២៦
យ៉ូបមានចិត្តស្មោះត្រង់ចំពោះព្រះ
តើអ្នកមានចិត្តអាណិតដល់បុរសឈឺនេះទេ? ឈ្មោះរបស់គាត់ជាយ៉ូប ហើយស្ត្រីនេះជាប្រពន្ធរបស់គាត់។ តើអ្នកដឹងថានាងកំពុងតែនិយាយអ្វីទៅយ៉ូបទេ? ‹ចូរប្រមាថព្រះ ហើយស្លាប់ទៅ›។ សូមឲ្យយើងពិនិត្យមើល នូវហេតុអ្វីបានជានាងនិយាយពាក្យយ៉ាងដូច្នោះ ហើយហេតុអ្វីបានជាយ៉ូបបានរងទុក្ខវេទនាជាច្រើនម្ល៉េះ។
យ៉ូបជាបុរសស្មោះត្រង់ម្នាក់ ដែលបានគោរពតាមព្រះយេហូវ៉ា។ គាត់រស់នៅក្នុងស្រុកអ៊ូស មិនជាឆ្ងាយប៉ុន្មានពីស្រុកកាណានទេ។ ព្រះយេហូវ៉ាទ្រង់ស្រឡាញ់យ៉ូបណាស់ ប៉ុន្តែមានបុគ្គលម្នាក់ដែលបានស្អប់គាត់។ តើអ្នកដឹងបុគ្គលនោះជាអ្នកណាទេ?
វាជាអារក្សសាតាំង។ នៅចាំទេ សាតាំងជាទេវតាអាក្រក់ដែលស្អប់ព្រះយេហូវ៉ា។ វាបានធ្វើឲ្យអ័ដាមនិងនាងអេវ៉ាមិនគោរពតាមព្រះយេហូវ៉ា ហើយវាគិតថា វាអាចធ្វើឲ្យមនុស្សគ្រប់គ្នាមិនគោរពតាមព្រះយេហូវ៉ាបានដែរ។ ប៉ុន្តែ តើវាអាចធ្វើអញ្ចឹងបានទេ? មិនអាចធ្វើបានទេ។ សូមគិតអំពីបុរសនិងស្ត្រីដ៏ស្មោះត្រង់ជាច្រើន ដែលយើងទើបតែបានរៀនមកនោះ។ តើអ្នកអាចរាប់ឈ្មោះគេបានប៉ុន្មាននាក់?
ក្រោយពីយ៉ាកុបនិងយ៉ូសែបបានស្លាប់នៅឯស្រុកអេស៊ីព្ទទៅ យ៉ូបជាមនុស្សដ៏ស្មោះត្រង់បំផុតចំពោះព្រះយេហូវ៉ានៅលើផែនដី។ ព្រះយេហូវ៉ាចង់ឲ្យសាតាំងដឹងថា វាមិនអាចធ្វើឲ្យមនុស្សទាំងអស់ទៅជាអាក្រក់បានទេ ដូច្នេះទ្រង់ក៏មានបន្ទូលថា៖ ‹ចូរមើលយ៉ូបចុះ។ ឃើញគាត់មានចិត្តស្មោះត្រង់ចំពោះអញទេ›។
សាតាំងបានប្រកែកថា៖ ‹គាត់មានសេចក្ដីស្មោះត្រង់មែន ពីព្រោះទ្រង់បានប្រទានពរឲ្យគាត់ ហើយគាត់មានរបស់ដ៏ល្អជាច្រើន។ ប៉ុន្តែ បើទ្រង់ដកយកចេញរបស់ទាំងនោះពីគាត់ នោះគាត់នឹងប្រមាថដល់ទ្រង់ជាមិនខាន›។
ដូច្នេះព្រះយេហូវ៉ាបានមានបន្ទូលថា៖ ‹ចូរអញ្ជើញ យកចេញពីគាត់ចុះ។ ចូរធ្វើរបស់អាក្រក់តាមតែចិត្តឯងដល់យ៉ូបចុះ។ យើងនឹងដឹង បើគាត់នឹងប្រមាថដល់អញ។ ក៏ប៉ុន្តែឯងមិនត្រូវសម្លាប់គាត់ឡើយ›។
ជាបឋម សាតាំងបានធ្វើឲ្យមនុស្សលួចសត្វគោនិងសត្វអូដ្ឋទាំងប៉ុន្មានរបស់យ៉ូប ហើយចៀមរបស់គាត់ក៏ត្រូវគេបានសម្លាប់ចោលដែរ។ បន្ទាប់មក វាបានបណ្ដាលឲ្យមានខ្យល់ព្យុះសម្លាប់កូនប្រុសស្រីទាំង១០នាក់របស់គាត់។ បន្ទាប់មកទៀត សាតាំងក៏បានធ្វើឲ្យយ៉ូបមានជំងឺដ៏អាក្រក់ក្រៃលែង។ យ៉ូបបានរងទុក្ខវេទនាណាស់។ ហេតុដូច្នេះហើយបានជាប្រពន្ធរបស់យ៉ូបប្រាប់គាត់ថា៖ ‹ចូរប្រមាថព្រះ ហើយស្លាប់ទៅ›។ ប៉ុន្តែយ៉ូបមិនព្រមធ្វើឡើយ។ ម្យ៉ាងវិញទៀតមានមិត្តក្លែងក្លាយបីនាក់បានមកប្រាប់យ៉ូបថា គាត់ពីដើមបានដឹកនាំជីវិតដ៏អាក្រក់មួយ។ ប៉ុន្តែ យ៉ូបនៅតែរក្សាសេចក្ដីស្មោះត្រង់ជានិច្ច។
ការនេះបានធ្វើឲ្យព្រះយេហូវ៉ាមានព្រះទ័យរីករាយណាស់ ហើយក្រោយមក ទ្រង់បានប្រទានពរដល់យ៉ូប ដូចជាអ្នកអាចឃើញនៅក្នុងរូបភាពនេះ។ ទ្រង់បានធ្វើឲ្យគាត់ជាពីជំងឺរបស់គាត់។ យ៉ូបក៏មានកូនដ៏ស្អាតៗ១០នាក់ទៀត ហើយមានសត្វគោ ចៀមនិងអូដ្ឋជាច្រើន លើសជាងពីមុនមួយជាពីរ។
តើអ្នកនឹងមានសេចក្ដីស្មោះត្រង់ដល់ព្រះយេហូវ៉ាជានិច្ចដូចយ៉ូបទេ? បើសិនជាមែននោះ ព្រះទ្រង់នឹងប្រទានពរដល់អ្នកដែរ។ អ្នកនឹងអាចរស់នៅជានិរន្តរ៍ នៅពេលដែលផែនដីទាំងមូលនឹងធ្វើឲ្យទៅជាស្អាតដូចសួនច្បារអេដែន។
យ៉ូប ១:១-២២; ២:១-១៣; ៤២:១០-១៧