ភាពច្របូកច្របល់ខាងនយោបាយកំពុងកើតឡើងដូចទំនាយគម្ពីរ
មនុស្សសព្វថ្ងៃនេះ មានការខ្វែងគំនិតគ្នាជាខ្លាំងអំពីរឿងនយោបាយ។ ពួកគេមិនយល់ស្របនឹងច្បាប់ផ្សេងៗដែលប៉ះពាល់ដល់ជីវិតប្រចាំថ្ងៃរបស់ពួកគេទេ ហើយពួកគេថែមទាំងបញ្ចេញមតិរិះគន់ប្រឆាំងនឹងរឿងនោះទៀតផង។ ចំណែកឯក្នុងជួររដ្ឋាភិបាលវិញ អ្នកដែលបង្កើតច្បាប់និងរដ្ឋមន្ត្រីច្រើនតែមិនយល់ស្របគ្នា ហើយមិនចង់ទទួលយកទស្សនៈគ្នាឡើយ។ ការខ្វែងគំនិតនេះនាំឲ្យមានវិបត្តិខាងនយោបាយដែលប៉ះពាល់ដល់ដំណើរការនៃរដ្ឋាភិបាល។
ប៉ុន្តែ ភាពច្របូកច្របល់ខាងនយោបាយ នៅសហរដ្ឋអាម៉េរិកនិងប្រទេសអង់គ្លេស គឺជាព្រឹត្តិការណ៍សំខាន់ណាស់។ ហេតុអ្វី? ព្រោះគម្ពីរបានប្រកាសទុកជាមុនថាភាពច្របូកច្របល់នេះនឹងកើតឡើងចំពោះប្រទេសពីរនេះ គឺក្នុងអំឡុងគ្រានេះ ជាគ្រាដែលរដ្ឋាភិបាលរបស់ព្រះនឹងកែប្រែទាំងស្រុងចំពោះស្ថានភាពនៅផែនដី។
ភាពច្របូកច្របល់ខាងនយោបាយនៅ«គ្រាចុងបញ្ចប់»
គម្ពីរមានទំនាយមួយដែលគួរឲ្យរំភើបចិត្ត។ ទំនាយនោះបានកត់ទុកនៅក្នុងសៀវភៅដានីយ៉ែល។ ក្នុងទំនាយនោះ ព្រះបានបើកបង្ហាញអំពី«អ្វីដែលនឹងកើតឡើងនៅគ្រាចុងបញ្ចប់»។ ពេលដែលដានីយ៉ែលបានកត់ទុកពាក្យទាំងនេះ គាត់សំដៅទៅគ្រាអនាគតជាគ្រាដែលមានការប្រែប្រួលយ៉ាងខ្លាំងក្នុងប្រវត្តិសាស្ត្រមនុស្ស។—ដានីយ៉ែល ២:២៨
ព្រះបានប្រាប់អំពីទំនាយគម្ពីរនេះនៅក្នុងសុបិនរបស់ស្ដេចបាប៊ីឡូន។ ក្នុងសុបិននោះ ស្ដេចបានឃើញរូបធំសម្បើមមួយដែលធ្វើពីធាតុផ្សេងៗ។ ក្រោយមក ដានីយ៉ែលដែលជាអ្នកប្រកាសទំនាយបានពន្យល់ថា ពីក្បាលដល់ប្រអប់ជើងនៃរូបធំសម្បើមនោះ គឺតំណាងឲ្យមហាអំណាចពិភពលោកដែលបានឡើងនិងធ្លាក់អំណាចក្នុងប្រវត្តិសាស្ត្រមនុស្ស។a ទីបំផុត រូបនោះបានត្រូវថ្មមួយមកបុកកម្ទេច។ ថ្មនោះតំណាងឲ្យរាជាណាចក្រឬរដ្ឋាភិបាលមួយ ដែលព្រះបានតាំងឡើង។—ដានីយ៉ែល ២:៣៦-៤៥
យោងទៅតាមទំនាយនេះ រាជាណាចក្រព្រះនឹងគ្រប់គ្រងជំនួសរដ្ឋាភិបាលទាំងឡាយរបស់មនុស្ស។ រាជាណាចក្រនេះហើយដែលលោកយេស៊ូបានបង្រៀនពួកអ្នកកាន់តាមលោកឲ្យអធិដ្ឋានសុំ ពេលដែលលោកមានប្រសាសន៍ថា៖«សូមឲ្យរាជាណាចក្ររបស់លោកបានមកដល់»។—ម៉ាថាយ ៦:១០
