ជំពូកទី៤
មានផ្ទៃពោះតែមិនទាន់រៀបការ
ម៉ារាមានផ្ទៃពោះបីខែហើយ។ អ្នកនឹងនៅចាំថា ម៉ារាបានទៅលេងអេលីសាបិត នៅពេលដែលគាត់ចាប់មានផ្ទៃពោះដំបូង។ ប៉ុន្តែឥឡូវម៉ារាបានត្រឡប់មកភូមិណាសារ៉ែតវិញហើយ។ មិនយូរប៉ុន្មានទៀត រឿងរបស់ម៉ារាច្បាស់ជាគេដឹងឮសុះសាយទូទៅនៅក្នុងស្រុកភូមិគាត់ជាមិនខាន។ ប្រាកដហើយ ម៉ារាស្ថិតនៅក្នុងស្ថានការណ៍ដ៏ពិបាកមែន!
អ្វីដែលធ្វើឲ្យស្ថានការណ៍នេះកាន់តែពិបាកទៅទៀតនោះ គឺម៉ារាបានភ្ជាប់ពាក្យហើយជាមួយនឹងយ៉ូសែប ដែលជាជាងឈើម្នាក់។ ហើយម៉ារាដឹងថា ក្រោមក្រិត្យវិន័យរបស់ព្រះសំរាប់សាសន៍អ៊ីស្រាអែល បើស្ត្រីម្នាក់ដែលបានភ្ជាប់ពាក្យនឹងបុរសម្នាក់រួចទៅហើយ តែបានទៅរួមដំណេកជាមួយនឹងបុរសម្នាក់ផ្សេងទៀត នោះនឹងត្រូវគេយកដុំថ្មគប់សម្លាប់ចោល។ តើម៉ារាអាចពន្យល់អំពីការមានផ្ទៃពោះនេះដល់យ៉ូសែបយ៉ាងដូចម្ដេចទៅ?
ដោយព្រោះម៉ារាបានទៅកន្លែងឆ្ងាយអស់រយៈបីខែហើយនោះ យើងអាចដឹងប្រាកដថា យ៉ូសែបច្បាស់ជាចង់ជួបមុខនាងខ្លាំងណាស់។ ពេលដែលពួកគាត់ជួបគ្នា ប្រហែលជាម៉ារាបានប្រាប់ដំណឹងនេះដល់យ៉ូសែបហើយ។ ម៉ារាប្រហែលជាខំប្រឹងអស់ពីសមត្ថភាពដើម្បីពន្យល់ថា គឺតាមរយៈវិញ្ញាណបរិសុទ្ធរបស់ព្រះទេ ដែលនាងមានផ្ទៃពោះនោះ។ ក៏ប៉ុន្តែ អ្នកប្រហែលជាអាចយល់ហើយថា នេះគឺជារឿងដែលយ៉ូសែបពិ បាកនឹងជឿណាស់។
យ៉ូសែបដឹងនូវកេរ្ដិ៍ឈ្មោះដ៏ល្អដែលម៉ារាធ្លាប់មាន។ ហើយតាមមើលទៅ គាត់ស្រឡាញ់នាងខ្លាំងណាស់។ ទោះជានាងប្រហែលជាអះអាងយ៉ាងណាក៏ដោយ នេះមើលទៅហាក់ដូចជានាងមានផ្ទៃពោះជាមួយបុរសណាម្នាក់ទៅវិញទេ។ ប៉ុន្តែ យ៉ូសែបមិនចង់ឲ្យគេយកដុំថ្មគប់សម្លាប់នាងចោល ឬបង្ខូចកិត្ដិយសនាងនៅខាងមុខសាធារណជននោះទេ។ ដូច្នេះ គាត់បានសម្រេចចិត្តថានឹងលែងលះនាងដោយស្ងាត់ៗ។ នៅសម័យនោះ បុគ្គលដែលភ្ជាប់ពាក្យហើយ បានត្រូវចាត់ទុកដូចជារៀបការហើយនោះដែរ និងតម្រូវឲ្យមានការលែងលះគ្នាសិន ទើបអាចបញ្ចប់ការភ្ជាប់ពាក្យនោះបាន។
ក្រោយមក កាលដែលយ៉ូសែបកំពុងតែគិតអំពីរឿងទាំងនេះ នោះគាត់ក៏លង់លក់ទៅ។ ទេវតារបស់ព្រះយេហូវ៉ាលេចខ្លួនឲ្យគាត់ឃើញនៅក្នុងសុបិនមួយ ហើយពោលថា៖ «កុំឲ្យខ្លាចនឹងយកនាងម៉ារា ជាប្រពន្ធអ្នកឡើយ ដ្បិតបុត្រដែលមកចាប់ទំផ្ទៃនាង នោះកើតពីព្រះវិញ្ញាណបរិសុទ្ធទេ នាងនឹងប្រសូតបុត្រា១ ហើយអ្នកត្រូវថ្វាយព្រះនាមថា ‹យេស៊ូវ› ព្រោះបុត្រនោះនឹងជួយសង្គ្រោះរាស្ត្រទ្រង់ ឲ្យរួចពីបាប»។
នៅពេលយ៉ូសែបភ្ញាក់ពីការលង់លក់ឡើងវិញ នោះគាត់មានអំណរគុណណាស់! គាត់ក៏ធ្វើតាមបង្គាប់របស់ទេវតាដោយមិនពន្យារពេលឡើយ។ គាត់បានយកម៉ារាមកនៅក្នុងផ្ទះរបស់គាត់។ ជាលទ្ធផល ការនាំយកនាងមកនៅជាមួយក្នុងផ្ទះក្លាយជាពិធីរៀបអាពាហ៍ពិពាហ៍ជាសាធារណៈ ឲ្យបណ្ដាជនឃើញថា យ៉ូសែបនិងម៉ារាឥឡូវគឺបានរៀបការជាផ្លូវការហើយ។ ក៏ប៉ុន្តែ យ៉ូសែបមិនបានរួមដំណេកជាមួយម៉ារាសោះ កាលដែលព្រះយេស៊ូនៅក្នុងផ្ទៃពោះរបស់នាង។
មើលន៍! ម៉ារាមានផ្ទៃពោះជិតគ្រប់ខែហើយ តែយ៉ូសែបកំពុងតែឲ្យនាងជិះលើសត្វលា។ តើពួកគាត់ទៅកន្លែងណា ហើយហេតុអ្វីក៏ពួកគាត់ធ្វើដំណើរដូច្នេះ បើម៉ារាជិតនឹងសម្រាលកូនទៅហើយនោះ? លូកា ១:៣៩-៤១, ៥៦; ម៉ាថាយ ១:១៨-២៥; ចោទិយកថា ២២:២៣, ២៤
▪ តើយ៉ូសែបមានចិត្តគំនិតយ៉ាងណា ពេលដឹងថាម៉ារាមានផ្ទៃពោះនោះ? ហើយហេតុអ្វី?
▪ តើយ៉ូសែបអាចលែងលះម៉ារាយ៉ាងដូចម្ដេចបាន បើពួកគាត់មិនទាន់ទាំងបានរៀបការផងនោះ?
▪ តើយ៉ូសែបនិងម៉ារាធ្វើអ្វីជាសាធារណៈ ទុកជាពិធីរៀបអាពាហ៍ពិពាហ៍របស់ពួកគាត់?