ជំពូកទី៤៥
បុរសម្នាក់ដែលមិននឹកស្មានថាអាចក្លាយជាសិស្សម្នាក់
មើលទៅគួរឲ្យខ្លាចមែន ពេលដែលព្រះយេស៊ូទៅដល់ត្រើយម្ខាង! មានបុរសកាចសាហាវពីរនាក់ចេញពីកន្លែងបញ្ចុះសព ហើយរត់តំរង់ទៅរកទ្រង់។ បុរសពីរនាក់នេះមានអារក្សចូល។ គេលើកយកមកនិយាយអំពីបុរសតែម្នាក់ដែលមានអារក្សចូលប៉ុណ្ណោះ ដោយព្រោះបុរសម្នាក់នេះកាចសាហាវជាងម្នាក់ទៀត ហើយស្ថិតនៅក្រោមអានុភាពរបស់អារក្សយូរជាង។
បុរសដ៏គួរឲ្យអាណិតនេះរស់នៅកន្លែងបញ្ចុះសពដោយអាក្រាតជាយូរយារមកហើយ។ គាត់ចេះតែស្រែក ព្រមទាំងយកថ្មមកអារសាច់ខ្លួនឯង ទាំងយប់ទាំងថ្ងៃជានិច្ច។ គាត់កាចសាហាវណាស់ បានជាគ្មាននរណាហ៊ានដើរកាត់តាមផ្លូវនោះឡើយ។ គេបានដាក់ខ្នោះដាក់ច្រវាក់គាត់ជាច្រើនលើកច្រើនដងហើយ តែគាត់បានកាច់បំបាក់ច្រវាក់និងខ្នោះទាំងនោះចោលអស់។ គ្មានអ្នកណាអាចបង្ក្រាបគាត់បានឡើយ។
ពេលបុរសនេះជួបព្រះយេស៊ូគាត់ក៏បង្ហាញការគោរពចំពោះទ្រង់ នោះអារក្សដែលចូលគាត់បានធ្វើឲ្យគាត់ស្រែកយ៉ាងខ្លាំងថា៖ «ឱព្រះយេស៊ូវ! ជាព្រះរាជបុត្រាព្រះដ៏ខ្ពស់បំផុតអើយ! តើទ្រង់ហើយនឹងទូលបង្គំមានរឿងអ្វីនឹងគ្នា ទូលបង្គំសូមទ្រង់ឲ្យស្បថដោយព្រះថា មិនធ្វើទុក្ខទូលបង្គំទេ»។
ព្រះយេស៊ូមានបន្ទូលថា៖ «ម្នាលអារក្សអសោចិ៍ ចូរថយចេញពីមនុស្សនេះទៅ!»។ រួចមក ព្រះយេស៊ូមានបន្ទូលសួរថា៖ «ឯងឈ្មោះអី?»។
វាទូលឆ្លើយថា៖ «ទូលបង្គំឈ្មោះ‹កងទ័ព›ពីព្រោះយើងខ្ញុំមានគ្នាច្រើន»។ ពួកអារក្សសប្បាយចិត្តណាស់ ដោយឃើញមនុស្សរងទុក្ខដោយពួកវាចូលគេនោះ ហើយតាមពិត ពួកវាសប្បាយរីករាយក្រៃលែងពេលពួកវាព្រួតដៃគ្នាធ្វើបាបដល់មនុស្ស។ ប៉ុន្តែនៅពេលជួបនឹងព្រះយេស៊ូ នោះពួកវាទទូចអង្វរសុំកុំឲ្យទ្រង់បញ្ជូនពួកវាចូលក្នុងជង្ហុកធំឡើយ។ ម្ដងនេះទៀត យើងឃើញថាព្រះយេស៊ូមានព្រះចេស្ដាយ៉ាងខ្លាំង ហើយទ្រង់អាចឈ្នះលើពួកអារក្សដ៏កាចសាហាវទាំងនេះ។ នេះបានបង្ហាញថា ពួកអារក្សក៏ដឹងថា នៅទីបំផុត ព្រះនឹងជំនុំជំរះពួកវាបោះទំលាក់ចូលទៅក្នុងជង្ហុកធំ រួមជាមួយមេដឹកនាំរបស់ពួកវា គឺអារក្សសាតាំង។
នៅក្បែរនោះ មានជ្រូកមួយហ្វូងប្រហែល២.០០០ក្បាលកំពុងតែរកស៊ីនៅតាមចង្កេះភ្នំ។ ដូច្នេះ ពួកអារក្សនិយាយថា៖ «សូមឲ្យយើងរាល់គ្នាទៅជ្រក នៅក្នុងជ្រូកទាំងនោះចុះ!»។ យ៉ាងជាក់ស្តែងណាស់ ដែលពួកអារក្សមានការពេញចិត្តខុសពីធម្មតាក្នុងការចូលរូបកាយមនុស្សឬសត្វដែលមានរូបសាច់ ពីព្រោះដោយការចង់ធ្វើបាបគេ។ នៅពេលដែលព្រះយេស៊ូយល់ព្រមឲ្យពួកវាចូលទៅក្នុងជ្រូក ហើយហ្វូងជ្រូក២.០០០ក្បាលក៏បោលចុះតាមជំរាលភ្នំ ធ្លាក់ទៅក្នុងសមុទ្រលង់ទឹកស្លាប់ទាំងអស់ទៅ។
នៅពេលដែលពួកអ្នកថែរក្សាហ្វូងជ្រូកឃើញដូច្នេះ ពួកគេប្រញាប់ប្រញាល់យករឿងនេះទៅប្រាប់អ្នកនៅទីក្រុងនិងអ្នកនៅតាមជនបទ។ ភ្លាមនោះ មនុស្សម្នាក៏នាំគ្នាចេញមកមើលហេតុការណ៍ដែលបានកើតឡើង។ ពេលមនុស្សម្នាមកដល់ នោះពួកគេឃើញបុរសដែលពីដើមមានអារក្សចូលកំពុងតែអង្គុយជិតព្រះបាទរបស់ព្រះយេស៊ូ ទាំងស្លៀកពាក់ ហើយដឹងស្មារតីទៀតផង!