ប៉ុន្តែ តើទំនាយអំពីភាពច្របូកច្របល់ខាងនយោបាយនេះរៀបរាប់នៅខគម្ពីរមួយណា? សូមកត់សម្គាល់ថាប្រអប់ជើងនៃរូបធំសម្បើមនោះ បាន«ធ្វើពីដែកលាយដីឥដ្ឋ»។ (ដានីយ៉ែល ២:៣៣) ដែកលាយនឹងដីឥដ្ឋនោះ គឺខុសពីធាតុដែកសុទ្ធនៃរូបធំសម្បើមនោះ នេះបញ្ជាក់ថាមហាអំណាចពិភពលោកមួយនេះមានលក្ខណៈពិសេសប្លែកពីមហាអំណាចឯទៀត។ តើតាមរបៀបណា? ទំនាយដានីយ៉ែលបានពន្យល់ថា៖
ហេតុនេះ យោងទៅតាមទំនាយនេះ មហាអំណាចពិភពលោកដែលតំណាងដោយប្រអប់ជើង នឹងមានភាពច្របូកច្របល់ខាងនយោបាយ។ ព្រោះផ្នែកខ្លាំងនៃមហាអំណាចនេះនឹងចុះខ្សោយ ដោយសារប្រជាជនរបស់ពួកគេ។
ទំនាយដានីយ៉ែលបានកើតឡើងនៅសព្វថ្ងៃនេះ
ប្រអប់ជើងនៃរូបនោះតំណាងឲ្យមហាអំណាចពិភពលោកសព្វថ្ងៃនេះ ដែលជាសម្ព័ន្ធមិត្តរវាងសហរដ្ឋអាម៉េរិកនិងអង់គ្លេស។ តើព្រឹត្តិការណ៍នានានៅសម័យយើងគាំទ្រគំនិតនេះយ៉ាងដូចម្ដេច?
ប្រអប់ជើង«មានធាតុដែកលាយដីឥដ្ឋ» ការលាយដីឥដ្ឋនេះធ្វើឲ្យប្រអប់ជើងខ្សោយ។ (ដានីយ៉ែល ២:៤២) សព្វថ្ងៃនេះ អំណាចរបស់សហរដ្ឋអាម៉េរិកនិងអង់គ្លេសបានទៅជាខ្សោយជាង ដោយសារមានការបែកបាក់ក្នុងចំណោមប្រជាជនរបស់ខ្លួន។ ជាឧទាហរណ៍ ប្រទេសទាំងពីរនោះមានជម្លោះផ្ទៃក្នុងរវាងពលរដ្ឋរបស់ខ្លួន។ ប្រជាជនធ្វើបាតុកម្មទាមទារសិទ្ធិរបស់ខ្លួន ព្រោះមន្ត្រីដែលពួកគេបោះឆ្នោតឲ្យ ច្រើនតែមិនអាចធ្វើតាមសេចក្ដីសន្យារបស់ពួកគេ។ ម្ល៉ោះហើយដោយសារប្រជាជនមានការបែកបាក់គ្នាយ៉ាងខ្លាំង នោះធ្វើឲ្យរដ្ឋាភិបាលនៃប្រទេសទាំងពីរមិនអាចធ្វើតាមគោលនយោបាយរបស់ពួកគេទេ។
ស្ថានភាពខាងរដ្ឋាភិបាលនេះបានត្រូវប្រកាសទុកនៅក្នុងដានីយ៉ែលជំពូកទី២
សូមរៀនថែមទៀតអំពីព័ត៌មានល្អិតល្អន់នៃទំនាយដានីយ៉ែល និងអំពីរបៀបដែលអ្វីទាំងនោះកំពុងសម្រេចនៅសព្វថ្ងៃនេះ៖
ទំនាយ៖ «ឯប្រអប់ជើងនិងម្រាមជើងពីធាតុដែកលាយដីឥដ្ឋដែលលោកឃើញ គឺជារាជាណាចក្រដែលនឹងគ្មានការរួបរួមគ្នាទេ តែផ្នែកខ្លះរឹងដូចជាដែក ផ្នែកខ្លះទន់ដូចជាដីឥដ្ឋ»។—ដានីយ៉ែល ២:៤១
