សូមទទួលស្វាគមន៍ពួកគាត់!
១. តើពិធីអ្វីដែលផ្ដល់ឱកាសដ៏ល្អដើម្បីឲ្យយើងធ្វើជាសាក្សីបញ្ជាក់? ហើយហេតុអ្វី?
១ គ្មានពិធីណាដែលប្រសើរជាងពិធីរំលឹកប្រចាំឆ្នាំដើម្បីឲ្យយើងធ្វើសាក្សីបញ្ជាក់ឡើយ។ សូមពិចារណា: ឆ្នាំនេះយើងគិតថានឹងមានមនុស្សជាង១០លាននាក់មកចូលរួមពិធីរំលឹក ហើយស្ដាប់សុន្ទរកថាស្តីអំពីសេចក្ដីស្រឡាញ់ដ៏ធំធេងពីរយ៉ាងដែលបង្ហាញឲ្យឃើញតាមរយៈថ្លៃលោះ។ (យ៉ូន. ៣:១៦; ១៥:១៣) ពួកគាត់នឹងដឹងអំពីពរដែលព្រះយេហូវ៉ាបានរៀបចំជាអំណោយសម្រាប់ពួកគាត់។ (អេ. ៦៥:២១-២៣) យ៉ាងណាក៏ដោយ នៅឱកាសនេះអ្នកថ្លែងមិនធ្វើជាសាក្សីបញ្ជាក់តែម្នាក់ឯងទេ។ អ្នកចូលរួមពិធីទាំងអស់មានឱកាសធ្វើជាសាក្សីបញ្ជាក់យ៉ាងខ្លាំងក្លាដោយទទួលស្វាគមន៍ភ្ញៀវយ៉ាងកក់ក្ដៅ។—រ៉ូម ១៥:៧
២. តើយើងអាចទទួលស្វាគមន៍ភ្ញៀវយ៉ាងកក់ក្ដៅតាមរបៀបណា?
២ ជាជាងរកកន្លែងហើយអង្គុយស្ងៀមរង់ចាំកម្មវិធីចាប់ផ្ដើម សូមទៅជួបអ្នកដែលនៅជិតៗយើងដើម្បីនិយាយរាក់ទាក់ជាមួយពួកគាត់។ ភ្ញៀវប្រហែលជាបារម្ភហើយមិនប្រាកដថានឹងមានអ្វីកើតឡើង។ ការញញឹមយ៉ាងកក់ក្ដៅនិងការទទួលរាក់ទាក់របស់យើងអាចជួយពួកគាត់ឲ្យមានអារម្មណ៍ស្រួល។ បើចង់ដឹងថា អ្នកណាម្នាក់ចូលរួមដោយសារបានទទួលលិខិតអញ្ជើញ នោះអ្នកអាចសួរថា៖ «តើនេះជាលើកទី១ដែលអ្នកបានចូលរួមកិច្ចប្រជុំរបស់យើងឬ?» ឬ«តើអ្នកស្គាល់អ្នកណាម្នាក់ក្នុងក្រុមជំនុំទេ?»។ អ្នកប្រហែលអញ្ជើញគាត់ឲ្យអង្គុយជាមួយ ហើយឲ្យអានគម្ពីរ និងច្រៀងចម្រៀងជាមួយអ្នក។ បើពិធីធ្វើនៅសាលប្រជុំ ប្រហែលជាយើងអាចនាំគាត់ដើរមើលមួយត្រួស។ បន្ទាប់ពីសុន្ទរកថា យើងលៃពេលដើម្បីឆ្លើយសំណួររបស់គាត់។ បើក្រុមជំនុំអ្នកត្រូវចេញភ្លាមដើម្បីក្រុមជំនុំមួយទៀតចូល អ្នកអាចសួរថា៖ «ខ្ញុំចង់ដឹង តើអ្នកគិតយ៉ាងណាអំពីកម្មវិធីនេះ? តើតាមវិធីណា ខ្ញុំអាចជួបអ្នកបាន?»។ បន្ទាប់មករៀបចំជួបគាត់ថ្ងៃផ្សេងទៀត។ ជាពិសេសពួកអ្នកចាស់ទុំគួរត្រៀមខ្លួនដើម្បីលើកទឹកចិត្តអ្នកផ្សាយអសកម្មដែលមកពិធីរំលឹក។
៣. ហេតុអ្វីជាការសំខាន់ដែលយើងត្រូវព្យាយាមដើម្បីទទួលស្វាគមន៍ភ្ញៀវនៅពិធីរំលឹក?
៣ ចំពោះភ្ញៀវជាច្រើននាក់ នេះជាលើកទី១ដែលពួកគាត់បានឃើញអំណរ សេចក្ដីសុខសាន្ត និងសាមគ្គីភាពក្នុងការគោរពប្រណិប័តន៍ពិតដែលយើងមានក្នុងនាមជារាស្ត្ររបស់ព្រះយេហូវ៉ា។ (ទំនុក. ២៩:១១; អេ. ១១:៦-៩; ៦៥:១៣, ១៤) តើភ្ញៀវនឹងចងចាំអំពីអ្វីបន្ទាប់ពីចូលរួមពិធីរំលឹក? នោះអាស្រ័យទៅលើការដែលយើងទទួលស្វាគមន៍ពួកគាត់បានច្រើនប៉ុនណា។