តើតាមរបៀបណាគ្រឿងអេឡិចត្រូនិកមានឥទ្ធិពលទៅលើ ចំណងអាពាហ៍ពិពាហ៍របស់អ្នក?
ពេលយើងប្រើគ្រឿងអេឡិចត្រូនិកតាមរបៀបត្រឹមត្រូវ នេះនឹងជួយពង្រឹងភាពជិតស្និទ្ធរវាងប្ដីនិងប្រពន្ធ។ ជាឧទាហរណ៍ វាអាចជួយឲ្យប្ដីនិងប្រពន្ធទាក់ទងគ្នានៅគ្រប់ពេលវេលា។
ប៉ុន្តែ ប្ដីប្រពន្ធខ្លះប្រើគ្រឿងអេឡិចត្រូនិកក្នុងរបៀបដែលមិនត្រឹមត្រូវ ហើយនេះនាំឲ្យ...
លែងសូវចំណាយពេលជាមួយគ្នា។
ចំណាយពេលធ្វើការនៅផ្ទះដោយមិនចាំបាច់។
លែងទុកចិត្តហើយលែងស្មោះត្រង់នឹងគ្នា។
អ្វីដែលអ្នកត្រូវដឹង
ពេលនៅជាមួយគ្នា
ប្ដីម្នាក់ឈ្មោះម៉ៃឃឺលបាននិយាយថា៖ «ជួនកាល ពេលខ្ញុំនិងប្រពន្ធនៅជាមួយគ្នា គាត់មិនសូវបង្ហាញការយកចិត្តទុកដាក់ចំពោះខ្ញុំសោះដោយសារគាត់រវល់ឆែកមើលទូរស័ព្ទរបស់គាត់ ហើយគាត់និយាយថា៖ ‹ខ្ញុំមិនបានឆែកទូរស័ព្ទរហូតមកដល់ឥឡូវ›»។ ប្ដីម្នាក់ទៀតឈ្មោះយ៉ូណាថានបាននិយាយថា ក្នុងស្ថានភាពបែបនេះ«គូអាពាហ៍ពិពាហ៍អាចនៅជិតគ្នា ប៉ុន្តែពួកគេគ្មានភាពជិតស្និទ្ធជាមួយគ្នានោះទេ»។
សូមគិតអំពីនេះ: រាល់ដងដែលអ្នកចំណាយពេលជាមួយគូអាពាហ៍ពិពាហ៍របស់អ្នក តើមានគេតេទូរស័ព្ទឬផ្ញើសារមកអ្នកជាញឹកញយដែរឬទេ?—អេភេសូរ ៥:៣៣
ការងារ
មនុស្សខ្លះមានការងារដែលតម្រូវឲ្យពួកគេលើកទូរស័ព្ទឬឆ្លើយតបអ៊ីម៉ែលទោះបីជាពួកគេនៅផ្ទះក៏ដោយ។ ចំណែកអ្នកឯទៀតវិញ ទោះបីជាពួកគេមានការងារដែលមិនតម្រូវឲ្យពួកគេធ្វើដូច្នេះក្ដី ពួកគេនៅតែធ្វើការច្រើនម៉ោងពេលនៅផ្ទះ។ ប្ដីម្នាក់ឈ្មោះលីបានសារភាពថា៖ «សម្រាប់ខ្ញុំគឺពិតជាពិបាកបើមិនឲ្យលើកទូរស័ព្ទឬឆ្លើយតបសារពីកន្លែងការងារ នៅពេលដែលខ្ញុំកំពុងតែចំណាយពេលជាមួយនឹងប្រពន្ធខ្ញុំ»។ ប្រពន្ធម្នាក់ឈ្មោះចូអីបាននិយាយថា៖ «ដោយសារខ្ញុំធ្វើការពីផ្ទះ ដូច្នេះពិតជាពិបាកឲ្យខ្ញុំដឹងថាគួរឈប់ធ្វើការនៅពេលណា។ នេះមានន័យថាខ្ញុំត្រូវព្យាយាមដើម្បីមានតុល្យភាពក្នុងការងារនេះ»។
