៧៩
ដានីយ៉ែលនៅក្នុងរូងសិង្ហ
មើលទៅដូចជាលោកដានីយ៉ែលកំពុងតែមានបញ្ហាច្រើនណាស់។ ប៉ុន្តែ សិង្ហទាំងនេះមិនធ្វើអ្វីដល់លោកដានីយ៉ែលសោះ! តើអ្នកដឹងមកពីហេតុអ្វីទេ? តើអ្នកណាដាក់លោកដានីយ៉ែលឲ្យនៅជាមួយនឹងសិង្ហទាំងនេះ? សូមឲ្យយើងពិនិត្យមើល។
ស្តេចនៃស្រុកបាប៊ីឡូនឥឡូវនេះ ជាបុរសម្នាក់ឈ្មោះដារីយុស។ ទ្រង់សព្វព្រះហឫទ័យនឹងលោកដានីយ៉ែលណាស់ ពីព្រោះដានីយ៉ែលជាមនុស្សមានចិត្តសប្បុរសនិងមានប្រាជ្ញា។ ស្តេចដារីយុសបានរើសតាំងដានីយ៉ែល ឲ្យធ្វើជាមេគ្រប់គ្រងក្នុងព្រះរាជាណាចក្ររបស់ទ្រង់។ នេះបានធ្វើឲ្យបុរសឯទៀតនៅក្នុងព្រះរាជាណាចក្រនោះ មានចិត្តច្រណែននឹងលោកដានីយ៉ែល។ ដូច្នេះហើយនេះជាអ្វីដែលគេធ្វើ។
ពួកគេបានទៅឯស្តេចដារីយុសហើយទូលថា៖ ‹ឱព្រះរាជាអើយ យើងបានជំនុំព្រមគ្នាថា សូមទ្រង់បង្កើតឲ្យមានច្បាប់មួយដែលចែងថា នៅក្នុងរយៈ៣០ថ្ងៃគ្មានអ្នកណាមួយត្រូវអធិស្ឋានដល់ព្រះឬមនុស្សឯណាឡើយ លើកលែងតែទ្រង់ប៉ុណ្ណោះ។ បើមានអ្នកណាមួយមិនគោរពតាម នោះនឹងត្រូវបោះទម្លាក់ចូលទៅក្នុងរូងសិង្ហ›។ ស្តេចដារីយុសមិនដឹងជាហេតុអ្វីបានជាពួកបុរសនេះចង់បង្កើតច្បាប់នេះទេ។ ប៉ុន្តែ ទ្រង់គិតថានេះជាគំនិតដ៏ល្អមួយ ដូច្នេះទ្រង់ក៏សរសេរច្បាប់នោះទៅ។ ឥឡូវនេះ ច្បាប់នោះមិនអាចផ្លាស់ប្ដូរបានឡើយ។
នៅពេលដែលលោកដានីយ៉ែលបានដឹងអំពីច្បាប់នេះ លោកក៏ទៅឯផ្ទះហើយអធិស្ឋាន ដូចកាលដែលលោកបានធ្វើជារៀងរាល់ដង។ ពួកបុរសអាក្រក់ដឹងថា ដានីយ៉ែលនឹងមិនឈប់អធិស្ឋានដល់ព្រះយេហូវ៉ាឡើយ។ ពួកគេសប្បាយចិត្តណាស់ ពីព្រោះគម្រោងការណ៍របស់គេក្នុងការកំចាត់លោកដានីយ៉ែល មើលទៅហាក់បីដូចជាកំពុងតែសម្រេច។
នៅពេលដែលស្តេចដារីយុសជ្រាបដឹងពីមូលហេតុដែលបុរសទាំងនេះ ចង់បង្កើតច្បាប់នេះឡើង ទ្រង់មានព្រះទ័យសោកស្ដាយណាស់។ ប៉ុន្តែ ទ្រង់មិនអាចផ្លាស់ប្ដូរច្បាប់នេះបានឡើយ ដូច្នេះទ្រង់ត្រូវតែបង្គាប់ឲ្យគេយកដានីយ៉ែលបោះចូលទៅក្នុងរូងសិង្ហ។ ប៉ុន្តែ ស្តេចមានបន្ទូលប្រាប់ដានីយ៉ែលថា៖ ‹ខ្ញុំសង្ឃឹមថាព្រះរបស់ឯង ជាព្រះដែលឯងបំរើនោះនឹងជួយឯង›។
ស្តេចដារីយុសមានព្រះទ័យព្រួយដល់ម្ល៉េះ បានជាទ្រង់ផ្ទំមិនលក់សោះនៅរាត្រីនោះ។ ព្រឹកស្អែកឡើង ទ្រង់ក៏យាងទៅឯរូងសិង្ហ។ អ្នកអាចឃើញទ្រង់នៅទីនោះ។ ទ្រង់ក៏ស្រែកឡើងថា៖ ‹ឱដានីយ៉ែល ជាអ្នកបំរើនៃព្រះដ៏មានព្រះជន្មរស់អើយ! តើព្រះដែលអ្នកគោរពជានិច្ចនោះ អាចជួយឲ្យអ្នករួចពីសិង្ហទាំងឡាយបានឬទេ›?
លោកដានីយ៉ែលទូលឆ្លើយថា៖ ‹ព្រះទ្រង់បានចាត់ទេវតាទ្រង់ ឲ្យមកបិទមាត់សិង្ហទាំងអស់ ដើម្បីមិនឲ្យពួកវាបានប្រទូស្តដល់ទូលបង្គំឡើយ›។
ស្តេចមានព្រះទ័យរីករាយក្រៃលែង។ ទ្រង់ក៏បង្គាប់ឲ្យគេយកដានីយ៉ែលចេញពីរូងមក។ បន្ទាប់មក ទ្រង់ចាត់ឲ្យគេយកពួកបុរសអាក្រក់ដែលចង់កំចាត់លោកដានីយ៉ែលនោះ ឲ្យបោះចូលទៅក្នុងរូងសិង្ហនោះវិញ។ ពួកគេមិនទាន់ទាំងធ្លាក់ដល់បាតរូងផង ស្រាប់តែសិង្ហទាំងនោះក៏ចាប់ត្របាក់ពួកគេ ហើយបំបាក់ឆ្អឹងគេអស់ទៅ។
បន្ទាប់មក ស្តេចដារីយុសសរសេរទៅប្រជាជនទាំងអស់ នៅក្នុងព្រះរាជាណាចក្ររបស់ទ្រង់ថា៖ ‹យើងចេញបង្គាប់ឲ្យមនុស្សគ្រប់គ្នាត្រូវគោរពដល់ព្រះរបស់ដានីយ៉ែល។ ទ្រង់បានសម្ដែងអព្ភូតហេតុដ៏អស្ចារ្យជាច្រើន។ ទ្រង់បានជួយសង្គ្រោះដានីយ៉ែលពីសិង្ហ›។