ជំពូកទី១០
លោកយេស៊ូមានឫទ្ធានុភាពខ្លាំងជាងពួកវិញ្ញាណកំណាច
តើមូលហេតុអ្វីដែលទេវតាមួយរូបរបស់ព្រះបានក្លាយទៅជាមេកំណាចសាថាន? តើកូនចាំទេ?— ដោយសារវាគិតតែពីប្រយោជន៍ផ្ទាល់ខ្លួន ហើយចង់ឲ្យអ្នកឯទៀតគោរពប្រណិប័តន៍វា។ នេះហើយជាមូលហេតុដែលវាប្រឆាំងនឹងព្រះយេហូវ៉ា។ តើទេវតាឯទៀតបានធ្វើតាមសាថានទេ?— មែន ពួកវាបានធ្វើតាមសាថានមែន។ គម្ពីរហៅពួកវាថា‹បណ្ដាទេវតារបស់សាថាន›ឬពួកវិញ្ញាណកំណាច។—ការបើកបង្ហាញ ១២:៩
តើពួកទេវតាអាក្រក់ទាំងនេះឬពួកវិញ្ញាណកំណាចជឿថាមានព្រះទេ?— គម្ពីរចែងថា៖ ‹ពួកវិញ្ញាណកំណាចជឿថាមានព្រះ›។ (យ៉ាកុប ២:១៩) ប៉ុន្តែ សព្វថ្ងៃនេះពួកវាមានការភ័យខ្លាច។ ហេតុអ្វី? ពីព្រោះពួកវាដឹងថាព្រះនឹងដាក់ទោស ដោយសារពួកវាបានធ្វើអាក្រក់។ តើពួកវាបានធ្វើអាក្រក់អ្វី?—
គម្ពីរចែងថាទេវតាទាំងនោះបានបោះបង់ចោលទីលំនៅស្ថានសួគ៌ ហើយមករស់នៅផែនដីជាមនុស្ស។ ពួកវាបានធ្វើដូច្នេះ ពីព្រោះពួកវាចង់រួមដំណេកជាមួយស្រីស្អាតៗនៅផែនដី។ (លោកុប្បត្តិ ៦:១, ២; យូដាស ៦) តើកូនដឹងទេថាការរួមដំណេកជាអ្វី?—
ការរួមដំណេកគឺពេលបុរសនិងស្ត្រីមានភាពស្និទ្ធស្នាលនឹងគ្នាតាមរបៀបពិសេសមួយ។ ក្រោយមកទារកអាចបង្កកំណើតនៅក្នុងផ្ទៃម្ដាយ។ ប៉ុន្តែ បើពួកទេវតារួមដំណេក នោះគឺជាការខុស។ ព្រះអនុញ្ញាតឲ្យបុរសនិងស្ត្រីរួមដំណេក លុះត្រាតែពួកគេបានរៀបការហើយប៉ុណ្ណោះ។ យ៉ាងនេះ ពេលកូនកើតមក ប្ដីប្រពន្ធនោះអាចចិញ្ចឹមអប់រំកូនជាមួយគ្នា។
តើទេវតាទាំងនេះបានធ្វើអំពើអាក្រក់អ្វី?
