អត្ថបទអំពីក្របទស្សនាវដ្ដី | តើទីបញ្ចប់ជិតមកដល់ឬ?
មនុស្សជាច្រើននឹងរួចរស់ជីវិតនៅទីបញ្ចប់ អ្នកក៏អាចដែរ
គម្ពីររៀបរាប់ថានៅទីបញ្ចប់នឹងរួមបញ្ចូលការបំផ្លិចបំផ្លាញ ដោយចែងថា៖ «នឹងមានទុក្ខវេទនាជាខ្លាំង ដែលមិនធ្លាប់មានតាំងពីកំណើតពិភពលោករហូតដល់ឥឡូវនេះ . . . តាមការពិត ប្រសិនបើព្រះមិនកាត់បន្ថយគ្រានោះឲ្យខ្លីទេ គ្មានអ្នកណានឹងត្រូវសង្គ្រោះឡើយ»។ (ម៉ាថាយ ២៤:២១, ២២) ប៉ុន្តែ ព្រះសន្យាថាមនុស្សជាច្រើននឹងរួចរស់ជីវិត។ បណ្ដាំរបស់ព្រះចែងថា៖ «ពិភពលោកនេះ . . . កំពុងឈានទៅរកការសាបសូន្យ ប៉ុន្តែអ្នកណាដែលធ្វើតាមបំណងប្រាថ្នារបស់ព្រះ អ្នកនោះនឹងនៅជាប់ជារៀងរហូតវិញ»។—យ៉ូហានទី១ ២:១៧
បើលោកអ្នកចង់ទទួលសេចក្ដីសង្គ្រោះហើយ«នៅជាប់ជារៀងរហូត» ពេលពិភពលោកនេះឈានទៅរកការសាបសូន្យ តើលោកអ្នកគួរធ្វើអ្វី? តើលោកអ្នកគួរស្តុកស្បៀងអាហារឬគ្រឿងសម្ភារៈផ្សេងៗជាច្រើនឬទេ? មិនមែនទេ។ គម្ពីរលើកទឹកចិត្តយើងឲ្យចាត់ទុកចំណងមិត្តភាពជាមួយនឹងព្រះយេហូវ៉ាថាសំខាន់ជាង។ យើងអានក្នុងគម្ពីរថា៖ «ដូច្នេះ ដោយសារការទាំងអស់នោះនឹងត្រូវរំលាយសាបសូន្យទៅ ចូរពិចារណាថា អ្នករាល់គ្នាគួរជាមនុស្សប្រភេទណា។ អ្នករាល់គ្នាគួរជាមនុស្សដែលមានការប្រព្រឹត្តបរិសុទ្ធ ហើយធ្វើការអ្វីដែលបង្ហាញពីភក្ដីភាពចំពោះព្រះ ដោយទន្ទឹងហើយចាំជាប់ជានិច្ចនូវការមកដល់នៃថ្ងៃរបស់ព្រះយេហូវ៉ា»។ (ពេត្រុសទី២ ៣:១០-១២) ខមុននិងខក្រោយនៃបទគម្ពីរនេះបង្ហាញថា«ការទាំងអស់នោះ»ដែលនឹងត្រូវរំលាយសាបសូន្យទៅ រួមបញ្ចូលការគ្រប់គ្រងនៃពិភពលោកដ៏អាក្រក់នេះ និងអស់អ្នកដែលគាំទ្រការគ្រប់គ្រងនេះជាជាងគាំទ្រការគ្រប់គ្រងរបស់ព្រះ។ ហេតុនេះ យើងយល់ច្បាស់ថាការស្តុកស្បៀងអាហារឬគ្រឿងសម្ភារៈផ្សេងៗនឹងមិនអាចសង្គ្រោះយើងពីការបំផ្លាញចោលឡើយ។
មែនហើយ ដើម្បីរួចរស់ជីវិត យើងត្រូវធ្វើជាមនុស្សស្មោះត្រង់ចំពោះព្រះយេហូវ៉ា ហើយរៀនឲ្យដឹងថាការប្រព្រឹត្តណាខ្លះដែលលោកពេញចិត្ត។ (សេផានា ២:៣) យើងមិនចង់ធ្វើតាមមនុស្សទូទៅទេ តែយើងចង់យកចិត្តទុកដាក់ចំពោះសញ្ញាសម្គាល់យ៉ាងច្បាស់ដែលថាយើងកំពុងរស់នៅគ្រាដ៏សំខាន់ណាស់ ថែមទាំងយើងត្រូវ«ទន្ទឹងហើយចាំជាប់ជានិច្ចនូវការមកដល់នៃថ្ងៃរបស់ព្រះយេហូវ៉ា»។ សាក្សីព្រះយេហូវ៉ាអាចបង្ហាញលោកអ្នកពីគម្ពីរអំពីរបៀបដែលលោកអ្នកអាចទទួលសេចក្ដីសង្គ្រោះនៅពេលថ្ងៃរបស់ព្រះមកដល់។