កិច្ចប្រជុំមានប្រយោជន៍ដល់យុវជន
១ យុវនារីម្នាក់បានមានប្រសាសន៍ថា៖ «ជួនកាល ខ្ញុំគិតថាយុវជនមានជីវិតពិបាកជាងគេ។ យើងនៅក្នុងចំណោមមនុស្សដែលធ្វើសហាយស្មន់ ប្រើថ្នាំញៀន និងផឹកស្រា»។ តើអ្នកមានអារម្មណ៍អ៊ីចឹងឬទេ? បើអ៊ីចឹងមែន តើអ្វីដែលអ្នកគិតថា អាចជួយអ្នកទប់ទល់នឹងអានុភាពអាក្រក់ទាំងនេះ? អ្នកត្រូវការជំនឿ។ គឺជាជំនឿដ៏ខ្លាំងមែនទែន ដោយជឿថាផ្លូវរបស់ព្រះយេហូវ៉ាគឺសុទ្ធតែត្រឹមត្រូវទាំងអស់ ពីព្រោះបើសិនជាគ្មានជំនឿអ៊ីចឹងទេ នោះ«មិនអាចនឹងគាប់ដល់ព្រះហឫទ័យព្រះបានឡើយ»។ (ហេព្រើរ ១១:៦) ការចូលរួមកិច្ចប្រជុំក្រុមជំនុំ នឹងជួយពង្រឹងនិងពង្រីកជំនឿគ្រីស្ទានរបស់អ្នក ហើយថែមទាំងជួយពង្រឹងការតាំងចិត្តរបស់អ្នកឲ្យជៀសវាងអំពើអាក្រក់។
២ កិច្ចប្រជុំមានប្រយោជន៍ច្រើនយ៉ាង: តើអ្វីដែលធ្វើឲ្យការបរិភោគម្ហូបឈ្ងុយឆ្ងាញ់ជាមួយពួកម៉ាកជិតស្និទ្ធទៅជាអ្វីដ៏សប្បាយ? តើមិនមែនជាម្ហូបដែលធ្វើឲ្យមានសុខភាពល្អ និងពួកម៉ាកល្អក្នុងបរិយាកាសមួយដែលអនុញ្ញាតឲ្យយើងសំរាកទេឬអី? អ៊ីចឹង កិច្ចប្រជុំរបស់យើងផ្ដល់នូវឱកាសឲ្យមានអារម្មណ៍ដូច្នេះដែរ ក៏ប៉ុន្តែ ក្នុងន័យខាងវិញ្ញាណ។
៣ អ្វីដែលត្រូវពិភាក្សានៅឯប្រជុំ គឺជាអ្វីដែលស្អាងចិត្ត ចាប់ពីរឿងទាក់ទងនឹងបញ្ហាធម្មតានៃជីវិត រហូតដល់ការសិក្សាបទទំនាយព្រះគម្ពីរដែលគួរឲ្យចាប់អារម្មណ៍។ ការណែនាំដែលមានប្រយោជន៍ត្រូវផ្ដល់ឲ្យ ដែលបង្រៀនអ្នកឲ្យមានជីវភាពរស់នៅតាមរបៀបដ៏ល្អបំផុត និងរបៀបឈ្នះលើបញ្ហាដែលអ្នកនឹងប្រឈមមុខ។ ពួកម៉ាកដែលយើងរកបាននៅឯកិច្ចប្រជុំ គឺជាពួកម៉ាកល្អបំផុតដែលអាចត្រូវរកឃើញបាន និងបរិយាកាសខាងវិញ្ញាណនោះគឺស្រួលនិងមានសុវត្ថិភាពទៀតផង។ (ទំនុកដំកើង ១៣៣:១) មិនគួរឲ្យឆ្ងល់ទេដែលយុវនារីម្នាក់បាននិយាយថា៖ «ខ្ញុំទៅរៀនពេញមួយថ្ងៃ ហើយការនោះពង្រីងកម្លាំងចិត្តរបស់ខ្ញុំ។ ក៏ប៉ុន្តែការប្រជុំគឺប្រៀបដូចជាទីដែលមានដើមឈើ និងមានទឹកក្នុងវាលខ្សាច់ ជាកន្លែងដែលខ្ញុំទទួលកម្លាំងវិញដើម្បីស៊ូទ្រាំនៅថ្ងៃបន្ទាប់នៅសាលា»។ យុវនារីម្នាក់ទៀតក៏និយាយថា៖ «ខ្ញុំឃើញថា ការសេពគប់យ៉ាងជិតស្និទ្ធជាមួយអ្នកឯទៀតដែលស្រឡាញ់ព្រះយេហូវ៉ា ជួយខ្ញុំឲ្យនៅជិតស្និទ្ធនឹងទ្រង់»។
