ចូរយកតម្រាប់តាមហូសេជាអ្នកប្រកាសទំនាយ
១. តើអ្នកប្រហែលជាសួរខ្លួនអ្នកនូវសំណួរអ្វី?
១ ‹តើខ្ញុំសុខចិត្តលះបង់អ្វីខ្លះដើម្បីព្រះយេហូវ៉ា?›។ អ្នកប្រហែលជាបានសួរសំណួរនេះចំពោះខ្លួនអ្នកកាលដែលអ្នកកំពុងរំពឹងគិតអំពីគុណធម៌និងសេចក្ដីមេត្ដាករុណាដ៏លើសលប់របស់លោក។ (ទំនុក. ១០៣:២-៤; ១១៦:១២) ហូសេបានសុខចិត្តធ្វើតាមបង្គាប់របស់ព្រះយេហូវ៉ា ទោះជាការធ្វើដូច្នោះតម្រូវឲ្យគាត់លះបង់ប្រយោជន៍ផ្ទាល់ខ្លួនក្ដី។ តើយើងអាចយកតម្រាប់តាមគំរូរបស់ហូសេយ៉ាងដូចម្ដេច?
២. ដោយសារហូសេបានតស៊ូផ្សព្វផ្សាយ តើយើងអាចយកតម្រាប់តាមគាត់យ៉ាងដូចម្ដេច?
២ ចូរប្រកាសនៅពេលដែលមានការលំបាក: ដំណឹងដែលហូសេបានប្រកាស ជាពិសេសគឺសំដៅទៅលើរាជាណាចក្រអ៊ីស្រាអែលដែលមានកុលសម្ព័ន្ធ១០។ នៅទីនោះការគោរពប្រណិប័តន៍ពិតស្ទើរតែលែងមានទៀត។ ស្តេចយេរ៉ូបោមទី២បានធ្វើអាក្រក់នៅចំពោះព្រះយេហូវ៉ា ហើយបានគោរពបូជារូបកូនគោ។ ការគោរពបូជានេះបានផ្ដើមដោយស្តេចយេរ៉ូបោមទី១។ (២ព. ១៤:២៣, ២៤) ស្តេចបន្តបន្ទាប់មកទៀតក៏ធ្វើឲ្យការគោរពប្រណិប័តន៍ពិតក្នុងរាជាណាចក្រនោះកាន់តែអាប់ឱនទៅៗ រហូតដល់រាជាណាចក្រនោះបានត្រូវបំផ្លាញចោលនៅឆ្នាំ៧៤០ មុនគ.ស.។ ក៏ប៉ុន្តែ យ៉ាងតិចបំផុតអស់រយៈពេល៥៩ឆ្នាំដែលហូសេបានធ្វើជាអ្នកប្រកាសទំនាយយ៉ាងស្មោះត្រង់ ទោះជាមានការគោរពប្រណិប័តន៍មិនពិតនៅពាសពេញស្រុកអ៊ីស្រាអែលក្ដី។ សូម្បីតែយើងជួបនឹងការព្រងើយឬការប្រឆាំងក្ដី តើយើងបានតាំងចិត្តតស៊ូផ្សព្វផ្សាយពីមួយឆ្នាំទៅមួយឆ្នាំដូចហូសេទេ?—២ធី. ៤:២
៣. តើជីវិតហូសេបានបង្ហាញឲ្យឃើញសេចក្ដីមេត្ដាករុណារបស់ព្រះយេហូវ៉ាយ៉ាងដូចម្ដេច?
៣ ចូរផ្ដោតអារម្មណ៍ទៅលើសេចក្ដីមេត្ដាករុណារបស់ព្រះយេហូវ៉ា: ព្រះយេហូវ៉ាបានបង្គាប់ហូសេឲ្យរៀបការជាមួយ«ស្រីដែលធ្លាប់ប្រព្រឹត្តជាសំផឹង»។ (ហូ. ១:២) ទោះជាកូមើរដែលជាប្រពន្ធរបស់ហូសេបានបង្កើតកូនប្រុសមួយឲ្យគាត់ក្ដី តាមមើលទៅក្រោយមកនាងបានបង្កើតកូនពីរទៀតដែលមិនមែនជាកូនរបស់ហូសេទេ។ ការដែលហូសេសុខចិត្តអភ័យទោសឲ្យប្រពន្ធរបស់គាត់ នេះបានបង្ហាញនូវសេចក្ដីមេត្ដាករុណាដ៏ធំធេងរបស់ព្រះយេហូវ៉ាចំពោះជនជាតិអ៊ីស្រាអែលដ៏អាក្រក់ ពេលដែលពួកគេបានកែប្រែចិត្ត។ (ហូ. ៣:១; រ៉ូម ៩:២២-២៦) តើយើងសុខចិត្តលះបង់ប្រយោជន៍ខ្លួនដើម្បីធ្វើឲ្យមនុស្សគ្រប់ប្រភេទស្គាល់សេចក្ដីមេត្ដាករុណារបស់ព្រះយេហូវ៉ាឬទេ?—១កូ. ៩:១៩-២៣
៤. តើយើងអាចលះបង់អ្វីខ្លះដើម្បីព្រះយេហូវ៉ា?
៤ អ្នកបម្រើខ្លះរបស់ព្រះយេហូវ៉ាបានលះបង់ការងារឬមុខរបរដែលអាចទទួលលុយច្រើនដើម្បីមានពេលច្រើនជាងក្នុងកិច្ចបម្រើផ្សាយ។ បងប្អូនខ្លះទៀតសុខចិត្តនៅលីវ ឬមិនយកកូនដើម្បីស្វែងរកប្រយោជន៍រាជាណាចក្រ។ ពេលរំពឹងគិតអំពីជីវិតរបស់ហូសេ យើងប្រហែលជាគិតថា‹ខ្ញុំមិនអាចធ្វើដូចគាត់ទេ›។ ក៏ប៉ុន្តែ កាលដែលយើងមានចិត្តដឹងគុណកាន់តែខ្លាំងចំពោះគុណដ៏វិសេសលើសលប់របស់ព្រះយេហូវ៉ា ហើយពឹងផ្អែកទៅលើសកម្មពលបរិសុទ្ធរបស់លោកឲ្យពង្រឹងកម្លាំងយើង នោះលោកក៏អាចប្រើយើងតាមរបៀបដែលយើងមិននឹកស្មានដូចហូសេដែរ។—ម៉ាថ. ១៩:២៦; ភី. ២:១៣