អត្ថន័យ៖ ទោះជាសហរដ្ឋអាម៉េរិកនិងអង់គ្លេសមានការបែកបាក់ផ្ទៃក្នុងរដ្ឋាភិបាលអំពីរឿងនយោបាយក្ដី តែពួកគេនៅតែមានកម្លាំងយោធាខ្លាំង។ ហេតុនេះហើយបានជាពួកគេអាចធ្វើអ្វីដែលមានឥទ្ធិពលទៅលើពិភពលោក ដែលខ្លាំងក្លាដូចដែក។
បានកើតឡើង
វិទ្យាស្ថានស្រាវជ្រាវសន្តិភាពអន្តរជាតិមួយបានរៀបរាប់ថា៖«នៅក្នុងបញ្ជីប្រទេសដែលចំណាយថវិកាលើវិស័យយោធាក្នុងឆ្នាំ២០២៣ សហរដ្ឋអាម៉េរិកនិងអង់គ្លេសបានចំណាយថវិកាច្រើនជាងគេ គឺច្រើនជាងប្រទេសធំៗ១២បូកបញ្ចូលគ្នាដែលមានក្នុងបញ្ជីនោះទៅទៀត»(Stockholm International Peace Research Institute)។
កាលពីខែមេសា ឆ្នាំ២០២៤ យោងទៅតាមក្រសួងការពារជាតិនៅអង់គ្លេសបានរៀបរាប់ថា៖«ការរួបរួមគ្នារវាងប្រទេសអង់គ្លេសនិងសហរដ្ឋអាម៉េរិក . . . បានធ្វើឲ្យប្រទេសទាំងពីរមានសម្ព័ន្ធភាពស្អិតរមួតជាមួយគ្នា ហើយផ្នែកខាងបច្ចេកវិទ្យាក្នុងប្រទេសនោះក៏វិវត្តទៅដល់កម្រិតកំពូលដែរ។ . . . យើងធ្វើការជាមួយគ្នា យើងគាំទ្រគ្នា យើងរួមប្រយុទ្ធជាមួយគ្នា»(Strategic Command, U.K. Ministry of Defence)។
ទំនាយ៖ «ការដែលប្រអប់ជើងមានធាតុដែកលាយដីឥដ្ឋ នេះបង្ហាញថារាជាណាចក្រនោះមានផ្នែកខ្លាំង ហើយមានផ្នែកខ្សោយ»។—ដានីយ៉ែល ២:៤២
អត្ថន័យ៖ ទោះជាសហរដ្ឋអាម៉េរិកនិងអង់គ្លេសមានកម្លាំងយោធាខ្លាំងក្លាក៏ដោយ ពួកគេមិនអាចធ្វើអ្វីតាមអំពើចិត្តពួកគេទេ ដោយសាររដ្ឋាភិបាលរបស់ពួកគេប្រកាន់លទ្ធិប្រជាធិបតេយ្យ។ បើគ្មានការយល់ព្រមពីមតិភាគច្រើនទេ ពេលខ្លះរដ្ឋាភិបាលទាំងនោះពិបាកសម្រេចតាមផែនការរបស់ខ្លួន។
បានកើតឡើង
សារព័ត៌មានមួយបានរៀបរាប់ថា៖«អ្នកជំនាញខាងនយោបាយខ្លះបាននិយាយថាការបែកបាក់ផ្ទៃក្នុងរដ្ឋាភិបាលអាម៉េរិក ធ្វើឲ្យសហរដ្ឋអាម៉េរិកពិបាកធ្វើតាមអ្វីដែលពួកគេបានអះអាងប្រាប់ពិភពលោក ដូចជារឿងទាក់ទងនឹងសន្តិសុខសណ្ដាប់ធ្នាប់សង្គមនិងរឿងមុខជំនួញជាដើម»(The Wall Street Journal)។
