ការបង្ហាញការគោរពចំពោះក្រុមគ្រួសារ
មូលហេតុដែលការបង្ហាញការគោរពចំពោះក្រុមគ្រួសារគឺសំខាន់
ពេលដែលសមាជិកក្រុមគ្រួសារបង្ហាញការគោរពចំពោះគ្នាទៅវិញទៅមក នេះនាំឲ្យក្រុមគ្រួសារមានសុភមង្គល ហើយប្ដី ប្រពន្ធ និងកូនៗមានភាពកក់ក្ដៅ។
សៀវភៅមួយអំពីអាពាហ៍ពិពាហ៍ (The Seven Principles for Making Marriage Work) បានរៀបរាប់ថា នៅពេលដែលគូអាពាហ៍ពិពាហ៍បង្ហាញការគោរពចំពោះគ្នាទៅវិញទៅមក នោះពួកគេបង្ហាញសេចក្ដីស្រឡាញ់ចំពោះគ្នា«មិនគ្រាន់តែក្នុងរឿងធំដុំប៉ុណ្ណោះទេ តែក្នុងរឿងតូចតាចក្នុងជីវិតប្រចាំថ្ងៃផងដែរ»។
យោងទៅតាមការស្រាវជ្រាវមួយបានឲ្យដឹងថា ក្មេងៗដែលចេះបង្ហាញការគោរពចំពោះអ្នកឯទៀតច្រើនតែឲ្យតម្លៃខ្លួន មានទំនាក់ទំនងល្អជាមួយឪពុកម្ដាយ ហើយមិនសូវមានបញ្ហាខាងផ្លូវចិត្តទេ។
អ្វីដែលអ្នកអាចធ្វើ
ពិគ្រោះជាមួយក្រុមគ្រួសាររបស់អ្នក។ ដំបូង យើងត្រូវប្រាកដថាសមាជិកម្នាក់ៗក្នុងក្រុមគ្រួសារយល់អំពីអត្ថន័យនៃការបង្ហាញការគោរពចំពោះគ្នាទៅវិញទៅមក។ បន្ទាប់មកសរសេរអ្វីដែលសមាជិកម្នាក់ៗក្នុងក្រុមគ្រួសារយល់ស្របថា ជាការប្រព្រឹត្តដែលត្រឹមត្រូវឬជាការប្រព្រឹត្តដែលគួរជៀសវាង។ ក្រោយមក ពិគ្រោះគ្នាឲ្យដឹងច្បាស់ថាសមាជិកម្នាក់ៗត្រូវធ្វើអ្វីខ្លះដើម្បីបង្ហាញការគោរព។
ធ្វើជាគំរូល្អ។ សូមពិនិត្យមើលការប្រព្រឹត្តរបស់អ្នក។ តើអ្នករិះគន់សមាជិកក្រុមគ្រួសាររបស់អ្នកដោយសារកំហុសរបស់ពួកគេឬទេ? តើអ្នកសើចចំអកចំពោះទស្សនៈរបស់ពួកគេទេ? ពេលដែលពួកគេនិយាយជាមួយអ្នក តើអ្នកមិនអើពើឬនិយាយកាត់ពួកគេទេ?
