តើគម្ពីរចែងយ៉ាងណាអំពីបុណ្យណូអែល?
ចម្លើយពីគម្ពីរ
គម្ពីរមិនបានចែងអំពីថ្ងៃកំណើតរបស់លោកយេស៊ូទេ ហើយក៏មិនបានចែងថាយើងគួរធ្វើបុណ្យខួបកំណើតរបស់លោកយេស៊ូដែរ។ សព្វវចនាធិប្បាយមួយបានរៀបរាប់ថា៖«ព្រះមិនបានបង្គាប់ឲ្យធ្វើបុណ្យណូអែលទេ ហើយក្នុងគម្ពីរសញ្ញាថ្មីក៏មិនបានចែងអំពីការធ្វើបុណ្យនេះដែរ»(McClintock and Strong’s Cyclopedia)។
ផ្ទុយទៅវិញ ពេលពិនិត្យមើលប្រវត្តិសាស្ត្រនៃបុណ្យណូអែល យើងឃើញថាបុណ្យនេះមានដើមកំណើតមកពីទំនៀមទម្លាប់សាសនាផ្សេងដែលមិនមែនជាគ្រិស្តសាសនា។ គម្ពីរបង្ហាញថា ព្រះមិនពេញចិត្តទេ បើយើងព្យាយាមគោរពប្រណិប័តន៍លោកតាមរបៀបមិនត្រឹមត្រូវ។—ដំណើរចាកចេញ ៣២:៥-៧
ប្រវត្តិនៃទំនៀមទម្លាប់បុណ្យណូអែល
១. ការធ្វើខួបកំណើតលោកយេស៊ូ៖ សព្វវចនាធិប្បាយមួយបានរៀបរាប់ថា៖«គ្រិស្តសាសនិកនៅសម័យដើមមិនបានធ្វើខួបកំណើត[លោកយេស៊ូ]ទេ ព្រោះពួកគេចាត់ទុកថាការធ្វើខួបកំណើតអ្នកណាម្នាក់ គឺជាទំនៀមទម្លាប់របស់ពួកអ្នកដែលមិនកាន់សាសនាគ្រិស្ត»(The World Book Encyclopedia)។
២. ថ្ងៃទី២៥ ខែធ្នូ៖ តាមពិត គ្មានភស្ដុតាងណាដែលបញ្ជាក់ថា លោកយេស៊ូបានកើតនៅថ្ងៃនោះទេ។ មេដឹកនាំសាសនាគ្រិស្តទំនងជាបានសម្រេចយកថ្ងៃនោះជាថ្ងៃកំណើតលោកយេស៊ូ ដើម្បីឲ្យត្រូវនឹងថ្ងៃបុណ្យផ្សេងៗដែលគេធ្វើឡើងដើម្បីអបអរបាតុភូតវិនធើសូលស្ទីស(winter solstice)។
៣. ពិធីជប់លៀងអបអរ និងការជូនអំណោយគ្នា៖ សព្វវចនាធិប្បាយមួយបានរៀបរាប់ថា៖«ទំនៀមទម្លាប់ផ្សេងៗនៃបុណ្យណូអែលបានកើតចេញពីពិធីបុណ្យមួយឈ្មោះថាសាត់ធើនណាលា(Saturnalia) ដែលជាពិធីបុណ្យរបស់ជនជាតិរ៉ូម ហើយគេប្រារព្ធឡើងនៅពាក់កណ្ដាលខែធ្នូ។ ក្នុងបុណ្យនេះ គេមានទម្លាប់ធ្វើពិធីជប់លៀងអបអរ ជូនអំណោយគ្នា និងមានការដុតទៀនផងដែរ»(Encyclopedia Americana)។ សព្វវចនាធិប្បាយមួយទៀតបានរៀបរាប់ថា៖«ក្នុងអំឡុងពេលបុណ្យនេះ កន្លែងធ្វើការនិងកន្លែងលក់ដូរត្រូវបិទទាំងអស់»(Encyclopædia Britannica)។
៤. ភ្លើងបុណ្យណូអែល៖ សព្វវចនាធិប្បាយមួយបានរៀបរាប់ថា៖«ជនជាតិអឺរ៉ុបបានតុបតែងលម្អផ្ទះរបស់ពួកគេដោយអំពូលភ្លើងផ្សេងៗនិងដើមឈើពណ៌បៃតង ដើម្បីអបអរបាតុភូតវិនធើសូលស្ទីស និងដើម្បីបណ្ដេញពួកវិញ្ញាណអាក្រក់»(The Encyclopedia of Religion)។
៥. ដើមមិស័លថូ(Mistletoe) និងដើមហូលី(holly)៖ ដើមទាំងនេះគេនិយមយកមកតុបតែងលម្អនៅថ្ងៃបុណ្យណូអែល។ សព្វវចនាធិប្បាយមួយបានរៀបរាប់ថា៖«គ្រូវេទមន្តជឿថាដើមមិស័លថូជាអ្វីដែលស័ក្តិសិទ្ធិ ហើយផ្លែហូលីជានិមិត្តសញ្ញានៃការមានពន្លឺព្រះអាទិត្យឡើងវិញ»(The Encyclopedia Americana)។
៦. ដើមឈើណូអែល៖ សព្វវចនាធិប្បាយមួយបានរៀបរាប់ថា៖«ការគោរពបូជាដើមឈើ ច្រើនតែនិយមធ្វើដោយជនជាតិអឺរ៉ុប។ ទោះជាក្រោយពីពួកគេប្ដូរមកកាន់សាសនាគ្រិស្តក៏ដោយ ក៏ពួកគេនៅតែបន្តគោរពបូជាដើមឈើដែរ»។ គេធ្វើទំនៀមទម្លាប់នោះ«នៅពាក់កណ្ដាលរដូវរងា ដោយកាត់ដើមយូល(Yule)ដាក់តាំងនៅច្រកចូលផ្ទះឬក្នុងផ្ទះតែម្ដង»(Encyclopædia Britannica)។