ចូរយកចិត្តទុកដាក់យ៉ាងស្មោះចំពោះអ្នកឯទៀតដោយក្ដីសប្បុរស
១ ដោយនឹកឃើញពេលជួបជាមួយបងស្រីម្នាក់ជាស្មរបន្ទាល់ព្រះយេហូវ៉ានៅលើកដំបូងនោះ ស្ត្រីម្នាក់ដែលធ្លាប់ប្រកាន់មិនចង់និយាយជាមួយស្មរបន្ទាល់បានមានប្រសាសន៍ថា៖ «ខ្ញុំពិតជាមិនចាំថាយើងបានពិភាក្សាអំពីអ្វីទេ ប៉ុន្តែអ្វីដែលខ្ញុំចាំគឺថាគាត់សប្បុរសចំពោះខ្ញុំនិងរាក់ទាក់ហើយរាបសាណាស់។ គាត់ពិតជាបុគ្គលដែលខ្ញុំមានអារម្មណ៍ចង់ជិតស្និទ្ធជាមួយ»។ សំដីនេះគូសបញ្ជាក់សារៈសំខាន់នៃការយកចិត្តទុកដាក់យ៉ាងស្មោះចំពោះអស់អ្នកដែលយើងជួបក្នុងកិច្ចផ្សព្វផ្សាយ។—ភី. ២:៤
២ សេចក្ដីស្រឡាញ់តែងតែសប្បុរស: របៀបមួយដែលយើងអាចសំដែងសេចក្ដីស្រឡាញ់ចំពោះអ្នកឯទៀតគឺដោយបង្ហាញចិត្តសប្បុរស។ (១កូ. ១៣:៤) មនុស្សសប្បុរសយកចិត្តទុកដាក់យ៉ាងខ្លាំងចំពោះសុខុមាលភាពនៃអ្នកឯទៀតដោយព្យាយាមធ្វើអ្វីដែលមានប្រយោជន៍ដល់ពួកគេ។ ប្រាកដហើយ កិច្ចការផ្សព្វផ្សាយគឺជាទង្វើបង្ហាញពីចិត្តសប្បុរស។ ប៉ុន្តែយើងមិនគ្រាន់តែបង្ហាញការយកចិត្តទុកដាក់ដ៏ស្មោះចំពោះមនុស្សដោយផ្សព្វផ្សាយដល់ពួកគេប៉ុណ្ណោះទេ។ គ្រប់ទង្វើទាំងអស់ដែលយើងប្រព្រឹត្តទៅលើអ្នកឯទៀត ដូចជាភាពរាក់ទាក់ សុជីវធម៌ របៀបដែលយើងនិយាយនិងស្ដាប់ ហើយអ្វីដែលយើងនិយាយ សូម្បីតែទឹកមុខរបស់យើងពេលដែលយើងនិយាយទៅកាន់អ្នកឯទៀតក៏សឲ្យឃើញថាយើងពិតជាយកចិត្តទុកដាក់នឹងគេដែរ។—ម៉ាថ. ៨:២, ៣
៣ ការយកចិត្តទុកដាក់ប្រកបដោយសេចក្ដីស្រឡាញ់ចំពោះមនុស្សក៏នឹងជំរុញយើងឲ្យផ្ដល់ជំនួយដែលមានប្រយោជន៍ដល់អ្នកឯទៀត។ ពេលផ្សព្វផ្សាយពីផ្ទះមួយទៅផ្ទះមួយ បងប្រុសម្នាក់ដែលជាអ្នកត្រួសត្រាយបានត្រូវស្ត្រីមេម៉ាយវ័យចាស់ម្នាក់បណ្ដេញចេញយ៉ាងរហ័សពេលដែលគាត់ដឹងថាបងប្រុសនោះជាស្មរបន្ទាល់។ គាត់បានប្រាប់ថាពេលដែលបងប្រុសនោះចុចកណ្ដឹងផ្ទះគាត់ គាត់កំពុងតែនៅលើជណ្ដើរក្នុងផ្ទះបាយខំដូរអំពូលភ្លើងមួយ។ បងប្រុសបាននិយាយថា៖ «ធ្វើការនេះតែម្នាក់ឯង គ្រោះថ្នាក់ណាស់»។ ស្ត្រីនោះបានអញ្ជើញគាត់ឲ្យចូល។ បងប្រុសនោះបានជួយដូរអំពូលហើយបន្ទាប់មកបានចេញទៅវិញ។ ក្រោយមក ពេលដែលកូនប្រុសរបស់ស្ត្រីនោះបានមកសួរសុខទុក្ខគាត់ គាត់បាននិយាយប្រាប់អំពីអ្វីដែលបានកើតឡើង។ កូនប្រុសរបស់គាត់បានកោតស្ងើចដល់ម្ល៉េះបានជាគាត់ខំប្រឹងរកបងប្រុសនោះដើម្បីអរគុណគាត់។ នេះនាំឲ្យមានការសន្ទនាដ៏ល្អមួយ ហើយជាលទ្ធផលកូនប្រុសរបស់ស្ត្រី នោះបានយល់ព្រមសិក្សាព្រះគម្ពីរ។
៤ ដោយបង្ហាញចិត្តសប្បុរស យើងបង្ហាញសេចក្ដីស្រឡាញ់របស់ព្រះយេហូវ៉ាចំពោះមនុស្សហើយនេះធ្វើឲ្យមនុស្សកាន់តែចាប់អារម្មណ៍នឹងសារព្រះរាជាណាចក្រថែមទៀត។ ហេតុដូច្នេះហើយ សូមឲ្យយើង«ផ្ទុកផ្ដាក់ខ្លួនទុកដូចជាអ្នកបំរើព្រះ»ជានិច្ចដោយបង្ហាញចិត្តសប្បុរស។—២កូ. ៦:៤, ៦