«ដីនឹងបង្កើតផលឡើង ហើយព្រះដ៏ជាព្រះនៃយើងខ្ញុំ ទ្រង់នឹងប្រទានពរមកយើងខ្ញុំ»។—ទំនុកតម្កើង ៦៧:៦
អ្នកអាចទទួលពរពីអ្នកបង្កើតរបស់យើងជារៀងរហូត
ព្រះបានសន្យាជាមួយនឹងអាប្រាហាំដែលជាអ្នកនាំសាររបស់លោកថា កូនចៅម្នាក់របស់គាត់នឹងនាំឲ្យ«គ្រប់ទាំងសាសន៍នៅផែនដី»ទទួលពរ។ (លោកុប្បត្តិ ២២:១៨) តើកូនចៅនោះជានរណា?
ជាង២.០០០ឆ្នាំមុន ព្រះបានឲ្យលោកយេស៊ូមកផែនដី លោកយេស៊ូបានមកកើតជាកូនចៅរបស់អាប្រាហាំ ហើយលោកមានអំណាចធ្វើការអស្ចារ្យ។ ការអស្ចារ្យទាំងនោះបញ្ជាក់ពីសេចក្ដីសន្យាដែលព្រះបានធ្វើជាមួយនឹងអាប្រាហាំដែលថា គ្រប់ជាតិសាសន៍នឹងទទួលពរតាមរយៈកូនចៅរបស់គាត់ពោលគឺលោកយេស៊ូ។—កាឡាទី ៣:១៤
ការអស្ចារ្យដែលលោកយេស៊ូបានធ្វើនោះជួយយើងឲ្យស្គាល់ថាលោកជាអ្នកដែលព្រះបានជ្រើសរើសឲ្យពរដល់មនុស្សជាតិ ហើយការអស្ចារ្យទាំងនោះក៏បញ្ជាក់ដែរពីរបៀបដែលព្រះនឹងប្រើលោកយេស៊ូឲ្យផ្ដល់ពរដល់មនុស្សជាតិជារៀងរហូត។ សូមកត់សម្គាល់ពីការអស្ចារ្យខ្លះរបស់លោកយេស៊ូដែលបង្ហាញពីគុណសម្បត្តិខ្លះៗរបស់លោក។
ចិត្តស្លូតបូត លោកយេស៊ូព្យាបាលអ្នកដែលឈឺ។
មានពេលមួយ អ្នកកើតឃ្លង់ម្នាក់បានអង្វរលោកយេស៊ូឲ្យធ្វើឲ្យគាត់ជា។ លោកយេស៊ូបានប៉ះគាត់ទាំងមានប្រសាសន៍ថា៖ «ខ្ញុំចង់ធ្វើឲ្យអ្នកជាស្អាតមែន!» រំពេចនោះ ជំងឺឃ្លង់ក៏បានជាបាត់ទៅ។—ម៉ាកុស ១:៤០-៤២
ចិត្តទូលាយ លោកយេស៊ូផ្ដល់អាហារឲ្យមនុស្សដែលឃ្លាន។
លោកយេស៊ូមិនចង់ឲ្យមនុស្សឃ្លាននោះទេ។ មានប៉ុន្មានដងដែលលោកបានធ្វើការអស្ចារ្យដើម្បីផ្ដល់អាហារដល់មនុស្សរាប់ពាន់នាក់ដោយមានតែនំប៉័ងប៉ុន្មានដុំនិងត្រីពីរបីកន្ទុយប៉ុណ្ណោះ។ (ម៉ាថាយ ១៤:១៧-២១; ១៥:៣២-៣៨) នៅមានសល់អាហារជាច្រើន ទោះជាក្រោយពីមនុស្សទាំងអស់បានបរិភោគឆ្អែតក៏ដោយ។
ចិត្តអាណិតអាសូរ លោកយេស៊ូបានប្រោសមនុស្សស្លាប់ឲ្យរស់ឡើងវិញ។
«ចិត្តក្ដួលអាណិត»ជំរុញលោកយេស៊ូឲ្យប្រោសកូនប្រុសតែមួយរបស់ស្ត្រីមេម៉ាយម្នាក់ឲ្យរស់ឡើងវិញ ស្ត្រីមេម៉ាយនោះគ្មានសាច់ញាតិណាដែលមើលថែរក្សាគាត់ឡើយ គាត់មានតែកូនប្រុសម្នាក់នេះប៉ុណ្ណោះ។—លូកា ៧:១២-១៥