៣
បុរសនិងស្ត្រីទីមួយ
តើមានអ្វីខុសប្លែកក្នុងរូបភាពនេះទេ? ត្រូវហើយ គឺមានមនុស្សនៅក្នុងរូបភាពនេះ។ ពួកគេជាបុរសនិងស្ត្រីទីមួយ។ តើអ្នកណាបានបង្កើតពួកគេមក? ព្រះបានបង្កើតពួកគេ។ តើអ្នកស្គាល់ព្រះនាមទ្រង់ទេ? ព្រះនាមទ្រង់ជា យេហូវ៉ា។ ហើយបុរសនិងស្ត្រីនេះឈ្មោះ អ័ដាមនិងអេវ៉ា។
នេះជារបៀបដែលព្រះយេហូវ៉ាបានបង្កើតអ័ដាម។ ទ្រង់បានយកធូលីដីមក ហើយពីធូលីដីនោះ ទ្រង់បានសូនធ្វើជារាងកាយ គឺជារាងកាយបុរស។ ហើយទ្រង់ក៏ផ្លុំខ្យល់ទៅក្នុងរន្ធច្រមុះបុរសនោះ ហើយអ័ដាមក៏បានមានជីវិតរស់ឡើង។
ព្រះយេហូវ៉ាមានកិច្ចការសំរាប់ឲ្យអ័ដាមធ្វើ។ ទ្រង់បានមានបន្ទូលប្រាប់អ័ដាមឲ្យដាក់ឈ្មោះសត្វគ្រប់ប្រភេទទាំងអស់។ អ័ដាមប្រហែលជាបានសង្កេតមើលសត្វជាយូរយារមកហើយ ដូច្នេះគាត់ក៏អាចរើសឈ្មោះដ៏ល្អៗសំរាប់សត្វទាំងអស់នោះ។ កាលដែលអ័ដាមកំពុងតែដាក់ឈ្មោះសត្វទាំងឡាយនោះ គាត់ចាប់ផ្ដើមមើលឃើញអ្វីមួយ។ តើអ្នកដឹងនោះជាអ្វីទេ?
សត្វទាំងអស់សុទ្ធតែមានគូ។ គឺមានដំរីឈ្មោលនិងដំរីញី ហើយមានសិង្ហឈ្មោលនិងសិង្ហញី។ ប៉ុន្តែ អ័ដាមមិនមានអ្នកណាមួយជាគូរបស់គាត់ទេ។ ដូច្នេះ ព្រះយេហូវ៉ាបានធ្វើឲ្យអ័ដាមដេកលក់ស៊ប់ទៅ ហើយទ្រង់បានយកឆ្អឹងជំនីមួយពីចំហៀងខ្លួនរបស់គាត់។ ដោយប្រើឆ្អឹងជំនីនេះ ព្រះយេហូវ៉ាបានបង្កើតស្ត្រីសំរាប់អ័ដាម ហើយនាងក៏បានទៅជាប្រពន្ធរបស់គាត់។
ឥឡូវនេះអ័ដាមមានចិត្តសប្បាយណាស់! ហើយសូមពិចារណាទៅមើល នាងអេវ៉ាក៏មុខជាបានសប្បាយចិត្តណាស់ដែរ ដោយបានរស់នៅក្នុងសួនច្បារដ៏ល្អបំព្រងបែបនេះ! ឥឡូវនេះ ពួកគេអាចមានកូនចៅ ហើយរស់នៅជាមួយគ្នាដោយសុភមង្គល។
ព្រះយេហូវ៉ាមានព្រះហឫទ័យចង់ឲ្យអ័ដាមនិងនាងអេវ៉ារស់នៅជានិរន្តរ៍។ ទ្រង់ចង់ឲ្យពួកគេ ធ្វើផែនដីទាំងមូលឲ្យបានដូចសួនច្បារអេដែននេះអញ្ចឹង។ អ័ដាមនិងនាងអេវ៉ាមុខជាបានសប្បាយចិត្តណាស់ កាលដែលគេគិតអំពីកិច្ចការនេះ! តើអ្នកចង់ចូលរួមក្នុងការធ្វើឲ្យផែនដី ទៅជាសួនច្បារមួយដ៏ស្អាតទេ? ប៉ុន្តែ សុភមង្គលរបស់អ័ដាមនិងនាងអេវ៉ា មិនបានមានយូរទេ។ សូមឲ្យយើងស្វែងរកនូវមូលហេតុនៃរឿងនេះ។
ទំនុកដំកើង ៨៣:១៨; លោកុប្បត្តិ ១:២៦-៣១; ២:៧-២៥