សូមគិតអំពីនេះ: តើអ្នកយកចិត្តទុកដាក់ស្ដាប់ពេលដែលប្ដីឬប្រពន្ធរបស់អ្នកកំពុងតែនិយាយមកកាន់អ្នកដែរឬទេ?—លូកា ៨:១៨
ភាពស្មោះត្រង់
មនុស្សជាច្រើនបានប្រាប់ថា មូលហេតុដែលពួកគេឈ្លោះប្រកែកជាមួយនឹងគូរបស់ខ្លួន គឺដោយសារតែពួកគេសង្ស័យទៅលើអ្វីដែលគូបានបង្ហោះនៅលើបណ្ដាញគេហទំព័រដើម្បីទាក់ទងគ្នា។ មនុស្សខ្លះបានសារភាពថាពួកគេបានបង្ហោះព័ត៌មានសម្ងាត់មួយចំនួនដែលមិនចង់ឲ្យគូរបស់ខ្លួនដឹង។
ហេតុនេះហើយ មនុស្សជាច្រើនជឿថាបណ្ដាញគេហទំព័រសម្រាប់ទាក់ទងគ្នា«អាចនាំឲ្យមានគ្រោះថ្នាក់យ៉ាងខ្លាំងដល់ប្ដីប្រពន្ធ» ហើយអាចធ្វើឲ្យ«ពួកគេផិតក្បត់នឹងគូរបស់ខ្លួនយ៉ាងងាយស្រួល»។ មិនមែនជាការភ្ញាក់ផ្អើលទេដែលមេធាវីនិយាយថា បណ្ដាញគេហទំព័រសម្រាប់ទាក់ទងគ្នាគឺជាមូលហេតុដ៏សំខាន់មួយដែលបណ្ដាលឲ្យមានការលែងលះគ្នានៅសព្វថ្ងៃនេះ។
សូមគិតអំពីនេះ: តើអ្នកបានលាក់បាំងទំនាក់ទំនងរបស់អ្នកជាមួយនឹងបុគ្គលផ្សេងទៀតដែលមានភេទផ្ទុយពីអ្នកពីប្ដីឬប្រពន្ធរបស់អ្នកឬទេ?—សុភាសិត ៤:២៣
អ្វីដែលអ្នកអាចធ្វើ
គិតពីអ្វីដែលសំខាន់
អ្នកដែលមិនបរិភោគអាហារនឹងមិនអាចមានសុខភាពល្អបានទេ។ ស្រដៀងគ្នាដែរ បើបុគ្គលម្នាក់មិនចំណាយពេលជាមួយនឹងគូរបស់ខ្លួន ពួកគេក៏នឹងមានបញ្ហាក្នុងចំណងអាពាហ៍ពិពាហ៍ដែរ។—អេភេសូរ ៥:២៨, ២៩
គោលការណ៍គម្ពីរ: «ពិចារណាឲ្យដឹងប្រាកដថាការអ្វីដែលសំខាន់ជាង»។—ភីលីព ១:១០
សូមជ្រើសរើសយោបល់ដែលអ្នកចង់ធ្វើតាមឬសរសេរគំនិតរបស់អ្នកផ្ទាល់ ដើម្បីមិនឲ្យគ្រឿងអេឡិចត្រូនិកបង្ករឲ្យមានបញ្ហាក្នុងចំណងអាពាហ៍ពិពាហ៍របស់អ្នក។
ញ៉ាំបាយជាមួយគ្នាយ៉ាងហោចណាស់ម្ដងក្នុងមួយថ្ងៃ
កំណត់ពេលវេលាមិនប្រើគ្រឿងអេឡិចត្រូនិក
រៀបចំពេលវេលាដើម្បីធ្វើអ្វីពិសេសជាមួយគ្នា
បិទគ្រឿងអេឡិចត្រូនិកហើយទុកវាឲ្យឆ្ងាយពីកន្លែងដែលយើងគេង
កំណត់ពេល១៥នាទីជារៀងរាល់ថ្ងៃដើម្បីនិយាយជាមួយគ្នាដោយគ្មានគ្រឿងអេឡិចត្រូនិកមករំខាន
កំណត់ពេលដើម្បីបិទប្រព័ន្ធអ៊ីនធឺណិតជាទៀងទាត់