៥២
គេឌាននិងពួកបុរស៣០០នាក់របស់គាត់
តើអ្នកឃើញអ្វីកំពុងតែកើតឡើងនៅទីនេះទេ? បុរសទាំងនេះជាពួកទាហានអ៊ីស្រាអែល។ ពួកបុរសទាំងនេះកំពុងតែឱនផឹកទឹក។ បុរសដែលឈរនៅជិតគេនោះ ជាចៅហ្វាយឈ្មោះគេឌាន។ គាត់កំពុងតែពិនិត្យមើលរបៀបដែលគេផឹកទឹក។
ចូរមើលឲ្យបានច្បាស់លាស់ នូវរបៀបផ្សេងៗដែលបុរសទាំងនេះកំពុងតែផឹកទឹក។ អ្នកខ្លះបានដាក់មុខទៅនឹងទឹក។ ប៉ុន្តែបុរសម្នាក់បានក្បង់ទឹកនឹងដៃគាត់ ដើម្បីឲ្យគាត់អាចឃ្លាំមើលអ្វីៗនៅជុំវិញខ្លួនគាត់។ នេះជាការសំខាន់ណាស់ ពីព្រោះព្រះយេហូវ៉ាបានមានបន្ទូលប្រាប់គេឌាន ឲ្យជ្រើសរើសតែបុរសណា ដែលចេះប្រយ័ត្នឃ្លាំមើលនៅពេលដែលគេផឹកទឹក។ ព្រះទ្រង់មានបន្ទូលថា ពួកនៅសល់ត្រូវបញ្ជូនឲ្យទៅផ្ទះវិញ។ សូមឲ្យយើងពិនិត្យមើលនូវហេតុនេះ។
ប្រជាជនអ៊ីស្រាអែលមានបញ្ហាធំទៀតហើយ។ មូលហេតុនេះគឺពួកគេមិនបានគោរពតាមព្រះយេហូវ៉ា។ ពួកសាសន៍ម៉ាឌានបានត្រួតត្រាលើពួកគេ ហើយបានធ្វើទុក្ខបៀតបៀនដល់គេ។ ដូច្នេះ ប្រជាជនអ៊ីស្រាអែលបានអង្វរដល់ព្រះយេហូវ៉ាឲ្យជួយ ហើយព្រះយេហូវ៉ាសណ្ដាប់សេចក្ដីអង្វររបស់គេ។
ព្រះយេហូវ៉ាបានមានបន្ទូលប្រាប់គេឌានឲ្យប្រមូលកងទ័ព ដូច្នេះគេឌានក៏ប្រមូលបានពួកទាហាន៣២.០០០នាក់។ ប៉ុន្តែ កងទ័ពពួកសត្រូវមានចំនួន១៣៥.០០០នាក់ដែលទាស់នឹងស្រុកអ៊ីស្រាអែល។ ហើយព្រះយេហូវ៉ានៅតែមានបន្ទូលប្រាប់គេឌានថា៖ ‹ឯងមានបុរសច្រើនណាស់›។ ហេតុអ្វីបានជាព្រះយេហូវ៉ាមានបន្ទូលដូច្នោះ?
ពីព្រោះបើសិនជាស្រុកអ៊ីស្រាអែលឈ្នះសង្គ្រាម គេប្រហែលជាគិតថាគេបានឈ្នះដោយសារខ្លួនគេ។ គេប្រហែលជាគិតថា គេមិនចាំបាច់ត្រូវការជំនួយពីព្រះយេហូវ៉ាដើម្បីឲ្យឈ្នះទេ។ ដូច្នេះព្រះយេហូវ៉ាក៏មានបន្ទូលទៅគេឌានថា៖ ‹ចូរប្រាប់ពួកបុរសដែលមានសេចក្ដីភ័យញ័រឲ្យទៅផ្ទះវិញចុះ›។ នៅពេលដែលគេឌានបានប្រាប់ពួកគេហើយ ពួកទាហាន២២.០០០នាក់ក៏ត្រឡប់ទៅផ្ទះវិញអស់។ នៅសល់តែទាហាន១០.០០០នាក់ប៉ុណ្ណោះ ដើម្បីនឹងប្រយុទ្ធពួកទាហាន១៣៥.០០០នាក់។
ប៉ុន្តែ សូមស្ដាប់! ព្រះយេហូវ៉ាមានបន្ទូលទៀតថា៖ ‹ឯងនៅតែមានបុរសច្រើននៅឡើយ›។ ដូច្នេះ ទ្រង់ក៏មានបន្ទូលប្រាប់គេឌានឲ្យចាត់បុរសទាំងនេះឲ្យទៅផឹកទឹកនៅឯស្ទឹង ហើយបន្ទាប់មកបុរសណាដែលផឹកទឹកឈ្ងោកមុខ នឹងត្រូវបញ្ជូនឲ្យទៅផ្ទះវិញ។ ព្រះយេហូវ៉ាសន្យាថា៖ ‹អញនឹងឲ្យឯងមានជ័យជំនះដោយសារបុរស៣០០នាក់ ដែលចេះប្រយ័ត្នឃ្លាំមើលនៅពេលដែលគេផឹកទឹក›។
ពេលប្រយុទ្ធមកដល់ហើយ។ ដូច្នេះ គេឌានក៏ចែកពួកបុរស៣០០នាក់នោះទៅជាបីក្រុម។ គាត់បានឲ្យត្រែទៅបុរសម្នាក់មួយៗ ហើយនិងក្អមដោយមានចន្លុះនៅក្នុងនោះផង។ នៅពេលជិតកណ្ដាលអធ្រាត្រហើយ គេក៏នាំគ្នាព័ទ្ធជុំវិញជុំរុំរបស់ពួកទាហានសត្រូវ។ បន្ទាប់មក នៅពេលដំណាលគ្នា គេក៏ផ្លុំត្រែរបស់គេទាំងអស់គ្នា ហើយក៏បំបែកក្អមគេ រួចស្រែកឡើងថា៖ ‹នេះហើយជាដាវផងព្រះយេហូវ៉ា ហើយរបស់ផងគេឌានដែរ›! នៅពេលពួកទាហានសត្រូវភ្ញាក់ឡើង ពួកគេច្របូកច្របល់ហើយភ័យខ្លាច។ គេក៏ចាប់ផ្ដើមរត់រប៉ាត់រប៉ាយអស់ ហើយប្រជាជនអ៊ីស្រាអែលក៏បានឈ្នះចម្បាំងនេះទៅ។
ពួកចៅហ្វាយជំពូកទី៦ ទៅ ជំពូកទី៨