ពេលទេវតាបានកាឡាខ្លួនជាមនុស្ស ពួកវាបានរួមដំណេកជាមួយនឹងស្ត្រីនៅផែនដី។ ពេលកូនរបស់ពួកវាធំឡើង កូនទាំងនោះបានក្លាយទៅជាមនុស្សធំសម្បើម។ មនុស្សធំសម្បើមនោះសាហាវណាស់ ហើយធ្វើបាបមនុស្សឯទៀត។ ហេតុនេះហើយ ព្រះបានបំផ្លាញមនុស្សធំសម្បើមនិងមនុស្សអាក្រក់ដោយប្រើទឹកជំនន់ដ៏ធំ។ ប៉ុន្តែ លោកបានឲ្យណូអេសង់ទូកធំមួយដើម្បីសង្គ្រោះមនុស្សមួយចំនួនដែលបានធ្វើអ្វីដែលត្រឹមត្រូវ។ គ្រូដ៏ល្អប្រសើរបាននិយាយថាអ្វីដែលបានកើតឡើងនៅសម័យទឹកជំនន់ ជាមេរៀនដ៏សំខាន់ដែលយើងគួរចងចាំ។—លោកុប្បត្តិ ៦:៣, ៤, ១៣, ១៤; លូកា ១៧:២៦, ២៧
ពេលដែលមានទឹកជំនន់ តើកូនដឹងថាមានអ្វីកើតឡើងចំពោះពួកទេវតាអាក្រក់ទេ?— ពួកវាបានបោះបង់ចោលរូបកាយជាមនុស្ស ហើយត្រឡប់ទៅស្ថានសួគ៌វិញ។ ប៉ុន្តែ ពួកវាមិនអាចធ្វើជាទេវតារបស់ព្រះបានទៀតទេ។ ដូច្នេះ ពួកវាបានក្លាយទៅជាទេវតារបស់សាថានឬពួកវិញ្ញាណកំណាច។ ចុះយ៉ាងណាវិញកូនរបស់ពួកវា ដែលជាមនុស្សធំសម្បើម?— ពួកវាស្លាប់នៅក្នុងទឹកជំនន់។ ម្យ៉ាងទៀត មនុស្សដែលមិនស្ដាប់បង្គាប់ព្រះក៏ស្លាប់ទាំងអស់ដែរ។
ហេតុអ្វីនៅផែនដីមានបញ្ហាកាន់តែច្រើនជាងមុន?
តាំងពីសម័យទឹកជន់លិច ព្រះលែងអនុញ្ញាតឲ្យពួកវិញ្ញាណកំណាចកាឡាខ្លួនជាមនុស្សតទៅទៀត។ ប៉ុន្តែ ទោះជាយើងមិនអាចមើលឃើញពួកវិញ្ញាណកំណាចក៏ដោយ ពួកវានៅតែខំល្បួងមនុស្សឲ្យធ្វើអាក្រក់កាន់តែខ្លាំងឡើងដែរ។ ពួកវាបង្កើតបញ្ហាច្រើនជាងពេលមុនទៅទៀត។ នេះដោយសារពួកវាបានត្រូវបោះទម្លាក់ពីស្ថានសួគ៌មកផែនដី។
ក៏ប៉ុន្តែយើងមិនអាចមើលឃើញពួកវិញ្ញាណកំណាចទេ។ តើកូនដឹងថាហេតុអ្វីទេ?— ពីព្រោះពួកវាជាបុគ្គលវិញ្ញាណ។ ប៉ុន្តែ យើងអាចដឹងថាពិតជាមានពួកវាមែន។ គម្ពីរប្រាប់ថា សាថាន‹កំពុងបំភាន់មនុស្សក្នុងពិភពលោកទាំងមូល› ហើយពួកវិញ្ញាណកំណាចក៏កំពុងជួយវាដែរ។—ការបើកបង្ហាញ ១២:៩, ១២
