ជំពូកទី២៦
ហេតុអ្វីយើងពិបាកធ្វើអំពើល្អ?
ពេលសុលធ្វើអំពើអាក្រក់ តើអ្នកណាពេញចិត្ត?— គឺមេកំណាចសាថាន។ មិនត្រឹមតែប៉ុណ្ណោះ ពួកអ្នកដឹកនាំសាសនាយូដាក៏បានពេញចិត្តដែរ។ រួចមក ពេលសុលទៅជាអ្នកកាន់តាមគ្រូដ៏ល្អប្រសើរ ហើយបានប្ដូរឈ្មោះទៅជាប៉ូល ពួកអ្នកដឹកនាំសាសនាទាំងនោះចាប់ផ្ដើមស្អប់គាត់វិញ។ ដូច្នេះ តើកូនអាចយល់មូលហេតុដែលអ្នកកាន់តាមលោកយេស៊ូពិបាកធ្វើអំពើល្អឬទេ?—
ពេលដែលប៉ូលធ្វើអំពើល្អ តើអ្វីខ្លះកើតឡើងចំពោះគាត់?
ក្រោយពីប៉ូលទៅជាអ្នកកាន់តាមលោកយេស៊ូ មនុស្សធ្វើបាបគាត់ច្រើនណាស់។ ជាឧទាហរណ៍ មានពេលមួយដែលសម្ដេចសង្ឃឈ្មោះអាណានាស បានប្រាប់បុរសខ្លះឲ្យដាល់មុខរបស់ប៉ូល។ អាណានាសក៏បានព្យាយាមឲ្យគេយកប៉ូលទៅដាក់គុកដែរ។ នៅពេលផ្សេងទៀត មនុស្សអាក្រក់បានវាយប៉ូល ហើយព្យាយាមសម្លាប់គាត់ដោយគប់នឹងដុំថ្ម។—សកម្មភាព ២៣:១, ២; កូរិនថូសទី២ ១១:២៤, ២៥
នៅសព្វថ្ងៃនេះ មនុស្សជាច្រើននឹងខំធ្វើឲ្យយើងប្រព្រឹត្តអ្វីដែលព្រះមិនពេញចិត្ត។ ដូច្នេះ កូនត្រូវគិតអំពីសំណួរថា តើកូនស្រឡាញ់អំពើល្អខ្លាំងយ៉ាងណា? តើកូនស្រឡាញ់អំពើល្អខ្លាំងដល់ម្ល៉េះបានជាកូននឹងធ្វើអ្វីដែលត្រឹមត្រូវ ទោះជានោះធ្វើឲ្យអ្នកឯទៀតស្អប់កូនក៏ដោយឬ? ដើម្បីធ្វើដូច្នេះ កូនត្រូវមានចិត្តក្លាហាន មែនទេ?—
កូនប្រហែលជាឆ្ងល់ថា ‹ហេតុអ្វីមនុស្សស្អប់យើងដោយសារយើងធ្វើអំពើល្អ? តាមពិត ពួកគេគួរសប្បាយចិត្តទៅវិញទេ!›។ ត្រូវហើយ ពួកគេគួរសប្បាយចិត្តមែន។ មនុស្សជាច្រើនធ្លាប់ចូលចិត្តលោកយេស៊ូដោយសារលោកធ្វើអំពើល្អ។ មានពេលមួយដែលមនុស្សទាំងអស់ក្នុងក្រុងបានមកមូលគ្នានៅផ្ទះដែលលោកកំពុងស្នាក់នៅ ពីព្រោះលោកយេស៊ូបានធ្វើឲ្យមនុស្សឈឺជាសះស្បើយ។—ម៉ាកុស ១:៣៣
ប៉ុន្តែ ជួនកាលមនុស្សមិនចូលចិត្តអ្វីដែលលោកយេស៊ូបានបង្រៀនទេ។ ទោះជាលោកតែងតែបង្រៀនអ្វីដែលត្រឹមត្រូវក៏ដោយ ក៏មនុស្សខ្លះបានស្អប់លោកខ្លាំងណាស់ ពីព្រោះលោកបានប្រាប់សេចក្ដីពិត។ នេះធ្លាប់កើតឡើងនៅក្រុងណាសារ៉ែត ជាក្រុងដែលលោកយេស៊ូបានធំឡើង។ លោកបានចូលក្នុងសាលាប្រជុំ ដែលជាកន្លែងជនជាតិយូដាជួបជុំគ្នាដើម្បីគោរពប្រណិប័តន៍ព្រះ។
