mustafahacalaki/DigitalVision Vectors via Getty Images
ចូរចាំយាម!
តើប្រាជ្ញាសិប្បនិម្មិតជួយយើងឬធ្វើបាបយើង? តើគម្ពីរចែងយ៉ាងណា?
ថ្មីនេះៗ អ្នកដឹកនាំពិភពលោក អ្នកវិទ្យាសាស្ត្រ និងអ្នកជំនាញខាងបច្ចេកវិទ្យា បាននិយាយអំពីឥទ្ធិពលរបស់ប្រាជ្ញាសិប្បនិម្មិតឬបញ្ញាសិប្បនិម្មិត(AI)។ ទោះជាមនុស្សទទួលស្គាល់ពីតម្លៃនៃប្រាជ្ញាសិប្បនិម្មិតក្ដី ពួកគេក៏បារម្ភអំពីផលវិបាកដែលអាចមកពីការប្រើប្រាស់មិនត្រឹមត្រូវដែរ។
កាលពីថ្ងៃទី៤ ខែឧសភា ឆ្នាំ២០២៣ អនុប្រធានាធិបតីសហរដ្ឋអាម៉េរិក លោកស្រីខាមឹឡឹ ហ៊ែរីសបានរៀបរាប់ថា៖«ប្រាជ្ញាសិប្បនិម្មិតគឺជាបច្ចេកវិទ្យាមួយដ៏មានឥទ្ធិពលបំផុតនាពេលបច្ចុប្បន្ន ដោយសារវាធ្វើឲ្យជីវិតរបស់មនុស្សកាន់តែមានភាពងាយស្រួល . . . ។ ប៉ុន្តែនៅដំណាលគ្នានោះ វាក៏មានលទ្ធភាពគំរាមកំហែងដល់សុវត្ថិភាពនិងសេចក្ដីសុខរបស់យើង ហើយធ្វើឲ្យយើងលែងមានសេរីភាពនិងភាពផ្ទាល់ខ្លួនដែរ។ បន្ថែមទៅទៀត វាធ្វើឲ្យយើងពិបាកទុកចិត្តថា រដ្ឋាភិបាលមនុស្សប្រកាន់លទ្ធិប្រជាធិបតេយ្យឬយ៉ាងណា»។
អត្ថបទមួយសរសេរថា៖«ទោះជាប្រាជ្ញាសិប្បនិម្មិតប្រហែលជាអាចជួយថែទាំសុខភាពតាមរបៀបខ្លះក៏ពិតមែន តែវាក៏ធ្វើទុក្ខដល់សុខភាពផ្លូវកាយនិងផ្លូវចិត្តរបស់យើងតាមរបៀបផ្សេងទៀតដែរ» សរសេរដោយក្រុមវេជ្ជបណ្ឌិតអន្តរជាតិនិងអ្នកជំនាញខាងមើលថែសុខភាពដែលដឹកនាំដោយសាស្ត្រាចារ្យហ្វ្រីដឺរីក ហ្វីដឺស្ពីល(BMJ Global Health)a ចុះថ្ងៃទី៩ ខែឧសភា ឆ្នាំ២០២៣។
សារព័ត៌មានមួយរៀបរាប់ថា៖«មនុស្សអាចប្រើប្រាជ្ញាសិប្បនិម្មិតដើម្បីផ្សាយព័ត៌មានមិនពិត។ មិនយូរទៀត វាអាចធ្វើឲ្យមនុស្សជាច្រើនបាត់បង់ការងារ។ រីឯអ្នកខ្លះទៀតដែលធ្វើការខាងបច្ចេកវិទ្យា ពួកគេកំពុងព្រួយបារម្ភជាខ្លាំងថានៅថ្ងៃអនាគតប្រាជ្ញាសិប្បនិម្មិតអាចបង្កគ្រោះថ្នាក់ដល់មនុស្សផងដែរ។ ចុះថ្ងៃទី១ ខែឧសភា ឆ្នាំ២០២៣(The New York Times)។
មានតែពេលវេលាប៉ុណ្ណោះដែលអាចប្រាប់យើងថាប្រាជ្ញាសិប្បនិម្មិតនឹងផ្ដល់ប្រយោជន៍ដល់មនុស្សឬបង្កគ្រោះថ្នាក់ដល់មនុស្ស។ តើគម្ពីរចែងយ៉ាងណា?