សាក្សីជាច្រើនពណ៌នាប្រាប់អំពីរបៀបដែលបុរសនេះបានជាឡើងវិញ។ ពួកគេក៏រៀបរាប់ប្រាប់ដល់ជនគ្រប់រូបអំពីការស្លាប់ដ៏ចម្លែកនៃហ្វូងជ្រូកដែរ។ ពេលដែលមនុស្សម្នាបានឮអំពីរឿងនេះ នោះពួកគេមានសេចក្ដីខ្លាចយ៉ាងខ្លាំង ហើយពួកគេទូលអង្វរព្រះយេស៊ូឲ្យចាកចេញពីស្រុកភូមិរបស់គេទៅ។ ដូច្នេះ ទ្រង់ក៏យល់ព្រមហើយយាងឡើងទូក។ បុរសដែលអារក្សធ្លាប់ចូលពីដើមនោះ អង្វរសុំព្រះយេស៊ូឲ្យគាត់អាចទៅជាមួយទ្រង់ដែរ។ ប៉ុន្តែ ព្រះយេស៊ូមានបន្ទូលប្រាប់គាត់ថា៖ «ចូរទៅផ្ទះទៅ! ហើយប្រាប់បងប្អូនឯងពីការធំទាំងម្ល៉េះ ដែលព្រះអម្ចាស់បានមេត្ដាប្រោសដល់ឯងវិញ»។
តាមធម្មតា ព្រះយេស៊ូបង្គាប់អស់អ្នកដែលទ្រង់ប្រោសឲ្យជា កុំប្រាប់អ្នកណាឲ្យសោះ ដោយព្រោះទ្រង់មិនចង់ឲ្យមនុស្សសន្និដ្ឋានដោយនិយាយបំផ្លើស ដែលធ្វើឲ្យមានការចាប់អារម្មណ៍ជាខ្លាំងនោះទេ។ ប៉ុន្តែ លើកនេះព្រះយេស៊ូមិនបង្គាប់បែបនោះទេ ពីព្រោះបុរសដែលអារក្សចូលគាត់ពីដើមនេះ នឹងធ្វើបន្ទាល់ក្នុងចំណោមមនុស្សម្នា ដែលឥឡូវព្រះយេស៊ូពុំអាចមានឱកាសទៅជួបបានឡើយ។ ម្យ៉ាងវិញទៀត វត្តមានរបស់បុរសនេះ ក៏ផ្ដល់នូវសក្ខីភាពអំពីព្រះចេស្ដារបស់ព្រះយេស៊ូក្នុងការធ្វើអំពើល្អ ហើយបុរសនេះនឹងធ្វើឲ្យសាបរលាបនូវពាក្យចចាមអារ៉ាមដ៏មិនល្អណា ដែលមានដោយសារហ្វូងជ្រូកស្លាប់ទៅនោះ។
ដោយស្ដាប់តាមសេចក្ដីបង្គាប់របស់ព្រះយេស៊ូ នោះបុរសដែលអារក្សចូលពីដើមនេះក៏ចេញទៅ។ គាត់ចាប់ផ្ដើមប្រកាសប្រាប់ឲ្យប្រជាជនក្នុងស្រុកដេកាប៉ូល នូវអ្វីៗទាំងអស់ដែលព្រះយេស៊ូបានប្រព្រឹត្តចំពោះគាត់ ហើយមនុស្សម្នាកោតស្ញប់ស្ញែងក្រៃលែង។ ម៉ាថាយ ៨:២៨-៣៤; ម៉ាកុស ៥:១-២០; លូកា ៨:២៦-៣៩; វិវរណៈ ២០:១-៣
▪ ហេតុអ្វីបានជាគេលើកយកមកនិយាយអំពីបុរសតែម្នាក់ដែលអារក្សចូល ថ្វីបើមានបុរសពីរនាក់ដែលមានអារក្សចូលនោះក៏ដោយ?
▪ តើអ្វីដែលបង្ហាញថា ពួកអារក្សដឹងអំពីការបោះទំលាក់ទៅក្នុងជង្ហុកធំនៅនាអនាគត?
▪ តាមមើលទៅ ហេតុអ្វីបានជាពួកអារក្សចូលចិត្តចូលទៅក្នុងមនុស្សនិងសត្វដូច្នេះ?
▪ ហេតុអ្វីបានជាព្រះយេស៊ូធ្វើខុសពីមុន ដោយបង្គាប់ឲ្យបុរសដែលអារក្សចូលពីដើមនេះ ប្រាប់អ្នកដទៃអំពីអ្វីដែលទ្រង់បានធ្វើចំពោះគាត់នោះ?