ពេលដែលការស្អប់នឹងលែងមានជារៀងរហូត!
ទោះបីជាយើងអាចបំបាត់ចោលទាំងស្រុងនូវការស្អប់ចេញពីចិត្តរបស់យើងក្ដី យើងនៅតែមិនអាចគ្រប់គ្រងទៅលើការប្រព្រឹត្តនិងចិត្តគំនិតរបស់មនុស្សឯទៀតបានឡើយ។ មានមនុស្សស្លូតត្រង់ជាច្រើននៅតែបន្តរងគ្រោះដោយសារការស្អប់។ ដូច្នេះ តើអ្នកណាអាចបំបាត់ចោលការស្អប់ជារៀងរហូត?
មានតែព្រះយេហូវ៉ាប៉ុណ្ណោះដែលអាចបំបាត់ចោលទាំងស្រុងនូវការស្អប់ដែលយើងកំពុងឃើញនៅសព្វថ្ងៃនេះ។ តាមពិត នេះគឺជាអ្វីដែលគម្ពីរបានសន្យាថាលោកនឹងធ្វើ។—សុភាសិត ២០:២២
ព្រះនឹងបំបាត់ចោលនូវដើមហេតុដែលបណ្ដាលឲ្យមានការស្អប់
១. មេកំណាចសាថាន។ សាថានជាទេវតាដែលបះបោរប្រឆាំងព្រះ គឺជាដើមហេតុដែលបណ្ដាលឲ្យមានការស្អប់គ្នានៅសព្វថ្ងៃនេះ។ ព្រះនឹងបំផ្លាញសាថាននិងអស់អ្នកដែលស្អប់អ្នកឯទៀតដូចវា។—ចម្រៀងសរសើរព្រះ ៣៧:៣៨; រ៉ូម ១៦:២០
២. ពិភពលោកដែលពោរពេញទៅដោយការស្អប់របស់សាថាន។ ព្រះនឹងបំបាត់ចោលអ្វីទាំងអស់ដែលបណ្ដាលឲ្យមានការស្អប់គ្នាក្នុងពិភពលោកនេះដូចជា ពួកអ្នកនយោបាយពុករលួយ និងពួកអ្នកដឹកនាំសាសនាដែលញុះញង់ឲ្យមានការស្អប់គ្នា។ មិនត្រឹមតែប៉ុណ្ណោះ ព្រះក៏នឹងបំបាត់ចោលនូវប្រព័ន្ធពាណិជ្ជកម្មដែលលោភលន់ ពុករលួយនិងកេងប្រវ័ញ្ចអ្នកឯទៀតដែរ។—ពេត្រុសទី២ ៣:១៣
៣. ភាពមិនល្អឥតខ្ចោះរបស់មនុស្សជាតិ។ គម្ពីរពន្យល់ថាមនុស្សជាតិបានទទួលភាពមិនល្អឥតខ្ចោះជាមត៌ក ហើយនេះតែងតែធ្វើឲ្យយើងមានទំនោរចិត្ត គិត មានអារម្មណ៍ និងធ្វើអ្វីដែលមិនត្រឹមត្រូវ។ (រ៉ូម ៥:១២) ការគុំកួននិងការស្អប់អ្នកឯទៀតគឺជាទំនោរចិត្តដែលមកពីភាពមិនល្អឥតខ្ចោះ។ ព្រះនឹងជួយមនុស្សឲ្យយកឈ្នះនូវទំនោរចិត្តទាំងឡាយដែលបណ្ដាលមកពីភាពមិនល្អឥតខ្ចោះ ដើម្បីបំបាត់ចោលការស្អប់គ្រប់បែបយ៉ាងជារៀងរហូត។—អេសាយ ៥៤:១៣
គម្ពីរបានសន្យាអំពីពិភពលោកមួយដែលលែងមានការស្អប់គ្នា
១. លែងមានអំពើអយុត្តិធម៌ទៀត។ ពិភពលោកទាំងមូលនឹងស្ថិតនៅក្រោមការគ្រប់គ្រងនៃរាជាណាចក្ររបស់ព្រះ ជារដ្ឋាភិបាលនៅស្ថានសួគ៌ដែលយុត្តិធម៌និងគ្រប់គ្រងជារៀងរហូត។ (ដានីយ៉ែល ២:៤៤) ការរើសអើងនិងការប្រកាន់ពូជសាសន៍នឹងលែងមានទៀត។ ព្រះនឹងជួយមនុស្សទាំងអស់ឲ្យទទួលភាពយុត្តិធម៌ឡើងវិញ។—លូកា ១៨:៧