វិទ្យាស្ថានមួយបានរៀបរាប់ថា៖«ថ្មីៗនេះមានបញ្ហានយោបាយជាច្រើននៅប្រទេសអង់គ្លេស ដែលមិនធ្លាប់មានពីមុនមកទេ។ កត្តានេះហើយដែលរារាំងពួកអ្នកនយោបាយពីការសម្រេចកិច្ចការរបស់ពួកគេ។ ជាលទ្ធផល អ្នកដែលធ្វើការក្នុងរដ្ឋាភិបាលមិនអាចធ្វើកំណែទម្រង់ជួយពលរដ្ឋពួកគេឡើយ»(Institute for Government)។
ទំនាយ៖«ផ្នែកខ្លាំងនៃរាជាណាចក្រនោះនឹងលាយឡំជាមួយនឹងបណ្ដាជន តែពួកគេនឹងមិនជាប់ជាមួយគ្នាទេ»។—ដានីយ៉ែល ២:៤៣
អត្ថន័យ៖ រដ្ឋាភិបាលដែលកាន់លទ្ធិប្រជាធិបតេយ្យ ប្រជាជនប្រហែលជាអាចមានឥទ្ធិពលខ្លះទៅលើរដ្ឋាភិបាលតាមរយៈការបោះឆ្នោត។ ប៉ុន្តែលទ្ធផលដែលពួកគេទទួលបានប្រហែលជាមិនធ្វើឲ្យពួកគេពេញចិត្តទាំងស្រុងទេ។
បានកើតឡើង
មណ្ឌលស្រាវជ្រាវមួយបានរៀបរាប់ថា៖«សព្វថ្ងៃ ជនជាតិអាម៉េរិកភាគច្រើន មានទស្សនៈមិនល្អចំពោះរឿងនយោបាយ និងរដ្ឋមន្ត្រីដែលបានជាប់ឆ្នោត»(Pew Research Center)។
ការស្រាវជ្រាវមួយបានរៀបរាប់ថា៖«សព្វថ្ងៃជនជាតិអង់គ្លេសមិនសូវទុកចិត្តរដ្ឋាភិបាលនិងពួកអ្នកនយោបាយដូចមុនទេ បើប្រៀបនឹងអំឡុងពេល៥០ឆ្នាំកន្លងមក»(National Centre for Social Research)។
របៀបដែលទំនាយដានីយ៉ែលកើតឡើងនៅថ្ងៃអនាគត
យោងទៅតាមទំនាយដានីយ៉ែល អំឡុងពេលសហរដ្ឋអាម៉េរិកនិងអង់គ្លេសជាមហាអំណាចពិភពលោក រាជាណាចក្រព្រះនឹងបញ្ឈប់ការគ្រប់គ្រងរបស់រដ្ឋាភិបាលមនុស្ស ហើយរាជាណាចក្រព្រះនឹងគ្រប់គ្រងជំនួសវិញ។—ដានីយ៉ែល ២:៤៤
ក្នុងសៀវភៅការបើកបង្ហាញបានរៀបរាប់ទំនាយមួយអំពីគ្រាដូចគ្នា ដែលថា«ស្ដេចទាំងឡាយនៅគ្រប់ទីអាស្រ័យនៅផែនដី» នឹងត្រូវប្រមូលមកប្រឆាំងនឹងព្រះយេហូវ៉ាb នៅសង្គ្រាមអាម៉ាគេដូន។ សង្គ្រាមនេះ«នឹងកើតឡើងនៅថ្ងៃដ៏ធំរបស់ព្រះដែលមានឫទ្ធានុភាពខ្លាំងក្លាបំផុត»។ (ការបើកបង្ហាញ ១៦:១៤, ១៦; ១៩:១៩-២១) ក្នុងសង្គ្រាមនេះ ព្រះយេហូវ៉ានឹងបំផ្លាញរដ្ឋាភិបាលទាំងអស់របស់មនុស្ស។ ក្រោយនោះនឹងលែងមានមហាអំណាចពិភពលោកណាដែលតំណាងដោយរូបធំសម្បើមក្នុងទំនាយដានីយ៉ែលទៀតហើយ។
ដើម្បីស្វែងយល់ថែមទៀត សូមអានអត្ថបទ«តើសង្គ្រាមអាម៉ាគេដូនជាអ្វី?»។
តើភាពច្របូកច្របល់ខាងនយោបាយក្នុងទំនាយដានីយ៉ែលមានប្រយោជន៍អ្វីខ្លះ?