យោបល់៖ ចាត់ទុកការគោរពថាជាអ្វីដែលអ្នកត្រូវតែបង្ហាញចំពោះគូនិងកូនៗរបស់អ្នក ដោយមិនគិតថាពួកគេត្រូវធ្វើអ្វីមួយសិនដើម្បីសមនឹងទទួលការគោរពពីអ្នកឡើយ។
បង្ហាញការគោរពទោះជាអ្នកមិនយល់ស្របនឹងគ្នាក្ដី។ ពេលប្រាប់អំពីអារម្មណ៍របស់ខ្លួន សូមជៀសវាងពីការនិយាយថា«អ្នកតែងតែ» ឬ«អ្នកមិនដែល»។ ជាឧទាហរណ៍ «អ្នកតែងតែរវល់» ឬ«អ្នកមិនដែលជួយខ្ញុំទេ»។ ពាក្យសម្ដីបែបនេះអាចធ្វើឲ្យសមាជិកក្រុមគ្រួសាររបស់អ្នកឈឺចិត្ត ហើយអាចនាំឲ្យរឿងតូចតាចទៅជារឿងធំ។
អ្វីដែលសាក្សីព្រះយេហូវ៉ាកំពុងធ្វើ
សាក្សីព្រះយេហូវ៉ាលើកទឹកចិត្តសមាជិកក្រុមគ្រួសារឲ្យប្រព្រឹត្តចំពោះគ្នាដោយការគោរពដោយរៀបចំអត្ថបទផ្សេងៗ សៀវភៅ និងវីដេអូដែលមនុស្សទូទៅអាចមើលបានដោយឥតគិតថ្លៃ។
សម្រាប់គូអាពាហ៍ពិពាហ៍៖ អត្ថបទតភាគជំនួយសម្រាប់ក្រុមគ្រួសារអាចជួយប្ដីប្រពន្ធឲ្យ . . .
ធ្វើជាអ្នកស្ដាប់ដ៏ល្អ
មិនឈប់និយាយរកគ្នា
ឈប់ឈ្លោះប្រកែកគ្នា
(ស្វែងរក«ជំនួយសម្រាប់ក្រុមគ្រួសារ»នៅគេហទំព័រjw.org/km)
សម្រាប់ឪពុកម្ដាយ៖ អត្ថបទតភាគជំនួយសម្រាប់ក្រុមគ្រួសារអាចជួយឪពុកម្ដាយបង្ហាត់បង្រៀនកូនៗឲ្យ . . .
ស្ដាប់បង្គាប់
ជួយកិច្ចការផ្ទះ
និយាយ«សូម»និង«អរគុណ»
(ស្វែងរក«ការចិញ្ចឹមអប់រំកូន» និង«ការចិញ្ចឹមអប់រំកូនវ័យជំទង់»នៅគេហទំព័រjw.org/km)
សូមមើលអត្ថបទបន្ថែម«មេរៀនសំខាន់ៗ៦យ៉ាងសម្រាប់កូនក្មេង» ក្នុងទស្សនាវដ្ដីភ្ញាក់រឭក! លេខ២ ឆ្នាំ២០១៩ និង «គន្លឹះ១២យ៉ាងសម្រាប់ក្រុមគ្រួសារ» ក្នុងទស្សនាវដ្ដីភ្ញាក់រឭក! លេខ២ ឆ្នាំ២០១៨ ទំព័រ៨-១១។ (ស្វែងរកអត្ថបទទាំងនេះនៅគេហទំព័រjw.org/km)
សម្រាប់យុវវ័យ៖ នៅក្នុងផ្នែកក្មេងជំទង់និងយុវវ័យនៅjw.org មានអត្ថបទ វីដេអូ និងក្រដាសលំហាត់ដែលអាចជួយប្អូនៗវ័យក្មេងឲ្យ . . .
មានទំនាក់ទំនងល្អជាមួយឪពុកម្ដាយនិងបងប្អូន
និយាយជាមួយឪពុកម្ដាយអំពីច្បាប់ដែលពួកគាត់កំណត់ឲ្យដោយការគោរព
ទទួលការទុកចិត្តពីឪពុកម្ដាយ
(ស្វែងរក«ក្មេងជំទង់និងយុវវ័យ» នៅគេហទំព័រjw.org/km)
អ្នកអាចប្រើប្រាស់គេហទំព័រjw.orgដោយឥតគិតថ្លៃ។ អ្នកមិនចាំបាច់បង់ថ្លៃសេវាឬចុះឈ្មោះធ្វើជាសមាជិកនោះទេ ហើយអ្នកក៏មិនចាំបាច់ផ្ដល់ព័ត៌មានផ្ទាល់ខ្លួនដើម្បីចូលគេហទំព័រនេះដែរ។