ជំពូកទី១៨
យ៉ូហានអន់ថយព្រះយេស៊ូចំរើនឡើង
បន្ទាប់ពីបុណ្យរំលងនៅនិទាឃរដូវនៅក្នុងឆ្នាំ៣០ ស.យ. នោះព្រះយេស៊ូនិងពួកសិស្សរបស់ទ្រង់ក៏ចាកចេញពីទីក្រុងយេរូសាឡិម។ ក៏ប៉ុន្តែ ព្រះយេស៊ូនិងពួកសិស្សមិនបានត្រឡប់ទៅភូមិកំណើតនៅឯស្រុកកាលីឡេវិញទេ ផ្ទុយទៅវិញគឺធ្វើដំណើរទៅស្រុកយូដា ជាកន្លែងដែលទ្រង់និងពួកសិស្សធ្វើបុណ្យជ្រមុជទឹកឲ្យមនុស្ស។ យ៉ូហានដែលជាអ្នកធ្វើបុណ្យជ្រមុជទឹកឲ្យគេនោះ បានធ្វើកិច្ចការនេះប្រមាណមួយឆ្នាំហើយ និងគាត់នៅតែមានពួកសិស្សនៅជាមួយគាត់នៅឡើយ។
តាមពិត ព្រះយេស៊ូឥតបានធ្វើកិច្ចការខាងបុណ្យជ្រមុជទឹកឲ្យមនុស្សដោយអង្គទ្រង់ផ្ទាល់ទេ។ ប៉ុន្តែពួកសិស្សរបស់ទ្រង់បានធ្វើកិច្ចការនេះក្រោមការបង្គាប់របស់ទ្រង់។ ពិធីជ្រមុជទឹកនៃពួកសិស្សរបស់ទ្រង់គឺតំណាងដូចដែលយ៉ូហានធ្វើនោះដែរ គឺជានិមិត្តរូបនៃការប្រែចិត្តពីបាប ដែលប្រឆាំងនឹងកិច្ចព្រមព្រៀងខាងក្រិត្យវិន័យរបស់ព្រះ។ យ៉ាងណាក៏ដោយ ក្រោយពីដំណើររស់ឡើងវិញរបស់ទ្រង់ នោះព្រះយេស៊ូបានបង្គាប់ពួកសិស្សរបស់ទ្រង់ឲ្យធ្វើបុណ្យជ្រមុជទឹក ដែលជាតំណាងអ្វីផ្សេងទៅវិញ។ ពិធីជ្រមុជទឹករបស់គ្រីស្ទាននៅសព្វថ្ងៃនេះ គឺជានិមិត្តរូបនៃការថ្វាយខ្លួនរបស់បុគ្គលម្នាក់ ដើម្បីបំរើព្រះយេហូវ៉ា។
ប៉ុន្តែ នៅដើមនៃកិច្ចបំរើរបស់ព្រះយេស៊ូ ទាំងយ៉ូហាននិងទ្រង់ គឺកំពុងតែបង្រៀននិងធ្វើបុណ្យជ្រមុជទឹកឲ្យមនុស្សដែលប្រែចិត្ត ទោះជាធ្វើការនេះបែកពីគ្នាក៏ដោយ។ ប៉ុន្តែ ពួកសិស្សរបស់យ៉ូហានចាប់ផ្ដើមមានចិត្តច្រណែន ហើយក៏ត្អូញដាក់យ៉ូហានស្តីអំពីព្រះយេស៊ូថា៖ «លោកគ្រូ លោកនោះដែលនៅជាមួយនឹងលោក ខាងនាយទន្លេយ័រដាន់ ដែលលោកបានធ្វើបន្ទាល់ឲ្យ មើល លោកក៏ធ្វើបុណ្យជ្រមុជដែរ ហើយបណ្ដាមនុស្សទាំងប៉ុន្មាន គេទៅឯលោកវិញ»។
ជាជាងមានចិត្តច្រណែន នោះយ៉ូហានមានចិត្តរីករាយនឹងជោគជ័យរបស់ព្រះយេស៊ូ ហើយក៏ចង់ឲ្យពួកសិស្សរបស់ខ្លួនសប្បាយចិត្តដែរ។ លោករំឭកពួកសិស្សថា៖ «ខ្លួនអ្នករាល់គ្នាជាទីបន្ទាល់ពីខ្ញុំ ដែលខ្ញុំថា ខ្ញុំមិនមែនជាព្រះគ្រីស្ទទេ គឺគ្រាន់តែទទួលបង្គាប់នឹងមកនាំមុខទ្រង់ប៉ុណ្ណោះ»។ បន្ទាប់មក លោកបានប្រើរឿងប្រៀបប្រដូចដ៏ល្អមួយថា៖ «អ្នកណាដែលយក ប្រពន្ធ នោះឈ្មោះថាជាប្ដីហើយ ឯពួកមិត្រសំឡាញ់ ដែលឈរស្ដាប់គាត់ កំពុងដែលរៀបការ នោះក៏មានសេចក្ដីអំណរអរឡើង ដោយសារសំឡេងប្ដី គឺយ៉ាងនោះឯង ដែលសេចក្ដីអំណររបស់ខ្ញុំបានពោរពេញហើយ»។