លោកយេស៊ូបានថ្លែងសុន្ទរកថាល្អមួយដោយផ្អែកលើបទគម្ពីរ។ នៅដើមដំបូងមនុស្សចូលចិត្តអ្វីដែលលោកបាននិយាយ ហើយបាននឹកអស្ចារ្យក្នុងចិត្តពេលស្ដាប់សម្ដីដ៏ពីរោះរបស់លោក។ ពួកគេពិបាកជឿថាគឺបុរសវ័យក្មេងនេះដែលបានធំឡើងនៅក្រុងរបស់ពួកគេ។
ក៏ប៉ុន្តែ លោកយេស៊ូបាននិយាយបន្តទៀត។ តើលោកបាននិយាយអ្វី? លោកប្រាប់ពួកគេថាធ្លាប់មានពេលខ្លះដែលព្រះឲ្យពរពិសេសដល់មនុស្សដែលមិនមែនជនជាតិយូដា។ ពេលដែលលោកយេស៊ូនិយាយដូច្នេះ មនុស្សនៅសាលាប្រជុំចាប់ផ្ដើមខឹង។ តើកូនដឹងមូលហេតុដែលពួកគេខឹងទេ?— គឺដោយសារពួកគេគិតថា មានតែពួកគេប៉ុណ្ណោះដែលព្រះឲ្យពរពិសេស។ ពួកគេគិតថា ពួកគេប្រសើរជាងមនុស្សឯទៀត។ ដូច្នេះ ពួកគេស្អប់លោកយេស៊ូដោយសារអ្វីដែលលោកនិយាយ។ តើកូនដឹងថាពួកគេខំធ្វើអ្វីដល់លោកនៅពេលនោះទេ?—
គម្ពីរប្រាប់ថា៖ ‹ពួកគេបានក្រោកឡើងចាប់លោកយកចេញក្រៅក្រុងជាប្រញាប់ ក៏បាននាំទៅចំណោតភ្នំដើម្បីបោះទម្លាក់លោកទៅក្រោមឲ្យស្លាប់! ប៉ុន្តែលោកបានគេចចេញពីកណ្ដាលពួកគេ›។—លូកា ៤:១៦-៣០
ហេតុអ្វីមនុស្សទាំងនេះព្យាយាមសម្លាប់លោកយេស៊ូ?
បើរឿងនោះកើតឡើងចំពោះកូន តើកូននឹងត្រឡប់ទៅវិញដើម្បីប្រាប់មនុស្សទាំងនោះអំពីព្រះទេ?— ដើម្បីធ្វើដូច្នោះ ត្រូវមានចិត្តក្លាហាន មែនទេ? ប៉ុន្តែកូនដឹងទេ ប្រហែលមួយឆ្នាំក្រោយមក លោកយេស៊ូបានត្រឡប់ទៅក្រុងណាសារ៉ែតវិញមែន។ គម្ពីរប្រាប់ថា៖ «លោកចាប់ផ្ដើមបង្រៀននៅក្នុងសាលាប្រជុំរបស់ពួកគេ»។ ដូច្នេះ លោកយេស៊ូមិនបានឈប់និយាយសេចក្ដីពិតដោយខ្លាចមនុស្សដែលមិនស្រឡាញ់ព្រះនោះទេ។—ម៉ាថាយ ១៣:៥៤
នៅថ្ងៃមួយផ្សេងទៀតដែលជាថ្ងៃឈប់សម្រាក លោកយេស៊ូនៅកន្លែងមួយ នៅទីនោះមានបុរសម្នាក់ដែលស្វិតដៃ។ លោកយេស៊ូមានសមត្ថភាពពីព្រះដើម្បីធ្វើឲ្យបុរសនោះជាឡើងវិញ។ ប៉ុន្តែមនុស្សខ្លះនៅទីនោះខំរករឿងលោកយេស៊ូ។ តើគ្រូដ៏ល្អប្រសើរនឹងធ្វើអ្វី?— មុនបង្អស់លោកសួរថា៖ ‹បើអ្នករាល់គ្នាមានសត្វចៀមដែលធ្លាក់ចូលរណ្ដៅនៅថ្ងៃឈប់សម្រាក តើអ្នកនឹងលើកវាចេញទេ?›។
ពួកគេប្រាកដជាលើកចៀមនោះចេញមកមែន ទោះបីថ្ងៃនោះគឺជាថ្ងៃដែលពួកគេត្រូវឈប់សម្រាកក៏ដោយ។ ដូច្នេះលោកយេស៊ូនិយាយថា៖ ‹ការជួយមនុស្សម្នាក់នៅថ្ងៃឈប់សម្រាក គឺប្រសើរជាងនោះទៅទៀត ដោយសារមនុស្សម្នាក់មានតម្លៃជាងសត្វចៀមឆ្ងាយណាស់!›។ នេះបញ្ជាក់ច្បាស់ថាលោកយេស៊ូគួរជួយបុរសនោះដោយធ្វើឲ្យគាត់ជាឡើងវិញ!
