៥៨
ដាវីឌនិងកូលីយ៉ាត
ម្ដងនេះទៀត ពួកភីលីស្ទីនលើកទ័ពមកច្បាំងនឹងសាសន៍អ៊ីស្រាអែល។ ឥឡូវនេះ បងច្បងបង្អស់របស់ដាវីឌបីនាក់ បានធ្វើជាទាហានក្នុងទ័ពរបស់ស្តេចសូល។ ដូច្នេះ នៅថ្ងៃមួយ លោកអ៊ីសាយប្រាប់ដាវីឌថា៖ ‹ចូរកូនឯងយកលាជនិងនំប៉័ងខ្លះទៅឲ្យពួកបងៗឯងចុះ។ រួចចូរមើលតើពួកបងឯងសុខសប្បាយ ឬយ៉ាងណា›។
នៅពេលដែលដាវីឌមកដល់ឯទីបោះទ័ព គាត់ក៏រត់ទៅឯកងទ័ពមុខ ដើម្បីនឹងរកបងៗគាត់។ លំដាប់នោះ ទាហានភីលីស្ទីនម្នាក់មានមាឌធំដូចយក្ស ឈ្មោះកូលីយ៉ាត ក៏ចេញមកចំអកដាក់ពួកទាហានអ៊ីស្រាអែល។ វាបានធ្វើយ៉ាងនេះទាំងព្រឹកទាំងល្ងាចអស់រយៈ៤០ថ្ងៃមកហើយ។ វាស្រែកឡើងថា៖ ‹ចូររើសយកមនុស្សម្នាក់នៃពួកឯងមកច្បាំងនឹងអញ។ បើវាឈ្នះ ហើយសម្លាប់អញបាន នោះយើងនឹងធ្វើជាបាវបំរើឯង។ តែបើអញឈ្នះនិងសម្លាប់វាបានវិញ នោះឯងរាល់គ្នានឹងធ្វើជាបាវបំរើយើង។ ពួកអាឯងមិនហ៊ានរើសអ្នកណាមកប្រកួតនឹងអញទេ›។
ដាវីឌសួរពួកទាហានខ្លះថា៖ ‹តើបុរសដែលនឹងសម្លាប់សាសន៍ភីលីស្ទីនម្នាក់នេះ ហើយដោះលែងសាសន៍អ៊ីស្រាអែលពីការអាម៉ាស់មុខនេះ នឹងទទួលរង្វាន់អ្វីខ្លះ›?
ពួកទាហានក៏ឆ្លើយថា៖ ‹ស្តេចសូលនឹងប្រទានឲ្យទ្រព្យសម្បត្ដិជាច្រើនដល់បុរសនោះ ហើយទ្រង់នឹងប្រទានរាជបុត្រីរបស់ទ្រង់ឲ្យធ្វើជាប្រពន្ធរបស់អ្នកនោះ›។
ប៉ុន្តែ ពួកទាហានអ៊ីស្រាអែលទាំងអស់ភ័យខ្លាចកូលីយ៉ាតណាស់ ពីព្រោះវាមានមាឌធំពេក។ វាមានកំពស់ប្រហែលជា៣ម៉ែត្រ ហើយថែមទាំងមានទាហានម្នាក់ទៀតកាន់ខែលឲ្យវាផង។
ពួកទាហានខ្លះក៏ទៅទូលស្តេចសូលថា ដាវីឌចង់ទៅប្រយុទ្ធនឹងកូលីយ៉ាត។ ប៉ុន្តែស្តេចសូលមានបន្ទូលប្រាប់ដាវីឌថា៖ ‹ឯងមិនអាចប្រយុទ្ធនឹងសាសន៍ភីលីស្ទីនម្នាក់នេះបានទេ។ ព្រោះអីឯងនៅក្មេងណាស់ ហើយវាជាមនុស្សស្ទាត់ចម្បាំងតាំងពីក្មេងមកម្ល៉េះ›។ ដាវីឌក៏ទូលប្រាប់ស្តេចសូលថា៖ ‹ទូលបង្គំបានសម្លាប់ខ្លាឃ្មុំ និងសត្វសិង្ហដែលបានចាប់យកកូនចៀមរបស់ឪពុកទូលបង្គំ។ ហើយសាសន៍ភីលីស្ទីនម្នាក់នេះ ក៏នឹងបានដូចសត្វមួយនោះដែរ។ ព្រះយេហូវ៉ានឹងជួយទូលបង្គំ›។ ដូច្នេះស្តេចសូលក៏មានបន្ទូលថា៖ ‹ចូរទៅចុះ សូមឲ្យព្រះយេហូវ៉ាគង់ជាមួយនឹងឯង›។
ដាវីឌក៏ដើរចុះតាមទឹកជ្រោះ ហើយរើសយកក្រួសរលីងៗចំនួនប្រាំគ្រាប់ដាក់ក្នុងថង់យាមរបស់គាត់។ បន្ទាប់មកគាត់ក៏យកខ្សែដង្ហក់របស់គាត់ ហើយដើរឆ្ពោះទៅជួបសាសន៍ភីលីស្ទីនដែលមានមាឌធំដូចយក្សនោះ។ នៅពេលដែលកូលីយ៉ាតក្រឡេកឃើញគាត់ វាក៏ហួសចិត្ត។ វាគិតថា ជាការងាយស្រួលណាស់នឹងសម្លាប់ដាវីឌ។
កូលីយ៉ាតនិយាយថា ‹ចូរមកឯអញចុះ អញនឹងឲ្យសាច់ឯងដល់សត្វស្លាបនិងសត្វព្រៃស៊ី›។ ប៉ុន្តែ ដាវីឌឆ្លើយតបថា៖ ‹ចំណែកឯងបានមកឯអញ ទាំងកាន់ដាវកាន់លំពែង ហើយនិងដែកពួយផង តែឯអញវិញ អញមកឯឯងដោយនូវព្រះនាមរបស់ព្រះយេហូវ៉ា។ នៅថ្ងៃនេះ ព្រះយេហូវ៉ានឹងប្រគល់ឯងមកក្នុងកណ្ដាប់ដៃនៃអញ ហើយអញនឹងវាយសម្លាប់ឯង›។
ខណៈនោះ ដាវីឌក៏រត់ឆ្ពោះទៅកូលីយ៉ាត។ គាត់យកក្រួសមួយគ្រាប់ពីថង់យាមរបស់គាត់ ហើយដាក់ក្រួសនោះនៅក្នុងខ្សែដង្ហក់ រួចក៏គ្រវែងអស់ពីកម្លាំងកាយរបស់គាត់។ ក្រួសនោះក៏បាញ់ត្រូវចំត្រង់ក្បាលកូលីយ៉ាត ហើយវាក៏ដួលស្លាប់ទៅ! កាលពួកទ័ពភីលីស្ទីនឃើញទាហានពូកែឯករបស់គេបានស្លាប់ហើយ នោះពួកគេក៏រត់អស់រលីងទៅ។ ពួកទ័ពអ៊ីស្រាអែលក៏ដេញតាមគេ ហើយបានឈ្នះចម្បាំងនោះទៅ។