ភាគ១៥
ព្រះបើកបង្ហាញអនាគតដល់អ្នកប្រកាសទំនាយដែលបានត្រូវបំបរបង់
ដានីយ៉ែលប្រកាសទំនាយអំពីរាជាណាចក្ររបស់ព្រះ និងអំពីការមកដល់នៃមេស្ស៊ី។ ក្រុងបាប៊ីឡូនរលំ
ដានីយ៉ែលជាយុវជនដែលមានចិត្តស្មោះគ្រប់លក្ខណៈយ៉ាងអស្ចារ្យត្រូវគេចាប់ជាឈ្លើយយកទៅបាប៊ីឡូនមុននឹងក្រុងយេរូសាឡិមបានត្រូវបំផ្លាញចោល។ គាត់និងជនជាតិយូដាខ្លះទៀតបានត្រូវបំបរបង់ចេញពីរាជាណាចក្រយូដាដែលទទួលបរាជ័យ ហើយពួកអ្នកដែលចាប់ពួកគាត់ជាឈ្លើយបានឲ្យពួកគាត់មានសេរីភាពមួយកម្រិត។ ក្នុងអំឡុងពេលរស់នៅយ៉ាងយូរឯបាប៊ីឡូន ដានីយ៉ែលបានទទួលពរយ៉ាងច្រើនពីព្រះ គឺបានរួចជីវិតពីរូងសិង្ហ ហើយព្រះបើកបង្ហាញឲ្យគាត់ឃើញក្នុងគំនិតនូវព្រឹត្ដិការណ៍នាអនាគតដ៏វែងឆ្ងាយទៀតផង។ ទំនាយដ៏សំខាន់បំផុតរបស់ដានីយ៉ែលសំដៅទៅមេស្ស៊ី និងការគ្រប់គ្រងរបស់លោក។
ដានីយ៉ែលបានទទួលដំណឹងស្តីអំពីពេលដែលមេស្ស៊ីនឹងមក។ ដានីយ៉ែលបានត្រូវប្រាប់ថា «អ្នកដែលចាក់ប្រេងតាំងនោះ គឺជាអ្នកដែលជាកំពូលបណ្ដាច់»នឹងមកដល់៦៩អាទិត្យដែលជាឆ្នាំ ក្រោយពីសេចក្ដីបង្គាប់ឲ្យជួសជុលនិងសង់កំពែងក្រុងយេរូសាឡិមឡើងវិញ។ មួយអាទិត្យធម្មតាមាន៧ថ្ងៃ ដូច្នេះមួយអាទិត្យដែលជាឆ្នាំស្មើនឹង៧ឆ្នាំវិញ។ សេចក្ដីបង្គាប់នោះបានចេញយូរក្រោយពីសម័យដានីយ៉ែល ពោលគឺនៅឆ្នាំ៤៥៥ មុនគ.ស.។ ដូច្នេះ ៦៩«អាទិត្យ»ស្មើនឹង៤៨៣ឆ្នាំ។ ប្រសិនបើយើងរាប់៤៨៣ឆ្នាំចាប់ពីឆ្នាំ៤៥៥ មុនគ.ស. នោះយើងមកដល់ឆ្នាំ២៩ គ.ស.។ យើងនឹងឃើញមានអ្វីកើតឡើងនៅឆ្នាំ២៩ គ.ស. នោះ ពេលយើងពិនិត្យមើលផ្នែកបន្ទាប់ក្នុងសៀវភៅនេះ។ ដានីយ៉ែលក៏បានឃើញថាមេស្ស៊ីនឹងត្រូវ«ផ្ដាច់ចេញវិញ» ឬប្រហារជីវិតដើម្បីឲ្យធួននឹងភាពខុសឆ្គង។—ដានីយ៉ែល ៩:២៤-២៦
មេស្ស៊ីនឹងក្លាយជាស្តេចនៅស្ថានសួគ៌។ ព្រះបើកបង្ហាញអ្វីដ៏អស្ចារ្យមួយឲ្យដានីយ៉ែលបានឃើញក្នុងគំនិត។ គាត់ឃើញស្ថានសួគ៌ ហើយមេស្ស៊ីដែលបានត្រូវពណ៌នាថាជា«១អង្គដូចជាមនុស្សជាតិ»ចូលមកជិតបល្ល័ង្ករបស់ព្រះយេហូវ៉ា។ ព្រះយេហូវ៉ាប្រគល់ឲ្យលោកនូវ«អំណាចគ្រប់គ្រង នឹងសិរីល្អ ព្រមទាំងឲ្យមានរាជ្យ[រាជាណាចក្រ]ផង»។ រាជាណាចក្រនោះនឹងនៅស្ថិតស្ថេរជារៀងរហូត។ ដានីយ៉ែលក៏បានដឹងព័ត៌មានដ៏គួរឲ្យរំភើបចិត្តមួយទៀតអំពីរាជាណាចក្រនៃមេស្ស៊ី ពោលគឺស្តេចនោះនឹងមានពួកអ្នកឯទៀតគ្រប់គ្រងជាមួយនឹងលោក ជាក្រុមមួយដែលត្រូវហៅថាជា«ពួកបរិសុទ្ធនៃព្រះដ៏ខ្ពស់បំផុត»។—ដានីយ៉ែល ៧:១៣, ១៤, ២៧
រាជាណាចក្ររបស់ព្រះនឹងបំផ្លាញចោលរដ្ឋាភិបាលទាំងឡាយនៃពិភពលោកនេះ។ ព្រះបានឲ្យដានីយ៉ែលនូវសមត្ថភាពបកស្រាយសុបិនដែលធ្វើឲ្យស្តេចនៃជនជាតិបាប៊ីឡូនឈ្មោះនេប៊ូក្នេសាច្របូកច្របល់ក្នុងចិត្ត។ ស្តេចឃើញរូបមួយដែលធំសម្បើមមានក្បាលជាមាស ដើមទ្រូងនឹងដៃជាប្រាក់ ពោះនឹងភ្លៅជាលង់ហិន ជើងជាដែក ហើយប្រអប់ជើងជាដែកលាយនឹងដីឥដ្ឋ។ មានថ្មមួយដាប់ផ្ដាច់ចេញពីភ្នំបានមកទង្គិចត្រូវរូបនោះត្រង់ប្រអប់ជើងដែលធ្វើពីដែកនិងដីឥដ្ឋ ក៏បំបាក់បំបែករូបនោះខ្ទេចខ្ទីអស់។ ដានីយ៉ែលបានពន្យល់ថាផ្នែកផ្សេងៗនៃរូបនោះតំណាងមហាអំណាចពិភពលោកដែលកើតឡើងជាបន្តបន្ទាប់គ្នាយ៉ាងយូរ ចាប់ពីបាប៊ីឡូនដែលជាក្បាលដែលធ្វើពីមាស។ ដានីយ៉ែលបានឃើញជាមុនថាក្នុងគ្រានៃការគ្រប់គ្រងចុងក្រោយបង្អស់របស់ពួកមហាអំណាចនៃពិភពលោកដ៏អាក្រក់នេះ រាជាណាចក្ររបស់ព្រះនឹងចាត់វិធានការ។ រាជាណាចក្ររបស់ព្រះនឹងកម្ទេចចោលរដ្ឋាភិបាលទាំងអស់ក្នុងពិភពលោកនេះ។ រួចមក រាជាណាចក្ររបស់ព្រះនឹងគ្រប់គ្រងជារៀងរហូត។—ដានីយ៉ែល ជំពូកទី២
ដានីយ៉ែលដែលមានអាយុចាស់ណាស់ រស់រហូតដល់បានឃើញបាប៊ីឡូនត្រូវរលំ។ ស្តេចស៊ីរូសបានច្បាំងឈ្នះក្រុងនោះដូចពួកអ្នកប្រកាសទំនាយរបស់ព្រះបានទាយទុកមែន។ មិនយូរក្រោយមក នៅទីបំផុត ជនជាតិយូដាបានត្រូវដោះលែងពីការបំបរបង់ នៅចំពេលដែលគ្រា៧០ឆ្នាំបានចប់ ពោលគឺ ក្រោយពីស្រុកកំណើតទទួលការបំផ្លិចបំផ្លាញអស់៧០ឆ្នាំដូចបានទាយទុកជាមុន។ ក្រោមការដឹកនាំនៃពួកអភិបាលខេត្ត ពួកសង្ឃនិងពួកអ្នកប្រកាសទំនាយដ៏ស្មោះត្រង់ នៅទីបំផុត ជនជាតិយូដាបានសង់ក្រុងយេរូសាឡិមនិងវិហាររបស់ព្រះយេហូវ៉ាឡើងវិញ។ ប៉ុន្តែ តើនឹងមានអ្វីកើតឡើងនៅទីបញ្ចប់នៃ៤៨៣ឆ្នាំនោះ?
—មានមូលដ្ឋានលើសៀវភៅដានីយ៉ែល។