ចុះយើងវិញ តើមេកំណាចនិងពួកវិញ្ញាណកំណាចរបស់វាអាចបំភាន់ឬបោកបញ្ឆោតយើងបានទេ?— ពិតជាអាចមែន បើយើងមិនប្រុងប្រយ័ត្ន។ ប៉ុន្តែ យើងមិនចាំបាច់ខ្លាចពួកវាទេ។ គ្រូដ៏ល្អប្រសើរបាននិយាយថា៖ ‹មេកំណាចមិនមានអំណាចលើខ្ញុំឡើយ›។ បើយើងនៅជិតស្និទ្ធនឹងព្រះ លោកនឹងការពារយើងពីមេកំណាចនិងពួកវិញ្ញាណកំណាច។—យ៉ូហាន ១៤:៣០
ជាការសំខាន់ដែលយើងដឹងថា ពួកវិញ្ញាណកំណាចព្យាយាមល្បួងយើងឲ្យធ្វើអំពើអាក្រក់អ្វីខ្លះ។ សូមគិតអំពីរឿងនេះ។ ពេលពួកវិញ្ញាណកំណាចមកផែនដី តើពួកវាបានធ្វើអាក្រក់អ្វី?— មុនទឹកជំនន់ ពួកវាបានរួមដំណេកជាមួយស្ត្រី។ ការធ្វើដូច្នោះមិនត្រឹមត្រូវទេសម្រាប់ពួកទេវតា។ សព្វថ្ងៃនេះ ពួកវិញ្ញាណកំណាចសប្បាយចិត្តណាស់ ពេលដែលមនុស្សមិនធ្វើតាមច្បាប់របស់ព្រះស្តីអំពីការរួមដំណេក។ ខ្ញុំសូមសួរកូនថា តើអ្នកណាប៉ុណ្ណោះដែលអាចរួមដំណេកជាមួយគ្នាបាន?— កូនឆ្លើយត្រឹមត្រូវ គឺសម្រាប់តែអ្នកដែលបានរៀបការហើយប៉ុណ្ណោះ។
សព្វថ្ងៃនេះ ក្មេងប្រុសនិងក្មេងស្រីខ្លះបានរួមដំណេកជាមួយគ្នា។ ប៉ុន្តែពួកគេធ្វើដូច្នេះជាការខុស។ គម្ពីរថាព្រះបានបង្កើតប្រដាប់បន្តពូជរបស់បុរសនិងស្ត្រី។ ព្រះយេហូវ៉ាបានបង្កើតផ្នែកទាំងនេះនៃរូបកាយក្នុងគោលបំណងដ៏ពិសេសមួយ។ នេះសម្រាប់តែបុរសនិងស្ត្រីដែលបានរៀបការហើយប៉ុណ្ណោះ។ ពួកវិញ្ញាណកំណាចសប្បាយចិត្ត ពេលមនុស្សធ្វើអ្វីមួយដែលព្រះបានហាម។ ជាឧទាហរណ៍ ពួកវិញ្ញាណកំណាចចូលចិត្តណាស់ ពេលក្មេងប្រុសនិងក្មេងស្រីលេងប្រដាប់បន្តពូជគ្នា។ យើងមិនចង់ធ្វើឲ្យពួកវិញ្ញាណកំណាចសប្បាយចិត្តទេ មែនទេ?—
ប៉ុន្តែ មានអ្វីផ្សេងទៀតដែលពួកវិញ្ញាណកំណាចចូលចិត្ត តែព្រះយេហូវ៉ាស្អប់។ តើកូនដឹងថានោះជាអ្វីទេ?— គឺអំពើឃោរឃៅ។ (ទំនុកតម្កើង ១១:៥) ពេលដែលមនុស្សមានចិត្តសាហាវនិងធ្វើបាបអ្នកឯទៀត នោះហើយជាអំពើឃោរឃៅ។ សូមចាំថា នោះជាអ្វីដែលមនុស្សធំសម្បើមដែលជាកូនរបស់ពួកវិញ្ញាណកំណាចបានធ្វើ។
ពួកវិញ្ញាណកំណាចក៏ចូលចិត្តបន្លាចមនុស្សដែរ។ ជួនកាលពួកវាបញ្ឆោតមនុស្សឲ្យគិតថា ពួកវាជាមនុស្សដែលបានស្លាប់ហើយ។ ពួកវាអាចធ្វើត្រាប់តាមសំឡេងរបស់មនុស្សស្លាប់ទៀតផង។ តាមវិធីនេះ ពួកវិញ្ញាណកំណាចបោកបញ្ឆោតមនុស្សជាច្រើនឲ្យជឿថាមនុស្សស្លាប់នៅតែបន្តរស់ ហើយអាចនិយាយជាមួយយើងបាន។ ប្រាកដហើយ ពួកវិញ្ញាណកំណាចធ្វើឲ្យមនុស្សជាច្រើនជឿថាមានខ្មោចមែន។