ហេតុអ្វីឧបករណ៍ដែលមនុស្សព្យាយាមបង្កើតធ្វើឲ្យសង្គមបារម្ភទៅវិញ?
គម្ពីរបង្ហាញអំពីមូលហេតុដែលបច្ចេកវិទ្យាជឿនលឿនរបស់មនុស្ស មិនអាចធានាថាអ្នកដែលយកទៅប្រើប្រាស់តែងតែប្រើក្នុងផ្លូវល្អទេ។
១. ទោះជាមនុស្សមានបំណងល្អក្ដី ពួកគេប្រហែលជាមិនអាចដឹងមុននូវលទ្ធផលអាក្រក់ដែលមកពីការប្រព្រឹត្តរបស់ពួកគេឡើយ។
«មានផ្លូវមួយដែលមនុស្សមើលទៅហាក់ដូចជាផ្លូវត្រឹមត្រូវ តែនៅទីបំផុត ផ្លូវនោះនាំទៅដល់សេចក្ដីស្លាប់»។—សុភាសិត ១៤:១២
២. បុគ្គលម្នាក់មិនអាចគ្រប់គ្រងរបៀបដែលអ្នកឯទៀតនឹងប្រើប្រាស់អ្វីដែលគាត់បានបង្កើតទេ មិនថាគេប្រើតាមរបៀបត្រឹមត្រូវឬមិនត្រឹមត្រូវក្ដី។
«ខ្ញុំត្រូវរក្សាទុក[អ្វីដែលខ្ញុំបង្កើត]ឲ្យអ្នកដែលមកក្រោយខ្ញុំ។ តើអ្នកណាដឹងថាគាត់នឹងមានប្រាជ្ញាឬល្ងង់ខ្លៅ? ទោះជាយ៉ាងណាក៏ដោយ គាត់នឹងគ្រប់គ្រងលើអ្វីៗទាំងអស់ដែលខ្ញុំព្យាយាមរកបានដោយប្រាជ្ញានៅក្រោមថ្ងៃ»។—អ្នកទូន្មាន ២:១៨, ១៩
ដោយសារភាពមិនប្រាកដប្រជាបែបនោះហើយ បានជាយើងត្រូវការការណែនាំពីព្រះដែលជាអ្នកបង្កើតយើង។
តើយើងអាចទុកចិត្តអ្នកណាវិញ?
ព្រះដែលជាអ្នកបង្កើតសន្យាថាលោកនឹងមិនអនុញ្ញាតឲ្យមនុស្សណាម្នាក់ឬបច្ចេកវិទ្យាណាមួយដែលមនុស្សបង្កើត បំផ្លាញផែនដីនិងមនុស្សយើងឡើយ។
«ផែនដីនៅស្ថិតស្ថេរជារៀងរហូត»។—អ្នកទូន្មាន ១:៤
«មនុស្សសុចរិតនឹងបានផែនដីជាមត៌ក ហើយពួកគេនឹងរស់នៅផែនដីជារៀងរហូត»។—ចម្រៀងសរសើរព្រះ ៣៧:២៩
តាមរយៈគម្ពីរ ព្រះដែលជាអ្នកបង្កើតយើង លោកឲ្យការណែនាំដែលជួយយើងឲ្យមានអនាគតដែលពោរពេញទៅដោយសេចក្ដីសុខសាន្តនិងសុវត្ថិភាព។ ដើម្បីរៀនថែមទៀតអំពីអ្វីដែលគម្ពីរចែង សូមអានអត្ថបទចំណងជើងថា«តើមានការណែនាំដែលគួរឲ្យទុកចិត្តដើម្បីមានអនាគតដ៏ល្អឬទេ?» និងអត្ថបទចំណងជើងថា«សេចក្ដីសង្ឃឹមដ៏ពិតប្រាកដកំពុងរង់ចាំអ្នក»។
a ដកស្រង់ពីអត្ថបទ“Threats by Artificial Intelligence to Human Health and Human Existence” និពន្ធដោយហ្វ្រីដឺរីក ហ្វីដឺស្ពីល រូថ មីសែល អាស្សា អាសូខិន ខាលឡូស អ៊ូម៉ាណា និងដាវីឌ ម៉ាខយ។