៤ ដោយចុះឈ្មោះខាងសាលាកិច្ចបំរើព្រះធិបតេយ្យ នោះអ្នករៀនចេះប្រមូលពត៌មានពីព្រះគម្ពីរ រៀបចំពត៌មាននោះជាបែបសុន្ទរកថា និងថ្លែងពត៌មាននោះតាមរបៀបសន្ទនាដល់ពួកអ្នកស្ដាប់នៅសាលព្រះរាជាណាចក្រ។ សូមនឹកគិតពីប្រយោជន៍ដែលមកពីការបង្ហាត់ឲ្យចេះបង្រៀនយ៉ាងស្ទាត់ជំនាញនូវសេចក្ដីពិតដែលមានក្នុងព្រះបន្ទូលរបស់ព្រះ! តើមានកន្លែងណាផ្សេងទេ ដែលយុវជនអាចទទួលនូវការបង្ហាត់បង្រៀនដែលមានតម្លៃដូចនេះបាន?
៥ របៀបទទួលប្រយោជន៍ឲ្យច្រើនបំផុតពីកិច្ចប្រជុំ: ការទទួលប្រយោជន៍ជាច្រើនបំផុតពីកិច្ចប្រជុំ រួមបញ្ចូលអ្វីបីយ៉ាងសំខាន់ដែលលះចោលមិនបាន។ ទាំងនេះគឺជា ការរៀបចំ ការចូលរួម និងការហាត់ធ្វើ។
៦ រៀបចំសំរាប់កិច្ចប្រជុំ: ឆ្លៀតពេលជាទៀងទាត់ ដើម្បីរៀបចំសំរាប់កិច្ចប្រជុំ។ កុំឲ្យកិច្ចការពីសាលា ការងារធ្វើបន្ដិចបន្តួច ឬក៏ការកំសាន្តលួចយកពេលវេលាដែលអ្នកត្រូវការដើម្បីសើរើជាមុននូវពត៌មានដែលនឹងត្រូវពិគ្រោះនៅឯកិច្ចប្រជុំនិមួយៗឲ្យសោះ។ ការមានរបៀបរបបល្អ មានប្រយោជន៍។ មុនបង្អស់និងសំខាន់បំផុតគឺជាការអានឲ្យទាន់នូវអំនានព្រះគម្ពីរប្រចាំសប្ដាហ៍សំរាប់សាលាកិច្ចបំរើព្រះធិបតេយ្យ។ នេះតម្រូវឲ្យចំណាយតែពីរបីនាទីរៀងរាល់ថ្ងៃដើម្បីអាននិងរំពឹងគិតពីជំពូកទាំងប៉ុន្មានដែលត្រូវបានកំណត់ឲ្យ។ ចូរឆ្លៀតពេលដើម្បីរៀបចំសំរាប់ការសិក្សាសៀវភៅតាមក្រុមជំនុំ និងការសិក្សាទស្សនាវដ្ដីប៉មយាម។ អ្នកខ្លះធ្វើអ៊ីចឹងប្រហែលជាមួយថ្ងៃឬក៏ពីរថ្ងៃយ៉ាងតិចមុនប្រជុំទាំងនោះ។ ទៅតាមលទ្ធភាព ចូររៀបចំដូច្នេះដែរនូវចំណែកផ្សេងៗសំរាប់ការប្រជុំអប់រំកិច្ចបំរើផងដែរ។
៧ ចូលរួមក្នុងកិច្ចប្រជុំ: ព្រះគម្ពីររៀបរាប់ថា ពេលដែលព្រះយេស៊ូមានព្រះជន្មាយុ១២ឆ្នាំ នោះគេបានរកឃើញទ្រង់នៅក្នុងព្រះវិហារទាំងស្ដាប់ ហើយសួរនិងឆ្លើយសំនួរ។ (លូកា ២:៤៦, ៤៧) បើនិយាយជារួម ទ្រង់បានចូលរួមយ៉ាងពេញលេញ។ អ្នកនឹងទទួលប្រយោជន៍ច្រើនជាងពីកិច្ចប្រជុំ ពេលអ្នកខិតខំចូលរួម។—សុភាសិត ១៥:២៣