គម្ពីរបានប្រកាសទុកជាមុនយ៉ាងត្រឹមត្រូវអំពីភាពច្របូកច្របល់ខាងនយោបាយនៅសហរដ្ឋអាម៉េរិកនិងអង់គ្លេស។ ការដឹងអំពីនេះធ្វើឲ្យយើងមានទស្សនៈផ្សេងអំពីព្រឹត្តិការណ៍ដែលយើងកំពុងឃើញនៅសព្វថ្ងៃ។
អ្នកនឹងយល់អំពីមូលហេតុដែលលោកយេស៊ូបានប្រាប់ពួកអ្នកកាន់តាមលោកឲ្យកាន់ជំហរអព្យាក្រឹតក្នុងរឿងនយោបាយ។ (យ៉ូហាន ១៧:១៦) បន្ថែមទៅទៀត អ្នកនឹងយល់អំពីមូលហេតុដែលលោកយេស៊ូក្នុងនាមជាអ្នកដែលព្រះបានរើសតាំងឲ្យគ្រប់គ្រងក្នុងរាជាណាចក្ររបស់ព្រះ បានមានប្រសាសន៍ថា៖«រាជាណាចក្រខ្ញុំមិនមែនជារបស់ពិភពលោកនេះទេ»។—យ៉ូហាន ១៨:៣៦
អ្នកនឹងមានទំនុកចិត្តថាមិនយូរទៀត រាជាណាចក្រព្រះនឹងកែប្រែអ្វីៗទាំងអស់ឲ្យល្អប្រសើរឡើងវិញ ហើយនាំឲ្យមានពរដ៏អស្ចារ្យដល់មនុស្សជាតិដូចដែលព្រះបានសន្យា។—ការបើកបង្ហាញ ២១:៣, ៤
នៅថ្ងៃអនាគត ការព្រួយបារម្ភអំពីសង្គ្រាមរវាងជាតិសាសន៍ផ្សេងៗដែលបំផ្លិចបំផ្លាញផែនដី នឹងលែងមានទៀត។—ចម្រៀងសរសើរព្រះ ៣៧:១១, ២៩
ទំនាយដានីយ៉ែលបង្ហាញថាសហរដ្ឋអាម៉េរិកនិងអង់គ្លេសដែលតំណាងដោយប្រអប់ជើងនៃរូបធំសម្បើម គឺជាមហាអំណាចចុងក្រោយដែលគ្រប់គ្រងមនុស្សជាតិ។ យើងពិតជារំភើបចិត្តណាស់ព្រោះបន្ទាប់ពីនោះ រាជាណាចក្ររបស់ព្រះដែលជារដ្ឋាភិបាលល្អឥតខ្ចោះនឹងគ្រប់គ្រងពីស្ថានសួគ៌ជំនួសវិញ។
ដើម្បីស្វែងយល់ថារាជាណាចក្ររបស់ព្រះនឹងធ្វើអ្វីខ្លះសម្រាប់មនុស្សជាតិ សូមទស្សនាវីដេអូតើរាជាណាចក្ររបស់ព្រះជាអ្វី?
a សូមមើលប្រអប់«តើមហាអំណាចពិភពលោកណាខ្លះដែលទំនាយដានីយ៉ែលបានរៀបរាប់?»។
b យេហូវ៉ាគឺជានាមរបស់ព្រះ។ (ចម្រៀងសរសើរព្រះ ៨៣:១៨) សូមមើលអត្ថបទដែលមានចំណងជើងថា«តើព្រះយេហូវ៉ាជានរណា?»។