លោកយេស៊ូបានប្រាប់បុរសនោះឲ្យលាដៃ រួចភ្លាមនោះដៃរបស់គាត់ក៏ជាឡើងវិញ។ បុរសនោះច្បាស់ជាសប្បាយចិត្តណាស់! ប៉ុន្តែចុះមនុស្សទាំងប៉ុន្មានទៀត? តើពួកគេសប្បាយដែរឬទេ?— មិនមែនទេ។ ពួកគេស្អប់លោកយេស៊ូខ្លាំងជាងមុនទៅទៀត។ ពួកគេចេញទៅនិយាយគ្នាអំពីវិធីសម្លាប់លោក!—ម៉ាថាយ ១២:៩-១៤
សព្វថ្ងៃនេះក៏ដូចគ្នាដែរ។ ទោះជាយើងខំប្រឹងយ៉ាងណាក៏ដោយ យើងមិនអាចធ្វើឲ្យមនុស្សទាំងអស់ពេញចិត្តបានទេ។ ដូច្នេះ យើងត្រូវសម្រេចចិត្តថាយើងចង់ធ្វើឲ្យអ្នកណាពេញចិត្ត។ បើយើងចង់ធ្វើឲ្យព្រះយេហូវ៉ានិងលោកយេស៊ូគ្រិស្តជាបុត្រលោកពេញចិត្ត យើងត្រូវបន្តធ្វើតាមអ្វីដែលលោកបង្រៀន។ ប៉ុន្តែ បើយើងធ្វើដូច្នេះ តើអ្នកណានឹងស្អប់យើង? តើអ្នកណានឹងនាំឲ្យយើងពិបាកធ្វើអំពើល្អ?—
មេកំណាចសាថាននឹងធ្វើឲ្យយើងពិបាក។ ប៉ុន្តែតើមានអ្នកណាទៀត?— គឺអស់អ្នកដែលមេកំណាចបានបោកបញ្ឆោតឲ្យជឿអ្វីដែលខុស។ លោកយេស៊ូបានប្រាប់ពួកអ្នកដឹកនាំសាសនានៅសម័យលោកថា៖ «មេកំណាចជាឪពុករបស់អ្នករាល់គ្នា ហើយអ្នករាល់គ្នាចង់ធ្វើតាមសេចក្ដីប៉ងប្រាថ្នារបស់ឪពុកអ្នក»។—យ៉ូហាន ៨:៤៤
មានមនុស្សជាច្រើនដែលមេកំណាចចូលចិត្ត។ លោកយេស៊ូបានហៅពួកគេថា«ពិភពលោក»។ ពេលលោកយេស៊ូនិយាយអំពី«ពិភពលោក» តើកូនគិតថាលោកចង់ប្រាប់អ្វី?— ដើម្បីដឹង សូមមើលនៅយ៉ូហានជំពូកទី១៥ ខ១៩។ នៅខនោះលោកយេស៊ូប្រាប់ថា៖ «ប្រសិនបើអ្នករាល់គ្នារួមចំណែកក្នុងពិភពលោក នោះពិភពលោកនឹងស្រឡាញ់អ្នករាល់គ្នា ពីព្រោះអ្នករាល់គ្នានៅខាងគេ។ តែឥឡូវ អ្នករាល់គ្នាមិនរួមចំណែកក្នុងពិភពលោកឡើយ ហើយខ្ញុំបានជ្រើសរើសអ្នករាល់គ្នាចេញពីពិភពលោក ហេតុនេះហើយបានជាពិភពលោកស្អប់អ្នករាល់គ្នា»។