២. មនុស្សទាំងអស់នឹងមានសន្តិភាព។ មនុស្សនឹងលែងរងទុក្ខដោយសារអំពើឃោរឃៅនិងសង្គ្រាមទៀត។ (ចម្រៀងសរសើរព្រះ ៤៦:៩) ផែនដីនឹងទៅជាកន្លែងដែលមានសុវត្ថិភាពនិងមានតែមនុស្សដែលស្រឡាញ់សន្តិភាព។—ចម្រៀងសរសើរព្រះ ៧២:៧
៣. មនុស្សនឹងរស់នៅជារៀងរហូតក្នុងស្ថានភាពដ៏ល្អឥតខ្ចោះ។ មនុស្សទាំងអស់នឹងបង្ហាញសេចក្ដីស្រឡាញ់យ៉ាងស្មោះចំពោះគ្នាទៅវិញទៅមក។ (ម៉ាថាយ ២២:៣៩) គ្មាននរណាម្នាក់រងទុក្ខដោយសារការគិតគូរ និងការចងចាំចំពោះអ្វីដែលមិនល្អទៀតទេ។ (អេសាយ ៦៥:១៧) នៅពេលដែលលែងមានការស្អប់ទៀត មនុស្ស«នឹងសប្បាយរីករាយយ៉ាងខ្លាំង ដោយសារមានសេចក្ដីសុខសាន្តជាបរិបូរ»។—ចម្រៀងសរសើរព្រះ ៣៧:១១
តើអ្នកចង់រស់នៅក្នុងពិភពលោកបែបនោះដែរឬទេ? សូម្បីតែឥឡូវនេះក្ដី មានមនុស្សជាច្រើនកំពុងរៀនឲ្យចេះលះចោលការស្អប់គ្នាដោយធ្វើតាមគោលការណ៍គម្ពីរ។ (ចម្រៀងសរសើរព្រះ ៣៧:៨) នេះជាអ្វីដែលកំពុងកើតឡើងក្នុងចំណោមសាក្សីព្រះយេហូវ៉ារាប់លាននាក់នៅជុំវិញពិភពលោក។ ទោះបីជាពួកគេជាច្រើនមានវប្បធម៌និងមជ្ឈដ្ឋានខុសគ្នាក្ដី តែពួកគេស្រឡាញ់និងមានសាមគ្គីភាពជាមួយគ្នាទៅវិញទៅមក។—អេសាយ ២:២-៤
សាក្សីព្រះយេហូវ៉ារីករាយចែករំលែកជាមួយអ្នក នូវអ្វីដែលពួកគេរៀនស្ដីអំពីរបៀបប្រឈមមុខនឹងអំពើអយុត្តិធម៌ និងការរើសអើង។ បន្តិចម្ដងៗ អ្វីដែលអ្នករៀននឹងអាចជួយអ្នកឲ្យជំនួសសេចក្ដីស្អប់ដោយសេចក្ដីស្រឡាញ់។ អ្នកអាចរៀនអំពីរបៀបប្រព្រឹត្តទៅកាន់មនុស្សទាំងអស់ដោយសប្បុរស ទោះបីជាពួកគេគ្មានចិត្តដឹងគុណនិងមានការស្អប់ក្ដី។ ជាលទ្ធផល អ្នកនឹងសប្បាយជាងនៅឥឡូវនេះ ហើយទំនាក់ទំនងរវាងអ្នកជាមួយនឹងអ្នកឯទៀតនឹងល្អប្រសើរឡើង។ ពិសេសជាងនោះទៅទៀត អ្នកនឹងរៀនអំពីអ្វីដែលអ្នកអាចធ្វើដើម្បីអាចរស់នៅក្រោមការគ្រប់គ្រងនៃរាជាណាចក្ររបស់ព្រះ ដែលការស្អប់នឹងលែងមានជារៀងរហូត។—ចម្រៀងសរសើរព្រះ ៣៧:២៩