ដូច្នេះយើងត្រូវប្រុងប្រយ័ត្ន កុំឲ្យសាថាននិងពួកវិញ្ញាណកំណាចបោកបញ្ឆោតយើងឡើយ។ គម្ពីរព្រមានយើងថា៖ ‹សាថានខំក្លែងខ្លួនជាទេវតាល្អ ហើយអ្នកបម្រើរបស់វាក៏ធ្វើដូចគ្នាដែរ›។ (កូរិនថូសទី២ ១១:១៤, ១៥) ប៉ុន្តែ ពួកវិញ្ញាណកំណាចពិតជាអាក្រក់ណាស់។ សូមយើងពិនិត្យមើលវិធីដែលពួកវាខំល្បួងយើងឲ្យធ្វើដូចពួកវាដែរ។
តើមនុស្សដឹងច្រើនអំពីរឿងឃោរឃៅ ការរួមដំណេកដែលខុសច្បាប់ព្រះ ពួកវិញ្ញាណ និងខ្មោចពីកន្លែងណា?— ពួកគេច្រើនតែឃើញតាមកម្មវិធីទូរទស្សន៍ ភាពយន្ត ហ្គេមវីដេអូ អ៊ីនធឺណិត និងសៀវភៅគំនូរជីវចល មែនទេ? តើអ្វីៗទាំងនេះនាំឲ្យយើងចូលកាន់តែជិតព្រះ ឬចូលកាន់តែជិតមេកំណាចនិងពួកវិញ្ញាណកំណាចវិញ? តើកូនគិតយ៉ាងណា?—
បើយើងមើលរឿងឃោរឃៅ តើអាចមានអ្វីកើតឡើង?
តើកូនគិតថាអ្នកណាដែលចង់ឲ្យយើងស្ដាប់និងមើលអ្វីដែលអាក្រក់?— មែនហើយ គឺសាថាននិងពួកវិញ្ញាណកំណាច។ ដូច្នេះ តើកូននិងខ្ញុំត្រូវធ្វើអ្វី?— យើងត្រូវអាន ស្ដាប់ និងមើលអ្វីដែលមានប្រយោជន៍ ហើយអ្វីដែលនឹងជួយយើងឲ្យបម្រើព្រះយេហូវ៉ា។ តើកូនគិតឃើញការល្អខ្លះៗដែលយើងអាចធ្វើបានទេ?—
តើយើងត្រូវធ្វើអ្វីដើម្បីទទួលប្រយោជន៍?
បើយើងធ្វើអ្វីដែលល្អ នោះគ្មានហេតុឲ្យយើងភ័យខ្លាចពួកវិញ្ញាណកំណាចឡើយ។ លោកយេស៊ូខ្លាំងជាងពួកវា ហើយពួកវាខ្លាចលោក។ ថ្ងៃមួយពួកវិញ្ញាណកំណាចបានស្រែកយ៉ាងខ្លាំងដាក់លោកយេស៊ូថា៖ «តើអ្នកមកបំផ្លាញយើងឬ?»។ (ម៉ាកុស ១:២៤) ពេលលោកយេស៊ូបំផ្លាញចោលសាថាននិងពួកវិញ្ញាណកំណាច យើងពិតជាសប្បាយចិត្តណាស់ មែនទេ?— ទម្រាំដល់ពេលនោះ យើងអាចជឿប្រាកដថាលោកយេស៊ូនឹងការពារយើងពីពួកវិញ្ញាណកំណាច បើយើងបន្តចូលទៅជិតលោកនិងព្រះយេហូវ៉ាដែលជាបិតានៅស្ថានសួគ៌។
សូមអានអំពីអ្វីដែលយើងត្រូវធ្វើនៅ ពេត្រុសទី១ ៥:៨, ៩ និងយ៉ាកុប ៤:៧, ៨។