យ៉ូហានជាមិត្តសំឡាញ់របស់កូនកំលោះនេះ ប្រមាណប្រាំមួយខែមុន លោកមានចិត្តរីករាយណាស់ ពេលដែលលោកនាំពួកសិស្សរបស់លោកឲ្យស្គាល់ព្រះយេស៊ូ។ ពួកសិស្សខ្លះបានក្លាយទៅជាសមាជិកនៃក្រុមកូនក្រមុំរបស់ព្រះយេស៊ូនៅស្ថានសួគ៌ ដែលរួមជាពួកគ្រីស្ទានចាក់ប្រេងតាំងដោយវិញ្ញាណ។ យ៉ូហានក៏ចង់ឲ្យពួកសិស្សរបស់លោក ដើរតាមព្រះយេស៊ូដែរ ពីព្រោះគោលបំណងរបស់លោក គឺដើម្បីរៀបចំផ្លូវសំរាប់កិច្ចបំរើដ៏ជោគជ័យរបស់ព្រះយេស៊ូ។ ដូច្នេះ យ៉ូហានដែលជាអ្នកធ្វើបុណ្យជ្រមុជទឹកឲ្យគេ ពន្យល់ថា៖ «ត្រូវឲ្យព្រះអង្គនោះបានចំរើនឡើង ហើយខ្ញុំត្រូវថយវិញចុះ!»។
សិស្សថ្មីរបស់ព្រះយេស៊ូឈ្មោះយ៉ូហាន ដែលពីមុនជាសិស្សរបស់យ៉ូហានដែលជាអ្នកធ្វើបុណ្យជ្រមុជទឹកឲ្យគេនោះ គាត់ក៏បានសរសេរស្តីអំពីដើមកំណើតរបស់ព្រះយេស៊ូ និងមុខនាទីដ៏សំខាន់របស់ទ្រង់ក្នុងការសង្គ្រោះមនុស្ស ដោយមានប្រសាសន៍ថា៖ «ព្រះអង្គដែលយាងមកពីស្ថានលើ នោះខ្ពស់លើសទាំងអស់ . . . ឯព្រះវរបិតា ទ្រង់ស្រឡាញ់ព្រះរាជបុត្រា ហើយបានប្រគល់គ្រប់ទាំងអស់ មកក្នុងព្រះហស្តទ្រង់ ឯអ្នកណាដែលជឿដល់ព្រះរាជបុត្រា នោះមានជីវិតដ៏នៅអស់កល្បជានិច្ចហើយ តែអ្នកណាដែលមិនព្រមជឿដល់ព្រះរាជបុត្រាវិញ នោះនឹងមិនឃើញជីវិតសោះឡើយ គឺសេចក្ដីក្រោធរបស់ព្រះ តែងនៅជាប់លើអ្នកនោះឯង»។
មិនយូរប៉ុន្មានក្រោយពីយ៉ូហានដែលជាអ្នកធ្វើបុណ្យជ្រមុជទឹកឲ្យគេ បានពិគ្រោះនូវការអន់ថយនៃសកម្មភាពរបស់លោក នោះលោកបានត្រូវស្តេចហេរ៉ូឌចាប់ដាក់គុក។ ស្តេចហេរ៉ូឌបានយកហេរ៉ូឌាសដែលជាភរិយារបស់ភីលីពអនុជទ្រង់ មកធ្វើជាភរិយាខ្លួន ហើយនៅពេលដែលយ៉ូហានបានលាតត្រដាងនូវការប្រព្រឹត្តនេះថាមិនសមត្រឹមត្រូវ នោះស្តេចហេរ៉ូឌក៏ឲ្យគេចាប់គាត់ដាក់គុក។ នៅពេលដែលព្រះយេស៊ូឮអំពីការចាប់យ៉ូហាន នោះទ្រង់ក៏យាងចេញពីស្រុកយូដាជាមួយពួកសិស្សទ្រង់ ដើម្បីធ្វើដំណើរទៅស្រុកកាលីឡេវិញ។ យ៉ូហាន ៣:២២–៤:៣; កិច្ចការ ១៩:៤; ម៉ាថាយ ២៨:១៩; កូរិនថូសទី២ ១១:២; ម៉ាកុស ១:១៤; ៦:១៧-២០
▪ តើពិធីជ្រមុជទឹកដែលបានធ្វើឡើងមុនដំណើររស់ឡើងវិញរបស់ព្រះយេស៊ូ ហើយក្រោមការបង្គាប់របស់ទ្រង់ នោះតំណាងអ្វី? ហើយក្រោយពីដំណើររស់ឡើងវិញរបស់ទ្រង់នោះ តំណាងអ្វីវិញ?
▪ តើតាមរបៀបណាដែលយ៉ូហានបង្ហាញថា ការត្អូញត្អែររបស់ពួកសិស្សលោក គឺឥតត្រឹមត្រូវនោះ?
▪ ហេតុអ្វីក៏គេចាប់យ៉ូហានដាក់គុក?