៨ អ្នកត្រូវតែផ្ចង់ចិត្តប្រុងស្មារតីនឹងអ្វីដែលរៀននៅកិច្ចប្រជុំ។ ជួនកាល ការស្ដាប់សុន្ទរកថាមួយគឺពិបាកជាងការថ្លែងសុន្ទរកថាមួយទៅទៀត។ ហេតុអ្វី? ពីព្រោះអារម្មណ៍របស់អ្នកអាចទៅជារវើរវាយអណ្ដែតអណ្ដូង ពេលអ្នកផ្សេងកំពុងតែនិយាយ។ តើយើងធ្វើដូចម្ដេចដើម្បីទប់ទល់នឹងបញ្ហានេះ? ដោយកត់កំណត់សរសេរ។ កត់ទុកចំណុចសំខាន់ៗដែលអ្នកចង់សើរើពេលក្រោយ។ ការកត់កំណត់សរសេរនឹងជួយអ្នកប្រុងស្មារតីទៅលើកម្មវិធី។ បន្ថែមទៅទៀត ចូរបើកមើលបទគម្ពីរនិងមើលតាមពេលអ្នកថ្លែងកំពុងតែអាន។
៩ មួយទៀត ចូរយកជាគោលដៅនូវការចូលរួមក្នុងការពិគ្រោះតាមរយៈសំនួរនិងចម្លើយដែលមាននៅកិច្ចប្រជុំនិមួយៗ។ អ្នកនឹងទទួលប្រយោជន៍កាន់តែច្រើន បើសិនជាអ្នកគិតឲ្យបានហ្មត់ចត់ពីអ្វីដែលអ្នកចង់និយាយ។ សុភាសិត ១៥:២៨ ចែងប្រាប់ថា៖ «ចិត្តរបស់មនុស្សសុចរិតរំពឹងគិតជាមុន ទើបឆ្លើយ»។
១០ អនុវត្តតាមអ្វីដែលអ្នករៀន: ជំហានចុងក្រោយ គឺធ្វើឲ្យប្រាកដថាអ្វីដែលអ្នករៀន‹កំពុងតែបង្កើតផលក្នុងអ្នក›។ (ថែស្សាឡូនីចទី១ ២:១៣) ពេលដែលអ្នកអនុវត្តតាមចំណុចល្អៗដែលអ្នករៀននៅឯកិច្ចប្រជុំនិមួយៗ នោះអ្នកនឹងចូលជិតស្និទ្ធជាងនឹងព្រះយេហូវ៉ា។ ទ្រង់នឹងទៅជាបុគ្គលពិតប្រាកដចំពោះអ្នក ហើយអ្នកនឹងមានអំណរនិងពេញចិត្តជាខ្លាំង ពេលអ្នក«កំពុងតែប្រព្រឹត្តតាមសេចក្ដីពិត»ទាំងធ្វើឲ្យសេចក្ដីពិតនោះជាជំនឿរបស់អ្នកផ្ទាល់។—យ៉ូហានទី៣ ៤
១១ បងប្អូនប្រុសស្រីអើយ! ពេលអ្នករៀបចំជាទៀងទាត់សំរាប់កិច្ចប្រជុំ ចូលរួមក្នុងកិច្ចប្រជុំ និងអនុវត្តតាមអ្វីដែលអ្នកបានរៀន នោះអ្នកនឹងអរសប្បាយពេញកំរិតនឹងកិច្ចប្រជុំ។ ទន្ទឹមគ្នានេះ អ្នកនឹងទទួលប្រយោជន៍ដ៏ច្រើនបំផុតដែលអ្នកអាចទទួលបានពីកិច្ចប្រជុំ។ ជំនឿរបស់អ្នកនឹងត្រូវបានពង្រឹងឡើង ថែមទាំងជួយក្នុងការប្ដេជ្ញាចិត្តរបស់អ្នកដើម្បីនៅស្មោះត្រង់នឹងព្រះវរបិតារបស់អ្នកដែលគង់នៅស្ថានសួគ៌ ជាព្រះយេហូវ៉ា។—ទំនុកដំកើង ១៤៥:១៨