«យើងទាំងអស់មកពីគ្រួសារតែមួយ»
ក្នុងរយៈពេលថ្មីៗនេះ ការប្រកាន់ពូជសាសន៍និងសាសនាបានរាលដាលពាសពេញផែនដី។ ការប្រកាន់បក្សពួកអាណិកជនបានបណ្ដាលឲ្យមានការកាប់សម្លាប់គ្នា ការធ្វើទារុណកម្ម និងអំពើឃោរឃៅដ៏អាក្រក់ឯទៀត។ យោងទៅតាមរបាយការណ៍មួយពីអង្គការមនុស្សធម៌អន្តរជាតិ ការរំលោភលើសិទ្ធិមនុស្សបានបង្ខំមនុស្សជាង២៣លាននាក់នៅជុំវិញផែនដី ឲ្យភៀសខ្លួនចេញពីទីលំនៅរបស់គេក្នុងឆ្នាំ១៩៩៤។
គ្រាន់តែនៅក្នុងប្រទេសរ្វ៉ាន់ដា មនុស្សប្រមាណ៥០០.០០០នាក់ត្រូវបានគេសម្លាប់ចោល ហើយជាង២.០០០.០០០នាក់ទៀតបានក្លាយទៅជាជនភៀសខ្លួន ក្រោយពីអំពើឃោរឃៅបានផ្ទុះឡើងរវាងពួកធុត្ស៊ីនិងពួកហ៊ុតធូ។ សារពត៌មានសាសន៍បែលហ្ស៊ិក លើស្វារ៍ បានរាយការណ៍ថា៖ «ស្មរបន្ទាល់ព្រះយេហូវ៉ាត្រូវបានគេធ្វើទុកបៀតបៀនណាស់ ដោយសារពួកគេមិនព្រមទទួលកាន់អាវុធ»។ ស្មរបន្ទាល់ព្រះយេហូវ៉ាមិនចូលរួបរួមក្នុងចំបាំងឡើយ។ ទោះជាយ៉ាងនេះក្ដី ពួកគេរាប់រយនាក់បានស្លាប់ដោយសារតែអំពើឃោរឃៅ។ នេះធ្វើឲ្យយើងនឹកឃើញដល់ពាក្យរបស់ព្រះយេស៊ូ ដែលទ្រង់បានមានបន្ទូលទៅពួកសិស្សរបស់ទ្រង់ថា៖ «អ្នករាល់គ្នាមិនមែនជារបស់ផងលោកីយ . . . នោះបានជាលោកីយស្អប់អ្នករាល់គ្នា»។—យ៉ូហាន ១៥:១៩
ស្មរបន្ទាល់មួយគ្រួសារ—ប្ដីឈ្មោះយូជិន ធ្នែបណាណា ប្រពន្ធនិងកូនពីរនាក់របស់គាត់—រស់នៅក្នុងរដ្ឋធានីឃីហ្គាលី។ ជាអ្នកបំរើពេញពេលនៃស្មរបន្ទាល់ព្រះយេហូវ៉ា យូជិនតែងតែពន្យល់ប្រាប់អ្នកជិតខាងរបស់គាត់អំពីអព្យាក្រឹតភាពគ្រីស្ទាន។ (ម៉ាថាយ ២២:២១) គាត់តែងតែលើកយករុក្ខជាតិម្យ៉ាងមួយមកនិយាយ ដែលមានសណ្ឋានដូចវល្លិ ដែលសម្បូរមានក្នុងអាកាសធាតុក្ដៅល្មម។
យូជិនពន្យល់ថា «នៅក្នុងឃីហ្គាលីនេះ រុក្ខជាតិនេះដុះចេញផ្កាជាច្រើនពណ៌ មានពណ៌ក្រហម ពណ៌ផ្កាឈូក និងជួនកាលមានផ្កាពណ៌សដែរ។ ហើយផ្កាទាំងអស់នេះចេញមកពីពូជតែមួយ។ ចំពោះមនុស្សលោកក៏ដូចនេះដែរ។ ថ្វីបើយើងមានពូជសាសន៍ សម្បុរ ឬ ប្រវត្ដិត្រកូលខុសៗគ្នា យើងទាំងអស់មកពីគ្រួសារតែមួយ គឺគ្រួសារមនុស្សជាតិ»។
គួរឲ្យខ្លោចផ្សាណាស់ ថ្វីបើពួកគេមានលក្ខណៈស្លូតបូត និងកាន់ជំហរអព្យាក្រឹតក្ដី គ្រួសារលោកធ្នែបណាណាត្រូវបានពួកបង្ហូរឈាមសម្លាប់ចោលអស់។ យ៉ាងណាក្ដី ពួកគេបានស្លាប់ដោយស្មោះត្រង់។ យើងអាចដឹងជាប្រាកដថាព្រះយេហូវ៉ាទ្រង់នឹងបំពេញកិច្ចសន្យារបស់ទ្រង់ចំពោះមនុស្សបែបនេះ ហើយពួកគេនឹងមានជីវិតរស់ឡើងវិញក្នុងពិភពលោកដែលនឹងគ្មានការប្រកាន់ទៀតឡើយ។ (កិច្ចការ ២៤:១៥) បន្ទាប់មក គ្រួសារលោកធ្នែបណាណានិងអ្នកឯទៀតនឹង«បានចិត្តរីករាយដោយសេចក្ដីក្សេមក្សាន្តដ៏បរិបូរ»។—ទំនុកដំកើង ៣៧:១១