តើអ្នកអាចយកឈ្នះអារម្មណ៍ខ្លាចស្លាប់តាមរបៀបណា?
ចម្លើយពីគម្ពីរ
សេចក្ដីស្លាប់ប្រៀបដូចជាសត្រូវរបស់មនុស្ស។ ដូច្នេះធម្មតាទេដែលយើងខ្លាចស្លាប់ ហើយយើងខំព្យាយាមធ្វើយ៉ាងណាដើម្បីការពារជីវិតរបស់យើង។ (កូរិនថូសទី១ ១៥:២៦) ប៉ុន្តែ ការខ្លាចដែលមិនសមហេតុសមផលចំពោះសេចក្ដីស្លាប់ និងមានមូលដ្ឋានពីសេចក្ដីបង្រៀនមិនពិតឬជំនឿឆ្វេង អាចធ្វើឲ្យមនុស្សទៅ«ជាខ្ញុំបម្រើអស់មួយជីវិត»ចំពោះការខ្លាចនោះ។ (ហេប្រឺ ២:១៥) ពេលអ្នកដឹងការពិតអំពីសេចក្ដីស្លាប់ នោះនឹងជួយរំដោះអ្នកពីការខ្លាចស្លាប់ដែលធ្វើឲ្យអ្នកបាត់បង់ភាពសប្បាយរីករាយក្នុងជីវិត។—យ៉ូហាន ៨:៣២
ការពិតអំពីសេចក្ដីស្លាប់
មនុស្សស្លាប់ឥតដឹងអ្វីឡើយ។ (ចម្រៀងសរសើរព្រះ ១៤៦:៤) អ្នកមិនចាំបាច់ខ្លាចឈឺចាប់ឬរងទារុណកម្មក្រោយពេលអ្នកស្លាប់នោះទេ ព្រោះគម្ពីរប្រៀបប្រដូចសេចក្ដីស្លាប់ទៅនឹងការដេកលក់។—ចម្រៀងសរសើរព្រះ ១៣:៣; យ៉ូហាន ១១:១១-១៤
មនុស្សស្លាប់មិនអាចធ្វើបាបយើងទេ។ ទោះជាពីមុនគាត់ធ្លាប់ជាសត្រូវនឹងយើង ហើយប្រព្រឹត្តដ៏សាហាវមកលើយើងក្ដី តែពេលគាត់ស្លាប់ទៅគាត់មិនអាចធ្វើបាបយើងបានឡើយ។ គម្ពីរចែងថា៖«ការស្អប់ និងការច្រណែនរបស់ពួកគេ បានវិនាសបាត់ទៅហើយ»។—អ្នកទូន្មាន ៩:៦
សេចក្ដីស្លាប់មិនមានឥទ្ធិពលមកលើយើងរហូតឡើយ។ ព្រោះព្រះនឹងប្រោសមនុស្សដែលបានស្លាប់ ឲ្យរស់ឡើងវិញ។—យ៉ូហាន ៥:២៨, ២៩; សកម្មភាព ២៤:១៥
ព្រះបានសន្យាថានឹងមានគ្រាមួយដែល«សេចក្ដីស្លាប់នឹងលែងមានទៀត»។ (ការបើកបង្ហាញ ២១:៤) គម្ពីរចែងអំពីគ្រានោះថា៖«មនុស្សសុចរិតនឹងបានផែនដីជាមត៌ក ហើយពួកគេនឹងរស់នៅផែនដីជារៀងរហូត»។ ពួកគេនឹងលែងខ្លាចសេចក្ដីស្លាប់ទៀត។—ចម្រៀងសរសើរព្រះ ៣៧:២៩