌ទៀតទេ»។+
មានន័យថា«ព្រះយេហូវ៉ាបាននឹកចាំ»
ឬ«វិលត្រឡប់មក»
មើលសេចក្ដីពន្យល់បន្ថែម ផ្នែកខ១៥
សព្វថ្ងៃនេះហៅថាហ៊្សេរុយសាឡិម
ឬ«គុណធម៌»
នេះសំដៅលើក្រុងបាប៊ីឡូននិងអ្នកស្នាក់នៅទីនោះ
នេះសំដៅលើក្រុងស៊ីយ៉ូនឬអ្នកស្នាក់នៅទីនោះ
តាមមើលទៅនេះសំដៅលើព្រះយេហូវ៉ា
ឬ«ការតូចតាច»
ជាខ្សែដែលចងដុំអ្វីមួយសម្រាប់សំយុងស្ទង់ជំហរ
មែកពីរនេះពេញដោយផ្លែ
មួយហត្ថស្មើ៤៤,៥សង់ទីម៉ែត្រ។ មើលសេចក្ដីពន្យល់បន្ថែម ផ្នែកខ១៤
ន័យត្រង់«កញ្ឆេអេហ្វា»។ នេះសំដៅលើប្រអប់ ឬកញ្ឆេដែលប្រើសម្រាប់រង្វាល់អេហ្វា។ មួយអេហ្វាស្មើ២២លីត្រ។ មើលសេចក្ដីពន្យល់បន្ថែម ផ្នែកខ១៤
ន័យត្រង់«ហោះឡើងរវាងផែនដីនិងមេឃ»
ន័យត្រង់«កញ្ឆេអេហ្វា»។ នេះសំដៅលើប្រអប់ ឬកញ្ឆេដែលប្រើសម្រាប់រង្វាល់អេហ្វា។ មួយអេហ្វាស្មើ២២លីត្រ។ មើលសេចក្ដីពន្យល់បន្ថែម ផ្នែកខ១៤
នេះសំដៅលើស្រុកបាប៊ីឡូន
ន័យត្រង់«ធ្វើឲ្យវិញ្ញាណរបស់ព្រះយេហូវ៉ាសណ្ឋិតនៅទឹកដីខាងជើង»
ឬ«មកុដដ៏រុងរឿង»
ឬ«ហើយតួនាទីទាំងពីរនេះនឹងដំណើរការទៅយ៉ាងរលូន»
ឬ«ការនឹកចាំ»
មើលសេចក្ដីពន្យល់បន្ថែម ផ្នែកខ១៥
ឬ«កូនកំព្រាឪពុក»
ន័យត្រង់«ពួកគេបែរខ្នងចេញដោយរឹងចចេស»
ឬប្រហែលជាមានន័យថា«រឹងដូចថ្ម» ដូចជាថ្មសំលៀង
ឬ«ការណែនាំ»
ឬ«សេចក្ដីស្មោះត្រង់»
ឬ«ចេញពីទឹកដីនៃថ្ងៃរះនិងទឹកដីនៃថ្ងៃលិច»
ឬ«សេចក្ដីស្មោះត្រង់»
ឬ«ខ្ញុំមិនបានស្ដាយក្រោយទេ»
ឬ«អាវវែង»
ន័យត្រង់«ជនជាតិយូដាម្នាក់»
ឬ«បន្ទាយ»
ឬប្រហែលជាមានន័យថា«នៅលើសមុទ្រ»
ឬ«អ្នកត្រួតត្រា»
តាមមើលទៅនេះសំដៅលើទុក្ខវេទនារបស់រាស្ត្រលោក
នេះសំដៅលើក្រុងស៊ីយ៉ូនឬអ្នកស្នាក់នៅទីនោះ
នេះសំដៅលើក្រុងយេរូសាឡិមឬអ្នកស្នាក់នៅទីនោះ
ឬ«ជ័យជម្នះ»
ឬ«លាឈ្មោល»
នេះសំដៅលើទន្លេអឺប្រាត
ន័យត្រង់«រូបធេរ៉ាភីម»សំដៅលើរូបព្រះក្នុងផ្ទះ និងរូបសំណាកផ្សេងៗ
ន័យត្រង់«ប៉មនៅកាច់ជ្រុង»ដែលធ្វើឲ្យនឹកឃើញដល់បុរសសំខាន់ ឬមេដឹកនាំ
ឬ«ចានគោម»
ឬ«អាវរបស់អ្នកប្រកាសទំនាយ»
ឬ«ផ្ទះរបស់អ្នកដែលស្រឡាញ់ខ្ញុំ»
នេះសំដៅលើក្រុងដែលរៀបរាប់នៅខ២
ឬ«នៅនឹងថ្កល់» ហាក់ដូចជារឹងកកដោយសារត្រជាក់
នេះសំដៅលើសមុទ្រស្លាប់
នេះសំដៅលើសមុទ្រមេឌីទែរ៉ានេ
ឬ«កន្លែងជាន់ផ្លែទំពាំងបាយជូរយកទឹកធ្វើស្រា»
ឬ«គោរពប្រណិប័តន៍»
ឬ«ជម្រកបណ្ដោះអាសន្ន»
ឬប្រហែលជាមានន័យថា«ឈ្មួញ»