១៩
យ៉ាកុបមានគ្រួសារដ៏ធំមួយ
សូមមើលគ្រួសារដ៏ធំនេះ។ ពួកទាំងនេះជាកូនប្រុស១២នាក់របស់យ៉ាកុប។ ហើយគាត់ក៏មានកូនស្រីខ្លះដែរ។ តើអ្នកស្គាល់ឈ្មោះកូនទាំងអស់នេះទេ? សូមឲ្យយើងរៀនអំពីឈ្មោះរបស់ពួកគេខ្លះ។
លេអាបង្កើតបានកូនឈ្មោះរូបេន ស៊ីម្មាន លេវី និងយូដា។ នៅពេលដែលរ៉ាជែលឃើញថានាងអត់មានកូនសោះ នាងមានចិត្តក្រៀមក្រំណាស់។ ដូច្នេះ នាងក៏ឲ្យបាវស្រីប៊ីលហាទៅយ៉ាកុប ហើយប៊ីលហាមានកូនប្រុសពីរនាក់ឈ្មោះ ដាន់ និងណែបថាលី។ បន្ទាប់មក លេអាក៏ឲ្យបាវស្រីរបស់នាង ស៊ីលផាទៅយ៉ាកុបដែរ ហើយស៊ីលផាបង្កើតបានកូនប្រុសឈ្មោះ កាឌ់ និងអេស៊ើរ។ នៅទីបំផុតលេអាមានកូនប្រុសពីរនាក់ទៀត អ៊ីសាខារ និងសាប់យូល៉ូន។
នៅទីបំផុត រ៉ាជែលបង្កើតបានកូនមួយ។ នាងដាក់ឈ្មោះកូននោះយ៉ូសែប។ នៅពេលក្រោយ យើងនឹងរៀនថែមទៀតអំពីយ៉ូសែប ពីព្រោះគាត់បានទៅជាបុរសដ៏សំខាន់ម្នាក់។ កូនប្រុស១១នាក់ទាំងនេះបានកើតមក នៅគ្រាដែលយ៉ាកុបបានរស់នៅជាមួយឡាបាន់ដែលជាឪពុករបស់រ៉ាជែល។
យ៉ាកុបក៏មានកូនស្រីខ្លះដែរ ប៉ុន្តែព្រះគម្ពីរបានចែងប្រាប់តែអំពីកូនស្រីម្នាក់ទេ ដែលឈ្មោះឌីណា។
ពេលវេលាបានមកដល់ ដែលយ៉ាកុបបានសម្រេចចិត្តនឹងរើចេញពីឡាបាន់ ដើម្បីត្រឡប់ទៅឯស្រុកកាណានវិញ។ ដូច្នេះ គាត់ក៏ប្រមូលរួបរួមគ្រួសារដ៏ធំរបស់គាត់ និងហ្វូងចៀមដ៏ធំនិងហ្វូងគោ រួចក៏ចាប់ផ្ដើមធ្វើដំណើរដ៏ឆ្ងាយទៅ។
ក្រោយពីយ៉ាកុបហើយនិងគ្រួសារបានត្រឡប់មកស្រុកកាណានបានមួយរយៈហើយ រ៉ាជែលក៏បង្កើតបានកូនប្រុសម្នាក់ទៀត។ នេះបានកើតឡើងនៅពេលដែលគេកំពុងធ្វើដំណើរ។ រ៉ាជែលនាងមានការពិបាកសម្រាលកូននោះណាស់ ហើយនាងក៏បានស្លាប់កាលដែលកំពុងតែសម្រាលកូននោះ។ ប៉ុន្តែ ទារកប្រុសមានសុខភាពល្អ។ យ៉ាកុបបានដាក់ឈ្មោះវាបេនយ៉ាមីន។
យើងចង់ចាំឈ្មោះកូនប្រុស១២នាក់របស់យ៉ាកុប ពីព្រោះសាសន៍អ៊ីស្រាអែលទាំងមូលកើតមកពីពួកគេ។ តាមការពិត កុលសម្ព័ន្ធទាំង១២នៃសាសន៍អ៊ីស្រាអែល បានត្រូវដាក់ឈ្មោះតាមកូនប្រុស១០នាក់របស់យ៉ាកុប និងកូនប្រុស២នាក់របស់យ៉ូសែប។ អ៊ីសាកបានរស់នៅយ៉ាងយូរឆ្នាំ ក្រោយពីក្មេងប្រុសទាំងអស់នេះបានកើតមក ហើយគាត់ច្បាស់ជាសប្បាយចិត្តណាស់ ដោយមានចៅប្រុសជាច្រើននោះ។ ប៉ុន្តែ សូមឲ្យយើងពិនិត្យមើលការណ៍ដែលបានកើតឡើងដល់ចៅស្រីរបស់គាត់ឌីណា។
លោកុប្បត្តិ ២៩:៣២-៣៥; ៣០:១-២៦; ៣៥:១៦-១៩; ៣៧:៣៥