ដូច្នេះ ពិភពលោកដែលស្អប់អ្នកកាន់តាមលោកយេស៊ូ គឺជាមនុស្សទាំងអស់ដែលមិនធ្វើតាមសេចក្ដីបង្រៀនរបស់លោក។ ហេតុអ្វីពិភពលោកស្អប់អ្នកកាន់តាមលោកយេស៊ូ?— សូមកូនគិតទៅមើល តើអ្នកណាជាអ្នកគ្រប់គ្រងពិភពលោក?— គម្ពីរប្រាប់ថា៖ «ពិភពលោកទាំងមូលនៅក្រោមអំណាចរបស់មេកំណាច» មេកំណាចនោះគឺសាថាន។—យ៉ូហានទី១ ៥:១៩
ឥឡូវកូនយល់ទេ ហេតុអ្វីយើងពិបាកធ្វើអំពើល្អម្ល៉េះ?— គឺដោយសារសាថាននិងពិភពលោករបស់វាធ្វើឲ្យយើងពិបាក។ ប៉ុន្តែមានមូលហេតុមួយទៀត។ តើកូនចាំថាមូលហេតុនោះជាអ្វីទេ?— នៅជំពូកទី២៣ក្នុងសៀវភៅនេះ យើងបានរៀនថាយើងទាំងអស់គ្នាកើតមកទាំងមានភាពខុសឆ្គង។ ពេលដែលមេកំណាច ពិភពលោករបស់វា និងភាពខុសឆ្គងលែងមានទៀត យើងពិតជាសប្បាយរីករាយខ្លាំងណាស់! មែនទេ?—
ពេលដែលពិភពលោកនេះសាបសូន្យទៅ តើអ្វីនឹងកើតឡើងចំពោះមនុស្សដែលធ្វើអំពើល្អ?
ក្នុងគម្ពីរមានសេចក្ដីសន្យាថា៖ ‹ពិភពលោកនេះកំពុងឈានទៅរកការសាបសូន្យ›។ នេះមានន័យថា អស់អ្នកដែលមិនមែនជាអ្នកកាន់តាមគ្រូដ៏ល្អប្រសើរនឹងលែងមានទៀត។ ពួកគេនឹងមិនទទួលជីវិតដែលគ្មានទីបញ្ចប់ឡើយ។ តើកូនដឹងទេថាអ្នកណានឹងទទួលជីវិតដែលគ្មានទីបញ្ចប់?— គម្ពីរប្រាប់តទៅទៀតថា៖ «អ្នកណាដែលធ្វើតាមបំណងប្រាថ្នារបស់ព្រះ អ្នកនោះនឹងនៅជាប់ជារៀងរហូត»។ (យ៉ូហានទី១ ២:១៧) អ្នកដែលធ្វើអំពើល្អ គឺជាអ្នកដែលធ្វើតាម«បំណងប្រាថ្នារបស់ព្រះ»។ ដូច្នេះ មានតែពួកគេប៉ុណ្ណោះ ដែលនឹងរស់ជារៀងរហូតក្នុងពិភពលោកថ្មីរបស់ព្រះ។ ម្ល៉ោះហើយ ទោះជាពិបាកក៏ដោយ យើងចង់ធ្វើអំពើល្អ មែនទេ?—
ដើម្បីដឹងមូលហេតុដែលយើងពិបាកធ្វើអំពើល្អ សូមអានបទគម្ពីរទាំងនេះជាមួយគ្នា ម៉ាថាយ ៧:១៣, ១៤ លូកា ១៣:២៣, ២៤ និងសកម្មភាព ១៤:២១, ២២។