ឯកសិទ្ធិមួយដែលពួកយុវជនអាចទទួលបាន
១ មនុស្សច្រើននាក់ដែលជាមាតាបិតាឥឡូវ អាចនឹកចាំដោយអារម្មណ៍សប្បាយនូវឯកសិទ្ធិមួយដែលពួកគេបានមាន ពេលគេនៅក្មេងហើយកំពុងតែត្រូវចិញ្ចឹមអប់រំក្នុងសេចក្ដីពិត។ ឯកសិទ្ធិនោះគឺជាសកម្មភាពនៅថ្ងៃចែកទស្សនាវដ្ដី។ សកម្មភាពនោះបានត្រូវរៀបចំក្នុងក្រុមជំនុំទាំងអស់នៅឆ្នាំ១៩៤៩។ មួយថ្ងៃក្នុងមួយសប្ដាហ៍ មនុស្សទាំងអស់គ្នាត្រូវបានប្រមូលអារម្មណ៍ទៅលើការចែកទស្សនាវដ្ដីប៉មយាម និងភ្ញាក់រឭក តាមថ្នល់ ពីផ្ទះមួយទៅផ្ទះមួយ តាមហាង និងតាមវិធីផ្សេងទៀត។ ក្មេងៗជាអ្នកផ្សាយធ្លាប់ទន្ទឹងចាំដោយចិត្តរំភើបនូវការចូលរួមក្នុងកិច្ចការនេះ ពីព្រោះនោះបានហុចឲ្យគេនូវឱកាសមួយដើម្បីចូលរួមសកម្មភាពជាមួយអ្នកពេញវ័យក្នុងក្រុមជំនុំ។ តើអ្នកធ្លាប់មានអារម្មណ៍អ៊ីចឹងទេ ពេលដែលអ្នកនៅក្មេង?
២ ជួយកូនៗរបស់អ្នកឲ្យចូលរួម: ក្មេងតូចៗដែលមិនអាចចាប់ផ្ដើមការពិភាក្សាអំពីព្រះគម្ពីរពេលជួបគេនៅផ្ទះ នៅតែអាចស្នើផ្ដល់ទស្សនាវដ្ដី។ ការធ្វើអ៊ីចឹងតម្រូវឲ្យរៀននិយាយពាក្យសម្ដែងមួយ ដែលមានតែឃ្លាខ្លីៗពីរបី។ ការពន្យល់យ៉ាងខ្លីនូវរូបភាពនៅក្របប្រហែលជាគ្រប់គ្រាន់។ ម្ចាស់ផ្ទះជាច្រើនទទួលទស្សនាវដ្ដីពីក្មេងៗដោយមិនទើសទាល់ ថែមទាំងជាញឹកញាប់សរសើរភាពស្មោះត្រង់និងចរិយាល្អរបស់ក្មេងៗនេះផងដែរ។ ដោយមានជំនួយបន្ដិចបន្តួច កិច្ចបំរើនេះគឺជាអ្វីមួយដែលក្មេងៗអាចធ្វើបានល្អប្រសើរ ទាំងផ្ដល់ជំនួយដ៏មានប្រយោជន៍ចំពោះការផ្សព្វផ្សាយសារព្រះរាជាណាចក្រ។ ពិតមែន ពេលដែលក្មេងៗធំឡើង នោះមាតាបិតារបស់គេចង់ជួយគេមានជំនឿនជាបន្តបន្ទាប់ ក្នុងការបណ្ដុះបណ្ដាលការប៉ិនប្រសប់របស់គេខាងការធ្វើបន្ទាល់។
៣ ម៉ាញូវអែល បានចាប់ផ្ដើមផ្សព្វផ្សាយពីផ្ទះមួយទៅផ្ទះមួយពេលគាត់អាយុ៣ឆ្នាំ។ មាតាបិតារបស់គាត់បានបង្រៀនគាត់ឲ្យទន្ទេញចាំការនិយាយសម្ដែងខ្លីមួយ។ គាត់ផ្សព្វផ្សាយជាមួយនឹងគេយ៉ាងខ្នះខ្នែងដោយផ្ដល់ឲ្យទស្សនាវដ្ដី សៀវភៅស្តើង និងខិត្តប័ណ្ណ។ គាត់ក៏ផ្សព្វផ្សាយក្រៅផ្លូវការដែរ។ នៅពេលមួយ ពេលមាតាបិតារបស់គាត់បានជូនគាត់ទៅសួនច្បារដើរលេង នោះគាត់បានចាប់ផ្ដើមចែកខិត្តប័ណ្ណដល់អ្នកឯទៀតនៅទីនោះ។ ទោះបីគាត់នៅក្មេងខ្ចី ចិត្តរំភើបរបស់ម៉ាញូវអែលចំពោះកិច្ចបំរើ គឺជាប្រភពមួយនៃសេចក្ដីលើកទឹកចិត្តពិតប្រាកដដល់មាតាបិតារបស់គាត់ ព្រមទាំងដល់ក្រុមជំនុំផង។—សុភាសិត ២២:៦
៤ ក្នុងប្រក្រតិទិនស្មរបន្ទាល់ព្រះយេហូវ៉ាសំរាប់ឆ្នាំ២០០០ រៀងរាល់ថ្ងៃសៅរ៍ត្រូវកំណត់ជា«ថ្ងៃចែកទស្សនាវដ្ដី»។ មាតាបិតាអើយ យើងសូមជូនយោបល់ថា អ្នកគួរចាប់អារម្មណ៍សារជាថ្មីទៅលើកិច្ចការនេះ ទាំងជួយកូនៗរបស់អ្នកចូលរួមជាទៀងទាត់ តាមតែលទ្ធភាពក្នុងឯកសិទ្ធិកិច្ចបំរើនេះ។